Kieslowski

十年前，奇斯洛夫斯基正值創作的高峰期，剛完成了《藍白紅三部曲》，正欲退休又復萌創作念頭之際，卻突然心臟病發，手術失敗，卒於波蘭，享年54。臨行前，他遺下了另一個三部曲的電影故事大綱 ─《天堂》、《地獄》和《煉獄》。

四年前《疾走羅拉》導演Tom Tykwer執導的《疾走天堂》，及今年《無人地帶》導演Danis Tanovic執導的《Hell》，便正是奇斯洛夫斯基御用編劇兼老拍檔Krzysztof Piesiewicz，根據他生前寫下的電影大綱所編寫。它們都有奇斯洛夫斯基電影的影子，看得出他那觀人於微，看人性看世界的一份睿智，與他早期的作品一脈相承。

奇斯洛夫斯基早期的電影，拍的都是紀錄片、劇情短片和電視作品。不論那一類型，他的作品都不囿於傳統規範，與當時同期波蘭導演的作品截然不同。他的紀錄片沒有主導性的旁述，一切從人出發，旨在反映現實，尤其是當時波蘭共產政權下的人民生活，以藉小喻大的手法，一方面避免電檢的封鎖，另一方面更貼近人民的角度去批判官僚主義和政府的無能。《車站》、《醫院》、《工廠》和《辦公室》都是此中代表作，平易近人，活現了波蘭人民於共產政權下生活的悲涼和無奈。

奇斯洛夫斯基的劇情片，打從他的第一部學生作品《電車》開始，已看得出他後期作品中經常重複出現的母題：情事的曖昧(《情誡》)、人生的矛盾(《十誡》)、機緣的播弄(《紅》)、命運的安排(《盲打誤撞》)、女性的感觸(《藍》)，而當中最可堪玩味的，莫過於他那不可解釋的感性(《兩生花》)和非敘事性的安排──出現於《十誡》和《藍白紅》中路上拾樽的婆婆──這些特徵，都成了他署名式的標記。

十年了，我們現在只可在銀幕上懷念他的電影，同樣地渡過了十年光影時間的百老匯電影中心(bc)，亦已邁進第十個年頭。十個年頭是一代，我們在這個日子裡籌辦「奇斯洛夫斯基十年祭」，除了讓十年前已成為奇斯洛夫斯基影迷的那一代人懷念這位當代歐洲電影大師之外，更希望在十年後的今天，新一代未有機會在銀幕上看過其作品的年輕影迷，可藉今次較全面的放映，有系統地欣賞他的作品，尤其是今次所選映的早期短片及紀錄片，都是了解奇斯洛夫斯基電影世界的重要作品，錯過者自誤。

我鐘意奇斯洛夫斯基，包括電影裡面所有東西，美術、音樂、選角，但我睇佢d戲唔算多，咁當然必睇果幾部，好似「紅 白 藍」、「兩生花」（今日聽阿芝話十五年後再係戲院上影）不過我最鐘意佢果部係「Blind chance」，但無影響過我日後搞過果部「一個字頭的旦生 」，韋家輝當時無睇過奇斯洛夫斯基任何一部戲，但佢可以想到同Blind CHANCE異曲同工佳作，奇係大師，韋生係思考上都不惶多讓！


