3.31.2010

一切都在進行中



從前我有個病,叫做「寫稿病」,每次一要開筆寫劇本就會(覺得)病,現在感冒骨痛左成個月,但反而一寫野就精神,很享受這種橋如泉湧的狀態,「別煩我!等睇好野吧!」,今年見到我任何新搞作,希望大家會訓身支持,些些!



UB.com 一直進行中,但不停收到其他天使要加入幫手,有一些怎至以行動表示要參與,以上的logo是朋友Pal所畫的,好PUNK,好另一個我,另一種感覺,大家有興趣,可以繼續自動參與,就算幫唔到手,你們的作品,都會放到未來UB.com內「騷ROOM」內,有好野就send去〈er.beach@hotmail.com〉啦~
等你呀!

3.27.2010

418



各位準備好未,請細心留意以下詳情

日期:四月十八日
地點:大埔大美篤
時間:早上十一時至傍晚六時
費用:全免
活動:bbq、踏車、行山、拍照、傾偈、唱歌、享受大自然....(以上可以任選其一,當然亦歡迎玩晒)
聚集方法:A:自到大美篤,點相認?沿停車場車入第一個「燒烤場」等,最大班最嘈,最多笑容,著得最靚果 班就係我地,其他時間到,見到最嘈最大班最多笑容,著得最靚果班就係我地
B:十點係九龍塘跟我坐旅遊巴入去,報名方法睇落去就知
準備:現場將會有專人為想bbq者霸定爐,起定火,但大家要自備食物,自家醃製定街上購買,適隨尊便,唔燒烤可以自備其他食物、水果、齋菜...自用及分享皆宜,飲料可現場購買,但美酒就要大家帶來。各類型遊戲請自備
參加者:由手抱嬰兒至百歲長者,男女直攣,貓狗龜雀,無任歡迎
報名方法:A:自到者請在這裡留言,及初步講低會帶幾多人及什麼食物、飲料到現場,方便其他人準備食物數量,畫量減少浪費食物的可能性
B:在九龍塘跟我撘旅遊巴入去者,請EMAIL 《去beach418@gmail.com》,然後會有專人回覆你一個獨立「暗號」,到現場講得出暗號,就可以上車,但記住一人只可以有一個名額,唔可以「我叫mary十位」,同埋名額只得六十名,除左先到先得,亦請大家諗清楚係咪一定會出現,唔好報左名唔到,浪費其他人機會,但如果你報左名,收到暗號,突然發現有事或決定自己去,請以email回覆交還暗號,讓出位置給其他人,呢架旅遊巴係包來回的

大家清楚未?未清楚再問,清楚就唔駛多講,高高高!〈418,快d來註冊〉

3.25.2010

成功



收到麵包天使的新消息,相片連口訊 「我不停祈禱,終於收到電話,說骨髓不吻合......有點失望!」,我叫麵包天使影一幅相表達對整件行動的心情,她影了以下的那一幅相,說可能相不達意,但她其實是想「麵包天使識得望遠D,或者係搵下其他需要有幫忙的人!」最後麵包天使跟我說「對不起!我失敗了!」


妳並沒有失敗,妳已經好成功把做天使的訊息傳開去,望得遠一點,幫得多一點,放心吧!其他天使已收到訊號,好快會出手相助,妳安心去幫助其他人吧!不要給一次挫敗而影響妳!

3.23.2010

學習~`



遠看你會以為這位伯伯正在填票買馬或者六合彩




走近你才發現他原來在抄報紙,還以最古典的PARKER 墨水筆抄寫,一黑一紅,黑色記載大綱,紅色標記重點,他說每天都會把重要資料抄下,已經抄了二十多年,抄滿了近百本記事簿,問他這些資料要來做什麼,他輕輕一笑後回答「有用時你就知道它要來做什麼!」



所學能否致用天知曉,都好過書到用時方恨少~`

3.22.2010

誰拍



俾人問了好多次,我的相是誰影?其實九成以上,都是自己無聊搵位自拍,其他一成,就看那一天跟誰見面,而對方又肯幫我影,而通常肯影的機會都不大,所以如果你見到我鬼鬼崇祟,係街望來望去,其實我搵緊放機位,然後無耐見我企定定,通常背鏡,那我就是在自拍,有冇危險?當然有啦,就好似呢一幅咁,我把相機放在地上,影完轉身聽到菲藉家傭鬼殺咁嘈,原來佢地踢中我部機!所以唔駛再問我請到邊個幫我拍照,答案就是我,至於個攝影師係咪好貴,答案都是「yes!」,因為經常要冒爛相機及被偷相機的險,好似呢次咁,又要換相機,btw,有咩好介紹!

