9.26.2006

折頭人


出黎交際應酬,總要有兩招旁下身,有人的本領是搞氣氛,有人喜歡做老細請客,有人天南地北,無所不識,有人永遠有班女跟住,當然這個只供男性市場,至於女性,最容易變成朋友,好可能係對方買東西有「折頭」!
九六年百份百岩feel內,我寫了一場關於折頭人的戲,內容大致是鄭伊建同鄭秀文本是一對,伊建因邱淑貞移情別戀,鄭秀文班好姊妹,梁詠琪,蘭茜有日去賣衫撞到邱淑貞,起初充滿敵意,但最後發現邱是vip,買衫有七折,即時化敵為友!
折頭人在社交界所向披靡,上至買樓、買車,小至街市買菜,街邊拮魚蛋,佢都有能本事羅到折頭俾你,能夠遇到呢種人,是上天恩賜給你的福氣,就算遇到的不是全能折頭人,咁打個五折,無得買菜,拮魚蛋,都仲有買衫、飲野、食飯、家具、電器、建身、瘦身.....
同折頭人相處都有學問,人家俾折頭你,你要回十足的禮,例如千祈咪要買野先搵人,要投其所好,找出除了買野外的共同興趣,送他一些他找不到的東西,例如親自下廚煮一餐出街無可能食到的飯,呢個世界無free lunch!
我唔算喜歡買野,又怕一逼自己做唔想做的行為就會好假,所以係呢方面的折頭人,我認識有限,但世上還有另一種折頭人,不過是我們給他折頭!
有次在街上碰到一個我認識了半年的so call 朋友,由於我缺席之前一晚的po局,呢d情況一定有人話我知現場有好多美女,仲個個熱情如火,呢d真係預左,但呢位人兄告之撞到我另一位女性朋友,飲到醉晒見人就攬,但那位女性朋友當晚跟我在某地方飲野,她只是曾經經過門口,跟幾個熟朋友擁抱,與那位人兄打個招呼而已!好彩佢唔係做八掛雜誌,係就死得人多!之後我又竟然唔知點解繼續同佢交往,我發覺佢並非存心作野,不過佢講野係要誇好多先係講野!試過一次我同佢睇住一對情侶在街頭口角幾句,佢覆述給另一位朋友聽的版本是,「果條女係咁鬧條仔,粗言穢語,條仔幾次忍唔住想開拖打佢,都忍住,越忍就越想打佢,個拳頭渣到實一實....」我在旁看著他,佢即刻說「係呀!你留意唔到之麻!」
事實是有發生,但節情被誇大,情緒亦被放大,佢無非都係想講出黎好聽d,「講誇d!好笑D!」,所以聽這些人說話,要打個折頭!最好笑呢種折頭人遇到傷害,佢地口口聲聲要報仇的方法,到頭來都是打了個折頭,話搵人打佢就變成打電話嚇佢話我會搵人打你架!幾cute丫,我鍾意聽呢d折頭人講故事,一方面拆解真相所在,另一方面學他們的觀察力,創作力,組織力,對寫劇本同做節目都有幫助!呢個世界每一個人身上都有野學,唔好放過!

5 comments:

鍾諾海 said...

真係估你唔到,海灘,講“折頭”可以用個咁新嘅角度,好鬼有Wyman嘅風範。

其實你做完節目先至系12點,點解一定要“磨”到6、點先瞓?唔可以調整一下嘅咩?長年累月夜晚唔訓覺,身材會殘得好快0架。

上個星期有晚節目,好似聽到D端倪,你係咪就嚟唔做她他她丫?如果個節目冇你,真系差好遠,不過如果你有其他更好嘅發展,冇理由唔想你好架。

都系果句,去內地嘅網站開番個blog啦,呵呵,你依家因爲孫燕姿變咗咁紅,食住上啦。

sugar19sugar said...

折頭人創作力多數都係好好架.....佢地會越講越上癮....講得越多作得越大.....哈哈....不能自拔....

好朋友 said...

你話每個人身上都有野學, 但係點解你個人仲係咁...

scarred v said...

你的描述能力都好强,不過我想信你無誇大嘅。 我亦非常佩服啲人可以面不改容地講到天花龍鳳,自問無咁嘅夲事。 只覺得自己言語乏味,不令人感興趣。

Anonymous said...

她他她都學到吾少野,第一樣係學識夜訓