SH bonus track

好兄弟，閒話休提，睇！





佢就係「batman 豬」，你今晚有睇就明講乜！

賀

達到十萬人次果刻，七仔係咁樣賀我！












都無野食，走~~~~













好記得阿媽係我細個同我講過，俾龜咬住，要行雷隻龜先會放開口，可能今日都有行雷，所以七記肯放開口掛，類似呢d無乜科學根據的傳聞，我仲聽過好多
『四腳蛇條尾斷左要掩耳，唔係條尾會飛入耳』
『撻生魚如果撻出手腳來，果條其實係化骨龍』
『哽魚骨要用個碗放係頭頂，再用筷指邊打邊講骨落就會無事』
『食飯唔乾淨會娶個老婆昏嫁個老公係豆皮』
仲有好多好多，不贅！但我聽過兩個最離譜的，是來自一個中學同學陳捷，佢是水上人，佢話汀九對出有個旋渦，被佢捲落去，出番黎就會係鯉魚門佢又唔講誇d話係加納比海，咁我一定唔信，鯉魚門有可能丫，所以到家下我仲覺得係真！另外就係係維港有一條蛟龍咁大條鰻魚，四年先上水面呼吸一次，我同學話係天星碼頭見過佢個嘴，佢話個嘴十幾個男人手拖手圍埋咁大！嘩！誇到咁點信呀！但係我每次撘船經過天星碼頭，我都會望望個海！
我們總會因為一些事而想起一些人，有些刻骨銘心，有些不堪回首，有些繾綣一生，有些落花流水....
其實要人想起又幾難，只要你有東西值得人家想起，蛟龍又好，旋渦又好，龜咬又好，哽骨又好...總好過有人提起你，其他人話「邊個呀？！講緊邊個呀？」如果你係咁，快d同人講鰻魚的故事！

信

我其實無睇過「龍虎門」，細個覺得「連環圖」好cheap！同埋我最憎打打殺殺！係去到後來夏金城唱「妳在何處馬小靈，我王小虎空有虛名！」，我先知呢兩個人物係來自龍虎門，咁都係知道左，唔代表有興趣睇！我家下想去睇，都係因為個導演叫葉偉信！

九八年寫「生化壽屍」開始認識葉生，開頭又係果d「你咁型我又咁串」，咪大家都唔多啋對方羅，後來因為工作傾多左偈，我未遇過一個人思想咁「黑色」、咁「絕」，既絕情又絕望！一般人食飯前咪講句「大家食飯」或者簡單d「食飯」，其實唔講都得！但佢會自言自語「有得食就食多d喇，呢d好難燒落去架！」，佢絕望都咁，但係其實又好sweet過喎，佢想送一個連位骨灰庵俾太太！佢又好識慳撿，搵office話一定要搵間有鬼，咁就會又大又平！
葉生係魔術狂，我睇佢表演早過劉華十年，佢好清晰架，想學就俾錢「你都係想踢爆人，咁你買黎任你踢羅！」佢識變野之外，個人變化都好大，其實捉摸佢只有一個方法，就係唔好去捉摸佢！
同佢只合作個三部戲，其實我自己最鐘意「爆裂刑警」，因為真係一次合作，佢令我劇本昇華十倍，我劇本亦到完全配合佢發揮，到後來「茱麗葉與梁山伯」，其實已經變成佢個人表演，當然亦都係我認為佢表演得最出色的一次！
我其實唔太熱熾同佢再合作，大家都長大了，還可以像以前那麼信任嗎？就算可以，最怕原來我同佢只是「童星」，最紅的時侯已經出現左！長大之後再做就穿晒崩，最美好的印象也粉碎！無咁必要丫！

余文樂好似葉偉信，但樂仔表達能力比阿信強，又咁講，好小可以再弱得過阿信！學下人啦！不過奉勸阿信，要學千祈唔好學霆鋒，佢果套好難學，仲唔係個個受到！

削

一直等緊黃偉文用「削」來寫首詞，想知佢對「削」字的睇法，不過佢可能嫌太削，所以唔寫。細個聽得好多老人家用削形容人無福氣！例如有親戚英年早逝，「睇佢個樣都唔係好削丫，咁早就死！」又或者「睇佢樣咁削，都知佢唔方長命」，咁睇番走左親相個樣，通常都係個樣都生得好嶙峋，骨瘦如柴，果時我仲成日講「瘦削但唔削就得！」，有好多人你覺得佢「有台型」，多多小小同佢「夠噸位」有關，穩如泰山的人總給人較有安全感，你見到個瘦骨仙做警衛，總會對佢有所質疑「嘩！佢咁削，得唔得架？！」總覺得大隻佬可以擋到子彈咁！奇洛李維斯如果再大隻，就唔駛彎身避子彈，直情用個身檔啦！「真削！」「削」我解為夠秤，未夠班，未成氣侯，呢個睇法我係君如領會番黎！佢形容得最多係阿澤以前，初做「嘩嘩嘩」時個樣仲係好削，過左無間道之後就唔同晒，當然最主要係肥左好多，但係肥膏裡面多左份自信，個人有左「份量」就有台型，就黎可以擋子彈架喇！

