4.26.2008

騷蘇拉芙.....與我的距離...



做了晨早人兩年,基本上我已經跟夜生活若即若離,一來無伴,二來無精力,從前聽見antie抱怨世叔伯夜夜出去花天酒地,天光至回家,世叔伯總會理直氣壯地說 「妳以為我想出去應酬嗎?!妳知道交際應酬要多小精力嗎?!不是為了工作,我寧願長留家中!」 當時我是覺得世叔伯的藉口極其勉強,但其實他的一字一句,絕無花假,你有天設身其中就會明白!

為了睇森美,我要推掉所有工作,下午回家睡了幾個小時,我不想帶著疲倦的狀態去看他,影響欣賞他的演出,上次看阿jan,森美坐在我背後,完騷後,他問我「為什麼你全場盤起雙手來看,反應毫不熱烈?!」
我當時笑而不答;今次看完騷後到後台,他又問我「你是否又全場盤起雙手看?」我依舊笑而不答!

我不喜歡說恭維說話,但就咁說一聲「好!」又實在太無誠意!其實我對心悅誠服的人,是不懂說話,反應,我習慣了思考時便盤起雙手,看到好東西我就會想「人家是怎樣想出來?做出來的?真利害,真今人汗顏!」 對!我不是在看騷,我是在分析個騷,這是職業病,等如我已經多年沒有真正欣賞過一部電影,每次都是在分析,解構,學習,取經!

所以我是怕去睇騷的!我怕之後要俾評語,「不是為了工作,我寧願留在家中~~」

森美!希望你會知道,我是真心欣賞你的演出的!雖然我仍然覺得個騷太長,但這是香港人的習慣,世界上無其他地方做騷要兩個幾三個鐘,演出者唔疲,睇都疲!

森美!佩服你!

我下午急叉的幾個鐘電,全部係個騷到用盡!但之後仲要去一個朋友生日會,其實我下午已經用盡方法說不想 去,但朋友竟然親自己打電話給我 「我好想你出現!我講完!」

在過海的士走進隧道時,我已經雙眼無法張開「都近十二點,其實對方都一定飲醉,唔去佢都唔知!」,我心裡一直在這樣想,不如就叫的士回頭返屋企,偏偏這是電話響起,滿以為是朋友打來催促我,竟然....竟然是阿Y 打俾我,他十年都不會打俾我,搵我一定有事,於是我抖摟精神,提起聲線,開場白簡單直接無爛gag 「阿Y! 搵我有事?!」 「請記住車牌號碼,MD3563」 我呆了半秒才知道他在說什麼,看見眼前的士內司機証下的車牌,正是「MD3563」,我立刻前、右、後在尋找他蹤影,三秒後,在旁的一架BENZ慢慢墮後入鏡,他就出現了!閒話幾句我們就揮手道別!或許對阿Y黎講,這只是昨晚其中一件不值一記的無聊事,但對我黎講,比得到偶像簽名與合照更開心!唔駛估,唔駛諗,我係Fans!


因為呢個刺激,令我再有動力去下個「應酬」



現在去夜店,最怕人影相,不是怕被拍到什麼不軌行為放上網,我是怕你影到我又肥又醜,然後放上Facebook,事關在夜店拍照,一定係SNAP-SHOT,一定係有閃光燈,真係梁朝偉都會影到變張偉文,但你介意無用,影的人照影,再加上到咁上下都飲到爆晒,影過乜都唔知!

然後你企到什麼地方,都會有人影你,然後補一句 「呢幅超過癮呀!」 但你的「過癮」,是我的「醜陋」,所以我變得好機警,基本上不動,如果每走到一個人身邊,就用手遮住最肥的地方,同退後四步,盡量避開閃光燈的蹂躪...









咪睇呢D你認為低能仔的動作,是要用好多體力才做到,始終我本身都不是一名低能仔,不能做自己,要靠演的,好疲....




連主人家走過來擁抱我,又影,仲要齋影我這一邊,我還可以交什麼戲,千鈞一髮之間,我在「V 字」手勢與豎起大姆指之間,揀了後者 ...但我估避得一邊,避唔到另一邊,大家見到左邊,已經有另一位reload了子彈,準備向我發射,務求影到你最衰果面!SIGH~~

我在夜店,從來都得到「你好悶呀?!」、「你好COOL呀?!」、「你啞架?!」、「你企係度博媾呀?!」、「你平時好多野講架?!咪扮野啦!」

以前我會為答而答「講咩野丫,搞野好過啦!」,但現在我連聽到對方說「爛GAG!」也不想,索性繼續不語,但對方就會說 「唔講野,影幅相得喇掛!」

「SORRY!不如你開個TOPIC傾下丫!」

如果對方這時說「玩野呀!」然後氣沖沖走開,我會立刻開支酒飲慶祝!然後繼續呆站在一旁等時間離開,正所謂「都唔知去黎做乜?!」


所以這些交際應酬騷蘇拉芙.....與我的距離越來越遠了....


