9.30.2006

Caveur



第一次食松露是在多年前的十月尾,當時我對松露毫無研究,只知道它是一種主要生長在橡樹鬚根部底下、一年生的天然蕈菇,種類約有三十多種,其中白松露、黑松露是最美味。奇怪吸引的香味,有人用舊傳單、蒜頭、麝香,甚至連精液都曾被用來形容松露的味道,歐洲人更認為松露有催情作用!我就知咁多,但一句戲言,朋友生日任食我請,佢選擇食松露!
還記得廚師近距離拿著松露,我見朋友已經被那濃烈的香味迷得神暈癲倒,我則覺得好刺鼻,好想大聲打乞嗤,至於食落口之後,更加頭頂閃出無數問號「有咩好食呢?」
之後因為工作在同一間餐廳,老闆請客再食多次,感覺跟第一次一樣,直到老闆說「其實都唔知有咩咁好食!」我沒有回應其實我亦有同感,免得被誤會好擦鞋!「不過請客唔食又唔得!」 我猛咁點頭扮晒好有taste...其實心裡面已經係松露身上面蓋了『過譽』這個印章!

我唔鍾意食松露,但我好恨做一次Caveur!所謂caveur,即是松露獵人,但獵松露,並不是荷槍實彈去森林打獵,而是帶著獵狗,去橡樹林去尋找生長在地底下的松露!從前獵人帶同的並不是狗,而是豬,據說松露內含有讓母豬「性」致高昂的費洛蒙,所以不須經過訓練,母豬就能非常準確的找到松露。可惜世上除了人類鍾意吃松露外,豬也擁有同等的品味,千辛萬苦找到,發狂似的酹土 裡面的松露挖出來,交俾你d人類,你當佢豬咁蠢咩!梗係自己食落肚啦!於是獵人改訓練母狗來獵松露;亦有傳蒼蠅也特愛此味道,因此只要觀察哪裡有一群蒼蠅圍繞,就表示地底下可能有松露。當然地上有一堆屎亦都會惹到一大堆蒼蠅圍繞!
我並不是果種三十歲後想轉做另一個工作的人,我只想去一次,因為我知道意大利某小鎮是有「尋找松露」的森林之旅;對方會提供狗隻同導遊,聽講話有d會提供豬,一見到咁樣就知道綽頭行先,雖然聲稱尋獲的松露全歸你所有,但如果你信真係會搵到,你可能是一個極不浪漫的人,當然你可以叫自己做理性,但我想提醒你,如果咁都信,小心會被保藥黨呃到!我覺得可以同愛人手拖手,另一隻手拖住一隻豬,漫遊神秘得令人既驚又喜的森林,呢個畫面好cult!還有點像M Night Shyamalan的電影世界,「尋找松露,卻找出從未揚露的....」
不過我呢一秒認為,再cult的畫面是,我左右拖著父母,父母分別左右拖住一隻豬,一隻狗....淨係企係度影幅相都已經係「鎗火」親情版啦!Must Do!
其實要得到呢個畫面真的不易,但前輩常說,目標要SET遠大一些,理想在現實中會打折扣,SET去意大利,到頭來可以一家人去城門水塘野餐已經好滿足,好快樂!尋找松露可以在任何地方也找得到!

9.29.2006

水和田

笑到咁咪幾好睇!邊有人咁多眼淚水架!妳真係cute到爆~~~

http://www.metacafe.com/watch/257818/he_she_hit_903_crystal_tins_birthday/

那個下午我在舊居燒蜆

很久沒有真正駕駛,繼續keep到以前水準,你睇下可以泊到兩個位中間,仲可以落車唔理,我諗我唔渣車係....絕對岩!

很久沒有番舊居了,因為工作關係,要找一些舊相片,阿立又肯陪我去,最緊要係出埋車,咪番入去睇下佢家下點羅!

在對這裡住了十年,感情深厚,亦都對這地方有點厭惡,它是屬於已過去的階段,現在它是爸爸媽媽的別墅和我的私人貨倉,可能因此,每次回去都不會逗留得耐!