係匈牙利酒店的地庫有個溫泉泳池，裡面游水的人大部份是公公婆婆，我見到呢個畫面，不自禁講左句
「嘩！好奇斯洛夫斯基！」




我解唔到咩叫「好奇斯洛夫斯基」，世界上好多野唔知點解，就好似係呢個地方咁古典，又有藝術氣息，點解賣泳衣個COUNTER個公仔係咁樣著泳衣？！

擁抱

唔好意思Yuki！妳寫給我的那EMAIL太精彩，我想大家分享下過箇中感受！放心！係分享唔係公開！
Yuki問我有冇特別渴望情人以外的擁抱，想感覺到那人的體溫........因為軟弱而變得眷戀，從而變得更軟弱！睇到呢度我千愁萬緒，以外的人，朋友、同事、親人？我最眷戀的擁抱是親人！因為其他的都可以得到！想到這裡，我想起黃偉文的「單車」，雖然呢首詞好多人都誤會係歌頌父愛，其實係黃生對父親愛恨交纏的控訴，渴望的只是父親的體溫，僅此而已，但你以為你降低要求，就可以得到所需咩？！
懷念單車給你我，懷緊貼背的擁
難離難捨想抱緊些　茫茫人生好像荒野
如孩兒能伏於爸爸的肩膊　誰要下車
任世間怨我壞　可知我只得你承受我的狂或野

我同家人關係並不是阿Y般覆雜，但中國人總是忌諱，細個鼻骨發大做過手術，但手術後有日傷口流血不止，父親背著我去醫院，身體溫暖但又一份從最深處浸透出來的抖震！「唯一有過的擁抱....」，至於母親，小時侯常躺在她大脾上，讓她給我採耳，我通常都會攬住佢條腰，躺在肚腩上，而佢已經下墮的胸哺就壓在我頭上，好有安全感，次次我都講大話謂仲有耳屎未挖清！果份體溫，果種媽媽的味道，我落棺材都仲會記得！「唯一有過的擁抱....」。細個跑去酒樓食飯，轟一聲推開道大門就衝入去，唔知道妹妹就跟在身後，砰一聲道門就撞落妹妹的額角，妹妹扑一聲就爆晒缸 ，然後係酒樓包紮傷口，我俾錫我個妹錫到癲個伯娘鬧到上天，當時我好想上去攬住妹妹話「唔駛驚...」但當時我仲驚！唔敢咁做！到而家我每次見到佢額角巴痕，我都好想攬住同佢講三個字....
無奈佢身材實在太堅！我做阿哥真係唔好意思攬落去！「唯一的擁抱也沒有....」不過無論在多遠，我們都是如此接近，一家人嘛！
今晚不是特別熱，偶意還有點涼風，可是我的T-SHIRT仍是濕透........

他鄉遇故知

凡事掉以輕心，心事唔夠細密，後果咪就係要擔驚受怕，浪費生命羅！不過我英國朋友有句金句
「i am so stupid，but i am lucky！」
要用多一倍時間機程回港，但係俾我係法蘭克福撞到個香港聽眾，上到機見佢隔離坐左對情侶，西人中國妹，兩個應該熱戀階段，嘩！hot到呢！佢坐係隔離真係唔知可以點反應，咁撞岩我隔離又無人坐，咪邀請佢過黎一齊坐羅，平時我一定唔會咁做，除時請個人過黎煩親自己，但果秒我腦裡面閃過「他鄉遇故知」呢五個字，最後亦証明到多野講果個其實係我，因為我訓唔到，但呢個機程，大家都的而且確無咁悶！
「他鄉遇故知」總給人被動，幸運的感覺，有被動就有主動，有幸就有不幸，被動變成主動，不幸會變成好運，試想想，當你遇上不幸，如果有人肯伸出援手幫你，你就變成好運，如果大家都肯咁做，主動去助人，有很多惡運是會易轉的！
第一次去london，回港後我發現有個一磅大銀無駛，我一直想帶佢返家鄉，但一次又一次都係上了機先發現忘記帶，到最近呢次情況都係咁，我開始懷疑佢係香港已經落地生根，帶佢番去，佢都唔知慣唔慣，既然我會咁假設，佢亦都有可能係好想番去，但番唔到，唯有係度孤獨終老！於是我係機場張應該洗清的外幣留起，（我唔鐘意捐左去，要捐就捐多d，唔好其實唔想羅，扮偉大施捨）帶佢地番香港陪下個鄉里！我唔知佢地相處成點，但起碼我好記得我有好多英磅未用，下次再去一定記得帶晒佢地走，再望望其他用剩的外幣，我知點可以帶番佢地走了，就係首先要帶多d佢d鄉里番黎，等佢地他鄉遇故之，然後下次我就可以一齊帶佢地番去，佢地命運改變左，我都因為咁下次去旅行多左錢駛，果個國家又會因為咁而多左生意，所有事情都會有連鎖的改變！
你可以覺得我講得誇，但係呢一秒你改變做法，世界將會由下一秒開始改變，在無關痛癢的小事上練習，訓練有素後，遇上大難題，你就知道點去改變厄運！
如果夠蠢真係可以得到運氣，這些運氣就是給你改變命運的機會！

