8.31.2009

Windows




成長在「大英帝國」統治的那一代香港人,都有一個特質,就是說話時,總喜歡夾雜無數單字英文
例句:「ACTUALLY,呢個Project已經去到要有final decision o既stage,如果你唔mind,hope that 你可以as soon as possible,俾到個answer我,係answer而唔係opinion,我地會好appreciate你o既配合,同co-operate...well...by the way,唔知係deadline前可唔可以俾到個reply我呢?」

而這種特質,是很多外國人都不知道,因為香港人大多都只會用這種中英夾離的方法,同香港人或中國人說話,對住外國人,就最多都係「Well....」、「oh..really?」、「Sure...」,其餘就都係講番中文。
而最常見到這種「中英人」,通常係公司裡面成日點你做呢樣,做果樣班「高層」,當你有緊要事搵佢,佢就會好忙咁答你「I am in the middle of the meeting,有咩你幫我handle左先啦!」,而當你做到頭昏腦脹,要解決六個問題,面對七個projects,仲同時開緊三個會,但你上面位「高層」要搵你解決問題時,佢就會話「我地running out of time喇!你仲係度開埋d唔productive o既meeting,知唔知咩野叫priority呀?!」 有時佢仲會用好多好深o既字,其實你都唔多知點解,但總之聽到「高層」講英文,就覺得事態相當嚴重,要立刻先去解決!

某大公司有一位「高層」,最喜歡對住下屬講「英文」,尤其是要落指令的時侯,而下屬們好多時都唔明佢講乜,但又唔敢多問,只好聽到幾多就做幾多。某日,這一位「高層」避在房,對著電腦研究他的「新project」,突然佢發現電腦出現了問題,令他有藉口放棄那份又長又悶的「Proposal」,穿上外套準備提早外出午膳,但臨行前亦不忘以壞電腦作起圍位,搵個下屬祭旗提提神,於是那一位「高層」打電話到「工程部」,劈頭第一句就話「我office個windows有問題,你地即刻搵人黎同我換左個windows!lunch之後,我要見到個轉好o既windows!」

「高層」說罷cut線,成個人醒晒,輕鬆外出去食晏,而同時地,工程部內,年屆退休年齡,同事們都愛稱他做「林伯」的林主管,本來正苦惱去那裡食晏,收到「高層」電話,乜胃口都無晒,立刻電召救兵,要在兩個鐘(「高層」係食咁長時間)內,換到「高層」房內的windows!終於林伯不負所託,一個小時四十八分就換好晒!
「高層」食完晏返到office即打電話落「工程部」,「Holy shit,你有冇搞X錯呀...」,那邊廂林伯義正嚴詞反問「有咩問題呀!?我已經跟足你指示去做啦!」,「高層」感啼笑皆非,「我叫你換電腦個windows呀!你換x晒我d〈窗〉把x咩!」





要怪就怪你平時說得太多英文了,不過我總覺得「林伯」其實是扮傻,替大家向「高層」出一口氣嗟,感激林伯~`

8.23.2009

比較 幸福



一對有精神病的攣生姊妹,相濡以沫四十年,姐姐如廁時猝死,妹妹不懂得救求,呆坐姐姐屍體旁邊三日,直至有鄰居難耐屋內傳出的惡臭報警,才把「兩姊妹」一起救出;報導稱「妹妹」被救出時,滿身便溺穢物,口吐白沫,身體十分虛弱,因為沒有了家姐的照料,妹妹三天沒有進食及正常如廁。
這對姊妹花自幼被父母遺棄,姐姐就負責以有限能力,去照料全完無法照顧自己起居飲食的妹妹,姊姊走了,妹妹根本無法生存,最終一個活人,還是要靠死去的姐姐的屍臭,才不至跟姐姐同往黃泉路,但卻引伸出另一個問題,以後誰會去照顧妹妹?

當你被戀人拋棄,傷得椎心泣血,肝腸寸斷,聲淚俱下地重覆著同一句話「我無左你生存唔到落去!」,而親朋總會勸妳瀟洒一點 「世上無話無左邊個唔得,地球仍然會繼續轉!」然後你哭得更大聲,鼻涕口水橫飛地搖頭慘叫「唔得呀....我真係無左佢生存唔到落去!」但點解會生存唔到?是因為你無法自行進食?自行如廁?自行梳洗嗎?沒有了這些基本的生存能力,才需要在其他人的照顧下去生存,否則要活下去,就只有靠自己,因為只有自己,才最清楚如何去照顧自己,因為只有自己,是可以照顧到自己到最後一刻,人是為自己而活,人生是為了學習去照顧自己,就算得到其他人照顧,都只是提醒你要繼續學習照顧自己,因為有「得」就有「失」,不要在失去時,才呆坐半天,不知所措,惶恐無助 !

雖然人的不快樂,可能是來自比較,但若果懂得選擇對像來比較,你就會比較快樂,比較幸福!相比起那位攣生妹妹,我們是多麼的幸福,因為至少我們還懂得去照顧自己,如果你還未懂,就不要再呆坐,趕快去學做一個「自顧」人士, 總比做「自憐」人士,來得幸福快樂!

