10.02.2006

秋天的真話


星期日下午,無線重播「秋天的童話」,我唔知你係咪果d至今才第一次睇的觀眾,定抑或你係同我一樣,係戲院都睇過十次,其他途徑就更加數之不盡,由頭到尾都識背!八九十年代娛樂的選擇有限,電影便是其中一樣主要及必要的消閒活動,當然當期時的電影質素相當高,台前幕後皆星光熠熠,製造出無數經典!果時我真係好迷發哥,第一次近距離見到佢時,我只得二十歲,因工作關係,要跟他對稿,我見到佢真係雙腳發軟,張口結舌,佢撘住我膊頭「慢慢講多次我聽,頭先好嘈聽得唔清楚!」 不過最好回憶亦都只有呢段,及後發哥遠怔好萊塢,成為國際巨星,但在我而言,佢已經風采不在,仲越黎越阿伯,都係睇番以前算!



前幾天先跟一個電影前輩講開,我話係時侯要搞番一部「秋天的童話」式的暗戀故事,奈何度到個故仔好好睇,家下又點會有發哥、鍾楚紅同陳百強呢d咁光芒四射的星演出!前輩謂星是一個問題,更加大的問題是,我們很難再遇到「秋天」的故事!

秋天的童話是導演張婉婷的親身經歷,船頭尺是真有其人,據聞鍾楚紅就是張婉婷本人,拍自己的故事是一定好睇,因為夠真!我覺得現在的電影,大家覺得無以前咁好睇,其中一個好大的原因是大家已經睇得太多,什麼也看過,覺得電影世界太假,需要真實的東西,所以YOUTUBE成為近期大熱,因為裡面有真野睇,巴士阿叔是真野,女學生打人是真野,日本整古節目,個個真反應....相信未來只會「真野」至吸引到大家,但大家信一切真野都是真嗎?!

當真野無晒,就是虛構真野出黎,就像前輩所言,個個導演頭幾部戲都係拍真野,自己野,一定好睇,但之後要拍人家的東西,登時穿崩現形;做創作更加嚴重,我不愛看法斯賓達,但我極認同佢自傳一句話「我沒有創作,我只有生活!」生活即係真野,總無可能全個故事都係虛構出來,可能創作沿頭就來自生活的一椿小事!
所以我欣賞的導演是工匠型,即是說你給他什麼,可會拍得很好看,列尼史葛就是工匠型的大師!

由細到大,成日聽人講及同自己講,做人最緊要做番自己!這話我一直深信不疑,但近年我睇法有點不同,個個都做自己,咁邊個做其他角色?!我行我素有幾難,做到顧全大局,才是真正的強者!唔好再俾藉口話咁樣好假,如果你心腸好,出發點係為件事,「假」只不過是方法演技而已!
因為自己改變而影響了結局,事後總會撫心自問「估唔到我份人可以咁樣!」,但我估通常大多會衝口而出的是「我份人係咁架喇!改唔到!」

18 comments:

Anonymous said...

最後果段說話好有意思。

海灘,我真係幾鍾意您,
在我眼裡面,您係一個既感性而理智既人。

繼續加油!

Anonymous said...

我唔係十零廿零都仍然係第一次睇秋童,以前聽人講如果揀「我最愛的愛情電影」都會揀呢套,心諗因為配搭係周潤發+鍾楚紅o者,可一不可再所以你先鍾意o羅,哈,但我終於信一套好既電影係會令人好留心好留心睇完,仲記得到d對白同場景,還有紅姑當年的一臉純情,成日一副無可奈何的樣子真係好cute,船頭尺o個種戇直麻甩look,老實講真係由太古城摷到落香港仔都未必搵得番。暗戀故仔好睇,但家下既港片硬係拍得唔夠"率真",總係欠d野,如果背景係外地,咦咦,o甘就work番,好奇。或者,無人相信香港乜都講求即食,仲玩暗戀係唔係有d....唔襯個"大背景"呢何~~

Anonymous said...

係咪跟善意的謊言有啲類同?
如果每人做回自己,因大家性格背景不同,
那便會有其他角色出現吧。
我行我素的話,總有顧全大局的人捨生取義。

自從非經常性寫blog後,我覺得自己的事或感受最易着筆,靈感到便源源不絕。
但平凡如我可以有幾多經歷呢,
生活點滴這麼鎖碎。
所以極佩服每天寫專欄的作家。

Anonymous said...