其實間屋keep得好好!我諗最大原因係父母常常入去打理,同時我估我對它開始無歸熟感都係咁原因,始終最私人空間俾其他人入侵過,那個就再唔係私人空間,正所謂覆水難收!
不過係廁見到呢雙牙刷 ,和平自處於自己空間,但又同時共用同一個杯,同一支牙膏,同一個空間,互不干預,但心中有你!這就是我最理想的相處之道。

又唔覺意唱起歌來「除非你是我,才可與我常在....」



9.27.2006


人生究竟有幾多野係我地有權揀?係片場有個笑話,每當放飯時,茶水問你食乜,如果你答「有咩揀?」,佢就會講笑咁答「有得揀食定唔食!」 呢個笑話會令我想起「五天精華遊」個gingle,選擇看似多,其實「我有得揀咩?!」
由出世開始,父母,兄弟姊妹無得揀,但其他可以選擇的東西,你有機會揀過嗎?讀書無得揀,課外興趣小組有無數咁多選擇,但跟本無一樣是你所好,你最想的是課餘跟朋友出去玩,留在家中打爆機,但無呢個選擇,焗揀之下揀左天文學會加入,第一日上堂,導師問點解會揀天文學會加入?「我有得揀咩?!」
辛辛苦苦讀完書出到搵工做,份份人工唔過萬,而世界上選擇太多,買衫、買鞋、買鐘、買馬、買波、媾女、媾仔、3p、4p、去旅行、去偷食....你可能只不過揀左其中一樣,就已經爭落大筆咭數,最緊要有份工,可以個個月有糧出,做咩野工「我有得揀咩?!」
工作唔如意,寄望愛情,先講女性,有得揀,一定係高大靚仔,有學識、擁有一份高薪又穩定工作,咁好條件,點會揀妳!?就算揀妳,要頂得住佢唔專一!咁好條件而又專一的男子,五十萬年先會有一個!退而求其次,老d窮d光頭都硬哽落肚,只要你肯對我好!咁簡單要求,無就無!把心一橫,橫豎都無,不如話俾人知妳只會嫁給Johnny Depp這一款!羅番個尾彩!點解唔拍拖?唔寂莫咩?「?!我有得揀咩?!」
男性方面,有得揀,一定四十三吋腳長,有學識,唔黐身,仲要老豆淨低幾億俾佢過日辰!you may say i a dreamer,but i am not the only one.....只要人工智能發展順利,不久將來一定可以研製出一個咁ideal女友俾我!咁現在未有,只好退而求其次,傾得埋,多隻腳陪食飯,放假去玩可以多個人互相照應,咁樣關係咪幾好!點解係要結婚呢?!唔結婚就分手!「?!我有得揀咩?!」
「無得揀」才是世上「最佳選擇」,如果我們每一樣東西也像父母、兄弟姊妹,全部上天安排好,無得揀!我們的人生將會比現在快樂得多!有大部份的人「俾你揀」同「焗住揀」都無分別,跟本永遠找不到「最佳選擇」,因為大部份人跟本不知道需要什麼,追求什麼!「無得揀」就最好,你俾乜,我咪要乜!幾簡單,幾開心快樂!據聞黎明係演唱會綵排時,談笑用兵 「排與唔排,都係上天安排!」 一如黎生說話風格,聽完會忍俊不禁,但細想常中並非無道理!黎生,等我同你對埋下聯。「無得揀,未必係慘!有得揀,絕對唔盞!」