當海灘遇上石灘

長情的人是個大悶蛋嗎？我食的、穿的、看的、聽的、交往的，來來去去都是那些東西！我是個不肯接受新的事物悶蛋嗎？只是舊東西還有很多可能性未被發現，我依然好奇想知道，更加唔介意俾人話我係個長情大悶蛋！




已經去過好多次BRIGHTON，今朝萌起去的原因有兩個，因為終於落雨同我想聽BRETT ANDERSON，可惜去到時天朗氣清，聽到BRETT 用佢永恆都咁浪漫腔口唱著TWO CRETURES的重要一句「YOU & ME WERE JUST TWO CREATURES ON THE RUN... 」我不禁回想第一次來到這個海邊小鎮時的情景，寒冷，大風，有雨，我跟情人在長堤上，攜著手跑入室內的遊戲中心避雨，當時覺得真係好浪漫，但其實落到咁大雨，梗係會咁做架啦！想到這裡，自己不禁笑左出黎！諗開就繼續諗，第二次來這個地方，我看到無數一家大細，扶老攜幼在耍樂，我覺得好溫馨，但這個樂也融融畫面的背後的辛酸，絕非我生命欲追求的東西！再想對上一次來，怎至跟同行的友人嘈交，原因是他替我安排了全個行程，咁我點解唔跟旅行團黎！至於今次，是我去BRIGHTON最開心的一次！
一個人去到這個如廝浪漫溫馨的地方，由火車站落車直行到石灘再過長堤，然後繞過商業區回到火車站離去，全程不過一小時，成十五磅車費，咁樣玩法以經濟效益而言，真係有D蝕，但玩多幾個鐘唔代表抵左，可能只會悶左，從前玩半日，除左係因為對個地方唔熟，大部份係因為要就呢個，就果個，今日自己去，鐘意玩幾耐就幾耐，唔駛扮浪漫行石灘，唔駛特登坐低食FISH & CHIPS，唔駛玩攤位遊戲，唔駛見到人地一家溫馨就要大談未來建立家庭的大計，唔駛玩完機動遊戲想走仲要陪人行SHOPPING MALL，唔駛想去馬場睇下，但幾個人跟住你，終於真係睇下，睇多陣都唔好意思！
一個人鐘意做乜就乜，影相唔駛趕住要影完跟上大隊，浪廢食物同車費都無人會管到我，唔駛因為要驚唔好意思而跟足有人的安排，聽住歌唔駛同人溝通，靜靜觀看這個小鎮，終於有新發現，原來這裡同咖啡灣差不多，分別只在於我的心情，這裡讓我知道一個人的快樂，此時，I-POD正播出EASON的舊歌
「除非你是我，才可與我常在」
到頭來我們都是跟自己最相親，早些學習自處，找出自處的快樂，與其他人分享快樂，並不一定要即時，更不一定要得到對方回應，懂得自處，就懂得與其他人相處，這種生活態度既經濟又實惠，想到這裡我開始明白D人點解到我呢個年紀就會怕死，因為尋找半生，就是要找到一個自己喜歡的生活模式，找到了發現自己已一把年紀，開始擔心自己仲可以享受得幾耐，不過幾耐都好啦！
『JUST ENJOY THIS MOMENT！』

疾走英倫

認識一個城市，跟結交新朋友係一樣，總無可能見一次真完全明白對方，一見如故的人實在太小，一次就愛上的城市更加小，但總有些人你見第一眼就決定一定唔會見面，總有城市你去好多次都仲想去！
你問我LONDON 有咩好玩，其實都不外乎果幾樣，「行街、買野、睇MUSICAL、行MESUIM、睇波、CLUBING..」而當然最常做就係避雨！飛機一到希斯路，我雨多田光就忍唔住講左句「THIS IS LONDON ！」你有睇曼聯對爾頓就知D雨有幾大！但竟然第二日奇蹟降臨於我身上！





