4.30.2007

Stay tuned



人想走....心就野

人未走....腦就動

人要走....口就停

人一走....茶就凍

人不走....腳就痺

人奔走....氣就喘

人已走....心就死

阿七宴客



阿七,養你果個最近比較忙,要派你出黎招呼下大家喇,妳做d表演俾大家睇下啦,唔好太難,C組難度加冒險分算喇....








係咁咋? 你真失禮~~`

4.27.2007

求愛有多難



因為冀盼愛,所以不停付出愛,到死仍未知道,最該愛的是自己~`Sigh




妳的不幸,是性格使然所至,否則就算開幕是一場悲劇,也可以大團圓喜劇收場~`~`

4.25.2007

我會愛妳多久




簡直迷一樣,愛一樣東西,會把整體分拆,斬件再愛,再分拆,再愛......每天也只看到多一點她的優點!

就像Oliver ASSAYAS的故事一樣,愛跟毒癮是一樣,一但愛上就不願能戒掉,移形換影,也只不過把不羈的天空搬到巴黎,穹蒼下誰去計較可愛多久,就讓愛開始吧~`~

你有愛過她嗎?你最愛她那個部份?

我愛上妳很久了~`難得竟然還未變心

4.24.2007

J L




林生在Disney attack的造形,一貫其風格,有心思,與別不同,幽默抵死,但我其實對這個造型沒大感覺,都是想像以內的事,正常發揮,但見佢右腳膝頭上貼了一塊膠布,心裡不禁說了聲「丫!你係都要再加d野!」,受傷對襯運動,但傷勢就輕微,似足林公子一向的幽默,本來我打算見到面問佢,點樣會有呢個諗法,但見到面又忘記了問....然後聽見其他同事也有同感,令我再醒起想問佢,點知朱薰快我一步開口

「你塊膠紙特登襯套衫架?」

林公子一貫冷峻,遲兩秒後才回應「係襯個髮型」,大家然後轉身繼續工作,但心裡面已認定,呢塊膠布,係造型其中一部份...

和林公子離開時,碰到他的一位同事朋友,甫見面就問「你隻腳無事丫麻?」,我當時心想「竟然有人唔知呢個係造型!」,然後我又睇呢次林生你會答乜

「開左D肉,五蚊咁闊,不過貼張膠布岩岩遮到!」

我聽到有點迷茫,終於忍唔住口問佢 「其實你係真係受傷,所以貼膠布?唔係造型?」


「造型黎架,特登滑水俾塊板界傷,然後貼膠布襯套衫.....」

「有的士喎,拜~`」

我衝上的士,轉身望見佢在冷笑,你好成功喇,冷面笑匠~~`


4.23.2007

Pro



再重提一次,我最怕撘的士,個司機問我「應該點行?」,俾錢撘的士並不是大晒,但一個職業司機連行邊條路都唔識,咁唔尃業,仲要煩到個客,作為消費者,我絕對有權不滿,尤其是當我表示不滿時「?!你問我呀?!」 對方的回覆九成是「唔好意思,我替工黎!」 你都知你係替工,你要真係替到人工作先得架,唔識路仲黎做替工?!又或者「唔好意思,我對面海過黎,唔熟路」,咁點解你仲要接我生意,咩道理呀?! 唔好同我講「搵食~~」,搵食咪應該裝置好自己,毫無準備出黎搵食,就即係「呃食!」,奈何世上充斥著太多呃食扮搵食的人!

雖然講得好似好火,但每次對方問我「應該點行?」,最後我仍是死死氣回答,跟著又心心不忿,自責又一次姑息了他們,「下次我一定唔會咁答佢地」,但應該點對付,一直唔諗到,直至早幾日.....

我和一個男子乘撘的士,上車後,告之要往目的地,的士司機開始自言自語,「左轉出?...直去轉右出?」,見我們沒反應,對方索性停低架車,重覆再問「左轉出定應該直去轉右出呢?」,我當時已無名火起「又遇到呢d司機!」 此時司機竟然再重覆問題,我身旁的男子好淡然咁回答「你慢慢諗下先!」

嘩!我簡直覺得呢句係「絕」,就算下次個司機問我「應該點行?」,我都可以答「你慢慢諗下先」,諗唔到我咪落車羅!然後個司機終於有所決定 「轉左出啦....轉左出岩..」半答自己半問我們,我和男子再沒回答,過了一會,司機又開腔「係咪一直去.....唔好意思,我對面海車」,我們沒有回應,十秒後,司機又再問「直去岩呀呵?!我對面海車,唔多熟!」,我在旁的男子再開腔 「你打上台問下岩唔岩?」