9.26.2006

折頭人


出黎交際應酬,總要有兩招旁下身,有人的本領是搞氣氛,有人喜歡做老細請客,有人天南地北,無所不識,有人永遠有班女跟住,當然這個只供男性市場,至於女性,最容易變成朋友,好可能係對方買東西有「折頭」!
九六年百份百岩feel內,我寫了一場關於折頭人的戲,內容大致是鄭伊建同鄭秀文本是一對,伊建因邱淑貞移情別戀,鄭秀文班好姊妹,梁詠琪,蘭茜有日去賣衫撞到邱淑貞,起初充滿敵意,但最後發現邱是vip,買衫有七折,即時化敵為友!
折頭人在社交界所向披靡,上至買樓、買車,小至街市買菜,街邊拮魚蛋,佢都有能本事羅到折頭俾你,能夠遇到呢種人,是上天恩賜給你的福氣,就算遇到的不是全能折頭人,咁打個五折,無得買菜,拮魚蛋,都仲有買衫、飲野、食飯、家具、電器、建身、瘦身.....
同折頭人相處都有學問,人家俾折頭你,你要回十足的禮,例如千祈咪要買野先搵人,要投其所好,找出除了買野外的共同興趣,送他一些他找不到的東西,例如親自下廚煮一餐出街無可能食到的飯,呢個世界無free lunch!
我唔算喜歡買野,又怕一逼自己做唔想做的行為就會好假,所以係呢方面的折頭人,我認識有限,但世上還有另一種折頭人,不過是我們給他折頭!
有次在街上碰到一個我認識了半年的so call 朋友,由於我缺席之前一晚的po局,呢d情況一定有人話我知現場有好多美女,仲個個熱情如火,呢d真係預左,但呢位人兄告之撞到我另一位女性朋友,飲到醉晒見人就攬,但那位女性朋友當晚跟我在某地方飲野,她只是曾經經過門口,跟幾個熟朋友擁抱,與那位人兄打個招呼而已!好彩佢唔係做八掛雜誌,係就死得人多!之後我又竟然唔知點解繼續同佢交往,我發覺佢並非存心作野,不過佢講野係要誇好多先係講野!試過一次我同佢睇住一對情侶在街頭口角幾句,佢覆述給另一位朋友聽的版本是,「果條女係咁鬧條仔,粗言穢語,條仔幾次忍唔住想開拖打佢,都忍住,越忍就越想打佢,個拳頭渣到實一實....」我在旁看著他,佢即刻說「係呀!你留意唔到之麻!」
事實是有發生,但節情被誇大,情緒亦被放大,佢無非都係想講出黎好聽d,「講誇d!好笑D!」,所以聽這些人說話,要打個折頭!最好笑呢種折頭人遇到傷害,佢地口口聲聲要報仇的方法,到頭來都是打了個折頭,話搵人打佢就變成打電話嚇佢話我會搵人打你架!幾cute丫,我鍾意聽呢d折頭人講故事,一方面拆解真相所在,另一方面學他們的觀察力,創作力,組織力,對寫劇本同做節目都有幫助!呢個世界每一個人身上都有野學,唔好放過!

9.23.2006

你就好啦~~





係日本,見到每個香港人都問「睇邊場?」 「睇左 未?」,番到黎香港,係人見到我都問「好唔好睇?」
都係答「不枉此行!」跟住對方一定講「你就好啦!」
咁你地都唔錯,零消費但係有相睇!老友!are you ready?







唔知點解會同佢講「孫小姐,可以跟妳拍照嗎?」 講果時仲有d心跳加速,我諗...我係fans!哈!其實我唔係,不過佢俾我感覺真係好親切,咁講好老土,但呢個係真相!一開show,佢就大嗌大叫大跳,呢個唔駛諗....佢係fans!




麻吉小姐,典型日本卡嘩兒,笑容甜到惹蟻,不過可唔可以影相唔好V字手勢!


9.20.2006

The Girl next door


有時隔離鄰舍太守望相助,我會因為咁憎左佢地,但有時太唔認識,我會因為咁喜歡佢地!認識是需要時間與空間,欲速不達。
隔離的那家人已搬來超過十個月,但到現在,我一眼亦沒有見過他們,據聞佢地第一日搬到來,便主動敲我家門,熱情親切跟我妹妹打交道,還借了我們半打汽水以作日後繼續交往的「八達通」,好可惜我妹妹是一個PR,恭維的說話自己講太多,因為對其他人的無故熱情對待,佢會列為「虛偽老土駛唔駛呀?!」,咁佢就會裝出一副驚死你唔知我唔鐘意妳樣,令對方知難以退!每一次都成功,呢次當然唔例外!自此,我就無機會見到呢家人!係如果佢地出門口,見我在等LIFT,都會轉身番入屋,肯定我離開,無機會再撞見我先再出門口!