各位!如果你仍醉心夜浦HANG OUT,高高高~~襯還想玩的時侯去多D,因為有日QUOTA用盡,去浦是慘過返工的!








不過如果返工可以對住咁靚的人,再辛苦,一個星期返八日,我應該都頂得順!

靚女!生日快樂

4.23.2008

起菜




「菜心、芥蘭、西蘭花、唐萵、西生菜、油墨菜、娃娃菜、小唐菜、椰菜、荳苗、 生菜 、 菠菜 、 白菜 、、莧菜 、 椰菜 、 椰菜花 、 芹菜 、 西洋菜 、 通菜 、 芽菜 」 ...

去食飯時叫菜,你會 A:「聽完所有選擇才落決定」
B:「聽到自己想要的,就決定」
C:「不會聽,一開始就說出自己要什麼菜」
D:「聽完所有決定,但再反覆問那種菜最靚」
E:「聽完所有決定,但再反覆問那種菜最靚,最後還是選擇自己早已有的決定」
F:「其他.....」請說明

4.22.2008

Must buy`~



聲唔靚,淨係買黎玩都抵啦!睇見已經開心晒!























http://www.fredflare.com/customer/product.php?productid=3793&cat=103#

高高高~`

4.21.2008

慈光普照



開工 點辛苦都記住笑``


共勉之

4.19.2008

吹呀吹~`



今朝起身寫稿,從書房望出去露台,不禁講左句粗口「嘩!搞乜X野呀?!」









唔知點解我覺得件事好MATRIX,但我唔駛用MATRIX o既特技,就已經做到呢個效果....





我以為咁已經好勁,未幾後突然「FLU」一聲,兩張凳就被巨大神奇力量拉走,一秒後....

所有東西都已經瞬間轉移,無花無假!




好擔心輕過趙飛燕「20」,妳無乜野都唔好企係露天地方,定其實妳已經吹走左?!瞪大眼,發現自己係 大板,唔駛驚,係神奇力量黎,再瞪大眼就會返黎`~

大家都小心被吹走呀~`

4.16.2008

手信



是朋友,就不要叫朋友去旅行時買手信,是我的朋友,就不會叫我去旅行時買手信,因為我是不會買的!因為我第一次去倫敦,就係因為要買齊一公司人的手信,趕唔切check in,好彩當時我二十歲出頭,演技又好,眼淚話到就到,聲淚俱下,不但准我上機,差點還想up-grade我上商務位!但一切都無法彌補我對買手信恐懼!

今次係日本我只買了兩樣東西,就係呢條頸巾同雨褸!竟然都有人話要,「當手信!」咁我好放心五月三號可以賣得出D貨!









可愛的球迷



串爆的球迷






節目中提及鹿島鹿角開波前想砌的字樣~`但搞緊都搞唔掂,全場大叫「姦巴嗲!」,最後都係搞唔掂....




半場完,再接再勵,終於成功!全場拍手掌~`!



真係要手信,唯有送呢張相俾你!

4.15.2008

東京散步



有些故事,你以為開始了,其實經過多番轉折後,在某年某同某日某刻,你突然從心裡面湧出一句話來「原來故事現在才真正開始!」 周日下午,我影了這幅相後,便決定開始我「東京散步」的故事!

四月新開了深夜飛羽田 的班機,零晨一時半起飛,到日本大約當地時間六點正,由於羽田去新宿、涉谷等地,都比成田快得多,去新宿,早上半個小時就到;早上八點在新宿,可以做什麼?!答案是「零」,但酒店又未可以check in,於是大家只可以帶著極疲憊的身軀(就算在飛機上訓足,都不是有質素睡眠,對我來說,同無訓一樣),到附近咖啡店飲住咖啡....訓,我就覺得好尷尬,好浪費時間,至小要等到十點,才有第一間百貨公司 開門,就算開門,要行三個鐘到一點先check in,對我這些鍾意買東西,但不歡喜行百貨公司的人來說,半小時已經行通全間 伊勢丹,而日本根本就無我SIZE!齋睇就更疲!終於我走入廁所廁格訓左三次,又幾舒服喎!但我仍然是希望正正經上床訓....