3.21.2010

會會會會會會會會會會會....



我的工作就是「會」,一日到黑都係開會,一個會之後又有另一個會,既然咁多會,開會的地方是好重要!




呢度係我尖東office,有人流但不算嘈吵,有露天但不算大塵,呢度係可以會好耐的地方!





你睇下幾多人陪我會,仲全部都係女仔,真係會好幫到個會,腦分秘都唔同晒!






旁邊個日本妹陪足我全程,我唔走佢都唔走,我舉咖啡杯,佢就舉相機,態度幾一致!走果時差d想相約佢,不會可惜我跟住仲有會!



係「演唱會」




個個去睇EASON,我睇薩頂頂




我就係鍾意唔知佢唱乜!如果心靈可以溝通,是什麼語言已經不重要,喜歡這個「心靈相會」,更欣賞妳遷就港人,把這一會變得簡單易明兼高潮起!



星期六晚睇完演唱會,好應該去同其他人相會,但我繼續要去開會,本來真係想扮唔舒服取消,不過對方一句,有個地方你一定鍾意!咁又去睇睇羅!




呢度我黎過幾次,但周末就第一次,不錯!人不算太多,但又有D野睇下咁!





想不到現在,周末夜出的,大部份都是全女班,係一班又一班,其他就係全班都係仔,個個好乖咁坐係度飲野,傾偈,玩下啤牌!我睇見佢地都悶!我終於明點解女仔一有人媾就會發左癲!因為家下最多係「死悶仔」,最少係「DUM女仔」,有人肯媾真係會好似見到「北極光」咁 癲左!

各位悶男,唔好再對部電腦,遊戲機同睇波啦!出黎睇下個世界,好多好野等緊你地架!個會變成談論新一代的感情世界,開會講約會,呢個都算係誤會!

終於咪要第二日再開過會羅!



呢個開會地方仲勁,要撘船去!逢星期日就會人同狗一樣咁多,其實住到咁遠,都係想寧靜一下,星期日可能係唯一假期,但係成個島嘈過返office!香港究竟仲有冇寧靜地方?!

呢個會得到的結論係 「或者係我地太唔香港人,所以才要靜!正常香港人,根本個個鍾意熱鬧嘈吵,每一分每一秒都不要靜下來,否則會感到好不安!」




同檯食飯,各自修行。我雖然一日到黑都會會會,但我點都要有靜下來的時侯,越多會就要有越多靜下來的時侯!所以詐肚痛,我都要蛇過來靜一靜,看海是一種廉價的高級享受!



「離開工作檯,快去望望海~`」

給忙得不可開交的各位,包括我,又繼續會會會會會會會會會......

3.18.2010

關心過客



很喜歡到這裡去,尤其是寒冬,瑟縮地看海,喜不快哉!在這裡會看到很多不同的人,「跑步人」、「釣魚人」、「Cable TV人」、「情人」,而自到最多的是「老人」,看著他們看著大海,有時都想知他們正在想什麼,懷緬自己的一生?定還是想念很久不見的家人?定其實他們什麼都沒有想,就只是靜靜地讓大海與腦海溶為一體,這是我最趨之若騖的境界!但願有天亦能達到這境界,但現在我依然很享受與人生過客們的一面之緣,有些更不止見過一面,而見得最多就是這一對母子!


兒子每次推著母親來,都會停泊在這個位置,大慨一起看海十至十五分鐘,就會推母親回去。每次他經過我面前,都會木無表情的打量我一眼,而他的母親是什麼模樣,其實我是從未看過,直至有一次,他又推母親回去,經過我面前之際,兒子因為要接聽電話,而停留了在我面前幾秒,那幾秒就是我與他母親的一面之緣

我看到他的母親,垂垂老矣,病痛把她折磨得連微笑的能力也消失,但我相信她的快樂是在心裡,因為至少還有兒子肯用心的照顧,所以每次看著他們遠去,背影依然是幸福的!