我其實唔知妹妹發左幾多成力,可以令佢地咁怕我地,但我寧願係咁,因為我唔想信會同一家D鞋放晒係門口,D底衫褲浪晒係露台可以傾得埋,至於守望相助,萍水相逢,幫係緣份,要大家好好感情先幫,咁就唔係守望相助,係供與求,提供感情要求責任性回報!就同「孝順父母」與「愛父母」的分別一樣!

最近我開始研究呢家人,原因來自半年前的一個下午,我在等LIFT,慣性望望這戶人門口放了的鞋,發現有兩對小女孩的鞋,好可愛,臨入LIFT之前,我聽到屋內傳來生硬的鋼琴聲,入LIFT後我腦裡面飄過一個畫面是這樣的,兩個年紀相若的姊妹分坐在鋼琴前的油木椅上,母親坐在梳化上,一邊看八掛雜誌,一邊篤束著兩位小可愛練琴.....之後我每逢下午出街,只要看到門外那兩對可愛的鞋,就會聽到屋內傳出鋼琴聲;她們琴技天天在進步中,然後我心想,我一點也不會彈琴,何來覺得佢有進步呢?其實我對這些琴聲開始有感情,對有感情的事景人,你會留意其優點多於缺點!

幾個月之後另一個下午,我又外出等LIFT,我聽到屋內除左傳出琴聲外,還傳出兩姊妹的爭吵聲,「俾番我!」 「明明係我架!」,我開始奇怪,點解兩姊妹一邊嘈交仲一邊可以彈琴,我估你叫朗朗都未必做得到!「會唔會係播碟呢?!」 「拍電影咩?!」 「電影就似D鬼片,可能兩姊妹其實係死左,但個鋼琴仲彈緊!」橫豎都是自己空想,我選擇一個自己鐘意的版本。

我終於明白點解會咁,係因為一直彈緊琴果個係阿媽!所有要從新想過,個畫面係咁,阿媽好辛苦安頓好兩姊妹,就撲上去鋼琴前,巨躉佔據大半張油木椅,又粗又骸的手指,粒粒皆辛苦地把每一粒音符彈出來.....之後媽媽犧牲自己打牌、煲劇,傾電話時間,除左照顧家庭之外,其他時間就是練琴,最後生羅獎做唔到,練得黎應該可以做到最老羅獎果個.....努力呀!唔知咩太!

然後到最近某個星期日下午,我倒完垃圾從後樓梯正準備離開回到屋去,我聽見佢地出黎,為左永遠保持住神秘感,同埋唔想驚動佢地掟彎番入屋,我企係後樓梯等佢地入lift先再行出黎,終於我聽見媽媽帶住兩個女入左lift,「叮」一聲lift門關上,我慢慢從後樓梯步出,呢個時侯我竟然聽見琴聲,望過去門口,得對男人鞋,怕且都係個老豆喇掛!?!咁...咪又要從新想過!

其實個老豆曾經有機會變成朗朗,但為左要同太太結婚,所以毅然放棄去參加比賽,今日為口奔馳,只可以在假日家人不在時騷騷手癮,太太為左回報丈夫的犧牲,決定要苦練好琴技,幾多歲練好都要出去比賽,羅冠軍時致謝詞就係講番呢個可歌可泣愛情故事!

嘩!The uncle next door 呢個戲名岩晒,但係諗到咁精彩,我更加唔可以再見到佢地一家人,因為我心裡面已經有設定型像;雖然係「真人真事改篇」,但梗係想梁家輝,吳君如主演會想睇一百倍啦,幾十年先有會一次DA VINCI CODE咁,一見Tom hanks就合埋眼,繼續幻想像自己心裡面個男主角!通常我們都希望有事景人可以美化我們平淡的事景人,人家唔俾咪自己諗羅!深淺濃淡,自己一手包辦!或者你會答我得閒死唔得閒病,仲要用腦諗埋d無謂野?!唔係無謂野!係點樣美化你平淡生活!如果都唔明,我可以幫你,只要你打側身海棠春睡,咬住個嘴角同我講~~
『Cmon! Colour Me BaDD~~~! 』

