10.18.2006

Tribes

我覺得子華「兒童不宜」最精彩的,是講辦公室那一part,好笑之餘,亦奇怪子華沒有在辦公室工作已那麼久,竟然可以玩得咁刁鑽到肉!當然亦有人認為子華只不過是講了辦公室內的皮毛事,還有更多難以想像的情況沒有披露;無辦法啦,辦公室的人與事,比Twilight Zone內出現的,發生的更加迷離,要全部涉獵到,可能要講十一二年先夠講,事關這些事與人,還會日日更新,加強,快過新款日本時裝,點跟得切!?
我好好彩,可以做一份唔駛點番office工作,不過因工作關係,亦遇過不小辦工室內的奇人,或者咁講,我遇過唔同種族辦公室人!

首先從面色分類,最常見當然是「黑面人」,呢種人通常係你上司,你好似變左部太陽燈機,你老細一見到你,佢塊面就自然變黑,慢慢變黑又得,即刻變黑又得,得左!無論你做得岩定錯,佢塊面都係同古天樂咁黑,但樣衰五十倍!鬼叫佢係你上司咩!咪忍囉!但最唔明係果個明明係你下屬,你叫親佢做野,佢望住你,接觸到紫外光,塊面何止黑過古仔,直頭同摩根費曼兩兄弟一樣,如果唔係懾於荷里活明星艷光之下,你一定會開口問「我係你老細,叫你做野係咪我唔岩?!」其實就算佢唔似費曼你都唔會問,因為佢唔會識答,但塊面就會再黑D,公司d燈暗d就搵佢唔到!

有黑就更係有白,「白面人」通常白中帶青,佢地長期時間都表現到自己好大壓力,做到面青唇白,隨時'砰'一聲就一倒不起,犯錯時加強版的青色會滲透整塊面,「責怪我都無用....一陣我暈埋俾你睇添呀!」
呢個種族好小做到老細級,通常都係跟你但一個月病番左四五日果個手下!



「惶種人」算是咁多種族之中有智慧的一族,口口聲聲「死喇!死喇!點做得切呀!」,面對所有事情,都先扮死狗,驚左先,自然就會有其他「有種人」自告奮勇或者叻唔切話「唔係嘛?!咁都要死?!好易之嘛,等我搞!」,以退為進,集天下兵器於一身,但這種人會唸精學懶,越做越無heart!最多呢種人產區是政府機構、歷史悠久的大公司....至於年份,最前是60至65,但最近發現竟然有83、84出廠亦不相伯仲!SIGH~~

「有種人」上面已提及過,如果不懂及時頓悟,轉到另一個族類,壽命極短!

「借種人」,由於借人種類扮做自己種類的科研仲處於發展階段,好多借種人只借左個殼,裡面乜都無,你點可以怪一個無腦人,佢唔明你講乜係好應該,佢唔記得你講過乜亦都好正常,至於上司講完唔數算,做左又唔認,扮唔知,扮唔見,佢根本無錯,只係科技發展緩慢所至!因為有很多人為左可以同借種人溝通到,自願轉族,裝傻扮黐,加入借種一族,你唔做我就唔做,你做我唔駛做,要我做就扮唔記得,你提我就扮唔識向你請教,兼博你無耐性教,自己羅做埋,如果學識點做就點下個去做!
真借種人你無佢乎,扮果d你無佢偈!

「播種人」,簡單直接,係辦公室就係負責散播各種是是非非,有組織無目的,搞到公司分晒黨派,鬥得你死我活,好睇過金枝欲孽,有些老細鍾意公司分黨派,因為可以借力打力,要改頓時只要發動一場內戰,勝出就証明有能力留低,因此播種人絕對係有價值員工,更何況,唔知咁岩定咁穚,好多時D播種人同老細總係有傳撘上,有時仲真係播左種,咁你話佢對老細幾重要!
切記「得罪播種人,惡果自尋!」

「果精種人」,越來越小這種人了,可以決定果斷,頭腦精明,運籌帷握的員工,大多已到他鄉掘金,還留在這福地的,是「紅種人」,一些未夠班但在無人可用之下,佢好運過你小小,所以做左你上司,實際就你做得多過佢幾倍,但人工小佢幾倍!
「你上司係紅種人,你都幾難唔頭痕!」


「紅種人」,靠運,靠果排鴻福齊天,時來風送騰皇閣,運完就玩完,照計壽命好短,應該影響唔到好耐,但族人人數多呢,真係死左一個紅種人,仲有千千萬萬紅種人,望死晒不如望自己有日變種又為紅種人好過啦!