我琴日都睇左少少..可能周潤發係我心目中已經係呀伯.所以好快轉左睇VCD.
最尾果段講得好好!有d人好中意強調自己夠真,呢種唔識轉彎既[性格]成日make the matter worse!!之後又會講1句:"sorry.我個人太真........."真係唔知比咩反應佢好.將自己優點當做缺點咁講出黎..

Anonymous said...

我行我素有幾難,做到顧全大局,才是真正的強者。

beach,
你好 Man 呀!!!

Anonymous said...

灘叔,

我都係一套戲睇幾十次嗰D人, 又再睇秋天的童話依然有嗰種感覺, 令我又想再睇返「呢種」戲...如雙城故事, 縱橫四海,什至係胭脂扣....

點解以經再無呢.... 灘叔我知到你係好有heart嘅電影人,好希望有一日會有一套灘叔作品百看不厭,我等您!

Anonymous said...

我二十歲,尋日第一次睇咋~~
不過都覺得好好睇
依家越黎越中意d七八十年代既戲同歌
我都唔知點解=.="

Anonymous said...

雖然睇過o甘多次,但都無留意首主题曲,原來係呂方唱,叫「別了秋天」,幾好聽.Ha真係唔知點解 o個陣時一d都發現唔到...唔通隨著年齡增長,越來越鍾意d感性有feel d o既o野(好似unkle beach 個blog)o甘?

Meoo...oow

Anonymous said...

really like you post.
as I studied in UK, I had lots of chances of writing about experiences. and in fact when ever I had to write about a story I use my own.
I love it!! of course, whether I get a good mark in my essays is another story, but usually I feel good about them.

Uncle beach. being yourself is good!!! keep it up!!

Anonymous said...

haven't read your blog for awhile. i think it's still as good as before :)
keep up the good work!

Anonymous said...

Dear Sir,
現在香港的愛情電影已做不到《秋天的童話》那種感染力了。
我是第一次睇《秋天的童話》的。

Anonymous said...

unkle beach

記得睇過你一編 blog 既分享, 令我係做人假唔假有一種從新定位既方向 , 今日呢編令我由定位再行多步 ...
thx

Anonymous said...

我覺得再要有好似秋天的故事不難,
但要有好似那兩位主角般的感染力,
含蓄而自然, 活生生而詩意,
真是談何容易呢

Anonymous said...

去年, 我仍然將「唔扮野, 做自己」掛在嘴邊 ; 今年, 發覺唔扮野, 也不一定等如做自己。

不時懷念率直任性, 有自己無別人的那個我。

3824 said...

真真正正o既我行我素係難o架,不過唔一定好;顧全大局?要睇下係o米真係藉同埋真係做到o羅!因為最可笑o既係每個人對“大局”o既演繹都可能好唔同。

曾特首一定覺得自己所做o既事全部都係為左顧全大局,有無人覺得佢係個強者?

Anonymous said...

看完你這篇,心中多年的願望又再浮現。

一直以來,也期望有一套以自己的故事為題材的電影/小說。可能因為太想紀念某一個人,又或者,太想這某一個人知道我還在紀念他。

一段夜總會PR與富家子的愛情故事。老土,但真實。像俗氣,但愛得轟烈。

人生有過這樣的一個故事,死而無憾矣。

Anonymous said...

"唔好再俾藉口話咁樣好假,如果你心腸好,出發點係為件事,「假」只不過是方法演技而已"
但係咁樣真係好難做喎...唔係個個人都可以演"假"囉...有冇更具體少少比喻?我意思係作多個比喻可以嘛? 可能我最近工作唔開心,可能係因為我唔識得"假"對嗰啲人,同埋演技唔夠好囉..但係如果演技好的話,咁我就係咪應該去演戲呢!? ;P

Anonymous said...

大福 :

嘩! 我星期日亦有睇這電影,每次都是在電視看, 斷斷續續地看,,,,這天是完完整整地看.奇怪,我在他們分開,紅姑去長島時,我CRY ....我是一個不看愛情片的人.
此片上正場時,年齡亦很小沒有看過.可能此片需要經過一些經歷的人會有深一層感受,好正 !!!!