9.19.2006

天地

『天地』俗稱是『竇』,一個可以容納一班志同道合老友的樂土,夾band、HIGH、聽歌、吹水、打牌、開P、hae.....不過唔係六樓后座,所以唔會玩true or dare !
另一種『竇』主力要黎住,通常人數兩至三個朋友,大家分租一個一個人住都細的單位,但又唔同情侶同居果種,果D叫做「窩」!唔理係「安樂窩」定「一品窩」,定位溫暖、整潔同齊備,兼要齊心!竇是「亂」的長期代言人,狗竇已經咁衰,仲要亂過狗竇,跟本存心要將竇打到落最地底泥,點解唔可以有「一品竇」,而同時你地好多都其實係「狗窩」黎之麻!太唔公平!
就係因為你想世界上只得兩種類別,將窩同竇分開到天與地,有人偏安排佢地走番埋一齊,拿起個「與」字,變成近年興起的「天地」,呢個TERM一出,個「窩」即刻被比下去,「竇」就更加被擯至瀕臨絕種受保護類別!
「天地」的可能性實在太多了,佢可以係「一間屋」、「一架車」、「一隻船」、「一個公園」、「一間酒吧」、「一個廁所」、「一部電腦」、「一條街」、「一個區」、「一個晚上」、「一個賽馬日」、「一間夜總會」、「一張床」、「一個天台」、「一間時鐘酒店內的房(唔好係2046)」、「一間咖啡室」、「一個桑拿房」、「一間電影院」、「一間書店」、「一個商場」、「一間club」、「一間band房」、「一間畫廊」、「一個酒庫」、「一個保險箱」、「一四一上面的地址」、「一個因生病的下午獨霸全屋睇咸片or重播電視的假期」、「一個全麻甩佬連睇三場直播波的晚上」、「一個又贏錢又可以同姊妹講是非,講買野的麻雀房」、「一家團聚」.....可以成為「天地」的場地肯定還有更多更多,每個人心裡面個天地都不一樣,唯一共通就只有是,當你一入了自己的天地,你邊度都無興趣再去!


有朋友幾千銀一個月租左工廠大廈一個單位作studio,有其他朋友覺得佢又做浮誇野,我覺得同渣保時捷一樣,你可以覺得浮誇,但不代表你其實因為渣不到保時捷,所以抹黑佢為bad taste車,得不到的天地又應該係硬泊個浮誇位,唔係心理好難平衡!
今次去倫敦的其中一個下午去了唐人街後面的old compton street同朋友飲茶,那裡是同性戀人仕的天地,還有不同酒吧有不同主題,military、camp、sailor、queer..... 我一向唔抗拒呢d野,不過我一直唔明點解要搞到咁慌死無人知,但朋友的說法也不無道理,不同人有不同需要,看見這裡的bar、coffe shop、book store人頭湧湧,有求先有供,難得有地方,點解唔可以有佢地「天地」
你如果覺得兩個military打扮的男人當街邂逅難頂,更難頂的是那位擅闖他人天地立心不良睇怪物的不速之客!我講的不是自己,但這類人大有人在!
人人頭上一片天,腳踏的土地,人人不同,天地之間,各有乾坤,互不相干,咁就個個都會係「歡樂天地」



講番朋友個天地先,樓底夠高,裝修相當簡潔,入到黎會理解點解邊度都無興趣去!係好舒服!不過我都係鐘意番屋企,果度唔係我天地,唔係咩窩,唔係咩竇,係我「屋企」就夠了!

