9.20.2006

The Girl next door


有時隔離鄰舍太守望相助,我會因為咁憎左佢地,但有時太唔認識,我會因為咁喜歡佢地!認識是需要時間與空間,欲速不達。
隔離的那家人已搬來超過十個月,但到現在,我一眼亦沒有見過他們,據聞佢地第一日搬到來,便主動敲我家門,熱情親切跟我妹妹打交道,還借了我們半打汽水以作日後繼續交往的「八達通」,好可惜我妹妹是一個PR,恭維的說話自己講太多,因為對其他人的無故熱情對待,佢會列為「虛偽老土駛唔駛呀?!」,咁佢就會裝出一副驚死你唔知我唔鐘意妳樣,令對方知難以退!每一次都成功,呢次當然唔例外!自此,我就無機會見到呢家人!係如果佢地出門口,見我在等LIFT,都會轉身番入屋,肯定我離開,無機會再撞見我先再出門口!

我其實唔知妹妹發左幾多成力,可以令佢地咁怕我地,但我寧願係咁,因為我唔想信會同一家D鞋放晒係門口,D底衫褲浪晒係露台可以傾得埋,至於守望相助,萍水相逢,幫係緣份,要大家好好感情先幫,咁就唔係守望相助,係供與求,提供感情要求責任性回報!就同「孝順父母」與「愛父母」的分別一樣!

最近我開始研究呢家人,原因來自半年前的一個下午,我在等LIFT,慣性望望這戶人門口放了的鞋,發現有兩對小女孩的鞋,好可愛,臨入LIFT之前,我聽到屋內傳來生硬的鋼琴聲,入LIFT後我腦裡面飄過一個畫面是這樣的,兩個年紀相若的姊妹分坐在鋼琴前的油木椅上,母親坐在梳化上,一邊看八掛雜誌,一邊篤束著兩位小可愛練琴.....之後我每逢下午出街,只要看到門外那兩對可愛的鞋,就會聽到屋內傳出鋼琴聲;她們琴技天天在進步中,然後我心想,我一點也不會彈琴,何來覺得佢有進步呢?其實我對這些琴聲開始有感情,對有感情的事景人,你會留意其優點多於缺點!

幾個月之後另一個下午,我又外出等LIFT,我聽到屋內除左傳出琴聲外,還傳出兩姊妹的爭吵聲,「俾番我!」 「明明係我架!」,我開始奇怪,點解兩姊妹一邊嘈交仲一邊可以彈琴,我估你叫朗朗都未必做得到!「會唔會係播碟呢?!」 「拍電影咩?!」 「電影就似D鬼片,可能兩姊妹其實係死左,但個鋼琴仲彈緊!」橫豎都是自己空想,我選擇一個自己鐘意的版本。

我終於明白點解會咁,係因為一直彈緊琴果個係阿媽!所有要從新想過,個畫面係咁,阿媽好辛苦安頓好兩姊妹,就撲上去鋼琴前,巨躉佔據大半張油木椅,又粗又骸的手指,粒粒皆辛苦地把每一粒音符彈出來.....之後媽媽犧牲自己打牌、煲劇,傾電話時間,除左照顧家庭之外,其他時間就是練琴,最後生羅獎做唔到,練得黎應該可以做到最老羅獎果個.....努力呀!唔知咩太!

然後到最近某個星期日下午,我倒完垃圾從後樓梯正準備離開回到屋去,我聽見佢地出黎,為左永遠保持住神秘感,同埋唔想驚動佢地掟彎番入屋,我企係後樓梯等佢地入lift先再行出黎,終於我聽見媽媽帶住兩個女入左lift,「叮」一聲lift門關上,我慢慢從後樓梯步出,呢個時侯我竟然聽見琴聲,望過去門口,得對男人鞋,怕且都係個老豆喇掛!?!咁...咪又要從新想過!