嘩!出到呢句都好串了,司機沒有問上台,不語憑信念繼續駛向前,之後亦沒有再問路,我與男子對望,他向司機身後做了一個鬼臉,好不威風,一幅「唔俾d顏色你都唔知味」的神情,就再此時,司機再開腔

「林生,你個show真係好好笑,最衰隻碟唔係度,唔係俾你簽名」,我即時擰開面笑,只聽到有人輕輕的回應
「係呀!多謝~~」,到落車先敢再望番佢,佢當然不苟言笑啦,呢方面佢都好Pro,會番到屋企講俾老婆聽先 會笑。

不過雖然係咁好笑,我是百份百認同你個做方的!

4.21.2007

記錄




呢張相,理應係Chocolate果邊出現 放過來這邊的原因是,難得幅相咁靚!在這個 數碼年代,一切都是記錄,先記錄,有用的才貯存,記錄錯便刪除,因此行又影,坐又影,去Party就更加要影啦,難忘的一刻,梗係要記錄低啦.....就因為呢個原因,我好怕去玩影相

首先,去玩地方一定暗,影想一定用閃光燈,面口就會又肥又白,仲要所有details都影都晒出黎,然而去玩
一定要盡情,狂歡時,眼又翻,妝又甩緊半,儀態盡失,這個時侯在強烈白光之下,影出來的相跟瞻仰遺容無乜分別,怎至乎衰過晒,要玩得盡,但仍然識擺到po影相,真係要平時有所準備,訓練對鏡頭敏感,訓練無輪在什麼情況下,一知道要影相,就會「chop行個樣」(迪偉教我呢個講法),包括收緊面容(咁會無咁肥)關目要有力,身記住要企直......如果是自拍,最好拒絕,推唔甩就搵個手長d渣機,自己身體盡量向我,阻止對方以低角度拍攝,把雙下巴出現的機會減至零....

唔明就睇睇我同應彩兒呢幅相,其實當時我同佢都唔多企得穩,相對地我仲steady過佢,起碼唔會做V字手勢!yeah~`所以以為係夜店見到我企埋一邊,唔駛問我係咪「好悶?」我其實係度擺緊po博影相

4.19.2007

Bok Beach



呢份禮物,真係多謝夾盛惠,cute到爆

4.18.2007

新發現



嘩~` 好開心!清卡啤娜幫我另外搞多個blog~`謝謝謝`~

http://schokoladebeach.blogspot.com/

太陽之下無新事




風和日麗,天清氣爽,萬里無雲,海天一色,一年可以有幾多日咁天氣,離開電台時,盧覓雪開懷地說

「海灘今日應該去海灘」

全世界都認為今日應離是放假的日子,既然大部份認為人,都係番緊工,如果海灘真係去海灘,肯定接收到大部份無得去要番工果班負能量,我無咁傻犯眾怒,我都係同大份部要番工、要番學一樣,做呀做,衝呀衝!

It's just another ordinary day!

太陽之下無新事
書檯之上辦工事
馬桶之上辦大事
鍵盤之上講同事
一人之上話晒事
萬人之下咪多事
曼聯之下車路士

B)

4.15.2007

茫了. 痛



我曾經天天去踢波,我曾經希望自己成為一個球星(二十年前香港是有這個夢發的),夢想未能成真,並非因為我屎波,更加與香港球市衰落無關,退出球圈是因為......我怕受傷!

二十多年前,石硤尾大窩平沙地球場,星期六早上,兩班滿面暗瘡,精力充沛,願意將僅有的零用錢,全放在球衣、球褲、球砵上的青年劍拔弩張,大戰一觸即發!

