什麼是快樂

這個景永遠令我快樂
聽到朋友的好消息令我好快樂
不停工作令我更快樂





又回到ATV，財神到，當然快樂




她很快樂，因為她好清楚自己要什麼



當你去一個地好多次，而有半數都是免費，你點會唔快樂，嘻嘻~`



有工開，仲係電影，仲係港產片，無可能唔快樂




可以同佢地同台，咁榮幸點會唔快樂~`

如果你對呢個人有點印象，你見到佢呢個死樣，你點會唔快樂



呢個組合，呢d顏色，呢次合作，你睇到一定好快樂，因為我快樂，所以你都快樂





後記：令到其他人都快樂，自己就會快樂，若然辦不到，至少亦不要令到其他人不快樂！記者朋友把我「frozen」的blog放了上報紙，當中我為求效果，寫大左Janice Man有個鏡頭 NG左十幾次，令文小姐形像受損，我一萬個不該，希望文小姐無因此而不快樂，影響演出，否則我要同導演郭子健及黎生再要講聲「唔好意思！」，不過最緊要都係搵人睇完同佢地講番，因為我知道呢篇記者朋友一定唔會登，就算登都只會登相片，無文字~

是堅 茄牙

我認識唔係「基佬」，但又好注重皮膚護理的男人，就只有吳鎮宇一人，其他有經常護膚的男人，通常都係女友幫佢護，女友越多，皮膚越靚，大家見到我皮膚狀況，就知我有幾多計仔啦！關於是堅茄牙，我只是認識皮毛，不過咁就夠啦，咪就係要認皮毛之麻~`

買本DEC 3出版果期MILK睇，就唔止睇到皮毛咁簡單~`

Frozen

這部電影還未有中文名，但英文名「Frozen」，我就覺得改得好貼題，「冰封了愛情，才可歷久常新~」，正！






















我一個星期五晚都係對住一班仔，難得有機會一晚見到咁多「女」，話無野唔高興，你都話我「虛偽」啦！所以我怕咩話你知「我真係好興奮！！」亦都唔怕再坦白話埋你知，「最令我興奮都唔係班女，而係一個男人！」






星期六咁岩睇到有線電台二台翻做「情迷大話王」，我先發現上次同佢合作，已經係八年前，上次是演佢的朋友，今次亦不例外，正！

同黎生開工人是一種高級享受，佢係「精神領袖」，不但有自己態度及精神，仲不停會令身邊的人好精神！「想提神，去幫其他人提神！」

Janice Man有一個鏡頭，拍了十幾個Take仍未演得到導演要求，JM問黎生「有咩方法可以演到導演的要求？」黎生微笑答她「只有一個方法，就係唔好去諗有咩方法，繼續做，妳做到之後，就會知道係用左咩方法！」

「要convince到觀眾，一定要令觀眾唔覺得你係度convince緊佢！」

嘩~嘩~嘩~

我點會唔為你而興奮丫！

不知不覺，郭子健已經拍到第四部作品，時間過得真快，就像黎生所言「同時間競賽，會輸雙倍時間，同時間拍拖，會無輸無贏，真正的贏，是我們都忘記了時間！」同黎生「金句」一樣，有些東西，還是諗少d為妙！

我愛校園生活

如果晚晚是這樣，我會好有興趣重返校園~` hee~`

先學會尊重自己

在一間茶餐廳看見有位清潔婆婆，因拖地不慎影響到一位年青茶客， 被恨罵「睇住拖啦！死老野！」，婆婆不慌不忙，不卑不亢，帶笑跟青年人說 「係人都會老，你無老就即係少年亡！」我聽罷刻意放聲大笑，其他茶客亦跟住大笑，青年無地自容！
懂得尊重自己，懂得尊重別人，「敬老」由尊重自己開始...


