8.06.2006

there is something about GOD


世界杯完了,拉闊完了,生日完了,軟硬完了....似乎是新開始的來臨!


其實.....我唔算係軟硬hardcore fans,咁點解再去睇,睇兩次我其實都係黎支持阿葛!

同阿葛認識其實都有十七八年,但交往極小,稱不上朋友,但阿葛對我做過幾件事,比一般所謂稱兄道弟的行為,簡單直接同窩心!
其實八七年做espirt已「認識」阿葛,當時佢好型,住砰洲,著好多comme sa du mode的衫(呢牌子而家已經變成大眾普及抵著牌子)手裡面永遠夾住幾隻黑膠唱片,kraftwerk、YMO、Dream academy....仲有好多好另類的樂隊!果時佢好cool,並唔係咁鬼馬咁神經!好難接觸上!
九十六年因為百份百感覺認識阿葛,當時電影市道好好,d戲開完一部又一部,邊個得就不停拍,百份百之後有百份百岩feel、愛情ameoba...當時阿葛算係最紅的一個電影人,再加上軟硬岩岩搞完「天空小說」,王家衛又搵佢地拍戲,阿葛當時就係忙緊「初前戀后...」佢當時講野已經成個大師咁!但老實講,阿葛係電影大師,不過係「電影雲遊大師」,初時成日唔知俾佢帶你去左邊,後來識野多左,就知道佢同好多謂識電影的人一樣,虛蕪飄渺,不切實際,呢樣野,你睇佢之後搞果部「龍火」就知,但自己羅錢出黎拍,無野好講啦!
九十七年我第一次做導演,王晶要我拍喜戲,仲要係佢果種喜戲,當時有得上車做導演,唔係拍三級,乜都做啦!部戲叫「超級無敵追女仔」,當時阿葛係你俾得起錢,佢就肯拍!雖然之前有三部戲合作過,但唔覺得同阿葛friend左,亦都唔覺得佢會幫我,只要唔好帶我遊花園已經係好大幫忙!拍攝過程,我開始覺得阿葛其實好會幫人,但當然幫緊你同時,亦都係俾佢玩緊,小則meet下你奶茲,大則你發現佢原來可以用五分鐘解決問題,佢會搞左你一日!戲裡面有場歌舞,拍完之後,阿葛捉住我,話場戲應該參考日本一隊當時好hit,好搞鬼的樂隊的演出,叫我剪片之前睇睇佢地d VIDEO!我照單全收,問佢係邊度可以搵到隻碟,佢話四圍都有,終於我係各大唱片公司搵左一日一夜,答案都係無,然後再開工問番佢,「係四圍都有喎.......係日本!」
佢就係度大笑,我就轉身走左去!過左好多日,有日阿葛無戲份,我拍拍下戲,副導演羅住一隻CD SINGLE俾我, 就係阿葛介紹俾我果隻,我問佢係邊度搵,佢話阿葛頭先親自渣車送來,但唔想阻你拍戲,所以俾左佢,等我得閒D先交俾我!呢個工作上的小幫忙,我到而家都記得!但係未算最深刻....
我成日問佢借YMO聽,但佢要我答到三個成員係邊個,我只係記得板本龍一......然後兩個就唔得,但佢次次都問,又唔肯俾個答案我,一唔識答就MEET你奶茲!我為左自己乳頭著想,一見到佢就問佢其他野,其中一條係「你有冇LAID BACK的WHITE HORSE」首歌係咁「IF YOU WANNA RIDE,DON'T RIDE A WHITE HORSE!IF YOU WANNA RICH ,YOU HAVE TO BE BITCH.....」佢話佢知日本可能有,跟住我已經好醒目話我自己去日本搵,佢奸笑「你咪試下搵羅!」 搵唔搵到唔緊要,最緊要係乳頭可以唔好再受創,我經好多次女友問我個乳頭俾邊個搞過黎?「阿葛!」 「你當我傻架!我點會信你!」 其實係真,不過你唔係傻,係阿葛傻!
好多年之後一個星期六晚上,我奇怪地留左係屋企,通常呢D應該出去但唔出的日子,總會有怪異事情發生!十一點幾我收到一個怪聲人電話,係呀!就係阿JAN扮阿葛果把「我係萬佛朝宗,想搵阿鄒乃光?」 雖然我知道又有排俾佢玩,但係我真係好開心佢會打俾我,我顧作鎮定「阿葛!咩事?」 「你搵到隻WHITE HORSE未!?」我繼續扮冷靜「搵緊....」「我有一隻喎!」 我開始D戲散左「阿葛!你想點先?唔好玩我啦!」
「你係邊?點俾隻碟你呀?」 「?!你幫我買左仲送埋俾我,咁又要付出咩代價?」 「我有支疊球棍,粗過手臂,你拮起俾我插人下就得...係一下,你鐘意都係一下!」呢D情況,我只可以笑來把事淡化,因為我真係驚佢會咁做,而自己又鐘意左!「我係屋企,係新界!」 二十分鐘後,佢渣住架招牌啞黑色旅行車係我樓下出現,俾完隻碟我就走左!
第一場我去睇軟硬,入到DRESSING ROOM見到佢,佢第一句就問「點呀?有冇聽WHITE HORSE呀?」「久唔久啦!」 「我一見到你就諗起WHITE HORSE!」,尋晚我係後台,佢地臨出場,我豎起姆指向住佢,我其實唔知佢睇唔到睇到,但佢豎番起兩隻姆指!係台上,佢竟然望到我,仲開左我名!果一剎那,我感覺到唔係虛榮,而係「上心」!
近年阿葛表現大不如前,有時見佢接D戲,又走去同查小欣做881,真係心裡面問「阿葛!你係咪真係咁等錢駛!」不過個仔都十幾歲,點會唔等錢駛!可以理解! 呢次演出,你總有六七成番左黎!我已經好滿足!
雖然你唱「妳的生活」感動唔到我!但係你就係咁,正正常常做D野,一見到你個樣就想笑,感乜春丫!但實際上,俾你無情情感動過的人,又點止我一個丫!
THX GOD!