以前聽軟硬，真係覺得佢地係「神」，有創意，有急材，從不欺場，技巧千變萬化！我記得我百份百感覺做編劇，我第一次同阿葛講戲，我企埋一邊準備左十分鐘，然後深呼吸衝埋去諗住一輪嘴講完就算，跟住就成機問係電台野！點知我用左十分鐘都未講到第一句「呢場戲係sammi生日...」「咪住！sammi係幾時生日？唔同星座我個演法唔同」跟住你再講，佢就問你係咩生肖，然後再問自己，玩到無得玩就一邊聽一邊meet你乳頭，咁都未算變態，佢好鐘臨開機拍，全場要靜晒時大力彈你耳仔，然後掩住你個嘴唔俾嗌！「電話整古」好濕碎架喇！
講個秘密俾大家知，「茉麗葉與梁山伯」最初係搵過林海峰做，我仲記得上到去佢好office講故仔，我個樣串到爆，因為我唔係咁會好易穿崩，我驚講講下故仔，突然問佢羅簽名！到舊年做晴朗，我仲緊張過第一次開咪，同林海峰一齊做節目喎，神點會同人一齊做節目架！完左節目後我問佢做成點？佢諗左一陣「咁第一次夾梗係咁架！」我好想問佢「咁即係點？好定唔好？」不過佢已經走左！最近有晚係電台撞到佢，佢竟然笑面迎人「好耐無見喇！」真係有D受寵若驚！
因為Long time no see，睇翻好多軟硬舊節目，包括軟硬製造，同埋係佢地上EYT，耀保良演出！雖然當年佢地迷到萬千，但係而家睇番，覺得佢地當時仲好「削」，眼神完全空洞，唔敢面向鏡頭，兩個人無眼神交流，面上大大個字寫住「我死撐架咋！」我即刻記起睇城市獵人佢兩個客串，完全唔夠級數！直到「新同居時代」，阿葛開始成氣侯喇，跟住「三個相愛的少年」直情提名添啦，然後「百份百」，佢已經再唔削，而阿Jan轉戰到更適合佢發揮的音樂歌唱，加埋佢d封面創計，果幾張碟絕對係Collective Items啦！

有邊個未「削」過，俾人話「削」其實未嘗唔係件好事，起碼唔會搵唔到個類形去形容你，即係個人無野啦！你肯不停增進自己，個人夠充實，一定可以成氣侯，一定可以擋到子彈！當然更加積極的方法是在未被人話「削」之前強大左自己先！坐以待斃，不如坐言起行啦 ！

跟

這裡正是我的樂園，不是新聞組，Angela開個留言版，係希望大家有機會同我媾通下，把開心快樂事情寫在上面，令大家可以分享喜悅，呢到係報喜不報哀！我已經講過，想唔公開就email俾我！我唔接納angela話留言版要先經過我scan，因為我深信我班老友並唔係新聞組水準！又再講多次，呢度唔係新聞組，可以討論，但並唔係針對人攻掣！再講！Angela係一個好忙學生，佢犧牲私人時間幫我搞好多野，仲要係我一講佢就做，無其他人地位比佢更重要，唔駛再問，同挑戰佢地位！更加唔駛為佢或者我向其他人筆伐，呢度開心要大聲笑出黎，見到d唔係自己友，唔好出聲，等佢知難以退，
講埋呢次，下次就唔係講，係消失！

不安感

今晚我想起黃偉文寫的兩首歌，Eason-「人車誌」同埋草蜢-「不安全感」，今晚終收到軟硬飛，見到果日九張，呢日又十一張，我完全唔知點分配俾果個三張呢個五張...我有d不安，開始進入問自己點解要做d咁吃力不討好的事情，幸好好友阿立羅飛之餘，仲用佢冷靜腦根，終於幫我成止企配，阿立！好野！
跟住最不安係有五十張飛係身，又係好彩阿立肯車我四圍派埋d飛俾人，呢d真係無謂壓力！

