7.07.2006

有誰共嗚十五



約定 - 王菲

詞︰林夕


還記得當天旅館的門牌
還留住笑著離開的神態
當天整個城市 那樣輕快
沿路一起走半里長街

還記得街燈照出一臉黃
還燃亮那份微暖的便當
剪影的你輪廓太好看
凝住眼淚才敢細看

*忘掉天地 彷彿也想不起自己
仍未忘想約看漫天黃葉遠飛
就算會與你分離 凄絕的戲
要決心忘記我便記不起

#明日天地 只恐怕認不出自己
仍未忘跟你約定假如沒有死
就算你壯闊胸膛 不敵天氣
兩鬢班白都可認得你

還記得當天結他的和弦
還明白每段旋律的伏線
當天街角流過你聲音
沿路旅程如歌褪變

重唱 *,#

就算你壯闊胸膛 不敵天氣
兩鬢班白都可認得你


做創作好處是無固定上班時間,但缺點是下班時間何止無固定,直頭要靠估,靠運氣!今日度得好順,所以唔肯收工繼續度;今日度唔到,所以唔肯收工繼續度;但有時又會「無mood度!今日早d收!」「下?!開左工半個鐘左喎,同埋家下下午三點幾,你叫我去邊好?!」
初入行,我試過由食lunch開始叫女友等我!「就收得~~~」終於女友等到食埋下午茶,再去睇場戲,然後食埋晚飯,最後食緊宵夜時打俾我,「唔駛講喇... 就收得丫麻~~~」 「真係就收得~~~好快....」終於我約了她食早餐亦險些兒趕唔切!從此,我都唔敢再與人約定!「定時再算啦~~~」
但如果突然早收,我一定係走最遲果個,因為要不停打電話,希望仲有人未被約,可以執死雞,果時細,仲有energy!所以會好似cold call咁,最終都俾我撞到一個肯就範!
家下一把年紀,要我覆轉phone book「喂~~~食飯有冇性趣?.....約左人...下次啦...下?!我五分鐘前打過俾你....咁呢次咪下次羅...哦...都係唔得!咁下次啦!」 係咪睇都疲,何況仲要不停重覆講!
有時d人無時間應約,但可以有時間教誨你!「你尊重下人得唔得?星期五八點先打黎問我食唔食飯,我就算無約都唔會肯同你出去啦!明唔明呀?即係....」「知喇!知喇!sorry!sorry!」有時以聲蓋聲未必可行,因為對方會繼續講!咁只好扮有電話入收線,你話幾無謂,我寧願自己食,你覺得我孤清,我覺得我瀟洒!直至上個世紀末,有人同我咁講「你咁大個人,連遵守一個約定都做唔到?其實係咪你跟本無誠意?!」
當時係我會過加拿大多倫多電影節,有個美國朋友過來join埋一齊玩,我一直無法confirm過去的日子!最後就換來呢句令我反思的問題。有誠意係大晒,因為有誠意我地願意不顧一切,勇往直前;終於我趕到上機,好有誠意係約定日期內出現,我仲好記得果年鄭秀雯找了馬偉豪為演唱會拍d短片,我地拍到上機前兩個鐘,我衫都無換就去機場!真係算好有誠意!
去多倫多影展是因為「爆裂刑警」,是上世紀跟多倫多的約定,唔係因為去影展,我一定唔會去加拿大呢個又無性格,又悶,又多唐人的鬼地方,所以我覺得係唔知幾時約定,都世紀末,唔去好無誠意!
最尾果日,我同朋友係一條長街上走著,九月的多倫多忽爾仍有一點寒意,我們把臂向前,行了兩個多小時,我們都疲倦,停下來之前,大家不經意唱著「約定」,唱罷相視而笑,我相信笑的原因應該不是看見有的士,似是大家而約定了!咁約定左咩呢?!後來我發現朋友的腳底arch有問題,其實不能步行太久,咁應該係約定一齊去睇醫生!不過到家下呢個約定都未兌現!
『仍未忘想約看漫天黃葉遠飛!』
你有咩約定?我九月約定睇MADONNA,十一月約定同阿媽過星加玻,同埋唔知幾時約定請一個好朋友去阿姆斯特丹玩.....我估頭兩個一定會好有誠意做到!其他果d「到時再算啦~~`」

11 comments:

Macau Lucia said...

