7.05.2006

舞台


二十年前第一次到倫敦,大鄉里出城,當然遊盡所有名勝,「big ben」、「大英博物館」、當然還有「海德公園」。果個星期天我仲記得,個公園嘈過街市買菜,其實d人未必一定上到台先講野,基本上見人又講,見隻狗都講,望住空氣照可以講半日!我仲記得果日有個從蘇格蘭到來的中年男子,拉住我係咁講係咁講,講左成個鐘,其實我聽得三四成,但呢個鐘裡,他說得最多的一句是「每個人都需要一個舞台!」最後仲問我個舞台係邊?我答「係銅鑼灣,叫利舞台!」
利舞台雖然已不在,但港姐繼續年年有,場show係有得做,係邊個舞台都一樣!
我好好運,算找到好多個舞台表演我d劣作!我爸爸的舞台係「棋盤」上,我媽媽是大姨媽,她的舞台在家庭危機理處,每每家有事發生,媽媽在舞台上就以渾身解數表演「一姐當關,解決問題唔好同我爭」絕技!我個妹表面舞台係時裝界,但其實真正舞台位置投訴區,每次有外賣,駁線等等失誤,就係投訴皇后show-time!
我有好多朋友舞台係「麻雀桌」,有人係「媾女」,又有人係「研究音響」,仲有係「湊仔女」、「攝影」、「潛水」、「煮食」、「風花雪月」.......
咁你個舞台係邊?係球場?成積?知識?打機?唱k?跳舞?訓教?定大多數都係網上面?低級版就係於新聞谷開topic引起罵戰,然後表演自以為有的「三吋不爛之舌」神功,為求發洩,四圍同人製造過節!高級表演舞台,當然係最近被「巴士阿叔」發揚光大的Youtube啦!


大家每日會花幾多時間係Youtube?就算自己唔上去hae,搵片,每收到朋友forward俾我,要link去Youtube的email,至小有十個,當然有七個都係重覆!你無可能避得開,除非你唔開email!
呢個舞台成功捧紅的人有「巴士阿叔」、「peter黃」、「羅啟明」、「所有玩得好盡的日本遊戲」、「王夫」.....我一直期待有一天會有一個香港人的表演會出現係呢個舞台!而唔係巴士阿叔,或者那些以弱智招徠的思覺表演!
年輕時興break dance,香港可以表演的舞台只有尖東街頭廣場上,但一班所謂奇裝異服的舞者,圍觀看得入神的小朋友被媽媽拉走!原因是舞台上的其中一位舞姐講了一句粗口!當時我覺得果個小朋友的父母好老土!「講粗口並唔一定係壞人!」但係如果可以連果句粗口都忍住唔講,小朋友就可以留低,唔好講到話可以令break dance得以繼續發揚光大咁嚴重喇!起碼你唔會小左一個觀眾!
一個好的表演是要廢盡心思,攪盡老汁,兼前顧後,左右包抄,四面楚歌定八面玲瓏,就睇你付出幾多努力,但係付出得多並不等如正比的收獲!又有一年去倫敦,在高富花園看街頭表演,一個男子表演拋樽,但係拋八個!我睇左三十分鐘,見男子好努力想表演成功,但每次都失敗,唔成功的表演有咩好睇,但我又繼續睇落去,心裡面好想有見証呢個表演成功果刻,但再睇多三十分鐘都係繼續表演失敗,在旁的阿婆話已經睇了六七個星期(星期日才表演)其實覺得個男子是無可能成功,但係表演一個永遠唔會成功的表演,可能吸引力比他有天表演功更大!呢番話我到而家都未參透到個真理,定其實係阿婆飲大左亂講架?!
我無阿婆講得咁弦,我只知道你上得舞台就要表演,你有無盡力,觀眾心知肚明!表演失敗當然得不到讚賞,但認真表演,你一定得到尊重!
考試又好,拍拖又好,工作又好....所有都是一個舞台,讓大家表演你的能力!表演失敗唔緊要,最緊要仲有下次機會再演演,如果無,去第個適合自己的舞台,係邊個可能你要失敗多好多次先知!
『只要你個表演有落過用心,就算失敗表演都睇得好lum!』

4 comments:

sugar19sugar said...

就係因為你呢篇"舞台" !!!!我決定要搵我自己既舞台 !!!!搵到就好喇.......成廿五歲喇我.....嘻~~~~

Winnie said...

對於我呢講"舞台" 可能一早已經找到, 但仲未有勇氣上這個舞台.

菜肉包 said...

有你份... 但我作為普通人就唔恨見到自己喺youtube上出現...

beauty~ said...

'表演失敗唔緊要,最緊要仲有下次機會再演演'~~~~~
你呢一句對我黎講真係好有意思呀,因為我上個星期a-level放左榜,拎左3 個f,結果唔開心左幾日(雖然有d 咁gei result都係自己攪成)...anyway,now 諗清楚lu,決定比多次chance自己,邊做part time邊溫書,next year自修retake再黎過,我gei target係要入bu呀~(雖然身邊冇人睇好~)