無乜相影到，因為真係無乜好影，十年前來同十年後再來，都是那些地方，OXFORD CIRCUS、 PICCADILLY CIRCUS、LEICESTER SQUARE賣D野都係差唔多，COVENT GARDEN都仲係表演緊果D表演，搵中國城都仲係好易，因為仲有人講粗口，但係八成係普通話了！CAMDEN TOWN依然似講英文的女人街、HARRDOS地庫個FOOD COURT依然係食一個星期都食唔完、D巴士轉晒新款..... 其他所謂旅遊區去過唔想再去，未去過而家唔想去，咁我係LONDON做咩？！
其實我最鐘意都見車就上，唔知去邊，見到個站名幾鐘意就落車，然後無無謂謂行下行下，睇下D人！而家LONDON除左唐人（大陸人）多之外，仲有好多東歐人黎左做野，聽講有成六十萬人，所以你係LONDON英文，如果對方無乜反應，未必係你講差，可能佢地跟本聽唔掂，或者聽到唔識點答！飄洋過海的人，總是心事重重，從前我喜歡聽唐人街的老華橋講他們的故事，每一次聽，我都會感嘆自己是多麼的幸揊，現在那些人已經不在，換來的是那些毫無人情味的大陸新移民，一險茫然，各家自掃門前雪，他鄉與故之，笑容欠奉，一副講多無謂，食完快D走，這樣冷漠真的/令我有點難堪，但跟這城市相當相襯！
LONDON沒變的，就是那副擺明係貴夾唔飽，你有錢就黎，黎到唔代表特別好招呼，冷漠依舊，囂張依然！所以陽光普照真係唔多夾呢個城市，但一早一晚天氣還是很冷，我今朝瑟縮係KINGSCROSS火車站等車，我覺得相當恰如其份，就是喜歡你這個模樣，反而你對熱情，我會不懂招架！老朋友麻，簡單自然就得了，能夠聚頭已經好滿足了！

頭上一片天

外國個月亮係唔係圓D我無留意，但歐洲個天空肯定係特別藍，D雲特別白，個天特別大，除左倫敦例外，因為呢個城市係屬於陰天同雨水，關於倫敦，過兩日再講！
其實好多歐洲國家都可以稱得上「悶」，當然你可以美其名叫做「寧靜」、「簡撲」、有「古典美」！如果路過逗留一天半天，我都會認同以上所講，否則都係覺得得「悶」字，尤其係東歐國家，都係等再老D先再去！
坐係度望住咁靚的天空 可以半日唔郁，我已經夠懶，唔想再咁hae！似乎都係大城市岩我多d！不過人人頭上一片天，同一個天空下，睇法人人不同，你鐘意就望多兩眼，記得讚下影相果個！ 邊個影，最後自有案！

ENJOY~~ !!