其實個老豆曾經有機會變成朗朗,但為左要同太太結婚,所以毅然放棄去參加比賽,今日為口奔馳,只可以在假日家人不在時騷騷手癮,太太為左回報丈夫的犧牲,決定要苦練好琴技,幾多歲練好都要出去比賽,羅冠軍時致謝詞就係講番呢個可歌可泣愛情故事!

嘩!The uncle next door 呢個戲名岩晒,但係諗到咁精彩,我更加唔可以再見到佢地一家人,因為我心裡面已經有設定型像;雖然係「真人真事改篇」,但梗係想梁家輝,吳君如主演會想睇一百倍啦,幾十年先有會一次DA VINCI CODE咁,一見Tom hanks就合埋眼,繼續幻想像自己心裡面個男主角!通常我們都希望有事景人可以美化我們平淡的事景人,人家唔俾咪自己諗羅!深淺濃淡,自己一手包辦!或者你會答我得閒死唔得閒病,仲要用腦諗埋d無謂野?!唔係無謂野!係點樣美化你平淡生活!如果都唔明,我可以幫你,只要你打側身海棠春睡,咬住個嘴角同我講~~
『Cmon! Colour Me BaDD~~~! 』

26 comments:

firekid said...

longest post i ever seen i yr blog~ support~ hope u can hv infinity ideas

sugar19sugar said...

嘩~~~~開工前睇完你篇"真人真事".....
精神爽利.....
正呀~~~~多謝你啦......灘叔

Serina said...

如果你大廈係新果種﹐應該門口唔比擺鞋﹐管理員會管的~

anywayzzz﹐你呢篇真係鋒回路轉﹐一路睇一路笑﹗我都常常為身邊的人惗故事情節﹐都好好笑~

bone said...

不愧為編劇!
只喺睇你呢三個版本,巳經覺得好 interesting !
諗嘢都喺我强項!

qt芝士 said...

如果有一日, 見到阿爸走出來, 琴聲繼續揚奏, 故事該怎麼串連呢 ?

我會推測全家大小都學琴, 往鋼琴世家的目標進發

ninja Jamal said...

Amazing!!! What a professional script-writer!!!!
Even in the spare time, you can still write such amazing stories!!! Just
Amazing!!! I can totally
imagine what it will be like when it is shot into a movie!!!!ONe lAst time!!!
A-M-A-Z-I-N-G!!!!!!!

過客 said...

拍曬手掌!
編劇果然係編劇!
大編劇我想問下
你點知一個人係你既mr/ms right =]

Anonymous said...

你都係聽到琴聲,我係聽到隔離屋的女人粗口聲,粗到男人都講唔出口咁粗,唔係門外聽到,而係我自己屋入面聽到,好可怕.自此我聽到隔離屋出門口,自己明明開緊門都再關門.唔可以再想像d咩畫面...

Mabel said...

Hi Uncle Beach,

Seems like you never go to sleep... I've been listening to 三姑 for over 6-7 years, and of course她他她... anyway nothing to do with this topic.

I have weird neighbours too, so totally undterstand what you're saying. It would be interesting to make a movie about neighbours..

Look forward to that!!

Cheers,
Bo

Anonymous said...

unkle beach
人總是有太豐富想像力,「是好」,「是壞」,「是工作需要」,「還是想逃離現實」。
而我...只想逃離現實~你呢?~
BJ oe (^0^)

Christie said...

為趕及萬聖節檔期﹐ 故事既發展會係。。。

有日﹐ 你等lift﹐ 又聽到琴聲。 但係你望望個門口﹐ 一隻鞋都冇。。。

有。。。 鬼。。。 啊。。。﹗

片名"隔離灘叔撞到矮"。。。 (童言無忌)

scarred v said...

你的編劇本能好厲害!
但你說得對,平淡的生活太乏味了。
在街上跟陌生人擦肩而過,我都會選擇性的幻想下某人的故事和身份。
所以一有機會,放工我會由尖沙咀行去旺角搭車。順便當運動。

r1112 said...