係香港，駕駛並不是一種樂趣，但如果你識選擇時間，例如閒日仲要係月尾的深夜十二點左右，太夜會容易遇到醉駕，今晚我驅車去派飛時，口裡不停哼著「人車誌」
我有車　我有壓抑　需要發射
　我與車　結合一體　感覺快些
　我愛車　似個聖堂　開到半夜
　跳上車　對著錶板　禱告那些　難題
　想想　如何　轉彎　攀山　落斜
我知黃偉文係無車牌，但點解佢可以寫得咁到肉，呢d咪創作人，要每一樣東西都想像到，除左天生有慧根之外，仲要對每樣野都認識，佢寫細緻野出色我都未算服，連自己唔認識的東西都可以寫得咁好！五體投地，一直以黎，我都係愛阿Y多過林夕！

五對new-balance食完宵，吹完水，阿立車我番屋企！

番到屋企睇見個blog，再同angela傾起，我覺得呢度開始多人，開始有人唔守秩序，唔係幫人就可以亂黎架，又發覺我的價值觀同好多新一代背道而馳，我驚呢度會亂，想到有點不安，有點想停一停，但寫blog係每日寫其他東西的熱身運動，我唔想停，但我有心無力...我覺得我有d似kellyjackie寫d野，但其實我無睇過佢寫d野....
其實我係應該停一晚，但係我想同各位分享，我咁不安，咁lost的一個晚上！尋晚，灘will be back！

痛

尋晚我遇到一個音樂人，一個我認為近十年樂壇，如果無左佢，基本上小左好多歌手會紅，樂壇更加唔會拖到今時今日，早十年就死左！其實佢近年已經開始減產，估唔到佢尋晚同我講，佢已經隨時隨地可以退休，一走了永不回頭，一定唔會做復出咁鬼唔型的行為！ 沉默了一會的我，心裡面好後悔得到呢個消息，我知佢一定會咁做，佢一定會係最高時走「咩都會唔興架！如果發現自己唔興先走就好樣衰」
「必需有這結果，才能懷念我，讓我於荒野馳騁！」
我唔知應該講乜，終於我話「你係全港最原創果個人，你走埋大家就連抄都無得抄架喇！」 「我d野行早人五年，有D甚至十年，我走左大家都仲有排用我D野啦！同埋唔好當正抄係應該先得架！」 「咁有係！等大家無得抄，咪焗住要自創羅！」
本來我唔想講呢件事出黎，但因為呢度CUT左音樂而引發出黎的「那首音樂版權非法合法」的問題，我本來唔想參與，既然首音樂會帶來咁多麻煩，就CUT了它罷！但我見到
「我覺得今時今日既科技，並唔需要將版權看得咁重！」
我真係赤赤痛，再痛D係仲要問我係咪唔認同！死未？
我無講過自己係聖人，連成龍都唔係，我點會係呢！我細個窮都有將歌錄落卡式帶聽，但每一次都同自己講，一定要買番隻黑膠碟，自己擁有然後點變係我的事，借人番黎錄始終唔型！
亦舒名句「你擁有它就要供養它」
講緊唔係一隻歌，一部戲，係一份尊重，你唔尊重佢，對佢唔公平，無供養但擁有左佢！佢就會好快死！我再講多次，幫襯HMV係因為我唔想佢死，所以我願意出多D錢供養佢！
如果版權唔重要，每樣野都垂手可得，咁仲邊有人去做一樣東西出來，我做出黎都係俾人抄，咁不如我抄人，我羅人黎用，久而久之就無野再可抄，以後唔駛再有版權，靠版稅為生的人全部死晒！等你到時乜都無，大家攬炒！
我一直對時下新一代好不滿，自從寫BLOG之後，我改觀左好多，我知我班老友可能年輕，但並非廢人，但呢一刻我真係好失望，我亦都覺得佢退休係好岩！係去到無先識後悔！
我唔想估咁樣心態、思想的人究竟有幾多人，不過每一次俾我遇到，我都會好痛心！你可以話我落後，無與時並進，但呢個係我堅持，等如你堅持自己無錯一樣！如果呢篇文令你不滿，你可以用粗口鬧我，亦都可以永遠唔支持我！I DON'T CARE，我以後唔再寫野都得！但是非黑白唔可以錯！
「請你滾！滾出走！」