黑獄斷長歌

八九年第一次撘長途機去倫敦，要香港飛四個幾鐘去馬來西亞吉隆玻，然後等兩個幾鐘再轉機，飛多十四個鐘，先到倫敦，辛苦過行去咁滯！落機果一刻，我同自己講，我下次一定要夠錢撘直航機，終於幾年後我再飛倫敦，都係撘轉機，今次無咁辛苦，因為要係杜拜訓一晚再上機，時間仲長，落機時我再同自己講，下次一定要撘直航！終於之後我飛邊到都係撘直航！但當我係經濟倉渡日如年，周身骨痛，想訓又訓唔到，落機時我同自己講，下次我要夠錢坐商務客位！但至今我仍未坐過一次！能力我是有的，可是要俾近雙倍價錢，得到的只是接載我到一個目的地過程的舒適，我寧願辛苦而可以食多餐好，買多樣鐘意的東西！商務客位，應該係工幹公司出錢俾我撘，總有機會，不過最好都係無，我真係驚坐過一次會返唔到轉頭！
其實只要坐到緊急出旁個位，可以伸直我對四十幾吋長腿，然後盡量唔好知機程時間，上機前盡量唔訓，一上到機就斷片，到達就醒，咁都唔會太辛苦！但係當你想訓時，空姐就會派餐，都算...飲飽食醉後會易訓D，點知到你想訓，前面就有一班男女因為坐位太窄，而走到空間比較大的緊急出口處旁伸展筋骨，傾偈解悶，咁我點訓得著，然後唯繼續聽歌，嘩！望下個I-POD，已經聽左一百四十幾隻歌，「喂！究竟仲有幾耐先到？！」我又問自己點解唔坐商務客位！SIGH~~~~終於d人走晒，我好辛口先訓著，空姐又派餐，就算佢唔叫我食，過程都仲會整醒左我！望望個I-POD，一百七十幾隻歌，「喂！究竟仲有幾耐先到？！點解唔撘商務客位！ SIGH~~~~我覺得七仔好慘！困係個玻璃缸，無地方可以去，想訓時個主人唔係圍住佢傾偈，就係整醒佢，餵食野！真係因果報應！我考慮係咪應該要放生七記，但係又驚佢唔適應外面世界！想下想下，終於聽到機長話有個好消息，班機會早到........ 十分鐘！真係感激流涕咁滯，如果唔係早十分鐘，一定唔可以聽完二百零六隻歌就到！
無呢十幾個鐘，又點會覺得呢十分鐘重要呢，如果撘商務客位，我就蝕左呢十分鐘了！YEAH~~~！

灘

我鐘意貓，但我並不是一個貓迷，起碼我無飼養！原因係同養小朋友一樣，人地果個梗係好玩，但到自己養就超多問題！佢點可愛，但咬爛我張梳化或者其他野，又整到成地毛，搞到我狂打三十個乞嗤！ 擁有就要供養佢！ 所以我無貓！

平時玩貓，通常去朋友屋企，養貓多數係女仔，貓咁嗲又識dum人，俾隻貓錫梗係好過俾男人激啦！不過有得激梗係好過無得錫啦！但記住什麼都會有癮，我有個朋友由唔鐘意貓，養左第一隻之後，半年後總數養左四十幾隻，間屋得四百幾呎，去到佢間企就會唔鐘意貓！總之養寵物同轆咭一樣，會泥足深陷！要有自制力呀！老友！






除左無聊會去勝利道，總統戲院睇下貓之外，我鐘意去『阿貓地灘』，原因除左有個灘字之外，佢多貓可以玩，仲可以抱，消費又唔算高，但呢d都唔係我鐘意去的原因！我最欣賞係佢個「慨念」！
其實「阿貓地灘」係一間日式夜總會，你去夜總會，會有小姐陪妳坐，然後你在店內消費，玩得開心，俾得舒服，普及化咪就係阿貓地灘羅！一間正常咖啡室，但去到有一大班貓陪你玩，你想多d貓陪，只要幫襯多d就得，即係買多d貓糧，你無本事d貓就會過，你請佢食又唔代表一定俾你摸，賣藝不賣身你知架，講落其實似石塘嘴多過夜總會，平價燒金窩！
所以果到成日聽見d客人問d青春女待應「fifi呢？」 「bobo呢？」 我覺得咁問，女待應應該答
「係果邊等緊老細你呀....」

至於我次次捧場個打令就係佢！MINI！

鐘意短毛貓，感覺爽朗，輪廓清晰，同埋有格，識嗲人又會發人脾氣，呢d女，唔係...呢d貓真係dum死我，我無餵佢食野，個個都餵，我梗係要有d唔同 ！



雖然我知道每個客同妳關係都可以咁親蜜，但係我唔介意，因為我知妳個心係向住我，我唔會睇妳唔起，但我點都唔會救妳出火海，大家保持呢個關係，先會永遠記住對方！
妳好嗎？M U badly！