8.21.2009

你藐.....我Mute




上星期我跟一班電影人度劇本,大家沉默地思考著,死靜的氣氛令我抖不過氣,終於我忍不住開腔「從前度劇本,有三份二時間都是傾閒偈,傾傾下d橋就飛出來,點解現在大家都咁靜?!」,然後我未等大家回應,就開始講「閒話」,「我覺得上星期播完的《烈火雄心》,以電視製作來講,是不錯的作品!」,這時侯,一直沉默的一眾,紛紛開腔表示認同,而其中一名年紀及年資最輕,開會時甚少出聲的小編劇,像找到信仰認同,解放地暢所欲言,而他的見解與分析相當到位,令人對他另眼相看;我問他為什麼一直不多發表,他的回覆是「我不敢發表,因為怕被其他人「藐」... 〈 嘩!無線d電視劇你都睇呀?!〉」
忘記由什麼時侯開始,我們不敢表達自己,是因為怕被其他人「藐」,明明喜歡但不敢看王晶電影,因為怕被人「藐你cheap」,明明喜歡「話沙池」,但怕被「藐無taste」,明明想約會那位打扮純撲的同事,但怕被「藐你鍾意埋d娘人」; 但其實著住「華沙池」相約那位好娘的女同事,去睇王晶的「靈靈狗」,是絕對可以令你快樂的事情,但怕被人「藐」,你就算敢去做,也不敢告之其他人你有做過,慢慢我們習慣了只去聽,不敢作「無謂」表達,但聽到的都是對什麼什麼不滿的聲音,因為發表「反對」的意見,比較易得到認同,然後在群體裡,「反對」或「藐」變成了互相溝通的文化,識別是否志同道合的記號,而你不想「一齊藐」,但又不想「被人藐」,終於就都選擇不作聲,默默地去聆聽,然後每天就像「竊聽風雲」內的三位主角,整日聽著自己不想聽到的東西;就算感覺到個世界變成為「藐」而「藐」,為「反」而「反」,大家都只懂去看東西的缺點,放大事情的錯處,你都沒勇氣與動力去出聲平反,偶爾有勇氣想表達比較正面的意見,亦要在開腔前加一句「這是我個人意見,不喜勿插!」在這個言論自由的國土上,我們因為其他濫用言論自由的人,而令到我們不敢發言,簡直是荒天下的大謬!但更加荒謬的是,我們都不知不覺接受了這種風氣與文化!但我們都無需要去「反」或者「藐」這一種文化,否則我們就變成同一族類!正如小編劇所言「這些人是讓我們知道,能夠遇上同聲同氣,可以暢所欲言的朋友時,一定要好好珍惜 !」