那天我隊於於蓄夠錢,買了個新足球,就是八六年世界杯指定足球『Tango』

每人也爭著落場,爭著可以踢到這個「世界波」,我記得當日我特別博命,除了因為這個價值近四百圓的足球,更因為對手實力很強,傳說當中有兩位已被南華青年軍取錄,贏到就由石硤尾威到番荔景村,最重要的還是,心儀的女神,正在隔離場地打疊球,我當時深信,對方一定會因為我出色表現而動心,賽後會主動跑過來向我說

『你好好波,我叫xxx,你可以送我番屋企嗎?』

夢想是向前衝的推動力,我洞悉戰情,自願放棄打前鋒,以我當時身高,企係前面,唔頂得都嚇得,但我知道後防更加需要我,最重要是疊球隊就在我們龍門後面操練,我梗係扮到泰利咁,指揮若定,不時大嗌提場,更親力親為走去執對方射出界飛到疊球場的波,希望助球隊贏波,仲得到妳對我說

『你好好波,我叫xxx,你可以送我番屋企嗎?』

在一次激烈的攔截中,我聽到bok一聲,倒地後只覺得左腳好麻痺,我知道我傷了,但仍咬著牙關,裝出一幅硬漢子模樣,四圍在尋找她的注視.... 隊友把我扶出球場後,我終於看到她望過來,烈日之下,春青的火焰被她冷冷的一笑撲熄,她意帶不屑的輕嘆聲,像巫婆奸笑,加以5.1環迴立體聲包圍著我....
作為一個好球員,心理質素好重要,要承受得起壓力之餘,仲要識打反擊,妳笑夠了,就是我伺機出動的時侯...
『小姐,有冇水呀?』

她的答案是匪夷所思的

『好心你啦,仲好意思問人羅水飲!?』

然後她刻意放聲大笑,再回敬一個「窮心未盡,色心又起,唔該妳慳D啦~~!」的眼神,的而且確呢個表情係咁,影帝影后級都未必拿捏到,但佢切切實實就是用這個表情拒絕了我....

完場後,隊友扶我去睇鐵打,我們大聲講大聲笑,我像一點問題也沒有,事實上,那一刻我一點知覺也沒有,受傷的腳不痛,心更加不痛.... 直到跌打師傅說

『手尾長喎,斷左骨喎... 』 『唔係嘛,我無乜野左喎,都唔覺得痛!』

師傅抬頭一笑『無咁快,都未知痛,今晚你就知利害....... 不過後生仔頂得住」

那個晚上,我人生第一次為「受了傷而哭」,哭得要大叫「媽媽救命」,那種痛楚是來自....


『發現』


我發現原來傷勢那麼嚴重,可能三個月先痊瘉,半年後先可以再踢波,我發現我無法享受隊友賽前賽後的喜與悲,我發現原來他們是不會關心我的傷勢,只關心的是可否借用我的波砵,還有這個月我會如常夾隊費嗎?唯一探望我的隊友,都只是為了告訴我,在廁所外聽到她仍在訕笑我『牛高馬大都咁無用,正宗大而無當高大衰!』,我發現「你愛的人不愛你」不是最痛,是痛的是「你愛的人不愛你仲要笑Q你」,那才是極痛!


我又試過跟女友吃飯,她姍姍來遲,甫坐下便說「我不吃了!」,然後向我提出分手,再用十分鐘時間說盡我的問題,說罷給了我五分鐘,理應是看看我還有甚麼回應,但我呆著,口中只傻傻的地說著

「『唔好啦..... 唔好分手啦... 』

重覆又重覆.... 她又是那個搖頭輕嘆的表情,留下了一個字 『sigh``』便離場。

我呆坐餐廳內,腦袋一片空白,良久後打電話給朋友,相約出來打檯波,然後再去打牌,仲贏左二十幾底.... 四點幾番到屋企,眼光光訓唔著,開收聲機,正在播放Micheal bolton的「How am I suppost to live without you」,我開始發現自己是不可以無左她,我發現原來自己正在失戀,我發現她那十分鐘所說的問題,我有過之而無不及,我發現我贏二十幾底,因為情場失意,賭場得意.... 我知痛了,我知道比上次斷腳更痛......

上星期一個七十歲老伯,在執貨去買時,不慎跌進衫堆中焗至窒息而死,那天下午,其妻子繼續在中環如常擺賣,是冷酷無情,還是看破生死... 其實是未知痛!兩日後,她再報,樣子憔悴,失落焦慮,痛得欲哭而無淚,她發現失去了老伴,失去了依靠,她發現要獨個兒面對所有人與事,忐忑無助,痛楚與無援令人裹足不前,呆著茫然不知所措..... 身心同時受損,是失戀斷腳的倍數,超越極痛的痛楚!

痛楚是一道道連結你腦袋的大門,你發現得越多,打開的門就越多,釋放的痛苦就更多!