但自上次之後,我已經有個多月沒有見過他們,心裡驀然有種不祥之感,希望一切都只是我多疑,希望妳安好無恙!希望好快再見到妳!



我們每日都會遇到很多過客,但其實我們都是人生的過客,既然大家都是同類,過客關心過客,絕對唔須驚嚇~`

3.14.2010

下一次跳起




你上次好玩到跳起係幾時?



係咪呢一次?定你miss左呢一次?或者我唔知你上次跳起係幾時,但我可以話你知,你下一次跳起,會係四月,地點係大美篤,點解會跳起,因為好玩,點解好玩?因為「有我有你」「有大家」「有bbq」「有踩單車」「有行山」「有傾偈」的聚會,你玩邊part都得,玩晒咁多part又得,係咪聽見都想跳起呢?!確實日子要大家來投投票,睇睇邊個星期日會最好,我就大圍!但你早d「留言」報名,我會有特別安排俾你!來吧!

JUMP FOR YOUR HAPPINESS!

3.13.2010

艋舺



〈once upon a time in America〉
〈Good Fellas〉
〈Reservoir Dogs〉
〈Kids return〉
〈古惑仔1234567〉
〈英雄本色〉(電影與漫畫)
〈Trainspoting〉
〈奏鳴曲〉
〈旺角卡門〉
〈夜叉〉
〈Mean street〉
〈黑道風雲20年〉
〈童黨〉
〈無主之城〉

「艋舺」內都可以找到以上電影的影子,但從來「江湖」,「古惑仔」片,都是離不開這些影子,「成長」、「情義」、「出賣」、「激情」、「浪漫」、「黑街」、「色情」、「暴力」、「毒品」、「煙酒」、「紋身」、「肌肉」、「血汗」、「飛車」、「仇殺」,而這些影子,都是觀眾喜歡看的,因為他們都好恨有這些影子隨身,試問有邊位唔想鬧市放縱狂吻,對不滿的人就爆佢樽,得到肌肉紋身人庇護,冶艷性感歡場女子瘋愛,為好兄弟兩脇插刀,醉生夢死,生光榮,死痛快,這樣才算活過!

對我來說,千篇一律的「江湖事」,都是絕佳笑料,由打扮到談吐到角色到劇情,真係由頭到尾都咁好笑!隨口講是旦一單都會笑到碌地,你唔信我就是旦講一單你聽;話說從前某次在尖東街頭取景拍攝,途中殺出七八個「古惑仔」,出現目的當然是為了收陀地費,這是在街上拍攝司空見慣的事情,而工作人員都總不會第一時間報警求助,因為他們都認為「響朵」解決,一定會快過警察到場,無謂阻延拍攝進度,於是當時的工作人員就說 「X哥公司黎拍戲喎!」,這位「X哥」是電影公司的成員,經常出鏡,給人戲裡戲外,都是「香港一帶我惡晒,我玩晒!」的感覺,有事當然是響他的朵,「古惑仔」們聽見「X哥」的名字,即後退兩步,然後發力衝前向工作人員拳打腳踢,打鬥間不時聽到「X哥!?X你老X!」,通常「古惑仔」打完人,留低一句就會走,例如「今日打住咁多先,聽日再黎唔俾錢就繼續打」,但呢班「古惑仔」竟然個個企定定,要拍攝組一係走人,一係俾錢!其他工作人員見情勢嚴峻,立刻致電給「X哥」,以下是工作人員跟「X哥」的對話

「X哥!我地係尖東拍野俾人搞,有手足俾打到爆晒缸,D器材又爛晒!」
電話另一邊傳來X哥拍檯氣憤的聲音,X哥憤怒地開聜
「點解你地去果度拍戲唔早D同我講!!!」
工作人員啞口無言,X哥就繼續說
「果度唔去得拍戲架!你而家打俾我都無用,快D走啦!」

