10.26.2006

給有拖的人



無拖拍,悶!有拖拍,煩!不過大多人都寧願好煩咁有拖拍,始終點煩,只要一百個巴仙裡面有一個巴仙是甜蜜,可以甜蜜半分鐘,就夠捱餘下果二十三小時五十九分半痛苦!
拍拖中最煩當然是想節目,但你有時間,有錢,節目是可以買回來的,總算可以解決!最煩又最難是拍拖一段時間,對方係你想唔到的情況下問你 『其實你鍾意我d咩?』





『頂!問d咁野?!』 、『我想同你上床左喎!』 、『鍾意你有d錢羅,唔通貪你樣醜地中海咩?!』 、『其實我都無鍾意過你,空虛搵個人hae住先之麻!』 、『死喇!無瑞瑞問d咁樣,我梗係之前做錯左野!』

或許當情人問你這一句時,你心裡面還有更加多其他沒有說出口的答案,但你選擇唔作答,因為點答都死!有些人會覺得自己好聰明,會反客為主『不如你講左你鍾意我d咩先啦?』,然後對方又會話『你講左先! 、『我唔講住,妳講先!』 問來問去,問多兩句大家d火就會上腦,呢個話題好快就會完,但對方問得你,而你未答,轉頭咪又再問過你! 所以有人會選擇答『點知喎!鍾意一個人點知鍾意佢乜喎,總之鍾意咪得羅!』

當你講呢一句時,心裡想著的全是上面的答案,其實對方都質疑你個答案背面的真相!

我都俾人問唔小,由諗爆腦到口不對心,由保持緘默到胡亂回答,現在如果仲有人問我,我會有果句答果句

『我想同你上床左喎!』 、『鍾意你有d錢羅,出街我唔駛俾錢!』 、『其實我都無鍾意過你,空虛搵個人hae住先之麻!』 、『無瑞瑞問d咁樣,我梗係之前做錯左野!』

咁樣答好處是及早話俾對方知,問我呢d問題,難受果個會係你,但偏偏事以願違,我咁講完,對方會當作是笑話聽,放聲大笑;平生我用盡幾多功力去講一個笑話,都唔會及呢個咁引到人笑,所以一個笑話好笑唔好笑,都係睇對方想唔想笑,笑話當認真咪唔好笑,但認真當笑話,除左好笑,仲可以避開好多尷尬場面!

久而久之,無人再問我,係時侯到我問番對方,竟然每一次問,唔同人但答案都係相同 『無野鍾意你,係因為你直接過其他人!』

各位!重大發現定係其實一直忽略呢?個個都等人錫,等人愛,等人約,等人攬,等人開聲表示.....等呀等,等到忘記左可以自己主動去爭取!「點爭取喎?!唔通話我鍾意你,好想佔有你,你跟我啦!」

中學時代喜歡了一個隔離班校花,所謂校花,即係好多人媾,幾時輪到我,高年班的幾個師兄,教我買定一張星期六七點半戲票,然後走到個女仔面前俾張飛佢「我想約妳,聽晚七點三係海運戲院門口等!」講完唔好等佢反應,轉身就走!

我真係有咁做,翌日仲真係係戲院門口等佢,但等到七點九都唔見人,我無入到場睇「刀馬旦」,心裡面自責蠢過隻豬,浪廢金錢,信錯師兄!果年我十五歲,之後我再唔主動!

十二年後一個寒冷晚上,我在朋友屋企BQQ重遇這個女子,當然事隔十二年後,佢美其名就叫有左女人味,實際上都人老珠黃了,大家閒談飲酒,想不到幾杯過後,佢竟然話我「無風度,無耐性,梗係無女仔鍾意啦!」
「咁耐無見,講d咁野?!」

原來十二年前對方是有出現,但遲了二十分鐘,仲自己入左場,可惜不見我在,好不氣結!所以從此無再啋我。我問佢「妳....當年點解會應約?」 「?!果時邊有人會咁樣直接約人架,仲懶型咁....咪出去睇下羅...點知....」 跟住佢一五一十說我不是,當中當然拉埋其他男人落水鬧啦!」 望住佢,我明白原來主動的重要,但好彩我無入場,大家無開始過,呢個故事先會更加入心!

「主動」確實會易於令事情加快進展,但主動只是一個行為,只構成事情開始,咁「其實你鍾意我d乜呢?」

『頂!問d咁野?!』 、『我想同你上床左喎!』 、『鍾意你有d錢羅,唔通貪你樣醜地中海咩?!』 、『其實我都無鍾意過你,空虛搵個人hae住先之麻!』 、『死喇!無瑞瑞問d咁樣,我梗係之前做錯左野!』

『我講先?!』 、『點知喎!鍾意一個人點知鍾意佢乜喎,總之鍾意咪得羅!』

其實唔知道鍾意你d乜,而繼續鍾意緊你,咁咪幾好羅!係要情人好辛苦講左你一樣微不足道行為「我鍾意你肯幫人!」,然後連你自己都所都質疑 「我又真係無咩值得人鍾意喎!」 咁又何苦呢~~~

17 comments:

Anonymous said...

情人未必想知呢d野, 可能明星會想知fan屎點解鐘意佢地多d!!