好艱難先捱到一點鐘,上到房,知道一訓就無左個下午,但唔訓又頂唔順,終於訓左兩個鐘,出到街,無地方想去,什麼也看不起眼,根本就處於渾沌之中,雖然照樣飲飲食食,但無一樣是值得回味,我應該九點幾就醉到爬返酒店,但其實我覺得酒精還是其次,身體狀態差才是真正原因,第二朝醒來,腦海只有一句話「不要再重覆昨天!」但昨天是怎樣渡過,我其實是到現在才想起!

「唔好重覆」唔不代表有新野!都係出街,都係飲飲食食,直到我影了這一張相片後,我的感覺回來了!

「喂!坐低睇下野先!」





其實對我來講,到每一個大城市,如果只可以做一件事,我一定會揀「To See」,當然To been Seen我都想,但係東京,這個可能性不大,日本人基本是唔會望人,要吸引到比他們更吸引的人,你要有明星質素、打扮才有可能!

但正因如此,在日本「To See」可以好放肆,你越望得「衡!」,佢越有滿足感,當然表面上,他們是裝作若無其事,但他/她們的一舉一動,就代表著這個城市,你望佢覺得好睇,即係個城市好睇!如果香港人個個都咁好睇,香港就會更好睇!

而那一刻,我只覺覺得東京好睇,既然咁好睇,我做咩仲要睇住兩個「香港人」,梗係坐低「To See」啦!

只是簡簡單單的坐了三個鐘,我的油缸已經打滿特級一號油,充滿力量,飽到有點需要去散步,但我估更加需要的是跑步,「To See」完,就開始第二種see,叫「壽司」,見到不同的面後,就開始見第二種面,「拉麵」,同行的「余生」已經不放在眼內,眼裡只有「魚生」,沒有「暴走」,只有「清酒」,當心靈滿足下,飲飲食食,係 好到極!































離開的當天中午,竟然俾我無意發現這個地方,我沒有去考究,但我覺得這裡是電影「情意兩心知」,ending拍攝的 場地





在這種地方,如果無人拉我,我可以坐十個鐘都唔走,但我唔走,同行人好想走,所以無得 唔走!


談不上是假期,談不上休息,但以心靈取經的方向出發,今次我還是有收獲的~`

4.11.2008

殘廢餐




我最想送給情人的一個假期是 『妳只要說出由那個檔期有空,然後到時準時抵達機場,去那裡?有什麼安排?節目?完全不用再費心,因為我已經一早預備好!』,可惜多年來,只有我同情人、朋友、家人、同事講「我檔期由幾時至幾時....」 然後放低錢,去邊?做什麼? 『你幫我諗啦!』

真正放假是應該什麼也不用去想,見步行步,張開眼就食,合上口就訓,如此奢侈,我做不到,感謝好友給我的豐盛行程,但我只要達成幾個簡單目標就滿足 「走」、「睇」、「食」,最重要是 「唔講野幾日!」

4.08.2008

甲由窩



舊朋友約食飯,說介紹一個風味地方我去.....土瓜環落山道一條昏暗,濕漉漉,臭氣薰天的殘舊後巷內,可以有什麼吸引人的食肆?





甫步入後巷,就覺得似曾相識,當然每條後巷其實都差不多,但呢條我一定見過!終於想起是「無間道2」,黑幫頭目被活生生燒死的那間「火窩海鮮店」






呢度不但可以邊爐,亦同時可以燒烤,食物質素不錯,我好快就係咁食,係咁食,正想大讚「得喎!」之際,我看見我其中一個朋友好隨意地掃掃大脾,我看到一些東西飛到一旁,細看下,是一隻很大的甲由(正寫我識寫),朋友繼續進食,然後我一直覺得「長江七號」最正果場戲,兩父子像打遊戲機般,拍打牆上不知從那裡跑出來的甲由,這場戲,就在我面前一張檯的距離外的牆上重演,朋友們繼續視而不見,繼續食得津津有味!但我已經有點反胃,正考慮應否坦白向朋友相告 「我頂唔住,走先!」之際,天花上有些牆灰跌落我膊頭上,我順手把灰掃走,突然感到頭上有東西跌下,來不及想像是什麼,但見朋友輕輕的望著我頭頂,我即時彈起,手頭並用,終於把「東西」fing走,就這樣地,一窩「甲由窩」製成!

老闆娘好禮貌同淡然地問「同你換過個窩去」,而朋友就轉移去燒烤,一會後,新的窩底重來,朋友們又繼續開懷進食,而我眼睛看到那裡,都只看到「甲由」

『唔好意思,聽朝要開咪,走先!』






離開時,我才發現原來我們是可以走進鋪內他食,打電話問朋友,他的回覆是「以為你鍾意外面有風味D!」,我份人係「溜廢」,但都怕污漕同甲由!不過我重申,呢度D野係好食的!

