10.10.2006



春麗是什麼?是街霸中那個既可愛又性感的Fighter.......


還是嘩眾取寵,將騎呢肉酸推至頂峰的潮流COSPLAY打扮中,不可缺小的一個人物造型...



我所講的春麗是一匹日本馬女,1996年於北海道出生,1998年十一月在高知賽馬場首次出場比賽,到2004年8月為止,出賽113次,每次都拚命跑的牠﹐但從來沒有跑第一。

這匹連戰連敗的雌馬「春麗」﹐日文原名是春urara﹐日本人通常覺得是「春爛漫」﹐不同於「快打旋風」電玩裡的春麗(syunrei)或是「聖鬥士星矢」裡的春麗﹐這隻已經八歲的春麗名駒﹐去年為該賽馬場賺進了五億多日圓﹐讓這個原本虧損累累的日本最小賽馬場免於關閉的命運,而且成為日本首次轉虧為盈的地方賽馬場。

春麗屢戰屢敗、屢敗屢戰,依然努力不懈﹐於是,全日本的人都幫牠加油;牠開創了地方賽馬馬票在全國發售的紀錄;排隊等買春麗的彩券要兩個小時;春麗每次出賽,都是馬迷的一個希望,希望見証到牠終有天勝出!今次失望變成下一次的希望!其實明眼人一早已經知道春麗是庸才,但日本人就是有這種奇怪的堅毅精神,你肯繼續努力,就會繼續支持!相反香港人,你睇下今時今日邊個仲支持精英大師,百勝雄師都落得如斯下場,何況是一隻永無機會勝出的馬匹,我支持你條毛咩!

日本人給任何東西也有個定位,只要你夠「盡」,『廢』都可以係一個定位,如果唔係邊有「廢柴同盟」、「稻中兵團」,我認為「軍曹」都係寫班無用傻人!照我咁講係咪只要廢到盡就有轉機?「無錯!」,但你究竟有幾廢?鬥好難,門廢仲難,呢個世界,低處未算低,要做到最廢同做到最好是一樣難!

細個有次失戀,覺得世界末日,我要遭遢自己,令自己沉淪到底,終於五日唔沖涼,日日飲酒,醉得不分天昏地暗,人唔似人,鬼唔似鬼.....我過左半個月呢種日子,終於頂唔順醒覺,唔可以再咁廢人;近十年來我看見友人失戀,沉淪的程度及時間跟我相比,我簡直覺得自己當時無沉淪過,乜原來可以半個月唔出房,三年來未醒過,點睇呢班人都唔似人,又唔似鬼,總之係一堆『廢物』!我估當佢地有日醒覺,是因為遇到一班比他們更廢的人,更廢的又會再遇更廢,點鬥呢?

我總覺得每個人都可以好叻,亦都可以好廢!視乎你有否去岩地方,如果碧咸是在你公司當會計,佢一定係廢中之廢、梁朝偉去做bill gates,微軟廢左九年、相反bill gates去演戲,一定係最廢演員(不過可能佢用電腦執好自己d戲,咁即係電腦特技勁,d戲仲係廢)

周星馳最鍾意寫廢人,但佢所謂的廢人,其實只不過是「英雄無用武之地」 「凌凌漆」的唏噓豬肉佬特務、「凌凌發」的神經發明家、「食神」淪落廟街變嘍囉、「喜戲之王」懷才不遇匿係石澳的演戲天才尹天仇、「少林足球」內各師兄弟虎落平洋、「功夫」內豬籠城寨的臥虎藏龍!每個人總有自己出色的一套武功,只要你肯去苦練,時機未到,找不到可以演出的舞台,唯有繼續苦練,「機會只會給有準備的人」,又或者咁講,你跟本無準備過,個機會黎左你都唔知!
既然做至廢同至叻都咁難,清楚自己定位,莫再不倫不類,做番個平凡普通人算罷啦!

16 comments:

Anonymous said...

Before I read your topic, I was kind of lost....I have fall in love w/ someone who doesn;t like me, I am not satisfied on what am I doing, I am kind of down....

after reading your article, ha, it's like the light on the road have turn on by you....I know what to do now....kind of....

Anonymous said...