我覺得如果你個情人愛你, 唔駛開口問, 佢都一定忍唔住主動話你知佢鐘意你d乜

Anonymous said...

女仔問你鐘意佢D乜, 無非係想你贊佢「佢自己」最 proud of 自己既野,

你估佢真係唔知個真實答案係「想同你上床」咩!

Dum 吓人啦!你覺得「佢覺得」佢自己「最正」係D乜, 你咪講嗰D囉!

足正路就包你想點都得!

Pessimist said...

呢個係我精心設計嘅一個「讚美」詞,亦係用作送比您呢篇post,以您嘅聰明才智一定睇得出!

讚 讚 讚 讚
讚讚讚 讚讚讚
讚 讚讚讚讚 讚讚讚讚
讚讚讚讚 讚 讚 讚 讚
讚讚讚 讚讚讚讚讚讚
讚讚讚 讚 讚
讚讚讚讚 讚讚讚讚讚讚
讚 讚 讚 讚
讚讚讚讚 讚讚讚讚讚讚
讚 讚
讚讚讚讚讚讚
讚 讚

Anonymous said...

講真, 如果你問我唔鐘意妳d 乜, 我唔使稿, 都可以講七千幾字, 當然有五千係粗口.
鐘意妳既最大原因咪就係因為佢唔鐘意我囉

Unknown said...

睇環境 睇場合 睇氣氛
可以有唔同答案

我估大部分都係以'耍花槍' 為目的居多.
無論係男又好, 女又好, 問得呢d問題都通常係sweet sweet的時候問... 大庭廣眾唔會有人問瓜....

俾人問果個最好答d sweet野... 如果口口唔係你直係搵自己煩...

Anonymous said...

我都試過俾男仔問我呢個問題,我真係答唔到lor
乜鍾意需要理由既咩???

Anonymous said...

在我而言, 如果我問呢個人"其實你鍾意我d乜呢?"...我心裡面其實是諗緊--->"其實我唔鍾意你, 你做好都諗唔到鍾意我d乜".. :P

因為如果我好鍾意果個人..我根本唔得閒去諗人地鍾意我d 乜..我只會諗點樣去令到呢個鍾意我多d

Anonymous said...

其實我試過答囉,鐘意d咩,唔係「點解鐘意」播。「鐘意d咩」只不過係一d野/ 原因我鐘意對方嘛。我同佢研究到係因為我同佢都有幾strong 0既common interest。同埋我人性格good囉,呵呵唔知呀…不過我就話如果你搵倒個好d 0既就飛左我啦,唔好為左我而後悔/ miss左…因為我地仲後生啊。(有時「明智」到有d恐怖)

Anonymous said...

在我以那標準答案回答完女友對我的提問之後,其實自己都會自問,我有咩值得人鍾意呢?她又有咩值得我鍾意呢?

是因為害怕孤獨而與她一起?
看著她的缺點總是比優點多,總想著分手。但又留戀著她的優點而不肯放手。其實佢經常問你此問題就是因為她愛你比你愛她還多,但又對你沒有一定的信心,想你給他一個肯定,一支強心針!
像黃子華說﹕女人是需要男人保鮮,而男人只需要女人新鮮是也!

Anonymous said...

不要想太多,愛就是愛。
愛是不懐疑。。。

Anonymous said...

對!要愛就去愛, 因為當無愛後你點想美化一件事情都無用。

Anonymous said...

愛是感覺,當你睡前想起他,睡了夢見他,聽歌想起他... 就是這些感覺,就像浪漫,是感覺,是意會,一切不需言喻。
覺得對嗎?
對於以上的comments我都好同意,各有各論據、道理。
係咪要到真實情況出現時,臨場發揮至係最真心和準確呢?

Anonymous said...

女人係因為太唔了解自己先會問對方鍾意自己d咩,都咁大個女啦,仲要日日聽大話咩,男人~總有10個8 個model answer袋係身la, haha

Anonymous said...

咁o岩近排寫左個故仔講點解會鍾意o既「理由」...... 或者真係要問返人地點解鍾意自己係一件無謂o既事,但本身你會鍾意一個人就真係會有理由,只係你自己都可能唔知甚至忘記左。有d 人會因此覺得,鍾意咪鍾意囉,好自然就會有感覺架喇,跟住就會開始「睇化」咁覺得愛情係唔需要咁特登、係唔需要主動、甚至會認為只要有緣自己點差點唔好都會有人鍾意自己——因為,鍾意一個人係無理由架嘛! ...... 或者,呢d 人係「運氣主義者」。 ~___~

栗子 said...

其實我都唔明白點解d人會問呢個問題~
我以前男朋友又係咁... 我都唔知點答佢好 ~

Anonymous said...

非常同意 bo, maryann, and chinkerbella 以上所講。問呢類問題都系想制造一個sweet moment,拍拖系甘架啦,你tum我, 我tum你,比埋位你都吾想入,仲要想對方難受,又何必﹗?加上問得你既,通常系因為少少無安全感,但系又無你想得咁複雜,無需要咁大反應,咁樣好吾大方,自私,同無品呀﹗ p.s. 不要像呀文那樣,害苦了嘉玲﹗>_^

Anonymous said...

就算好中意一個人時,我都唔會問對方呢個問題..