14 comments:

summer said...

我都有去睇軟硬~佢地表現真系吾錯!但系我認為重有進步的空間!我真系估吾到你同阿葛咁熟bo!

MM said...

其實我覺得成個 show 麻麻. 都係集體回憶咁解. 可能我睇第一場, 見到佢地自己 d 歌都唔記得歌詞, 都幾失望. 唔知係咪用左大部份時間排舞, 係連 FOR YOU 同點解要大家笠d 歌詞都唔記得...FOR YOU WOR ~~~~~~~ 點解要大家笠喎.....

其實我又鍾意阿 jan, 我又鍾意阿葛, 但我又唔係鍾意軟硬天師... 好矛盾... 唔好理佢地有冇不和啦... 冇合作咁多年, 好難有默契. 講真, 佢地係台上講 d 野我一 d 都唔覺得好笑. 好似普通其他歌手同 d 觀眾講下野咁. 我甚至乎覺得阿 jan 同阿澤係叱吒 1 月1 o個晚仲有默契過佢同阿葛.

o個晚我真係為嗌而嗌....不過.. 可能第一場掛~

喂灘灘, 有冇買小克本新作偽科學鑑証... 勁正呀... 我 post 左其中一個漫畫上網, 你可以去睇睇, click 我名個 link

MM said...

呀, 唔記得講埋添... 我勁鍾意睇愛情 amoeba 架!

Anonymous said...

I was there last night....good show but not as much as my expected. Really like their talents. They proved my growth. Thx

mary said...

Dear 灘,

我有去睇最後一場軟硬,有聽到 Eric 響你名,好攪笑、又好窩心的 Eric!

其實,輸贏之間又是誰去判斷?只要當事人找得到自己的位置、出口去好好生活就是這樣好了。生活幾時都有壓力、幾時都是辛苦的,我們只好在當中找到樂趣。

Live Soft, Play Hard~~~

ms_laugh said...

我都有睇show 呀, 一開場就見到你啦,
可以腸軟硬已經"正"...遇上了鄒海灘..仲"正"...

我愛你呀..鄒海灘!!

Anonymous said...

Hello, Uncle Beach.
我買唔到飛, 只有聽903節目和睇有線娱樂新聞台. 但我好想佢地快啲出DVD, 咁我都有點感想講吓, 可能紿終都係掙啲.
我每晚都有聽"她他她打到嚟", 希望你們繼續努力. 上星期你講到同朋友打边爐, 都唔得閒理啲大明星, 若果係我, 緊係叫你帶我去影張想, 然後繼續擦過.
打边爐萬歲!!!!!!!!!

Scared V said...

你識阿葛,好羨慕啊!
只從電台和電影中認識佢,但已經好锺意。
佢某程度上有啲似我一位故友,所以對佢有親切感覺。能做佢朋友好幸福啊!
希望有機會在街上見到佢,而我又有勇氣同佢講句「Hi, 阿葛。」咁就開心死啦!

Amanda said...

呢晚我都有去睇啊﹐聽到你個名﹐覺得好親切呢。原來阿葛同你咁friend架喎。順手要祝埋七仔早日康復啊。

qt芝士 said...

阿葛這幾年確是有點沉沉的感覺, 希望這次演出後, 可以繼續發光發熱啦~

Christie said...

灘叔叔﹐

小隱隱於山;大隱隱於市.

kaka said...

口甘你咪因為beach wanna rich 所以叫做beach bit bitch ar?

高玉 said...

好野,葛爺萬歲!!
我係佢超級fans!!估唔到你係支持呀葛爺bor,呀葛爺份人我覺得好nice呀,真係有求必應的!不過睇完你個blog,就更加覺得佢nice,雖然係曳d哈*好笑~呀jan個段重爆笑!!
呀葛爺套(龍火)我都有係到呀!個老昫唔識野,用賤格賣左比我,但係d(重慶森林)又keep起晒~(龍火)套野,我真係唔明,我鐘意(初纏戀后的2人世界),個故事好得^^我都好想睇(天空小說)呀,你有冇,可以倡我睇呀哈哈!!
但係我都覺得呀葛爺好似乜都撈,但係又唔紅咁...成日都唔會記得佢結左婚哈*
ps>你話軟硬完了,好似佢地死左咁...哈

檸檬羊:> said...

阿葛古古怪怪, 不過都好有你心....温暖人心的一篇。