9.27.2006


人生究竟有幾多野係我地有權揀?係片場有個笑話,每當放飯時,茶水問你食乜,如果你答「有咩揀?」,佢就會講笑咁答「有得揀食定唔食!」 呢個笑話會令我想起「五天精華遊」個gingle,選擇看似多,其實「我有得揀咩?!」
由出世開始,父母,兄弟姊妹無得揀,但其他可以選擇的東西,你有機會揀過嗎?讀書無得揀,課外興趣小組有無數咁多選擇,但跟本無一樣是你所好,你最想的是課餘跟朋友出去玩,留在家中打爆機,但無呢個選擇,焗揀之下揀左天文學會加入,第一日上堂,導師問點解會揀天文學會加入?「我有得揀咩?!」
辛辛苦苦讀完書出到搵工做,份份人工唔過萬,而世界上選擇太多,買衫、買鞋、買鐘、買馬、買波、媾女、媾仔、3p、4p、去旅行、去偷食....你可能只不過揀左其中一樣,就已經爭落大筆咭數,最緊要有份工,可以個個月有糧出,做咩野工「我有得揀咩?!」
工作唔如意,寄望愛情,先講女性,有得揀,一定係高大靚仔,有學識、擁有一份高薪又穩定工作,咁好條件,點會揀妳!?就算揀妳,要頂得住佢唔專一!咁好條件而又專一的男子,五十萬年先會有一個!退而求其次,老d窮d光頭都硬哽落肚,只要你肯對我好!咁簡單要求,無就無!把心一橫,橫豎都無,不如話俾人知妳只會嫁給Johnny Depp這一款!羅番個尾彩!點解唔拍拖?唔寂莫咩?「?!我有得揀咩?!」
男性方面,有得揀,一定四十三吋腳長,有學識,唔黐身,仲要老豆淨低幾億俾佢過日辰!you may say i a dreamer,but i am not the only one.....只要人工智能發展順利,不久將來一定可以研製出一個咁ideal女友俾我!咁現在未有,只好退而求其次,傾得埋,多隻腳陪食飯,放假去玩可以多個人互相照應,咁樣關係咪幾好!點解係要結婚呢?!唔結婚就分手!「?!我有得揀咩?!」
「無得揀」才是世上「最佳選擇」,如果我們每一樣東西也像父母、兄弟姊妹,全部上天安排好,無得揀!我們的人生將會比現在快樂得多!有大部份的人「俾你揀」同「焗住揀」都無分別,跟本永遠找不到「最佳選擇」,因為大部份人跟本不知道需要什麼,追求什麼!「無得揀」就最好,你俾乜,我咪要乜!幾簡單,幾開心快樂!據聞黎明係演唱會綵排時,談笑用兵 「排與唔排,都係上天安排!」 一如黎生說話風格,聽完會忍俊不禁,但細想常中並非無道理!黎生,等我同你對埋下聯。「無得揀,未必係慘!有得揀,絕對唔盞!」

15 comments:

Anonymous said...

可能係冇得揀既情況之下, 會有d意外既收穫呢?

c.u

Anonymous said...

係呀 !!!!我成日都好怕有得揀......所以好鍾意"我愛女人購物狂"既劉青雲......哈哈.

Anonymous said...

選擇不選擇, 你就會擁有所有野.
呢句係老師講架 ^^
我諗開心唔開心唔係你擁有乜野, 而係你接納幾多野.

秀秀

Anonymous said...

無得揀煩, 有得揀仲煩

Anonymous said...

的确系无得揀噶,好似依家我做紧PT甘,无份PT系好的,无一份系岩我,学滩叔话斋“焗住揀”都要揀一份。

Anonymous said...

你呢篇可能會插中好多人。
以前盲婚啞嫁的可以廝守一生。
現在左挑右選落得幾年貨仔。
或者,以為一子錯滿盤皆落索,
其實你選的只是跟着上面俾你的劇本走而已。
人生匆匆幾十年,由心出發,想點咪點囉。

Anonymous said...

unkle beach
你的下聯「無得揀,未必係慘!有得揀,絕對唔盞!」絕對貼切現代時下人的心態。『最怕揀來揀去;揀個爛燈棧』。
BJ oe (^0^)

Anonymous said...

"最愛女人購物狂" 我honey 睇完後, 佢先至發覺佢有劉青雲病症, 先至知道佢成日要決定揀 "A"餐 或 "B"餐, 當然佢最叻揀個次, 緊係同我一齊啦.

Anonymous said...

同意呢..如果對現狀係滿意既..就唔會諗如果有得揀會係點點點..因為無咁既需要..

我都希望係無得揀..

Anonymous said...

講真...你903個節目好悶,無新意,每日都係咁,失望

Anonymous said...

TO WAH:
人生夠日日都係無新意..好悶啦..成日充滿失望架啦

但係有失望因為有希望...希望在明天

Anonymous said...

講得岩,世事往往都無得被你揀,無得選擇就要學懂接受,好多時都會因此而愛上。人有太多自由可能冇必係好事,咁多選擇都吾知揀咩好

Anonymous said...

家下o的年青人嘅思想都好負面姐;凡事總有例外,無得你揀就話無自由;無快樂.到比你揀果陣時,你就唔想去揀嫁啦.
好似我個仔o感;出世之後,除左我同佢老豆離婚單野佢無得揀之外,由小學三年班後開始每樣野都有得佢揀,但係每次都將機會放棄.你睇哩個係咪一好好嘅例子呢!
Janny

Anonymous said...

To 小瑪
你也認同要希望嗎?本人言論並無惡意,我也十分支持海灘的,我只是說出我真心的話,雖支持但並不麻目.

Zero said...

小妹確係好鐘意呢幅圖片~^^