9.19.2006

天地

『天地』俗稱是『竇』,一個可以容納一班志同道合老友的樂土,夾band、HIGH、聽歌、吹水、打牌、開P、hae.....不過唔係六樓后座,所以唔會玩true or dare !
另一種『竇』主力要黎住,通常人數兩至三個朋友,大家分租一個一個人住都細的單位,但又唔同情侶同居果種,果D叫做「窩」!唔理係「安樂窩」定「一品窩」,定位溫暖、整潔同齊備,兼要齊心!竇是「亂」的長期代言人,狗竇已經咁衰,仲要亂過狗竇,跟本存心要將竇打到落最地底泥,點解唔可以有「一品竇」,而同時你地好多都其實係「狗窩」黎之麻!太唔公平!
就係因為你想世界上只得兩種類別,將窩同竇分開到天與地,有人偏安排佢地走番埋一齊,拿起個「與」字,變成近年興起的「天地」,呢個TERM一出,個「窩」即刻被比下去,「竇」就更加被擯至瀕臨絕種受保護類別!
「天地」的可能性實在太多了,佢可以係「一間屋」、「一架車」、「一隻船」、「一個公園」、「一間酒吧」、「一個廁所」、「一部電腦」、「一條街」、「一個區」、「一個晚上」、「一個賽馬日」、「一間夜總會」、「一張床」、「一個天台」、「一間時鐘酒店內的房(唔好係2046)」、「一間咖啡室」、「一個桑拿房」、「一間電影院」、「一間書店」、「一個商場」、「一間club」、「一間band房」、「一間畫廊」、「一個酒庫」、「一個保險箱」、「一四一上面的地址」、「一個因生病的下午獨霸全屋睇咸片or重播電視的假期」、「一個全麻甩佬連睇三場直播波的晚上」、「一個又贏錢又可以同姊妹講是非,講買野的麻雀房」、「一家團聚」.....可以成為「天地」的場地肯定還有更多更多,每個人心裡面個天地都不一樣,唯一共通就只有是,當你一入了自己的天地,你邊度都無興趣再去!


有朋友幾千銀一個月租左工廠大廈一個單位作studio,有其他朋友覺得佢又做浮誇野,我覺得同渣保時捷一樣,你可以覺得浮誇,但不代表你其實因為渣不到保時捷,所以抹黑佢為bad taste車,得不到的天地又應該係硬泊個浮誇位,唔係心理好難平衡!
今次去倫敦的其中一個下午去了唐人街後面的old compton street同朋友飲茶,那裡是同性戀人仕的天地,還有不同酒吧有不同主題,military、camp、sailor、queer..... 我一向唔抗拒呢d野,不過我一直唔明點解要搞到咁慌死無人知,但朋友的說法也不無道理,不同人有不同需要,看見這裡的bar、coffe shop、book store人頭湧湧,有求先有供,難得有地方,點解唔可以有佢地「天地」
你如果覺得兩個military打扮的男人當街邂逅難頂,更難頂的是那位擅闖他人天地立心不良睇怪物的不速之客!我講的不是自己,但這類人大有人在!
人人頭上一片天,腳踏的土地,人人不同,天地之間,各有乾坤,互不相干,咁就個個都會係「歡樂天地」



講番朋友個天地先,樓底夠高,裝修相當簡潔,入到黎會理解點解邊度都無興趣去!係好舒服!不過我都係鐘意番屋企,果度唔係我天地,唔係咩窩,唔係咩竇,係我「屋企」就夠了!

10 comments:

Anonymous said...

有自己天地就可以做自已想做既野,但係明確知道那東西地用途是什麼。Volar係去蒲,戶的士係用來坐.......。有能力賞心願,是一件好事。香港地震,真係唔知聽日會地球會唔會爆炸,do whatever u want ,RITE NOW

MM said...

好似好深咁... 有d 明, 有 d 唔明....
不過我都係好鍾意留係屋企o既人, 尤其是唔開心o既時候, 係屋企訓覺其實係最好o既治療方法... 訓到自己都覺得悶, 想出去行下o既時候, 就會唔記得 d 唔開心野....送俾你呢首歌, 在家千日好 (我係 青芥wasabi)

放下了窗簾隔絕街外燈
收起了活躍奔撲街外心
良夜就附托這身絲睡衣
蓋著厚氈喝著暖湯

擦淨了風沙卸下絨大衣
埋入了梳化深處享平安
茶涼掉按著爐再煮咖啡
漫無目的家中沉醉

愛就跳 愛就笑 盡情地哭
笑倦了 跳倦了 便沉睡去
再沒有 人讓我 能讓我牽掛
能像我戀上我的家

放下了心中各樣哀和傷
讓床共燈給我投靠撫慰
去准我寫意率性的生活
從來未讓我失意過

qt芝士 said...

你好厲害, 正面拍軍佬

我在 SOHO 區也想拍人生百態, 但只隨便拍幾張, 不敢有明顯目標

Lazy過路人 said...

果對腳都幾靚...我估係囡嚟嘅...不過咁坐...唔會腳痺咩?

灘淑你食緊乜呀?!

Serina said...

你仲唔係話緊你自己﹖入人地地方野﹐仲影相﹐哈﹗不過外國人已經好接受同性戀文化﹐我在Melbourne讀的大學有queer society﹐有時貼一些廣告0係廁格個門話比人知有D咩meeting﹐討論同性戀forum。我都好好奇﹐同埋呢D話就話學術性的討論﹐係咪其實同gay bar無咩分別﹐都係比D“同道中人”聯誼聯誼﹖

SCARRED V said...

少年時成日想有個地方可以俾大家hea、做乜都好,唔駛周街企諗去邊。
年事漸長,同我班朋友聚會已變成例行公事。
各自有家庭、空間。
屋企取代成為我的避風港,除了返工和睇戲。
我的天地裏有太多事要做呢。

Anonymous said...

agree,the warmest place in the world is always our home~~

Percy said...

感覺到你擁有一個你鍾意嘅家,我都有一個開心嘅屋企同一張令我好滿足嘅床。

Per 頭

Tessa said...

testing...

Brenda.66 said...

the lady's leg looks very sexy.