怕受傷的人是最易受傷的,在國內醫院昏迷的男童,在香港昏迷的內地女學生,他們都不痛,因為他們無機會發現自己痛,痛的只有在生有知覺的親朋.... 錯失太易,愛得太遲,從來有愛就有痛,如果那份痛楚是因為後知後覺,不要過份婉惜,倒不如下一次先知先覺,學會所有東西都是存在於這一秒,你能夠在這一秒前發現及預防,就沒有下一秒的痛楚....

我明白生老病死,乃人生必經的痛苦,而既定的東西,做好心理準備就足夠;至於「失去」,從來不是痛苦,只要你明白,失去是因為你曾經擁有過,下次當擁有時,就好好珍惜,因為總會有失去的一天,或許就是下一秒 `~




4.13.2007

C..


H



E


E


R



CHEERS~`

集結力量與好運,我同大家祝願所有人

『大肚生個肥肥白白,健健康康又易湊bb』

『無拖怕,懂得享受單身快樂』

『有拖拍,同時享有共存及私人的空間』

『讀書,真正學會所學的真蒂』

『做得好金,玩得一樣咁金』

『食飯唔駛等檯,打牌唔會清袋,交貨老細唔駛你改,情人唔會反檯,考試唔駛靠好彩,男仕唔會地中海,女仕日日買手袋...今年放假去加勒比海....』




這一年裡,最多留言的一篇是『納悶的野日外』,到現在仍然久不久有人出手,咩原因唔駛我多講,只有超越才能忘懷.....

留低你各大家祝願~~`

你會是第一個嗎 ?

ps:多謝shan333

4.12.2007

難題




遇到難題,一定要冷靜,要相信它是上天給你鍛練智慧的機會!人生的難題就會應刃而解,共勉之~`

4.09.2007

Collect & Deliver



父母是偉大的,但自問無本事做得到,退而求其次,幫助其他父母,一方面幫到人,另一面肯定自己曾動搖是錯的,何樂而不為。

大家有興趣,可以同我一齊做,辦法好簡單,如果你有已經無用嬰兒用品(衫、玩具、床、食剩奶粉、用利尿片...)可以在此留言,如果你超好人,可以到商台放低俾我,又或者你留言,我得閒到你指定地方取貨...

另一方面,如果閣下有這方面需要,亦可當言,我收到什麼,會因應你需要,將貨放在商台,又或撞岩我得閒,我可以直接送貨








既環保,又可以減輕父母們負擔,希望就算你得十零歲,都問下你地 uncle、anutie有冇貨,當然我唔希望要貨的是你們~``

4.07.2007

MeMe






向人講秘密的開場白通常是這樣

『講個秘密你知,但你唔好講俾人知!』
『講個秘密你知,但你唔好話係我講!』

然後如果對方質疑講秘密那人的可信性,那人就會裝出一臉無奈,左顧右盼,壓低聲線,煞有介事同你講

『信我啦,單野係xx講我知架』

那個xx通常是秘密中男女主角的近親、閨中蜜友,而當發現你開始相信,講密秘的人就會加句

『真係唔好同人講呀,至親果個都唔好講呀!』

通常在這個時侯,我都會反問

『人地講呢個秘密你知時,有冇話唔好話係xx講你知,同理叫你唔好講俾其他人知呢!?』

對方此時通常會扯火,大聲夾惡掩飾其劣行

『唔該你唔好扮正直啦!同你friend至講你知咋,以後知道有咩秘密野,都唔會同你講!你自己蝕底咋!』

反客為主,本末倒置!為了忠於自己,為免得到這些無理譴責,我決定在對方要說秘密給我知前先開口

『唔好意思!我唔想知!』

講秘密的人,總是帶著一個動機,有人為了弦耀自己快人一步,有人為了借你不知的東西,推番你的想法,有人秘密換人情,交際應酬必備,有人唯恐天下不亂,有人逼你幫手承擔,有人是試探你的口密指數....各式其式,結論都是一樣,
『知得越多,越無好處!』

如果你認同我講法,以下的東西你可以不看了,因為我決定講個秘密俾大家知







十多年前,我的朋友仍環繞中學時期的同學,嚴格來講,他們都不是朋友,一班變緊大人,媾唔到女,迷迷茫茫的烏合之眾,因為大家都悶,所以變成志同道合,聯群結黨去踢波、游水、睇戲、落bar飲酒、去Disco媾晒d女... .... ... 係我地好想完成心願

一大班人,總有一兩個比較突出,例如特別靚仔、特別好波、特別好笑、特別好打、特別叻、特別高.... 當然有特別醒,就自然會有特別豬、特別矮、特別醜、特別賤..... 我是屬於特別串的,因此不小特別豬,特別笨的人,總會主動同我扮friend,希望學識一招半式,對付其他特別串的人,而我就會主動巴結特別好打的人,我出口,佢出手,我特別精,佢特別笨!