9.18.2006


本來想肆無忌旦狂睡,但突然覺得世事邊有咁就我架!都講過,梗係我想狂睡,就會鑽牆,又或者有突發工作,又或者有親朋突然有事找我,越想越不安,太有組織去放肆都唔係咁岩我,我都係即興放肆岩d,仲要係放肆完先發現自己好放肆!我較定響鐘十點響,之後有人打黎搵我「喂!未醒呀?」 「唔係呀,十點醒左啦!見無乜野咪訓多陣羅!」 咁可能仲可以訓多d!
以上是一個好疲但無法入睡的男人自言自語,希望想多d,可以容易d入睡,但偏偏越想越精神!
失睡的另外一個原因是今日看了一本未出版的日本翻譯書,其內容縈繞著我,但最痛苦莫過於現階段不能透露其內容,但絕對值得期待!不過如果閣下是80年後出生,呢本書你未必有共鳴!我呢d死老鬼就中晒!剛剛先同年青貌美的ANGELA講開,點解我要去睇MADONNA,其實除左朝聖,還有是實現童年夢想,用消費去實現夢想,証明自己進入某個階層,同點都要渣一次保時捷的心態差不多,在「LOST IN TRANSLATOR」內,這種行為被認作是進入「中年危機」的通行証.....講到這裡我開始覺得好悶同好精神,我覺得我絕對需要「肆」,但並不是「放肆」,是「食肆」,好想食個早餐A,嘆杯奶茶,睇下報紙,同D伙記吹下波,吹下馬,研究下豪情版,今朝都幾涼,出街一定好舒服.......

9.17.2006

完事症侯群



一直都覺得森美同otto好似,基本上係同一個樣,但只要真正接觸過二人,會發現佢兩個係完全唔同人種,樣貌一樣,命運不同除了來自上面俾你個劇本,其他就要睇你性格!
據聞森小一班演員患上了「完show症侯群」,前晚同迪偉、王苑芝飲野,迪偉仍然懷念果條粉紅色馴獸鞭,王苑芝口口聲聲「我要杏人」,有睇觀眾就知我講乜,無睇講左你都唔明;係電台見到小儀,佢口口聲聲話第六年羅,無咩感覺,但十五分鐘內講左三次,真係幾無感覺喎,至於森美,我唔敢問,因為見到佢個樣就知道唔應該再提,唔想再提都係呢種症侯群一種!
從前我每做完一個project,一完事果日,一定要玩個痛快,但係而家我唔會,一來怕狂歡之後帶來無數更加痛苦的後遺症,二來我唔覺得再有咩值得慶祝,一件事完了就是另一件事的開始!有人話高潮過後是人生最空虛失落的時侯,我覺得因為唔知下一站去邊,做咩所致;我係「注意力失調症」患者,我工作時會諗去玩,去玩時會諗工作,所以每次狂歡期間,我不停在解決未完的工作問題,你覺得我唔投入無可能狂歡,如果玩完唔知做乜,我先狂歡唔起!所以無野做我一定唔會去玩,好驚玩完之後「咁跟住點?!」,但多野做果排,我會玩好多,已經唔係「work hard play hard」 ,係「I need to work....so I have to play!」
不過又咁講,幾十歲人仲有咩好玩,我又唔鐘意「劈酒」,但真係鐘意飲酒人又唔係咁多,到頭來我所謂玩,都係一條友係街行,睇人睇事,係呀!咁樣我就覺得好好玩架喇,家下細膽了,以前深夜行旺角,真係刺激到呢!「有暴力、有色情、有罪案、有英雄氣慨、有淒酸落泊、有蠻不講理、有口水多過茶....」真係應有盡有,愈夜愈精彩!可惜人老了,總覺得在家先係最舒服!
今日陽光普照,我無完事症侯群,唔想出街,在家裡睇「擺po皇」做show已經好滿足!

