10.15.2006

飲飲食食...好到極



喜歡多工作的日子,因為工作多,就會出去玩更多!「做得金!玩得更金!」








所謂「玩」只不過是一個代號,一個可以促進人生理、心理新陳代謝的行為,一個可以令我們終於無覺得時光虛渡的過程,這過程稱之為「好玩」;打牌、飲酒、唱K、行山、游水、睇書、聽歌、煲劇、潛水、性愛、購物、肆食、釣魚、工作、清潔,維修、旅行、按摩、吸毒、橋牌、過招、下棋、飛車、上網、做gym、訓教........總之你覺得幾悶,只要做某個行為,是會覺得好好玩,這行為就叫做「 玩 」 ,但可惜城市人個個忙到得閒只有一樣東西做,就是「死」,個個都做到得閒死唔得閒病,仲邊有時間做其他野!無可能淨係玩同淨係做(淨係讀),人是由多面體組成,人生不應只得一面,有時真係要「死就死!我要去鬆鬆!」,鬆完返黎,往往有意想不到收獲!
這個星期去了多個生日會,飲左好多,食左好多,回家的時侯,突然有兩秒問自己「passport放左係邊?!」,無辦法,呢個周末真係好似去旅行,「飲飲食食.....好到極、甲乙丙丁.....都岩傾」,有很多啟發,也有不小新構思浮現.....太寫意,我想做「思想家」,齋想唔行動!起碼偷埋今日懶先!
「前路漫漫....有排燦爛!」



「無黎禮貌......亂認母校」
從某相識的blog中發現他將會回到母校舉行婚姻註冊儀式,文中提到重遇一些十多年的舊同學,很有情懷!可能我不是這種人,如果我當你是朋友,我定時定刻一定會找你見面相聚一下,如果過了一段時間沒聯略,就以後都不會再聯略,見到面也很不自然,昔日的感覺已褪色,仍然歷歷在目的,定必是不堪回首的往事,但偏偏見到面要打開溝通之門,就要從往事開始,所以不如不要開始!
但成件事令我思潮起伏是,邊間係我母校?中一至中四,我是在葵盛的 樂善樂顧超文中學就讀,但由於無心向學,中二果年班主任為左力保我唔俾人趕出校,自己辭職,我一直覺得有個人可以自己唔做,就保到另一個人留低,只會發生係差館,但既然發生左係我身上,我昇到上中三係發奮左好多,跟住原校昇上中四,但果年我又故態復萌,終於無人再保我,我終於相信當年老師係真係要唔做,先可以保到我留低!
成績差,操行劣,只可以去讀私校,我係官塘地利亞重讀中四,然後中五!咁前面未完成,唔算母校,後面完成左下半場,即係全場過喎,咁算唔算係我母校?
邊間都好,其實我突然想起某幾位老師,想知他們近況,但我只是想知,不想見,如果你地係呢兩間學校學生,email俾我~~
「現在要找一個人.....是沒有找不到的可能....找不到只是你跟本不想找那人.....」

19 comments:

Ryan said...

灘叔,有個為左保你而自己唔做o既老師真係好難得!!!我讀書到依家,剩係見過一個好老師,但係個老師竟然因為同學生太Friend,而攪到比校長炒左...

Anonymous said...

哈...估唔到我哋都係'地記'友
不過我喺美孚
幫唔到你lu

kit said...

我睇黃子華見到你&你的女伴啊....

serina said...

好鐘意你第3張相果個“食得招積”樣﹐haha
同埋最後一張果個“屋企”既地方好靚bor

我同你一樣﹐唔鐘意撞返D舊同學﹐除左而家仲有contact果幾位。。。好怕懢介﹐以前都唔熟﹐何必而家扮熱情﹖﹖

不過我同其中兩位而家仲有contact的舊同學﹐好奇怪地﹐0係我離開左舊校去外國讀書先成為朋友。當然在校既時候都覺得呢兩個人係好人。成為朋友全因大家都有心contact。。。因為有D人就算知道點可以找到你﹐都廢事找你﹐我地所有人都會0甘吧。。。

Anonymous said...