呢班人之中有一個幾十年先會有一個「特別版」,佢特別矮、特別醜、特別蠢、特別無膽、特別易喊、特別易病.... 你繼續數關於特別差的東西,佢都有份,例如特別煩,因為佢特別鍾意找人講電話,又特別長氣,特別唔肯收線、出到去玩,特別遲,特別無錢.... 個個嫌佢煩,而我並不是一個特別有愛心的人,所以當時我建議疏遠佢!但當中大部份人反對,認為有這樣特別醜的人在團隊中,先會顯得我們特別好看,特別好波,特別高,特別醒,和他一起出街,我們會因為女仕們取笑他,而跟她們撘上,有事就將所有責任推在他蠢的身上,人家會可憐他而放過大家。

我絕對唔認同他們的做法,你可以唔喜歡佢,但唔應該唔尊重佢!因此我主動疏遠那班人.... 之後又好好彩俾我遇到另一班變緊大人,媾唔到女,迷迷茫茫的烏合之眾,其實當時我懷疑過,全世界九成人口都係呢種人。一次踢波,對番從前那班人,特別版亦在場,他是負責被人卸鑊,輸波插佢,自己俾得差,就賴佢唔走位,但特別版即是特別版,不但沒半點不快,還切切實實覺得自己存在,這就是他的「存在主義」

球賽後,兩班人如常在附近屋村的茶檔吃早餐,茶檔老闆的大女很美,他是當時全球變緊大人,媾唔到女,迷迷茫茫的烏合之眾的夢中情人,每次我們搞盡心思,希望博得美人一笑,來夠滿足我們一星期的幻想。
由細到大,撘訕我自問高級組,有膽色,有禮貌,有笑位,有內涵,是緊要係通常都有收獲,自己無本事的人,又不甘博不到美人一笑,就借力,借特別版的特別功能,希望吸引她注意,然後借力入位撘訕,特別版通常負責講廢話俾佢地窒,做低能行為俾佢地笑,當然有時小不免會除下佢條褲娛賓,果一刻,我先知道,原來特別差的那一群,是他們而不是特別版....

另一次踢完波後茶檔吃早餐,那是九零年初,張德培剛贏了法國網球公開賽,成為亞洲人新希望,也成為了茶檔老闆大女的偶像,大家當然投其所好,以自己有乜似張德培為向她撘訕題目...

『好多人話我好似張德培架... 個額頭 』
『我係張德培細佬無得賠.. 』
『我識張德培個妹張德蘭.. 』

她一如往常,不至抗拒,但又不會回敬一笑,繼續集中工作,此時,特別版的一番話,吸引了她目光


『張德培是潮洲人,我都係潮洲人,張德培係我親戚... 』

全場死靜了,三秒鐘後,她帶領第一聲笑,然後全場皆大笑起來

『我唔係講笑,我唔講大話,佢真係我親戚,不過我唔記得係幾多叔』

大家越放聲笑,特別版越講得大笑

『我講真,我無講大話!』

特別版四顧在尋找認同的目光,一時情急下,淚水奪眶而出...

『喊咩呀?!搵你個阿叔俾紙巾你啦.... 』

『我無講大話!』

目光移到我處,我不是特別容易心軟,只是特別怕煩,於是我拍拍佢膊頭

『我信你!』
我還記得佢當時的眼神,似找到了人生的信仰,他破涕為笑,我第一次覺得他並非特別樣衰,只是樣子平凡... 他拍拍我以表回敬

『多謝你相信我的秘密!』

之後我們並沒有因此而發展成朋友,只是久不久會在街上碰到,直至上年(2006)年頭我收到他的一個email,相約我於一月九號晚見面

這樣唐突的邀請,通常我是不會出席的,但見他最後留了『很久不見,希望到時見到你,若抽不到時間,祝一切安好』

終於我因為呢番話出席了約會,地點是他中半山的家中,原來他已婚,育有一子,其妻相當不俗,這不是因為他而覺得,她真的是不錯,大廳中,還有些他的朋友與親友,他介紹了其中一名親戚我認識