你口中所說的廢其實可真廢,當今世上人誰無廢呀~ 廢的根源便是懶散的,怠惰的,使人倦怠的,懶洋洋的,緩慢的和慢吞吞的... 一句講曬 - lazy! 列如: 面對唔到失戀,其實係懶得去面對,因此咪廢一排先囖~
馬會正進行發送免費門票比馬迷入場欣賞賽馬,但反應就真係mama~ 香港人只在乎快靚正,完全杯麵手冊... "山長水遠走入去為感受現場感?! 贏就得啦~ 入場支持把鬼咩~ 我"何"包夠需要你馬會支持啦~ 又唔見你比我中下?!" 之所以你話香港人係唔係過癮呀~ 又驚無呢項娛樂,但又唔身體力行去支持... 過癮‧過癮‧真過癮~ QQ"
總之廢嘅定義就係懶! 而世上係無"快靚正"呢回事的~ 有快就無靚同正,如果真係想靚正呢~ 就唔該等下啦~ 香港人!

Anonymous said...

Beach Beach,

你講中左我既心事,舒服左好多。

Thank you!

Meo..oo..oow

Anonymous said...

我對廢人的定義係.. 一D廢人以為自己係偉人.... 咁咪廢足一世lor..

Anonymous said...

但又有幾多人甘心過平凡的生活?
他們不知自己的平庸,總想千方百計透過不同的渠道去表現、甚至吹噓自己。
可能不被外人認同,不容於世道,只要自得其樂便可。
或者有一天夢醒,千帆過後,又再跌落凡塵做個普通人。
有點廢話。

Anonymous said...

一直都覺得, 平凡, 就是幸福

但過於平凡, 又嫌生活太悶, 沒有突破, 人生欠缺定位

平凡, 不過是高不成, 低不就的華麗代名詞而已

Anonymous said...

thank you :)

UltraVinz said...

灘兄,
o的深o野留番俾食腦的。我就膚淺點,件扒兒唔係扮緊春麗啊∼
應該係 SNK 的不知火舞(藍衫版)。

Anonymous said...

可能人花盡其一生也無法做到最好和最廢;可能人花盡其一生也無法達到自己心目中的目標;可能花盡我們的一生也無法改變自己在他人心中那個「廢柴形象」...
我想我是比較另類,我只覺得,越經歷得多,人便越不積極.當初可能追求大紅大紫做「宇宙偉人」,經歷過某些事之後,可能又會追求甚麼都不用做的「經典廢人」...但其實做人最重要的不是這些,而是「快樂」.即使你當了「宇宙最廢」也好「人間最好」也罷,不開心的話,這些也只是個沒用的「銜頭」吧了.

依我說,還是做「快樂老實人」最好.如若人生每一步都能走得輕鬆自在,無論是「廢」也好、「好」也罷,我都覺得很幸福.

Anonymous said...

--唔係導彈女--
講得最好個句係"清楚自己定位"
但唔係好多人清楚自己企個位,
就好似好多人因為唔了解自己會
買錯野,揀錯野,食錯野,羅錯野,...
平凡都幾好,唔係擁有最top,但係我擁有
就如一套劇你估個個要做主角o羊,
而我一定比人揀做衰人,
因我樣太cool太易得罪人啦

Anonymous said...


點解D日本人咁善良?
唔俾跑假馬既咩?
咁搵$ WOR!!

Anonymous said...

<「機會只會給有準備的人」,又或者咁講,你跟本無準備過,個機會黎左你都唔知!>

十分認同!

不過,「千里馬常有,百樂不常有」,有才華既人比比皆是, 可惜有能力去分辨的人太少...

linda said...

Good point ar~~~灘叔
你每一篇都打得咁精彩同有意思!!
你講中哂我心中的心結

Anonymous said...

好勁你睇完d戲都仲記得d角色名同特點!!
好佩服你!!

Anonymous said...

hey totally agree
very ture


a super Ta Ta Ta fans from UK LSE
ur shows rocks buddy!

moorl said...

>> 梁朝偉去做bill gates,微軟廢左九年

haha unkle, you're giving gates' competitors ideas!

>> "周星馳最鍾意寫廢人"

this goes all the way back to silent comedy aimed at the masses (mostly "lower class".) chaplin, keaton, etc. even 周's latest about astronaut and boy sounds like an heir to THE KID (1921).

love them all, anyway. rock on Unkle B!