7.08.2006

悟入奇途

















閒時總有人問「其實你點入行?而家有咩方法入行?」唔講方法住,首先做電影要好捱得!捱得鬧,捱得夜,捱得窮,捱得每樣不平等的對待,只要做,不要問!你可以嗎?這個只是我當年的準則,現在仲要加埋「捱得等」,機會實在太小了,每個人都可以係編劇寫劇本,但可以拍成電影的又有幾多個?!如果你只是想參與,其實拿個電話自己鐘意拍什麼就什麼,然後放上Youtube,滿足感可能更大!
講完d掃興野,講番我點入行。我見過兩次工,第一次係唔記得八幾年,當時電影市道好到飛天,電影公司多過銀行!其中一間係潘迪生先生的德寶電影公司,http://www.geocities.com/hkmovies168/db.htm,拍過八十部電影,其中經典愛情電影「秋天的童話」,無德寶都唔會有!
電影公司請見習編劇,首先會登報紙,然後叫你寫個故事去,如果覺得呢條友寫d野都幾過癮,就會再約你見!果日下午,係三角公廁隔離間「品質其誠」大廈(唔知有冇記錯,係咁上下),大約十幾二十樓一個office,「閹」我果個係少林足球、功夫編劇曾謹昌,當是他坐在一張大班椅上,雙腳放在桌上,我一坐低就叫我介紹自己,然後他繼續睇報紙...當時我真係覺得他好無禮貌,但入左行我明白做編劇首要條件就係面對所有惡劣東西!我試同七個高層sell橋,三個睇住份馬經,兩個睇住d股市,又一個掛住趕專欄稿,淨番唯一一個肯用心聽,又飯氣攻心釣緊魚!越講越無癮,越無癮越無信心,為左挽回頹勢,我運用編劇毒門秘功!
『個故事好X勁,X老味!一X開場,有個X樣搞個好X性感的女仔,X老XXX,個男主角XXXx打到班PKXXXXxx....係咪好X好睇先,X你XX!』

條橋賣唔賣得出,有時關鍵係班老細肯唔肯聽,肯聽三言兩語就搞掂啦!

講番轉頭先,介紹完自己,未等我補充,已經有新挑戰「PETER,MARY,炸彈,麵包..」組織一個故事出黎!
下?!我度定左十五個精彩絕倫故事你唔俾我講,要我係度埋D咁幼稚故仔,做創作一有質疑,度出黎D野實衰!
『PETER約MARY去街,PETER係MARY同學,MARY屋企開麵包鋪,PETER係鋪頭買左個蛋糕送俾MARY,點知裡面原來係個炸彈....』
講到呢度我已經知道衰,亦都趕唔到落去,曾生說了聲「多謝....」連話有消息通知你都無講!離去時,我呆站在三角公廁外,欲哭無淚「我的編劇夢完了.....」

「完了.......還未開始!」
八九年我為左要入到娛樂圈,不惜出賣肉體,做一樣我而家都唔明點解會做的工作,係TVB做「燈光」,有日有個同事俾份報紙我睇,亞洲電視請見習編劇,當時麗新集團剛入股亞視,前途一片無好光明!於是我再寄故事去,再一次得到約見。
一入到房,見我條友咁熟面口!下?!又係曾謹昌(曾是當時ATV的助理創作主任),心裡面涼左一截(但之後問番曾生,跟本就對我一d印象都無,好多時憂慮都係自己羅黎!)我即刻再組織下已經度好的那個「peter,mary,炸彈、麵包的新版!」亦都提住自己要準備想另外四樣唔知乜春春的東西的故仔,點知我介紹完自己,曾生就說OK!我真係估唔到死得咁快!不過呢次曾生有講「有消息會通知你!」總算絕望中尚有一斯希望!(其實事後問番,曾生其實約左人食飯趕住走)
一個星期後,有電話了!second閹的人就是馬偉豪(Yup!我們就是這樣開始),這次是群閹,一班人坐係度,馬生講第一句,「我發現屋企隻狗多左隻腳....」我地跟住駁落去,係我上家果個我懷疑係雲海,不停用科學角度解釋左成分幾鐘狗有五隻腳的可能性,到我時我on居居答「果隻狗同我一樣變左ON狗狗!」,講完馬生微笑左一下,但呢個微笑對黎講係「絕望的笑容」,馬生繼續同我地玩多幾ROUND,真係好心機!(後來問番原來約左人食飯,俾人甩左底無野做)玩完一輪,馬生叫我地寫十個「公文袋」的用途,我記得最後果個用途係殺晒我D對手,然後入落公文袋寄走,咁我機會會大好多!我唔知係咪因為呢個原因最後請左我,我只知入到去第一個工作就是「香港奇案之雨夜層夫」

我舊屎就係咁,睇完仲有興趣想做編劇,就試下做個驗試,下面四幅圖,度個故仔出黎,唔駛即刻答,水準應該會好過我。又或者,你的「公文袋」十大用途!



6 comments:

Macau Lucia said...

你講到做編劇好陰公好坎坷咁wor...
我原本對呢行係冇乜特別感覺, 聽完你講之後, 開始變左驚同抗拒添~~~~

Billy said...

我淨係知道捉人黃腳雞,比人睇相果陣要用個公文袋泥載相0者= ="

percy said...

The use of 公文袋:
1. Recycled Album covers (for friend's wedding)
2. Cards (birthday, ANniversary, get well...etc)
3. Garbadge bag (especial when you get too drunk, it is tough enough hold it)
4. New style Cap of 2006
5. Head cover for Robbery
6. cut out the size to fit the "Bow tai" on the pants
7. New style Hotel slippers
8. Put some corn starch powder in it, and place it in MTR to make the fake Terrist attack.
9. New style VEST
10. New material for curtains

Sorry, some of them were too dry. I was thinking about your 4 pictures as well... don't laugh at me since I am not professional like you.=)

qt芝士 said...

你冷面起來, 像個屠夫, 好 Cool。

Sue said...

有天,灘叔的主人 - 7叔 ,雙眼發光﹑義正辭嚴地說︰「海灘,我養了你這麼久﹑把你養得肥肥白白的,為甚麼你一個子女也沒有?你生下一兒半女的話,我就可以和隔壁的泰國短毛貓耀武揚威一下,不讓他們的小如獨領風騷」灘叔為了不讓主人失望,唯有硬著頭皮,上街找對手。死窮鬼這天又忘了帶錢包,只有2元碎銀,唯有坐全香港最偉大的交通工具—電車。往找他的朋友 - 小強,雖然這朋友和他一樣「冇計」,但一人計短。兩人碰面後,喝著紅酒,商討大計,但一直苦無良策。突然,小強想起,傳說中,韓食「PIPINBA」中,有「PIPINBA」神,誰人在7小時內,吃完七七四十九碗「PIPINBA」,就有一仙女出現,屆時不就「哈哈哈」了嗎??灘叔幾經辛苦,吃完七七四十九碗「PIPINBA」。仙女也真的出現了..........可惜..........,如斯的仙女,人生也真是「有幸有不幸」。

Naonle said...

To Sue,

我而家至睇到你段野,希望你仲會知道有人睇到:
韓食「PIPINBA」中,有「PIPINBA」神,誰人在7小時內,吃完七七四十九碗「PIPINBA」,就有一仙女出現,屆時不就「哈哈哈」了嗎??

既收埸係笑到poor 街. 你好勁,難以想像海灘竟然無俾comment,可能有generation gap,所以佢吾識笑~~