太耐無搵架朋友, 我唔識同佢地溝通, 講近況都唔知由邊度講起, 所以慢慢會無聯絡,我反而覺得舒服, 因為唔使再搵野講, 所以我的朋友愈來愈少, 因為以我不善應酬的性格,朋友唔使太多,有幾個講到心事就算啦。其實要抽時間同所有朋友保持聯絡, 係好花時間同心機, 不如留番d時間比我亞媽, 就算坐向屋企無野同亞媽講, 亞媽都好滿足, 因為我向佢視線範圍之內活動麻。

scarred v said...

係呀! 我都係想知有啲舊同學的近況,但唔想見,唔知有乜好講。無見咁耐,catch up得幾多呀,咪又係求其敷衍幾句了事。
如果好似你的朋友有blog就好啦,可以從中知道朋友的消息近況,唔駛尷尬的面對面。

pessimist said...

飲呀食~食呀飲~ 時間就係禁越過~ 越過天,越過地,越過濃密頭髮嘅頭頂亦越過一片明亮嘅島嶼‧‧‧ 人生如此,你個頭亦如此。

其實我仲好後生,但對任何事物已感好"化"嘅感覺,我好很定我無病(雖則有病嘅人都係話自己無病,但我真係無,信我!) "化" 到底係點解呢? 堅持同"化" 又可唔可以偕同一齊呢? 就好似你永遠都唔會用口字邊嘅字作書寫... (such as "D" "嘅" "咗")

政府有個slogan講得好好,意思係"你玩佢,定佢玩你先~" 我唔係講毒品... 我係指所有野呀~ dee~

Pessimist said...

不如你講吓你對"化"字嘅睇法呀~ 但無論你理唔理我‧‧‧ 我都"化" ka la~

菜肉包 said...

個老師好似好偉大...

Percy said...

有邊個話讀唔書唔出識﹖﹖
未又出左個幾有計既編劇?

林戚 said...

嘩,海灘,你個樣好嘆wo!
其實呢,你有冇諗過你最鐘意食乜?
我…係一個簡單o既中學生,又係一個肥仔,
我最鐘意食pizza!!你呢?

Anonymous said...

我係讀月華地記

qt芝士 said...

最後那張相, 要是姿勢再自在多一點, 可以做廣告硬照, 正~

「找不到只是你跟本不想找那人」

正處於這種狀態, 掙扎至半生不死, 仍然未肯踏出第一步....

願你找到想找的人。

Anonymous said...

www.lstkcmss.edu.hk
I think it may help

PVC said...

噢,好型喎最後嗰一張相..嘻嘻,雖然刻意咗啲 :)

我好耐都冇同啲同學聯絡喇..有時都幾羡慕啲人出咗嚟社會做事都仲會同啲中學或小學同學聯絡..唔好講話大學呀(因為都仲未必係好耐之前的事)但係小學同中學喎..真係好難得,但係唔通人真係唔會變?當大家接觸個社會多咗自然性格都可能會有所改變,咁樣點解可以同以前一樣?我意思係有啲人見識或者接觸唔同層面多咗,就可能會連以前一啲朋友都會少見或接觸,要同以前啲同學或朋友保持聯絡總要在那班人中有一或兩個人願意久唔久搞活動或GATHERING,如果唔係邊得嚟咁多"舊同學聚會"呢!?..SORRY,似乎我9唔搭到8添...唔好意思...

MM said...

海灘, 呢個係曾華倩講 o個個迪士尼淫亂片段呀... 好搞笑其實, 因為佢地個樣個個都係笑住咁o既樣 個網址好長架... 你 copy & paste 去 browser 度睇啦

http://www.dailymotion.com/flash/flvplayer.swf?rev=1160445799&url=http%3A%2F%2Fwww.dailymotion.com%2Fget%2F11%2F320x240%2Fflv%2F814752.flv%3Fkey%3D3746ca35b3b698ad08940ba7fc95df921273e63%26log%3D1%26log_blog_key%3D7dpzczaLaMNyr3pXa%26log_referer%3D&previewURL=http%3A%2F%2Fwww.dailymotion.com%2Fmedia%2Fdyn%2Fpreview%2F320x240%2F814752.jpg%3F20061010161250&autoStart=0&estatEnabled=1&estatClient=play

Kuen said...

unkle beach, we've held a exhibition on 上海街視藝 please come visit if you have time! Have a nice day!

www.xanga.com/ahbdotcom

Bo said...

灘叔,

好多謝你嘅留言, You're so sweet! Thank you!!

CARMAN said...

HI~
我到是讀葵盛的樂善樂顧超文中學,哈哈~