聚

阿立是我簡單朋友，做朋友做得簡單，就會成為知己；方法係首先大家性格，喜好要接近，然後相處時要留大量空間、忍耐給對方，應該問就問，有好多野，心照不宣就可以，far away so close，有事未必一定係身邊幫手，有心就得了，勉強幫咪盞越幫越忙，幫你變成害你！
我同阿立媾通永遠只有我地明，旁邊的人以為我地黐黐地，事實上我地都係；我同佢久不久見面就係為左見面，好小有特別事情做，其實一見面就係咁講，好多時走果時都仲傾緊，仲邊有時間做其他野，所以我同佢約見面，好小問「有咩搞？」

不過呢個頑童立有兩樣野係好專業，第一，所有關於聲音的東西，作為一個收音師，佢對聲音的要求係越乎常性，我的喇叭都係經佢推介而買，「簡單，直接，電腦喇叭係呢對，唔駛LUM！」未講完就扑去買啦！
第二：車！
好多男人對車都有研究，我是例外一個，阿立好識車，但佢永遠係從車主方向出發，咩人渣咩車先係重點，什麼性能都係其次，渣錯車會俾人定錯位，又或者咁講，你會自己定錯自己個位俾人地！ 我唔想渣日本車，但歐洲車並唔係架架岩我，唔可以太浮誇又唔可以太平凡，要保值但又唔想咁多人渣，基本上呢個二手車場係無車岩我，不過大熱天時，有咩舒服得過咁樣，邊行邊聽阿立解釋每架車的好與弊，而我當然反問一百個無聊問題，而佢又繼續無聊答到我！講到尾都係好耐無見聚一聚，其實做咩都無所謂！
只要係地球人都試過，首先好難約齊班friend，好辛苦約齊但又唔知去邊，「有咩搞？」
睇車，玩車的而且確係一個好主意！

驅車四圍看，我見到一班志同道合的飛車黨集結係尖嘴文化中心外！

遙控車係我認知中，通常都係速度極高的跑車，快到乜都睇唔到，有d仲喜歡唔要蓋，我覺得好似一隻無頭鬼咁係咁走係咁走，其實唔係想嚇人，只不過係迷失方向，另外就係攀山過嶺的越野車，個轆好大，個車身好細，咁鬼怪胎都鐘意，唔怪得d三角，四方形西瓜咁得人心，變態！

你睇d巴士、貨櫃車個外形同真車九成像，它們造形可愛，並不高速，負責服務大眾！一班朋友因為佢地而聚頭，佢地聚頭而引來大群觀眾圍觀！我估佢地應該係由文化中心飛過去新世界中心果邊，但唔知等乜，總之等左好耐都唔開車，咁唯有上番自己架車，我地開車走羅！

對呢種遙控車的研究比真車更貧乏，但我相信應該唔係平宜玩意，雖然消費係朋友之間娛樂的必需，不過係咪要玩到咁貴就真係見人見智！不過有一樣東西，車又好，遙控車又好，電影又好，唱K又好，飲飲食食又好，行街又好，行山又好，打牌又好，wake又好....乜都好，只要能夠同朋友聚就係最好！不過最好唔好「飯聚」，我唔係食字，係因為大家收工時間不一，真係好難就晒同一個時飯到聚！其次就係「賭聚」最傷感情，最無謂，贏就贏馬會d錢！所以最好都係「順聚」

順其自然聚到就聚，聚唔到都唔駛暴戾！

忘形

由灣仔地鐵站行去會展的過程是痛苦的，人多+炎熱=煩燥！我一直想係咪應該番轉頭，如果當時就走，我還可以約邊個食飯，我一直想著人選，不經意已經來到會展門外，呢種分散注意力方法，係煩燥時最佳抒緩方法，所以我連拍低呢個過程都唔記得！
場內係點其實我唔係好記得，人係多，不過並唔係傳聞中咁臭，總之影完呢幅相之後，我就好似飲醉酒一樣，去過邊都唔係好記得，淨係記得睇過好多書，但買就唔算多！因為我有個習慣係要先行晒一次個場，先會番轉頭買野，但係個場咁大，仲有兩層，行完番轉頭搵番想買果d野，可以係一個好好玩的尋寶遊戲，如果你唔鐘意咁玩，當然之前可以先mark低所有地標，番轉頭就方便；但好似我咁，入到場之後就忙了形，番轉頭淨係記得要買邊d書，但係唔記得d書係邊個攤位，搵得晒都夠鐘，所以唔係買得好多本就要走！不過我唔會再去，買東西也講緣份，勉強得到的東西通常都會後悔！所以我唔恨！係咁多就咁多！


