1.19.2007

洗牌黎過



我認為生命是一場牌局,同樣的一百四十四隻牌,卻製造出不同的命運,有人連莊十幾鋪,也有人十幾圈唔開糊,有人密食當三番,有人一生食一鋪最大就夠,誰勝誰負,取決於你的技術+運氣,然後你的性格就成為最後勝負關鍵,有人鋪鋪都造牌,隻隻牌都搏,到頭來輸多贏小,埋單結算都係輸,不過如果你玩得開心,又有咩所謂,會有人會由頭守到尾,最後打和,一團和氣,都唔知打黎為乜?,不過如果你玩得開心,又有咩所謂,又有人穩守突擊,一生等一鋪,食左先發現原來房租好貴,終於嘔凸,早d唔打好過,不過如果你玩得開心,又有咩所謂!

有人打幾十圈先完,有人打唔夠一圈就走左,但無論你是割禾青,還是宿命注定只是戥腳角色,意義不在於長與短,在於你有幾盡力打過鋪牌 『係咁打架喇,輸都無辦法!』 這兩句話不是安慰失敗者的說話,應該是你撫心自問「盡左力未?」 後勉勵自己的口號!

劉青雲閒談中講過,想達到某個階段後,就推lum鋪牌,從新洗牌黎過;我認為不單做演員要這樣,做人亦然!當然做每件事都有代價,放棄現在一切仲要嘔凸,因為詐糊是要賠錢,但你信唔信「包衰詐旺」丫!我信!但並不是信食完詐糊會轉運,是因為你肯去轉變,肯承受沉重的重生壓力,人定勝天! 一定贏~~

但可惜有很多人不是洗牌黎過,而是推牌唔打,因為一時之氣,離檯發現後悔,卻為時已晚,上星期同一個我很愛錫的年輕人飲野,聽見佢輕描淡寫敘述昨晚自殺的過程,我先發現生命原來可以咁兒嬉,「我無後悔過咁做......」我忍住眼淚聽埋佢講「既然死唔去,我知個天應該叫我繼續做人!」 我沒有再出聲,原來不只哭的時侯說不出話,把眼淚強吞落肚,是更語塞,更無言以對~~`

推牌唔打,就算你好好運,之後可以俾機會你再打番,但可能推牌時唔見左一隻,你再得唔到以前的同樣感覺!

傻人,你推牌唔打,以為可以逃避到呢一百四十四隻咩?君不見家下 「紙紮麻雀」幾多款,幾大副咁燒落去,「收野啦!」 去到第度咪一樣要打!倒不如俾多d心機打好而家果鋪啦!

15 comments:

Rita said...

睇完鄒生所講既野之後,有點令自己反思一下自己既人生方向...

p.s.
迷茫中...

Anonymous said...

正呀! 完全收哂你講 d 野, 多謝灘叔提點!! 不過, 你擺張咁型o既相o係度....想點先?!?

Anonymous said...

講兩句行嘢:唔賭唔知時運高,未到最後,點知道果舖唔係海底撈月十三么呢~~賭仔性格,梗係等到最後睇下邊個先係大贏家啦.

就算輸,輸得開心,咪一樣係另外一種嬴~睇下個人係咪樂觀而已.

之前看過黃子華的冇炭用,我好記得佢講過自殺,令我反思左好耐,事實又真係甘,呢個世界上甘多人比我不幸,佢地都唔用自殺去解决,點解我要咁傻,要揀死啊~

幾歹都玩埋落去!

灘叔~~我睇左你新戲噶製作特輯,你個造型好靚仔~~你本身已經够高大,你再著竪紋西裝,顯得你個人仲高...="=

Anonymous said...

我哋啲老嘢已經不能明白理解現今青少年啲諗法啦,唔俾佢哋話歐慈都唔得。
但係輪流轉,我哋年少時咪又係咁樣被長輩話過。 只不過隨着年代轉變,啲青少年諗法唔同咗啫。 成熟咗就上番正軌啦。
講咁多耶穌仲嫌你煩呢,老嘢應該適當時收聲,我覺得。

Anonymous said...

灘哥你不如戴番黑膠眼鏡啦,你戴呢副金絲眼鏡好恐怖.....(嘔)

Anonymous said...

Hi Unkle Beach: You're right!! I've faced a fiasco due to the 911 attack in U.S.A. I've lost a lot of my hard-earned assests. Well, it's a painful experience, but I've learnt to become a stronger woman. Although I am not totally get back on track yet, I choose not to give up and plan to start a new career after finishing the university education. Helping others is also a very good doze of medicine. I choose to volunteer for the elderly center and it's so rewarding when I see those cutie old faces who are so happy to have my help. It's impossible not to think negative when there are numerous of stress and challenge around. But I tell myself: Don't be self-pity. Be calm so I could stay young:}} Stick with the life-game. My turn will eventually come again!!

GOOD LUCK and ALOHA!!

Anonymous said...

wo~~
灘叔好型喎~~~
拍緊野??

Anonymous said...

灘叔,

寫咗幾句野卑個年輕人, 當局者迷, 做大人見到顧然心痛, 但路始終要佢自巳去行.. 幫得幾多得幾多。

Anonymous said...

我鐘意鋤Dee多0的..
因為講技術多0的..
最重要係要懂得適當時候..夾埋別人炒一家.
好多人都做唔到呢點.
呢個就係叻人同短見自私怪的分別啦.

Anonymous said...

做人就係咁
有時想食鋪大,係咁做牌
過5關斬6將
但最後食唔出
明明有其他細番數都唔食
係都要食鋪大,最後咩都無

有人傻下傻下,真係摸下又1隻
摸下又1隻,成副大4喜都摸返黎
係咪吹漲呢
成世唔做牌 雞糊又唔食
係咁比人當魚腩
咁又一世
我勁唔想咁樣
但如果做大牌,但唔知自己做唔做到
真係煩,真係一野推開佢
唔玩!
哈哈......但個天偏偏要坐係到

Pessimist said...

某程度上做任何事都要運氣,但大前題係 -
理解「遊戲規則」。有d人可能大早經已唔明個game 嘅玩法...
因此係生活上,係需要一d對game rule比較了解嘅朋友係附近,例如:「您」~

Anonymous said...

灘,

非常同意!呢篇很啱睇, 羊唔曉打牌不過非常明白你說的意思!;>

不過有些人係點都唔明,因為未到明白的時候~

總之, 盡咗力就一定唔會後悔!因為可以做的都做哂^^/* 反之,太多揼心的空間叨。

推牌係儍, 不過會推牌的人都係耍性子。又談何三思呢?
不碰釘又如何能學精?而且都係睇資質, 有些人係點碰釘都學唔精:P

Anonymous said...

我唔識打牌,但係無論打牌又好做人又好, 你坐得落枱就唔好淨係諗自己,顧吓你身邊既人, 三缺一好慘架, 講黎講去"現代人"淨係諗自己, 無哂人最重要既 "責任心"

Anonymous said...

其實舖牌點打,都係個人選擇啫.
如果個個人都係同一諗法、同一方向,
咁咪舖舖摸和囉,咁就大家一齊冇癮.
打牌嘅世界係一個天秤,有人羸,
只因有人輸...

不過你呢個打牌論人生,的確幾過瘾b^^

Anonymous said...

前陣子我都有推牌的想法, 後來想通了~

做人嘛, 還是積極一點較好~
算是對得住自己~