9.15.2006

9141953


我本來唔係好肯定,不過一分鐘之後,我見msn上面online d acc個題標都轉晒「地震」、「1953 earthquake」,我肯定自己無感覺錯誤。平凡曾通的一天,又因為呢個輕微震動而泛起漣而漪。你仲會問「地震果時你係邊?做緊咩呀?」 我得到大部份答案都係「係公司,做緊野」 而小部份係「係咩?唔知喎!」「我做緊gym,唔覺喎」 「我岩岩去緊廁所,我仲以為係我打屎震添」(真係笑破肚皮) 還有我「我係屋企做緊野,我覺得真正地震唔係咁!」
去北海道拍攝「七年很癢」時,唔知點解要左轉右轉,早機去,到扎幌也經晚上八點,身心皆疲,食完飯就番酒店訓,衫褲都除唔切就訓著!第二朝七點幾,我俾野搖醒,係張床,張床好震!我醒左,定神三秒後同自己講「地震喎」!跟住就跌番落床繼續訓,幾個鐘後起身,出去做野先知原來早上七點八級地震,油田都因為咁燒著,四圍的公路爛晒!有位同事話「嘩!我地住酒店十樓,其實好危險!」 「其實塌起上黎,十樓同住地下係無分別!」然後果個下午不停有餘震,D餘震係可以震到你打橫行!之後去到一間餐廳食飯,突然又震,同事們發現原來現場來了一個二百幾三百磅的女人客,剛才只是她經過,但係個女人坐低唔夠一分鐘,再次震,仲要震到左搖右擺,我和同事望住肥女客人本來穩如泰山的坐著,突然整個人被震動埋牆,和同事異口同聲「地震呀!好震呀!」
我認為咁先係地震,不過聽過朋友在台灣大地震的所見,我呢D都唔算地震,佢用左八個字形容「風雲變色,地動山搖!」 所有係電影內見過的畫面活現眼前,但置身其中,不時戲院,無路可逃!
仲有唔夠一個星期,921大地震又不經不覺七周年! 大家有冇發覺,時間過得很快,但係我地行過路得好小!

9.13.2006

靈氣逼人


嘩!係呢個時侯睇到呢部咁經典「鬼片」,真係「唔該晒!」



二十二年前作品,而家睇番,有某d位都仲係幾驚!當然全部戲最驚,其實係麥潔文扮演果隻厲鬼!再加埋首主題曲「夜夜痴纏」,一哼起個前奏,真係會毛骨悚悚然!







據聞電台係深宵節目唔可以播呢隻歌,因為曾經有人試過插,真係見到有個紅衫女子飄過~~~~
落雨添,咁即係仲有排先天光,呢一刻仲大風到吹埋左我度書房門!好驚呀~~~!!

9.12.2006

Fall

















涼風冷雨,呢種天氣好適服,我鐘意秋天叫FALL多過Autumn,落葉嘛,fall岩d,秋天係戀愛季節,fall in love麻,fall岩d!對d呢d 「下降天氣」,我反而持續向上喎!我講D情緒!
著衫呀!老友~~~

因為911..


都講過,有些微不足道的事情,但發生係「大日子」,一到過時過節,什麼紀念日,你就會自然想起!

五年前的九月十一日下午,我拍攝的電影「男歌女唱」,只剩翌日的拍攝,當時我是「嘩嘩嘩」的其中一個主持,無錯,就係同阿澤果期!我請假出去拍戲,戲拍完後,原則上我應該返回自己電台主持岡位;於是我下午番電台搵當時二台渣fit的一位高層,商討我幾時再上班的事宜,但對方支吾與對,唯唯諾諾,顧左右言他,我心裡已知道佢想話 「叫我跟住唔駛返!」當時年氣盛的我,覺得對方好無用,做到咁高位,連呢d問題都唔識處理,於是你唔講我自己講「其實個節目係咪唔駛我喇?!」,佢當然時繼續支吾與對,唯唯諾諾,顧左右言他,我心裡面覺得對方好廢,同你合作真係貶低我,如果我再唔走,就會開聲X佢!於是我就係咁離開左「嘩嘩嘩」,之後每當夜闌人靜,當那色士風無幽幽的響起時,我總會想,如果唔係佢,我今日成就會唔會唔同,會唔會變到阿澤咁(其實我好唔恨);老實講,第一次做電台純係因為心願,拍茱麗葉時膽粗粗同君如開口話想做,跟住李力持又要去拍「少林足球」,就係咁樣就入左做,做左差不多一年,又覺得自己仲好想拍戲,又難得有機會拍,咁咪請假走羅,做過咪算羅!今次再做番電台,我當係一份職業,我每日都想,點可以令自己份職業變成事業,心態不同,想法也改變!所以今日再想起這件事,這個人,我終於明白問題是在於自己!如果我緊張份工,我個上司就算點無能,都唔可以開口話佢知,更加唔好係個樣到寫住「你好廢!」,正確方法應該係想出一個解決方法,唔覺意pass俾佢,當係佢自己諗到,令到佢變成你恩人,咁就雙贏局面!其實邊個係邊個恩人,大家心照不宣啦!
對付廢上司只有一個方法,就係快d變成佢上司,所以首先要唔好俾佢趕走!叻過佢一d都唔出奇,但更加叻係唔好俾佢知道你叻,大智若禺!唔怕會教精佢,佢無左你唔得,佢上自然會帶埋你上,做到一人之下,萬人之上絕對唔錯啦!『世界之最攀上更空虛』(隨意門 Y)