另外要感謝博益秀慧帶我入場，仲犧牲食飯時間帶我遊場！一別秀慧已經五六年了，認識她的時侯，她仍然是個大學生，後來佢又住過我樓下，之後我搬左就無再聯絡，最近竟然係雲海幫我地重逢，真係唔可以唔信雲海有神奇力量！哈~~我記得秀慧讀書果時理想係做「作家」架！
（佢出過幾本書架http://jointpublishing.com/zwsm/fndbook.asp?Author=%B3%AF%A8q%BCz）佢仲引用張愛玲名句同我講「成名要早」，唔係來得唔痛快！估唔到佢而家變成一個出版社編輯，以前講理想，而家口口聲聲要理想工作，最好人工多，番五日，老闆又錫佢！再見理想？我唔信，家下為口奔馳，暫時放開理想，八十歲都仲可以做作家！妳唔肯講俾我知想寫乜無所謂！我等得！等唔到都仲可以燒俾我！

再謝妳幫我搵到果本宋美齡

我笑你

問題：「我愛你」對於你是難於啟齒，還是說得易如反掌，年中都唔知講幾多十次？

我的答案：對住唔愛的人說我愛你是易如反掌的，你幫了我一個大忙，我一定說「我愛你」而不是「唔該晒」；而對住真愛的人，如果要靠講「我愛你」先証明到愛佢，咁即係我未夠愛，又或者情人還未感受到我的愛！但係未有更有效的加強火力方法之前，又要令情人安心，唔想煩，講句「我愛你」避避風頭，都係三個字，總好過講「怕左妳」；所以基本上我係屬於易如反掌，年中都唔知講幾多百次果種！
情人、朋友之間要講「我愛你」唔算難，最難係同親人講，尤其係中國人，乜都放係心裡面，點講得出口呀！有人話「I love you」唔知點解易開口d！人咪就係咁衰架！著比堅尼又驚暴露得滯，外面又要加件tee，遮遮掩掩濕左水咪又係現晒出黎！點樣改頭換面，個餡咪又係一樣！係唔想講就中英都唔想，係唔敢著比堅尼就唔好著！對我黎講，我覺得中英文都咁難講，因為真係好老土，但有時都有半秒衝動攬實佢地，講句「我...」 一想到呢個位就打尿震！但無理由難做就唔做！我總會想到方法！
我有時見到佢地開心，我就會話「笑你丫！」佢地一直以為我講粗口「我話唔係粗口呀！我笑你丫！」通常講到呢到就會得到句「溜溜肺肺，唔正唔經！」 「係呀！我笑你全家添呀！」

I 『laugh』 you so much！


你可能唔明我講乜，或者會錯我意，唔緊要！如果你明！覺得好用我唔介意借俾你同佢地講！咁當然啦，點都係你直接講，又或者自創一種你同佢地表達「我愛你」的方法，先係最窩心！

Closing

由平地開始，到最高峰結束，離開時覺得唔夠喉，情緒仲係好high！呢個就係好show！而作為壓軸的表演者，身負令大家高潮疊起的巨任！仲要係七晚最後一晚，壓軸中的壓軸！
七晚我只係睇左FionaX鄭融同今晚KellyX陳春，聽講側田X中基同張敬X苑芝都好正，黎明Xjanis就好好笑，黎生d off-beat gag真係唔野小架！「知唔知點解我要飲水，第一，因為我口渴，第二係因為我需要！」至於呢個組合，其實我唔覺得有咩火花，或者我已經唔係好得kelly了，從前我真係好得佢，仲記得六年前做「嘩 嘩 嘩 」佢黎做嘉賓，我開咪前同佢講「kelly！我好迷妳架！」但做完果晚節目後，我相都無要求影！「星」有時係應該距離我地遠d，太近接觸，會發現原來佢並唔係自己心裡所想的形像，偶像幻滅！
但Kelly絕對係一個專業歌星，演出當然有水準，只不過唔係我杯茶！


阿姐同kelly合唱完「自由女神」就走，一句野都唔講，勁！佢一開聲，主角就會變成佢！幾時係主，幾時係客，唔會搞錯！真遺憾影唔到合照！

我係因為陳春所以黎，我無乜圈中朋友，同陳春久不久就會電聯吹下，久不久都會約埋一齊去玩！好多人話佢係孤寒陳，唔豪識駛唔代表係孤寒！佢太清楚自己要乜同可以要到乜，簡單直接！佢仲係一個有情有義的人，有時又有d童稚氣！

至於個show！我睇到九點九先好無奈同阿田走，呢個closing good到爆啦！