1.09.2007

你搵過我黎?






有些人像季侯鳥,定時定侯就會出現,定時定侯就會消失,今日收到一個陌生來電,她以極嬌嗲的聲線,劈頭第一句就問 『Matt!你搵我咩事呀?』 這位女仕久不久就會找到一個原因打俾我,有試過問人電話,有試過問我要唔要靈芝丸,去奧脫福睇波點買飛,識唔識婦科醫生介紹俾佢媽媽.....有時因為她的創意,會花時間同佢傾幾句,但談不到十句,我便收線,因為她說的東西實在「廢」,美其名就是「為賦新詞強說愁」,坦白講就係「食完飯無屎屙搵人hae」 所以我簡單直接就答『我無搵過妳!』 『無可能,有個你missed call喎...」 我今日心情不錯,所以無cut佢線,仲反問佢『妳搵我咩事?』 『唔係你搵我咩?你搵我咩事?』
已經俾左一次機會妳,妳仲黎!Bye都慳番講就收佢線!

從前喜歡跟幾個朋友入馬場,但賭仔姓賴,輸左錢實話發起入馬場那位『最衰係你,無端端叫咩我入場呢!』所以永遠無人肯打電話約局,但大家偏偏又大鋪癮,我就會用呢個方法,打俾朋友『喂!你搵過我黎?搵我咩事?想我陪你入馬場呀?』 後來這個方法使用於朋友間約其他約會中 『喂!你搵我過黎?搵我咩事?想我陪你睇戲呀?』 『喂!你搵我過黎?搵我咩事?想問我借錢呀?不如你借d俾我先啦!』

同情人炒大鑊之後,冷戰左個幾星期,唔甘心認輸打俾佢,但又好掛住佢,都會用呢招 『喂!你搵過我黎?搵我咩事?無搵咩?咁你係度做緊咩呀?』 如果對方亦已經嬲完,就會肯繼續同你傾落去。

我試過好耐無打俾阿媽,有日佢都用呢招 『喂!你搵過我黎?搵我咩事?無搵咩?你呢排好忙咩?』

基本上,『你搵過我黎?』可以係一句好可愛開場白,就算聽果位唔受,都未至於會反感,但如果你試過因為用呢個開場白,而被對方cut線,我估對方一定好憎你,好唔想同你講野,醒目D,唔好再煩人啦!

13 comments:

Anonymous said...

咦....我真無用過呢招喎 !!!!
其實我都想問....有時.....太過直接係咪會無晒情趣 ?可惜....偏偏我就係唔識轉灣........

(淑)女(蘭)求 said...

下次同老公仔嘈
試下呢個方法先

Anonymous said...

這時電話筒的另一端傳來了一陣do~~~~~~~~~ 聲响, 是通話掛斷的訊號.

一張還沒有把話說完的咀繼續微張, 一雙手一直緊緊握著聽筒, 臉上卻泛起一絲詭異的微笑, 徐徐吐出一句:

i'll be back...


然後把電話掛斷.


這是一套未完的恐怖片



呢d情況cut佢線未必係你好憎佢, 只係佢沒有搵0岩姿粉客.

wahahhahahhah...

Anonymous said...

我覺得咁樣搵朋友hea有啲面懵,尤其對方唔得閒嘅時候,或者唔想同你傾的話。
所以我打俾朋友的話,就真的有事要講。
目標為本!

櫻記士多*Ada* said...

如果(你搵過我黎)係開場白,咁(得閒飲茶)就係ending囉!係一個留有餘地的ending有下次嘛..嘻嘻!!!!

Anonymous said...

有時d野你情我願
但我好少會cut人線
又或者轉態度收線
可能我耐性好!!!!
廢電話真係收唔少
有時好鬼唔得閒,整句電話黎
問埋d無聊野.
試過有人打黎,話近排有間新野
我又應酬下,問係咪想試下食
點知佢係想問我教路,之後佢同另1個人食
大佬,唔約我,咪阻我啦,話左唔得閒......
想約人食新野,同果個人講丫嘛
又要撩人.....攪到好似要幫人貼埋大床咁
又唔係自己食,又要幫佢左諗右諗!!
男仔熟電腦野係應該,女仔問都好應該
但我記得,有個女仔打黎唔係問電腦野
係到問豉油雞翼,洗唔洗落糖
係唔係就咁滾熟佢.......
我叫佢問自己呀媽,佢又話想打黎傾下
或者係佢角度,可以有情調到打黎問雞翼點煮~~十分"煙煙銀銀"的談吐,之不過又唔係煮比我食喎!!
係我角度,就覺得好麻煩啦.....
不如問我今日凍唔凍...打去問天氣先生啦去.......哈哈
點解我又係到?放假囉.....

Anonymous said...

haha灘叔,人地擺到明掛住你啦,人地話哂都係女仔,唔好做到cut人線咁絕啦!!

Yu said...

哇卡卡~
我都用過呢招,幾好架!不過就唔多用,睇下熟唔熟啦,但唔熟既都唔會搵...
我喜歡單刀直入,想找就找~!

Anonymous said...

well, i think this line "你揾我呀?" not only applies on the phone, it also applies on email... but it is possible that never get a reply from the other side then it means that person really not like and don't feel like to keep in touch with you at all...

Anonymous said...

well, i think this line "你揾我嚟?" not only applies on the phone, it also applies on email... but it is possible that never get a reply from the other side then it means that person really not like and don't feel like to keep in touch with you at all...

Anonymous said...

sorry if i clicked "publish your comment" twice

Anonymous said...

打電話俾呀媽唔使理由o既, 掛住佢咪打囉.

Anonymous said...

我的媽媽也經常投訴我不致電問候他...

好不孝...