「賤種人」,一班俗世人無法接受戰士,以身作則,提醒大家不要得意忘形,世途本應如此險惡,弱肉強食,忘了這是生存的必需的話,你被吞噬人理所當然的!


「變種人」亦都是另一種為求生存的轉變,無可厚非,比起「雜種人」,算是易對付,而不可怕了!


「雜種人」,對付騎牆派,無招勝有招,無論自己是那種人,只要你處於優勢,佢就會出現於你身旁,你一唔見佢,就代表你跌,又或者做另一種人更有利益;如果你認同,咁雜種人多D出現絕對係好事丫!反而好耐無見過佢,就要好好撿討下自己!「
見到雜種人,果期就精神!」


「絕種人」,真真正正廢人,無腦,蠢,唔靚,懶...除非佢係敵方公司派來做臥底,否則佢存在是無意義的,但佢廢到咁,可以係公司臥到咩呢?!唔係臥底,唔係皇親國戚,同老細又無撘上....咁點解唔炒左佢呢?!一定係呢種人已經列入瀕臨絕種受保護的名單上,所以一定要養活佢地,炒一個就小一個,香港已經無晒特色建築,如果唔救救呢種特種人,真係天理不容!

唔知仲有漏左邊種,或者又有新變種出現左,辦工室個戰場其實好細,空間細但人種多,註定無得諧和,但如果係汰弱淘強,把最好的給客人,我當然支持辦公空係應該開戰一樣,但現在是廢鬥廢,仲要連累到其他人,包括客人喎。Tell me why?!點解一間公司越大,就越多各種廢人?!

好朋友Cindy話「大公司做得野人唔多,所以先要請咁多人做野!」,這番話不無道理,你睇d大公司可以次次裁員二三百人,裁極都仲可以再裁,你話之前請左幾多廢人丫!

如果你係做得野果種,你一定係做到死,如果你係廢下廢果種,你一定嘆到死!

有能者居之,無能者自知

15 comments:

sabrina said...

滩叔....你都有去梯子华个SHOW咩???
我都去梯佐,仲见到三姑啊....
三姑在我地前边几排..哈哈..仲成晚撩
D头发,好SEXY,好有女人味啊,哈哈~~~

栗子 said...

你呢篇精景呀 ~~ 唔知我將來會係邊種人呢 ~~
我係新 blog 友 ~~ 得閒來我到逛逛丫 ~~
希望我將來寫既 blog 都可以好似你咁 ~~
咁多人欣賞呀 ~~

serina said...

精彩﹗﹗都差唔多cover哂一間公司的人了﹗

Pessimist said...

office 本身就係一個廢墟,全部都係冇凌雲嘅廢殼,公司就等於食峴禁... 冇咗d峴殼係就係食得容易d... 但就緊係冇禁完美~

仲知無論你點打佢... 佢都只不過係份工!

Pessimist said...

你禁大篇人種論,真係睇到有d暈~ 你話人類係咪奧妙呀...d行為進化極都仲有,但係個腦都仲係用緊個一兩個%...

scarred v said...

Unbelievable! 除了讚嘆你的觀察力和分析力,不知還可說甚麼。
就算我呢啲植根辦公室多年,都只是懵懵吓又一日。權力鬥爭沾不上,辦公室政治不識玩。
我只想唔駛做,但又不愁錢花。
好一個春秋大夢!

小瑪 said...

uncle beach 你係睇邊場呀? 我尋晚 (17/10) 睇左..我都覺得office 果part 最正…我同d friends 都笑到 "爆咀" <---哈哈

Christie said...

多謝鄒師傅詳盡既解釋﹗

Anonymous said...

