7.27.2006

一直等緊黃偉文用「削」來寫首詞,想知佢對「削」字的睇法,不過佢可能嫌太削,所以唔寫。細個聽得好多老人家用削形容人無福氣!例如有親戚英年早逝,「睇佢個樣都唔係好削丫,咁早就死!」又或者「睇佢樣咁削,都知佢唔方長命」,咁睇番走左親相個樣,通常都係個樣都生得好嶙峋,骨瘦如柴,果時我仲成日講「瘦削但唔削就得!」,有好多人你覺得佢「有台型」,多多小小同佢「夠噸位」有關,穩如泰山的人總給人較有安全感,你見到個瘦骨仙做警衛,總會對佢有所質疑「嘩!佢咁削,得唔得架?!」總覺得大隻佬可以擋到子彈咁!奇洛李維斯如果再大隻,就唔駛彎身避子彈,直情用個身檔啦!「真削!」「削」我解為夠秤,未夠班,未成氣侯,呢個睇法我係君如領會番黎!佢形容得最多係阿澤以前,初做「嘩嘩嘩」時個樣仲係好削,過左無間道之後就唔同晒,當然最主要係肥左好多,但係肥膏裡面多左份自信,個人有左「份量」就有台型,就黎可以擋子彈架喇!

以前聽軟硬,真係覺得佢地係「神」,有創意,有急材,從不欺場,技巧千變萬化!我記得我百份百感覺做編劇,我第一次同阿葛講戲,我企埋一邊準備左十分鐘,然後深呼吸衝埋去諗住一輪嘴講完就算,跟住就成機問係電台野!點知我用左十分鐘都未講到第一句「呢場戲係sammi生日...」「咪住!sammi係幾時生日?唔同星座我個演法唔同」跟住你再講,佢就問你係咩生肖,然後再問自己,玩到無得玩就一邊聽一邊meet你乳頭,咁都未算變態,佢好鐘臨開機拍,全場要靜晒時大力彈你耳仔,然後掩住你個嘴唔俾嗌!「電話整古」好濕碎架喇!
講個秘密俾大家知,「茉麗葉與梁山伯」最初係搵過林海峰做,我仲記得上到去佢好office講故仔,我個樣串到爆,因為我唔係咁會好易穿崩,我驚講講下故仔,突然問佢羅簽名!到舊年做晴朗,我仲緊張過第一次開咪,同林海峰一齊做節目喎,神點會同人一齊做節目架!完左節目後我問佢做成點?佢諗左一陣「咁第一次夾梗係咁架!」我好想問佢「咁即係點?好定唔好?」不過佢已經走左!最近有晚係電台撞到佢,佢竟然笑面迎人「好耐無見喇!」真係有D受寵若驚!
因為Long time no see,睇翻好多軟硬舊節目,包括軟硬製造,同埋係佢地上EYT,耀保良演出!雖然當年佢地迷到萬千,但係而家睇番,覺得佢地當時仲好「削」,眼神完全空洞,唔敢面向鏡頭,兩個人無眼神交流,面上大大個字寫住「我死撐架咋!」我即刻記起睇城市獵人佢兩個客串,完全唔夠級數!直到「新同居時代」,阿葛開始成氣侯喇,跟住「三個相愛的少年」直情提名添啦,然後「百份百」,佢已經再唔削,而阿Jan轉戰到更適合佢發揮的音樂歌唱,加埋佢d封面創計,果幾張碟絕對係Collective Items啦!




















有邊個未「削」過,俾人話「削」其實未嘗唔係件好事,起碼唔會搵唔到個類形去形容你,即係個人無野啦!你肯不停增進自己,個人夠充實,一定可以成氣侯,一定可以擋到子彈!當然更加積極的方法是在未被人話「削」之前強大左自己先!坐以待斃,不如坐言起行啦 !

13 comments:

Supercalifragilisticexpialidocious said...

係人都有過去...

過去讓他過去~~~

sugar19sugar said...

我都要係"long time so see"之前狂煲......哈哈哈

細蚊 said...

原來軟硬以前係錦樣ga*
我真係5豬道牙''^0^
好開針海灘哥哥冇放棄到打 blog !!* xP

Tony said...

唔知係唔係後生唔夠件頭,睇番之前D相個樣實係削Do咼!

Christie said...

削﹐ 天師教英文有講過啦﹗SHOURK 削 ﹐ 比較差左少少咁解。 例句﹐ 豉油婆﹐ 妳D送好削wor。 Auntie soy sauce﹐ ur food very shourk wor。

睇番佢地咁多年身型都唔算大變。 係就係一個留左鬚﹐ 一個眼袋有笑紋﹐ 感覺成熟左。 阿葛既“買凶拍人”﹐ 我鍾意到不得了。 亦都since呢套戲開始留意詹sir。 好想買番佢隻DVD/VCD﹐ 但係見到多數都係老翻﹐ 我又唔想買。

Scared V said...

雖然聽軟硬大,但係去睇意慾不大,無特登撲飛,又無識人買。不了了之。但仍然支持阿葛。

姬子 said...

我有無睇錯, 你對眼係咪鬥雞

小琛 said...

灘兄,d片係我放上 youtube 的
你要 Cap 圖早響呃嘛~ XD

Sugar in the Creme Brulee said...

果日同同事講開就黎睇軟硬show..一講就講唔停..因為太多搞笑既回億..無論係d歌..電話整古 and 電視節目.都笑到我地兩個死死下去

qt芝士 said...

今日在商台網頁收聽前幾日的節目, 原來你又跌倒呀 ?

當阿田笑個合不攏嘴, 我腦裡有一個畫面, 就是一位老伯伯跌倒, 然後入院打石膏。

灘叔叔, 我有點擔心你頭髮花白的時候, 萬一摔一跤, 還能自己站起來嗎 ? 到時要入院嗎 ?

觀乎你告訴營養師的飲食習慣, 真令我們汗顏。
你還是趁現在多吃鈣質食物, 預防骨質疏鬆, 就算年紀老邁跌倒, 也不致骨折。

不想這麼削, 就要保重身子呀~

Anonymous said...

好彩灘叔永遠都唔係最削果個!!

Jer-先生 said...

祝賀 Unkle Beach's Blog reach over 100,000 vistors !!!

肥貓 said...

每個人總有成長期, 名人亦一樣!!