講番五年前,好記得夜晚係去新伊館睇「絕世名伶 范曉萱 」,當時大S、細S仲同佢(S O S)唱OPENING,兩S都完全唔掂!睇完出黎,d電話聲未停過,全部都係講「世貿俾飛機撞!」,無人再講過個演唱會!
其實當年個演唱會未算好精彩,但永世難忘,咪又係果個道理羅!因為發生係911果晚丫麻!咁大家以後唔會唔因為911想起 關海山先生! 蝦叔 R I P

9.11.2006

老 請注意


各位同我年代的「老友」,我有事相求,邊位有齊各個唔同版本的「time after time」,無碟唔緊要,有齊個list就夠!
如果驚被發現 老 友身份,可以email俾我,放心,如果你同我係同一個年代,我一定會保護你身份,唔會外泄,自己人嘛!

希望幫到我,謝!

都會過去



影藝年底又話會拆,天星碼碼十一月又會拆!從前我聽到呢d消息,都會有無限婉惜,但當一所又一所藏滿往昔美好記憶的地標,一所又一所被拆下,我開始接受!每個地方有每個地方的文化,歐洲可以保留咁多舊建築物,除左國家支持之外,地方大都係其中一個原因,我成日都講,其實歐洲人食煙勁過我地好多,亦都無功德心過我地好多,d煙頭四圍掟,不過地方大,你唔覺之麻! 香港嘛!地小人多,個個勞勞碌碌,營營役役,為口奔馳,仲邊有咁多閒情理d藝術野,你話果度興建一間全港最大,有專車接送按摩場,就會有好多人關心,千里迢迢都會去試下,唔試都去睇下!況且,影藝都真係好舊,又唔番新,要睇另類片,都去IFC昏電影中心啦!所以呢次我無咩感覺,只係又一次哼起黃偉文係「燕尾蝶」尾段的兩句歌詞
『叢林不割下,如何建造繁華!』
但一樣野離開,你總會係心裡面同佢搞個「永遠懷念你」特輯,請番好多自己係果度美好或者極痛苦回憶番黎,聚下舊,懷緬下!「係呀!影藝戲院生前,永遠唔會遲到,一定好準時開場...」之類啦!
我最深刻果次都係睇「情書」,睇完出黎係咁喊,喊到去灣仔先收聲;仲有一次再早d,約個女仔睇戲,部戲叫「世紀未暑假」,睇到一半個女仔發脾氣,問我係咪玩佢,叫佢睇d咁悶戲,「最憎d扮野人!」 我鄒凱灘生平第一次係戲院俾人「殊~~~」 就係因為呢個女子,於是我輕輕撘住佢膊頭,係佢耳邊同佢講
「不如妳走先啦!」 好鐘意個「啦」字都未講完,佢已經慌死人唔知咁走左!其實我一直都唔想記番起我約過呢個女子!但係通常懷念特輯都會有d唔知點解人出現架啦!其實以前成日去呢d地方「影藝」、「碧麗宮」、「藝術中心」、「新華戲院」、「藝穗會」,都係想撞到黃耀明!但係迷戀明哥的日子,都過去了.....所以仲想舊屎,舊屎沖走左啦!