海灘~我果日睇騷都見到你呀~我就係果個係咁跟住你~著背心果個呀~估唔到你真人都幾高~幾大隻下~你係咪結左婚嫁喇?

Anonymous said...

我有次去超市買o野都見到你呀!真人好高大,
我幾開心呀!跟住你行o左兩排貨架, 但又覺得靜靜跟晌你後面唔係幾禮貌, 所以狠下心走
o左喇! 做公眾人物有時真係幾煩呀可, 無端端俾d陌生人留意或跟住都唔知, 又或者知o左又唔可以做d乜, 有時真係幾擾人! 我只係一個普通人, 有時都好憎d sales煩住啦, 更何況你地呢d公眾人物有時俾d fans或者煩人跟住, 想享受一個人的時候都被干擾, 想起都覺你地幾無奈, 狗仔隊唔怪之得咁乞藝人/公眾人物憎囉! 就借此同你講聲sorry, 我唔係有心做d咁煩人o既o野, 只係當時太開心, 所以忍唔住跟住你後面, 想望多眼, 我唔會好似ella 的fans咁癲, 做d犯法o野o既!
加上我生得細細粒, 你拎轉頭平視可能都未必見到我呀, 哈哈哈

吱喳 said...

灘叔,你好,我是吱喳妹。

看你的blog已有好一段時間,lunch time留在office吃飯,又不能講是非,看你的blog是最佳的娛樂。

這段引述黃子華的話,好正,喺我公司搵到好幾個,forward給同事看,大家都拍案叫絕,笑到爆咀,正~~

Peggy said...

灘叔你好, 時時都有睇你固blog但一直冇留言, 由於今次實在太有同感喇, 不留不快.
晚晚有聽你做節目, 覺得你極度有急才
睇完你篇blog, 極度有同感, 因為我正身處於一個有齊你所講既各種人, 一路睇一路配對邊個係邊種, 確係好笑, 自己係邊種? 仲未分析到, 遲d話你知.
面對咁多種人, 有時真係唔識應對, 你講得冇錯, office人種真係時刻在邊, 今日對住呢種人, 聽日可能要面對另一種, 仲未加上果種 "變種人" 同 "雜種人" 喎, 加埋真係死火!!
今次講住咁多先, 下次傾過 Bye Bye~~

泰美 said...

真係好鬼正, 講出晒公司的人種, 係office打工, 真係乜野人都會遇到的, 我簡稱所有唔做得,睇唔信眼,只識講唔會做,一日發白日夢發到天黑的人為"monster",佢地真係望住個"mon"0架咋, 冇乜野做但可以開ot開到好夜,office hour唔做野,只係講多過做,不過老細永遠最喜歡開ot的人, 我地準時收工就係我地冇野做,唔會諗我地係office hour已搞店晒啦.. 真係唔公平..

DY said...

灘叔, 我都有去睇子華, 我好欣賞都係公司個段, 除左因為好好笑, 仲係個種都唔知要做多幾多世人先可以學到既精神...

坦白講我依傢先得個二十到就尾啦...我都化晒, 口可以講化個心自己有時都好唔化,成日[谷]住的氣... 辦工室, 唔係二五, 就係三八, 一係扮傻, 一係就係死蠢... 仲知唔做唔錯, 多做多錯, 你話點會唔係為左個飯盒去出take attendance... 所以真係可以鬼上身, 我寧可短一半既[陽壽]至少人生會快樂好多...

總之, 老細係白痴, 只係信二五仔講野啦...唉... 唔死都冇用.

玥兒 said...

一直都有聽你的電台節目, 一直都有看你的部落格, 一直都只是一個CD-ROM.
因為黃子華, 因為兒童不宜, 真的很想說一說.
不知道是不是不同場次的關係,那一段關於辦工室的,我並不是我覺得最好笑,不過我很應同你所說的。你那說的那幾種人,幸運地我只見過某幾種,另一方面說,我不幸地我最常見到的,就是黑面人和賤種人。
對我來說,化粧那一段是最好笑的,很多女人缷粧後,是完全認不出來,那該叫喬裝吧!(不知道是不是女生特別有共鳴,因為我和另一個女生都覺得這段最好笑)