工作人員只好笑住回去叫大家收工,仲要同果班「古惑仔」SAY SORRY,點知事情未完結,翌日X哥所屬的電影公司遭人上門破壞,未知是否與尖東事件有關,但卻令回來看到成間公司被反轉的X哥勃然大怒,大聲呼喝他的「O靚」,「即刻同我打兩個電話搵人做野!」 「X哥!要搵邊個?」 「同我搵老廟飛龍,叫佢帶最好架生過黎,幫我換把電鑽都鑽唔開O既鎖....仲有搵阿子飛上黎,做裝修果個呀!睇睇執番呢個場要幾錢,叫佢地半價,唔係搵人搞佢架!」

你知道點解狗要吠,其實係因為佢地驚,有些人裝凶作惡,其實都係因為驚,我扮驚左你,而可以令你無咁驚,咁我驚下又有咩所謂,橫豎你為我帶來咁多笑料!

「艋舺」前半部是很出色的,但後半部就相比下失色,當愛看「江湖片」的朋友,會相當滿足,因為很久沒有這種戲!順帶一提,遲些有部名為「飛沙風中轉」的電影,是莊文強新作,也是以新角度描寫「古惑仔」的,「古惑仔」迷,敬請留意!

3.09.2010

TesTing



這是一個Sample,並不會是最後出街的版本,我只想話俾各位知,一切在進行中,但記住唔駛等我,天使是無時無刻,任何地方都可以行動的,你呢一秒做左未?未就下一秒開始,永遠唔會遲!

btw:其實我覺得呢個版都幾靚丫

3.06.2010

最緊要信



我愛電影,是因為每次入到戲院,當所有大燈關掉,我就可以進入另一個忘我的國度,在那裡沒有人騷擾,你可以盡情狂歡大笑,也可以哭得死去活來...
我不愛現在的電影,是因為每次入到戲院,當所有大燈關掉,在這個國度裡,聽到的只有「高科技」的效果聲,手機各式新穎鈴聲,各人暢懷傾談的嬉笑聲....我欲哭無淚,誰偷了我看電影的真正感覺?

作為八九十年代靠香港電影養大的我,看過無數好電影,見過無數真正愛電影的電影人,如果沒有看過羅啟銳先生的「秋天的童話」,我不會想入行做電影,沒有看過「我愛扭紋柴」,我不會揀選「編劇」這個崗位..這些電影高手曾經棄我們而去,使我們認為香港再沒有好電影,但只要你肯信,他們是總有一日回來的!
多謝你們回來,多謝你令我再一次重拾看好電影的感覺,真是很久很久沒有看過這樣出色的電影,很久很久沒有在漆黑中哭得死去活來,那種快慰是睇阿凡達得不到的!真心感謝你們!

完場我第一時間發了個sms給君如,內容是「如果要捱十部〈花田喜事〉,先得到一部〈歲月神偷〉,我願意!」,未幾她回覆我「妳覺得呢部戲香港會收得嗎?」 「會!一定會!因為香港已經好耐無呢d好戲!」
我不是吹水,像戲中所言,「最緊要信!」,你是香港人,都應該去支持這部電影!

3.02.2010

明報Subaru Outback 2.5i × 鄒凱光



多謝幫我搵到呢篇訪問o既ANGELS(fibiyo so,Wing Chow,Fion Mui,Carol Chan,Rubisa...)咁恨睇係因為前幾日係茶餐廳「卡位」,竟然聽到凳後面有正在睇報紙的茶客這樣說 「呢個鄒凱光都幾高大,成架車都俾佢遮左大半......」
嘩!人家的高大,等如我心裡的肥屍大隻,遮得住大半架車,其實是一件好可佈的事!終於睇完後,腦海飛出四個大字「人言可畏」,那位茶客應該係漏左個「牌」字

「呢個鄒凱光都幾高大,成架車 牌 都俾佢遮左大半......」

3.01.2010

UP in the air ~`



就算你今日睇完無感覺,記住十年後,二十年後再睇!你會被這部好電影感動!我認為好電影應該就是這樣!電腦特技只是我們暫時的避難所,real life才是真實要面對!我們可以高飛遠離真實,但最終還是要腳踏實地,如果你覺得SAD,你應該還未參透人生!

btw:〈UP in the AIR〉可以是一個電台節目名,其實我(地)每日每晚都已經做緊!哈!咪同人生一樣,好多野我地其實係做左都唔知,所以越早知道,你越早快樂 !