4.06.2008

多功能拍賣大食會



時間: 3/5/08 (相信是黃昏時間開始)
地點:已有但遲一點才公佈
目的:1〉大家見下面,野下食,傾下偈
2〉我有大量舊CD、DVD及個人珍藏,當日將會以拍賣形式出售,所得款項作當晚燒烤經費補助,如果咁
神奇有錢淨,就撥入年底GATHERING使用

比大食會多個拍賣功能,比拍賣多個大食功能,由於book場地需時,截止日期為22/4/08,想報名,望望右邊,高高高~`

4.05.2008

清明節快樂



我真係好鍾意呢度,綠悠悠,一望無際,從前是相當寧靜,但現在起完一期又一期,一定清明、重陽,d人多過萬勝節個中環蘭桂芳,嘈過年三十晚維園年宵,完全無顧及住客感受!不過在閒日,這裡絕對是一個讓人好好沉澱,沉思的好地方!

十年前,因為伯娘入住於此,我便成為這裡常客,在這裡跟她談心,是世上最賞心的樂事~ `



我伯娘是世界上最好笑的女人,善良膽細,當初她肯用石油氣爐時,每次撻火開爐前,都一定會盡開家門,她認為這樣就算爆炸都可以走得切!她極慳儉,馬桶要五次小便+一次大先沖,水喉從不開大,閂剩小小空位,讓水一滴一滴的滴到放在下面的盆上,大約兩個零鐘就滿一盆,煲水飲用或沖涼,她的水費從未超過四蚊,唯一四蚊果次,佢已經要我打電話去水務處查數;她亦相當迷信,從前我一講衰野,例如「呢次死喇!呢次一定死梗~~」 伯娘就會出殺手鐗,「啋!你個死仔又亂講野,我摸過個「x」mung你個seafood嘴!」她是一個坐言起行的人,所以她每次都真係會摸過個「x」,然後追mung我,後來我知道佢一定追唔到,我特登講衰野,睇佢表演,係好核突,但好好笑,亦好懷念~`

每次我來探她,都會劈頭第一句就問 「妳其實係邊架?!妳擺明聽唔到我講野過喎...我仲講d心事妳知咪好傻?!」 但每次當我的難題迎刃而解,我知妳都在我身旁!

成夢嬌,清明節快樂~~



除了伯娘外,在這裡,我還有另一位朋友~`而我跟她的認識,是相當詭異的...

大約十年前,當張伯芝男友仲係陳曉東的年代,馬偉豪拍百份百感覺2,男主角正是陳奕迅和陳曉東,而我亦獲得「實Q榮」一角,當然一如以往,俾得我做演員,梗係要係幫手臨場改下劇本,度下對白,有時還會出去幫手見下其他演員,這是我跟馬偉豪多年合作的模式,有時他往見其他演員,都喜歡叫埋我去,表面上是貪我主動多說話,嬉嬉哈哈較易打開溝通的天空,其實他是俾機會我出去見下人...

馬生跟陳曉東當時的經理人R小姐,常常見面談論未來大計,每次馬生都會叫埋我出去,但事有湊巧,我一次又一次都遇上其他工作,始終遲遲無法遇上她,唯一一次我急趕來,她急趕著離去,互相介紹後,我只知道她叫R小姐,之後就再沒有見過她真人了,因為不久後她因工作壓力太大,跳樓身亡~~

伯娘入住新屋的四個月後,我們去為她慶祝生日,她的樓下來了一個新住客,我與她互望,我帶笑向她Say HI!「光仔,她是你朋友嗎?」,我想了一回才回答伯娘 「是呀!R小姐是我的朋友,妳要好好照顧她!」

雖然R小姐沒有承認我是她朋友,但我以後每次來探伯娘,我都會向她問好,有時會報告一下她的朋友近況,有時更會替她做FACIAL,我們的關係變得很微妙,談不上是真正友誼,但總比她生前時親蜜,你有沒有試過跟一個人的關係,是死了之後才開始?我就試過~` 這關係比任何在世的關係簡單,真摯,親蜜但又保持著距離,這種關係才是恆久永遠~~


R小姐,清明節快樂`~

我想她應該是快樂的,尤其是我重提伯娘的 那三句經典拯救 「豬扒」的金句,我感覺到她在微笑.... ... Yeah~~

那三句是什麼?妳咁緊張問,唔通妳係`~? 要有心理準備,呢三句真係好勁!



女人怕咩做大腳八,大面婆,大羅怪,正所謂
「腳大就站地穩,面大就好搽粉,羅大就好著裙!」

妳係咪成個人跳起嗌「BINGO!」呢? Hee``