8.01.2006

哇wow ~~

就咁睇呢幅相,你會覺得好紅,所有襯晒色!第一時間要你答幅相係邊到影,你個答案係咪「去飲果時影羅!」














幅相其實係九展影!睇見係咪為之「哇wow」呢?
什麼是「哇wow」?每當我們遇到一些事情,不懂反應,啼笑皆非,用「吹漲」又好似嚴重左,就會用「真係為之哇wow!」 呢個配樂係卡通片常有!都唔明就上「都唔知好嬲定好笑」架車啦!
我喜歡遇到令人為之哇wow的人與事,有咩奇妙得過你明明嬲但竟然笑左出黎丫!真係為之哇wow架!
早排去書展,有個肥仔問我「你係咪做她他她果個鄒海灘?」 「我係!」 「我無聽她他她好耐lu!」 「嘩!你叫我就係要話我知你無聽?」 「我坦白丫麻,我好鐘意聽你做節目架!不過而家真係無聽!」 「咁你鐘意聽但係又唔聽,你其實想點先?」「鐘意聽但唔一定要聽o既,總之你比心機d啦!我真係好鐘意聽你做節目!」 肥仔講完就走左去,我企係度,心裡已替自己配樂 「哇 wow~~~」

我係台灣拍「一個字頭的旦生」,有個樣子娟好的少女,手持紙筆,一臉靦腆,儲左好耐勇氣,然後走到我跟前,遞起紙筆給我,我雖然受寵若驚,但仍保持冷靜接過少女紙筆,正想簽名的時侯,「你可以幫我找劉青雲簽名嗎?」 起配樂「 哇 wow~~」

劉青雲係日本同我拍「七年很癢」時,曾經有兩個日本女仔問佢「可唔可以幫我地影幅相?」 青雲好有禮貌答好,然後走到兩個女仔身旁,點知個日本女仔俾部相機青雲「哦~~幫妳地影幅相!」 青雲忍住笑拿起相機同佢地影! 配樂又起「哇 wow~~」

我試過開工住酒店,第二朝七點要開工,一早訓,點知兩點幾俾隔離房開party嘈醒,我打電話落大堂求助,無耐之後,隔離就靜左,我心想,呢間酒店做事效率真快,所以我好快又訓得番,點知個幾鐘頭後個電話再響起!「先生!頭先你打電話俾我地,話隔離房好嘈,我地已經去同佢地反影左,唔知佢地而家仲有冇嘈呢?」
起配樂「哇 wow~~~」 「無嘈~~點夠你嘈丫!」

係澳門食飯,我叫身後的待應「唔該!請問有冇茄汁?」 「有!」個待應答完我繼續企係度!十秒後「我要呀!」 「好!我羅俾你!」 配樂又起「 哇 wow~~~」

同個女仔係寒冬行街,個女仔有點冷,我拉拉外套,個女仔見狀「喂!我唔凍.....」,未講完先發現我原來只是拉起拉鍊,並非除外套給佢!配樂起,兩個都為之「哇wow~~」

其實爆裂刑警內,羅蘭姐羅碗麵出來,然後好似俾古仔「要唔要呀?」古仔點頭 「自己煮丫」,呢場咁「哇wow」的戲,前身來自當時喜歡去飲野,問女仔「要唔要野飲? 自己買丫」我一見到佢地黑面,我就會「哇 wow!」 好開心!
面對難題時,橫豎發脾氣都解決唔到,倒不如說聲「咁大鑊!呢次真係為之哇wow喇!」
俾老細鬧,下屬害你咩鑊,情人對你無理取鬧,遇到任何唔開心東西,試下講句「真係為之哇wow!」,然後傻笑一陣,我肯定心情即刻會好番!我想起各位老友傻笑個樣,已經忍唔住笑左出黎,多d人做,多d笑容! 哇 wow~~

19 comments:

Anonymous said...

That's true man!! There's alwayz alot of "哇 wow" things happen around us.... especially in restaurant, office....

Anonymous said...

您似乎對格仔恤衫有份獨特情e結喎 : )

Anonymous said...

you know what, I am in a very bad mood few minutes ago. But after I read this, it made me happy. WOW. Thank you, Unkle Beach. Thank you for cheer me up.

Anonymous said...

哈哈,好多爆笑位播!
同樣情況,我會用Uh-Oh(丫噢)囉!哈哈。
有次老闆唔知做咩賴野我好大聲Uh-Oh左(驚),冇事!

Uh-Oh.

Anonymous said...

哈哈哈哈哈......."哇wow"

Anonymous said...

你果d哇wow事件都幾好笑...XD

Anonymous said...

我記得”為之哇wow” 係在你地節目聽番來的呢..

其實到依家有好多掛在我口邊既單句或四字詞都係在嘩嘩嘩or她他她聽番來…

好似”起身叫傑仔” 呀, “稀疏平常”等, 數之不盡…..全都變成我日常生活同朋友溝通用的句子

”為之哇wow” 我就好少用到…但睇完灘叔你咁講..我諗我都要try 下下次面對難題時用多d呢句..

Anonymous said...

hahahahahaha
that's all i can say
>v<

Anonymous said...

幾好笑喎..哇woo = ]

Anonymous said...

佳 作! 笑 爆 嘴....

Anonymous said...

哈哈~~~ 現實生活中既野,住住係最吹到你啤一聲又最好笑既~~~

睇你個 blog 唔係好耐,睇過既呢個最好笑`~~~ 多謝分享~~

Anonymous said...

This is a good prose with many interesting examples, talking about the embarrassment of
misunderstanding between people. As the prose is written in book language, it is more inspiring.

Anonymous said...

睇你個 blog 唔係太耐~~~ 呢個最好笑~~~

現實生活中吹到你啤一聲既,住住最好笑`~~keke
多謝分享

Monkey said...

如果係你有囍就好, 不過真係到你時你會唔會著到咁呢?

Anonymous said...

勾起我一件陳年事- 當時氣氛僵到唔知點收科,空氣好似凝住咗。突然我地呢邊有人咭聲笑出嚟,真係哇WOW。乜氣勢都無晒。

Anonymous said...

哈哈 ..
有 d 被玩的 feel .. xDDD

Anonymous said...

看第一張相, 覺得你似路過多於出席喜宴。

你平日去飲, 會這身打扮麼 ?

Karvitz said...

真係好笑! 哈哈
「幫妳地影幅相」估唔到係真人真事啦! 哈哈
仲希澳門O個個都係一絕啦!

多謝你令大家開心! :p

Anonymous said...

有一次係酒樓食晚飯, 經理剛好行過, 我地想叫佢寫野, 就舉手...

點知佢同我地揮手, "hi", 之後行咗去...

「 哇 wow~~~」