給 υψ ŁīęĤ

做Matt好？

據聞是個集幾十人作獨立表演的騷，我有幸被邀請作其中一位演出者，至於我做什麼，玩什麼，還有什麼其他人演出，暫時我無可奉告，其實我都想問問大家，我可以做什麼？

幫幫手，因為我半年前應承之後，到現在得番個幾月時間，仍然一片空白，老友！提供些想法來！些些~`



門票即日起至11月30日加推優先九折限量訂購。 $230 X 90% =$207 (限定300張)現加推多100張, $200 X 90% = $180 (限定200張)現加推多100張!!! 訂購及查詢:90131417(王小姐) 訂購電郵sixoneproduction@gmail.com 想知道每個單位之表演內容？密切留意Facebook群組更新！！

御寒

叫人著多件衫，不如叫人搵個人攬~`

Amor ~

我唔識做生意，但每次見到其他人搞自己生意，都會好羨慕，最主要羨慕是可以有自己的OFFICE

















簡簡單單，做的東西也不求花巧，只求要有好質素~




E小姐從前是電台同事，責任心極重，愛心直頭爆棚，做事一絲不苟，所以要離開電台，否則會命喪於電台，死因係「做到死！」

「我真係頂唔順出面d粗製濫造，結婚咁大件事，做好d得唔得！」

E小姐呢種「樣樣做好D」精神，與佢一日病到黑，食藥食到腫晒個死樣，真係相映成趣！




另一位老闆娘J小姐，真人靚過影相好多好多，好COOL，但原來是《遊花園》擁躉~ YEAH~`再覺得妳靚D！

坦白講，我有問過E小姐係咪俾有錢佬包起，開間鋪頭仔佢消磨時間，但聽佢用左半個鐘介紹間公司，我肯定佢地唔係鬧著玩！所以我都希望幫下手推介一下，有時間上去睇睇丫~`

http://www.amorworkshop.com/

追憶`~

還記得我從來沒有見過你真人一面；還記得我第一次被你迷住，是看到你說「做人不像做電視台，無須時時刻刻都要有節目！」，還記得當時我第一次知道什麼是「幽默」，而更加幽默的是，我當時正在撘小巴去亞視見工，見的是「節目製作助理」；還記得讀中學時，我曾經問過老師，點解有「甲骨文」，而無「乙骨文」、「丙骨文」同「丁骨文」...還記得老師不但沒有回答我，還以我在「上堂時搞亂」為罪名，記了我一個〈缺點〉，我還記得很多年之後，看到你說「穿山甲的朋友是穿山乙與穿山丙....」我笑著默認，把這些當是「爛gag」的人，一定比欣賞這種幽默的人多，還多好多倍，所以識笑的人，証明他們有幽默感；我還記得曾經因為林憶蓮的「哭」、「依然」、「野花」、劉美君的「事後」，蔡齡齡的「細水長流」，懷疑過你是Gay的，但我還記得，每次聽到夏詔聲的「空凳」、「結他低泣時」，林子祥的「追憶」，郭富城的「強」，張學友的「藍雨」、「每天愛你多一些」、「再度重遇你」、「花花公子」，太極的「頂天立地」，周潤發的「飛沙風中轉」...我肯定你就算係同性戀者，也都是女同性戀，仲係TB，因為你係一個好MAN的女人！還記得因為你「追憶」內一段「從前在那炎夏裡的暑假　跟我爸爸笑著行 沿途談談來日我的打算　首次跟他喝啖酒...」，便我在十八歲那年，買了第一枝酒，首次跟父親飲酒交心，但原來父親半杯就醉得不醒人事，我還記得當時我看著攤在床上暈住嘔的父親，不自禁地說「這種黑色幽默，真的很林振強！」我還記得某年某月某日，我跟某創作人說「我的創作風格，很受林振強影響」，那位創作人苦口婆心，勸我別要再跟其他人這樣說，以我的創作水準，這樣說簡直是侮辱林振強！還記得我依然希望有一日能夠有你的十份一才華；我還記得有袋就要有你的書在裡面，有乜頭暈生慶，迷迷惘惘，上便下秘時，一睇花開富貴，思路暢通，橋如泉湧；還記得你離開的那一天，是我一個朋友的生日，我借你過橋，話因為你離開，所以無心情食生日飯，慳番幾千....

還記得很多很多關你事的東西，此刻最記得的還是這兩句「一個真正喜歡食生果的人，應該死在波羅的海」，一個搞笑的人，就算死了依然引人發笑！