Your article made me think of one of my favorite movies, Alfred Hitchcock's "Rear Window". Really amazing film!

When I was small living in a apartment of the public estate, I used to stand in the balcony watching the people in the apartment of the other public estate nearby by my brother's very low end so-called binoculars. I wonder what they were doing, was there any mystery occuring? Very interesting, isn't it?

Now I have moved to another apartment without the balcony and other public estate nearby...so no more stories imagined...Oh I miss the old place where I grew
and my memories are...

Meoo...oow

Isa said...

不虧為食呢行飯!好好想像力....((拍掌

sanrio said...

笑死我 ! 一邊睇自己都一邊想像緊個畫面 ! 你真係一個百分百既寫作人 !

Tessa said...

good story~!

Anonymous said...

哥哥和我都不跟隔離屋的人打招呼,因為我地覺得佢地好自私,由我地未搬黎到搬左黎一年半,佢地仍舊將自己架單車放向我地門口前面的空位而不是他們自己門口前面私空位,故此我地認定左佢地唔係好人。

bii said...

hey... laugh crazily when i m reading your article!!! lol

you do cheer me up always! haha

suppory ya~ :-)

Anonymous said...

我都幾憎懶熱情, 實情係八卦到死的無聊鄰居, 無時無刻晌唔知邊個角落閃出o黎, 避到當然避啦, 有時想避都o黎唔切, 佢又厚面皮地趁此機會問三問四, 惟有頂硬上敷衍佢幾句, 然後速閃, 但個心就覺得好煩!

有時個樣污污where where諗住無人見到,快速倒完垃圾就轉身跑入屋, 總係有幾次呢d衺
o野發生, 就係碰見八卦鄰居囉!佢地實眼望望咁,真係好得人憎! 最憎你佢地失驚無神按門鐘, 話想睇睇你個廁所點整, 個廚櫃點樣, 地下鋪乜地板等等, 好擾人o架! 佢地又唔覺乞人憎o架喎!

小瑪 said...

好正呀..一路睇..一路有畫面..真係好想真係一齣戲..

Anonymous said...

灘叔叔
記得以前細個成日同隔離鄰舍D小朋友一齊玩
幾乎成棟樓D細路都係識得geh
之後每搬一次屋 識得geh鄰居就越o黎越少
直到宜家呢間住左近三年geh屋
我就連對面果家人咩樣都唔知
係樓下或者lift撞到都真係直行直過
睇完你篇野 先令我想翻起人與人之間geh距離 被拉遠得咁快

工作加油^^
=

rubiya said...

會唔會彈琴都唔係爸爸呀~~~
可能係佢地既......菲傭呀~~
哈哈~

said...

海灘,

喜歡看你寫的東西,
因為能感覺與你接近~

而這一個鄰居的故事,
相信亦發生在很多人的身邊,
但往往卻又被人忽視~
海灘,
你今次又令一個平常既故事,
增添了萬分色彩~

Anonymous said...

最近朋友搵屋搬, 佢去o左一d唐樓度睇, 又貴地方又唔掂, 我就成日想起一d唐樓的(鬼)故事! 仲有以前住公共屋村時聽返來唔知真定假的鬼故, 宜家, 真係點都住唔番那種7層大樓喇,真係幾難頂o架! 好在當時細個, 唔識
o野, 先至頂得順咋! 未住過的人, 可能點都想像唔到那種居住環境有幾惡啃的!
灘叔, 你住過或去過那種7層公共屋村未呀?

Brenda.66 said...

I am a person who think too much with a little information. I always thinks this is not a good thing for me. It make me emotional.
Now I think I should write it all down. May be one day, I can use my life experience to make a book, or a movie.

妹頭 said...

哈...第一次黎, 睇到呢篇好想覆...如果個阿爸都出埋黎, 我覺得可能係佢隻貓彈喎, 周慧豹都係咁啦...真係唔出奇架...不過你既想像力真係好豐富, 好鬼欣賞你, 正呀!!!