8.15.2009

Such a Good Time~`



開心!因為簡單~ 唔信自己去睇睇
http://www.skyhigh.hk/skyHigh/09summer/09summerReview.php?id=25




老友!遲d再見~`

8.13.2009

放 飛機



坦白講,有邊個做人兒女,未放過父母飛機?明明應承會回家食飯,但放工同朋友同事去飲杯野,於是越飲越夜,終於父母等了又等,等到眼訓你都未返,最終所有飯(送)全被留起,然後近天光你終於回家,你發現父母的苦心後,有丁點內疚,所以應承今日放工後,一定回來清理隔夜飯(送),但臨收工時,最心儀的人竟然相約去happy hour,你當然第一時間就應約,而同步地,家裡的母親卻不忍心你吃隔夜(送),困在高溫的廚房內,汗流浹背地為你重新弄菜,但心儀的人竟然邀請你食飯,飲野,唱K直落,你開心得連母親打電話給你亦聽不到,就算聽到,亦會裝作極之繁忙及不耐煩地回答「我俾老闆捉左去飲野..... 好快返啦!我都唔想架!咁老闆叫到,我唔通唔去咩?!」,最後你回到家,見父母已經把飯裝入午餐盒,留待你明天帶回公司作午餐用,但遲了起床的你,只忙著出門及盤算著發一個怎樣窩心的短訊給心儀的人,終於你還是沒有拿午餐盒上班,父母苦心被荒廢,向你輕輕埋怨兩句,卻被你這個無信用的人指責「你地好煩呀!」放父母飛機已經可恥,放完飛機還要惡人先告狀就更可恥,但我們都知道,就算我們再過份,再繼續放飛機,父母還是會接受,因為我們都是他們的兒女!
有時將心比己,如果你被父母放飛機又如何?二十年前,我第一次離家去英國玩,父母擔心我,送我到機場,年輕的我覺得好老土,一到步就趕他們走,他們不大情願地回去,臨走前,母親說我回來時,父親會來接機,而她就會在家煮定我最喜歡的(送)菜,待我回到家,就可以吃團聚飯,我當然極之抗拒,說自己懂得回家,而在機上已經吃飽,回來根本再吃不下,父母表面上認同我,說會取消接送及弄飯,但我知到最後他們還是會一意孤行!
兩個星後我回程,離開閘口時,想起父親已經站了很久在等我,我就感到渾身不自在,但步出閘口之後,四顧卻找不到他的蹤影,那一刻,我很愛父親,因為他終於認同孩子想要和不想要的東西;貪得無厭的我,回家途中更奢望母親可以放棄煮她的撚手菜式,轉而買了我心愛的老麥漢堡包,作為賀我回歸的晚膳!但當回到家,空無一人,檯面沒有蓋著的飯(送),打開雪櫃,比檯面更空洞,根本就沒有準備會煮飯我食,那一刻,我有一次感受到,被親人放飛機的痛苦,我呆坐客廳,心心不忿,腦海裡盤算出多個報報的計劃,例如:以後母親煮什麼,我都說難食,父親任何建議,我都不屑地反對.... 但等了又等,過了很久,他們依然未回來,由於當時沒有手提電話,所以我只可以繼續呆等,慢慢我的心燥鬱,被不安感覺掩蓋,腦海裡閃出了多個不幸的畫面,但越阻止自己去想,就越想得更多!終於這個時侯,大門的開門聲響起,我立刻再裝起那張不滿的臉,準備二人甫進來,我就向他們開火!但終於我還是沒有做到,因為進來的不是父母,而是四姑姐,那一刻,我突然呼吸急促,心情忐忑不安,似將會收到一個壞消息,四姑姐見到我的情況,急忙走近,輕拍我的肩膊安撫我「放心... 無事.... 」,她這樣說我就更惶恐,終於我失控地大叫「究竟咩事?講我知呀?」,如果當時天打雷,就正好是一幕陳腔濫調的電視劇場面;四姑姐反而被我嚇得手忙腳亂,口如地震地說「你媽媽急性盲腸炎入左醫院,你爸爸係醫院陪佢,叫我過來通知你... 」
跑到醫院時,母親已經甦醒過來,但無力說話,只握著我的手,而父親就在旁解釋事情發生經過,但字裡行間,仍然不忘提著「唔係咁突然,我點會黎接你機丫」,後來,母親終於開腔,而她對我說的第一句是 「要你擔心了... 下次餐飯唔會再放你飛機 !」 ,我的淚如雨下!那一刻我發現,被放飛機的人,不悅並不是來自對方的言而無信,不悅是來自擔心對方安危!所以我們常常聽到人家說「你放飛機唔緊要,至少都出句聲丫!唔好要人擔心你安全丫麻!」
不過為人為己,whatever you say,最好都係唔好放飛機!

當然以上說話,我主要係同自己講!

8.09.2009

Doubt



















如果大家唔知被我虐待的小童是誰,翻看兩年的post,就知這個Issac是誰















































小朋友真係大得快,相信再下次見面,我再咁虐待佢,佢一定已經識還我拖!所以小朋友,可以虐時就好虐!














HiLDA媽,下次帶埋熙曈出黎,一個實在滿足唔到我呢個虐童僻 !

8.08.2009

COOKING MaMa




《第一次》是何其重要,交給誰,一定三思!要值得又要無悔,不要留下任何不快陰影。而交給這一班人,不但令你安心,仲可以好開心!



















真真假假都好,至少我看見你們,真的把我第一次煮的東西,完全吞下,証明應該惡劣極有限!感謝你們~。`




好鍾意呢幅相,好有顏色,好有活力,好有一TEAM人的感覺~ I love U all~

8.04.2009

異常快樂



真係唔知點解,今年生日好快樂



感激所有向我說《生日快樂》的朋友們,I love U all~`

8.03.2009

生日禮物



我想星期二個PROMOTE係大家打上來同我 「生日快樂」,記住今晚十二點後打黎,如果個PROMOTE有五十、一百把聲同我講就好羅~`
旦你哦~`

8.02.2009

真正主角



生日鄒的探臉活動,其實係去探朋友間廠,因為佢間廠養左幾千條魚,幾十隻龜,成十隻狗,仲有四隻孔雀,三隻色蜥蜴,兩條蛇...嚴格來講,應該唔係一間廠,係一個動物園!
《詳情係節目再講》













去完動物園,然後車左我地去一間工廠.....食飯









大陸真係地大物博,好多野都係我地想像以外,絕不能只看表面!
《詳情節目再講》











其實放切蛋糕相好老土,絕非我的STYLE!但我怕大家齋睇以上照片,誤以為其實係迪偉生日!但的而且確迪偉仲玩得開心過我好多!
《詳情節目再講》




感激令我玩得好開心的各位~` THX~ a LOT~`


8.01.2009

生日鄒



踏入八月,踏入生日鄒,從來不愛慶祝生日的我,今年一反常態,慶足一周,聽人講d老人家突然改變,應該係時日無多,我信!所以更加要玩得開心d,無幾何架喇麻! 《Just Enjoy this moment!》 高高高~`
第一炮慶祝活動: 與迪偉去探險 !

詳情等我返黎至話你知!