呢篇文章好有意思....曾經同d唔多見0既朋友0係街上碰面, 最尾0個句通常都係"再約啦!", 又或者係"搵日得閒出0黎飲野"....講就講到好誠懇, 但好似一次又一次都冇下文.....再下次0係街上再見番佢, 仍然係冇遵守過約定....但有時我都會諗, 呢個問題唔係我自己一個0既問題, 雙方都有責任, 大家約好搵日出0黎飲野, 大家都有責任做主動0個個.....所以最後都冇出過0黎, 確實大家亦有責任。
灘叔, 其實你而家都算忙啦, 都唔洗開phone book搵人食飯啦, 有時做野做到咁上下, 見到身邊有邊個咪就叫0個個一齊食飯囉, 咁幾好丫, 方便丫嘛.....唔洗臨時特登搵人~~~
而家都好夜喇, 早d休息啦~~ ^^

kaka said...

約人係要有誠意架...揾人攝時間都係..一年之中我D朋友同我有勁多個約定...但到最後米又係做唔到...都唔知約黎為乜...當然係果一刻係好感動...個腦會諗嘩原來朋友係口甘重要...但係到最後我連佢地個影都揾唔到...我咪為有當佢地醉左亂講24

Sa said...

你講到咁我好想喊, 最近好似發生好多事......好無奈.......

serina said...

呢篇文章真係幾有意思
由其講到誠意﹐我相信有誠意一定會做到。
就好似我同爹地媽咪講唔使擔心供樓﹐我出年grad有份工我會養他們。。。他們可能一笑置之﹐但我是很認真的。這可能是我自己和自己的約定吧。“只要有夢想﹐凡事可成真。”

菜肉包 said...

為咗人哋同自己, 我所有嘢都唔會講到實牙實齒~~費時累到人哋...

P.tea said...

聽親約定個腦都有97回歸畫面.

Anonymous said...

灘叔:
9 月你會睇娜姐?!
咁咪分分鐘係東京巨蛋撞到你?!
KAWIS...

percy said...

Promising is easy, but keeping the promises is hard. People always "blow" water about when to meet, and have dinner... but never come true. I do not mad at those people bcoz I believe they must have their reasons not to say "yes" or "fly the plane" at that moment. About calling people, I have been thru the same things too. My friends always think I am too "jick hing" and educate me, but I just have too flexible hours on my schedule (or can't match with theirs). However, from then... whoever call me for dinner or drink, I will try my best to go bcoz so hard to have a friend call me up for activity and life is short on earth. I treasure my friends, should spend a bit more time with them, don't you think so?

PS: Toronto is not as bad as what you experienced, but you need to find your way in there. If you ever go there, let me know. I will be your guide. =)

泰美 said...

有時怕同人約定, 約定了, 做不到, 換來的卻是責怪自己, 早知唔好make promise好過, 所以我更重視約定, 不要給人失望感, 我寧可別人爽我約, 我會諒解對方的原因, 由於不是人人都跟自己一樣可諒解對方的, 人生有多少個約定呢??你做得到多少..??
約定了,便去做...不做..後悔的可是自己..

qt芝士 said...

最近約一位仁兄聚餐, 約了兩個星期, 答應不下十次會出現, 結果每次都放鴿子。

最後, 我決定放棄他。
勉強冇幸福。

Sue said...

今日買唔到 Madonna o既飛。好失望。唯有寄望下星期可以買到加場的飛。