『My Uncle,Michael... 』

不用質疑,他這一位uncle是姓張的.... 之後我站在他偌大的露台,看著香港夜景,心情相當覆雜,我在想曾經取笑過他的同學在那?茶檔老闆大女在那?他們看到這一幕會有怎樣反應?究竟仲有幾多人知?
還有很多很多問題在腦海中浮現.... 終於我忍唔住問左佢一個問題

『其他舊同學知唔知?』

他再次展現令人唔覺得樣衰的笑容,躊躇滿志搖搖頭

『唔通我學過如來神掌又要講佢地知咩!』

我見過張德培,但這並不是我要告訴你的秘密。

『講個秘密你知,你唔好話係我講!臥虎藏龍,通常是你最看不起的那位!』

4.03.2007

今天應該很高興




恭喜
http://www.congres-deauville.com:81//anglais/filmaction1.htm

4.01.2007

654321




本來想遲d至講,但太眼訓,所以已經減低左刺激性,新一期有獎capture路號碼是....

記住capture完send去我email,睇下呢次邊個羅!

老伴




無論你什麼年紀,有愛人無愛人,結了婚還是依然單身,夜闌人靜,總會想過你的老伴會是誰,出現了還是在遠方等得著。容我簡單直接,我所說的是老伴,不是丈夫、太太,身份並不重要,是究竟那個人會陪我們走到終點前....

下午同阿七在公園散步,我問她『妳會做我的老伴嗎?』,阿七冷冷地拋下一句『你都傻傻地!』,『妳食我住我,仲要食住我?!妳唔係嘛?!』,阿七瞪大眼睛凝視著我『如果你小心D,唔好再跌我落街,我一定長命過你啦,我龜黎架!』 『即係話妳一定做到我老伴啦!』 『我做你老伴,但你死了後,我就無老伴了』 『妳可以再去找其他嘛~~』

阿七沉默了~~`我們聽見的只有季侯風聲

季侯風之強勁,令我倆更加不想開腔說話,阿七驀然停下來,朝天兄單了一眼,風停了...

『到你死才找另一個老伴,太遲,太無計劃,現在就要開始覓尋.....』

阿七說罷,又再沉默不語,大風再刮起.....

夕陽西下,我倆回家去,阿七突然開腔問


『要早點找其他老伴,還有什麼選擇呢?』

回家路上,我一直在想,可以有什麼選擇,未幾腦內出現了一張清單

有人選擇『朋友』,因為朋友可以有很多,呢個無左仲可以有另一個,加上大家可以互相做對方老伴,呢個死完仲有另一個,但問題是總有一個會最後死,咁咪又無左老伴,雖然說朋友可以不停繼續識,但到時先識又違反了阿七的意願,太遲太無計劃,況且朋友未必能夠照顧你起居飲食,到時仲八成周身大病,要人貼身照料

咁仲有咩選擇

再聲明,丈夫、太太可能在傳統上有義務要照料另一半,但唔代表佢懂得如何照料另一半,當你周身病痛,你的老伴應該是一個私家看顧,男女均可,亦即是說我的老伴是可以用錢買到番黎,更即是說我的老伴是「金錢」,諗深一層更加認同,正所謂「金錢可以解決到的就不是問題了」

要有計劃,不要太遲,現在就開始努力搵錢,但其實現在才開始,是否已經遲了,anyway,又當我真係搵到「錢」做「老伴」,但夠駛唔夠消遣,當然你會說幾十歲仲有咩消遣?咁就睇性格喇,我咁鬼怕悶,無野做真係同等死無分別,即係話要搵d寄托,又唔可以太體力勞動,又要跟人物性物,咁我最大興趣都係識下女仔,但係到時幾十歲可以識到咩女仔呢?唔怕,我有錢,「金錢可以解決到的就不是問題了」,但有些感情是金錢買唔到的,即是說要早點識定多d,否則太遲太無計劃,亦即是說我要識定一d到我 七十歲 係二三十歲的女仔,即是說我現在要向剛出生 的女嬰埋手.....



『喂!你好似幫我搵緊老伴喎!』


我與阿七相視而笑,『我同我老伴行多陣先番去,你番屋企先..』,說罷阿七就轉身而去,我們不約而同唱起這首歌來...

「除非你是我,才可與我常在............一個人 同偕到老不靠運氣~~」