4.21.2006

溜溜廢廢



溜溜廢廢點解?
我細個住荔景村,外婆住美孚,我成話去探佢,陪佢住佢屋企,其實係為左方便去荔園同保齡球場玩,我同外婆好鐘意互窒,我唔夠窒就傻笑,亂講野,碌地,外婆就會話「阿光!你溜溜廢廢咁,大個點算呀?!」
呢個例子,溜溜廢廢解「胡鬧、輕挑、唔成熟」
大個左,我成日漏帶鎖匙,要去美孚取後備匙,外婆就會話「阿光!你咁溜溜廢廢,出黎做野好蝕底架!」
呢個例子溜溜廢廢解「操心大意,難成大器」
到我開始做演員,扮鬼扮馬搞笑,外婆就會話「阿光!你成世都溜溜廢廢,岩晒做呢d野!」
呢個例子溜溜廢廢解「有喜劇感,夠騎呢,錯有錯著」
鐘意點解,鐘意點用,適隨尊便,真正解釋只有外婆知道,但一直無問,相信以後佢都答唔到我!
外婆舊年中風後,活躍老人急轉直下,其實佢都算勁,生左七個,我阿媽係大女,亦都係傳說中的大姨媽,外婆幾年前患癌可以捱過無事,呢一次終於要抖抖了!
今晚佢八十三歲生日,總動員為佢賀壽
「外婆,阿光呀!溜溜廢廢果個呀!」
外婆捉住我隻手「唔溜廢,阿光唔溜廢..」
我想......呢個溜廢應該解「溫暖」
外婆感觸落淚,然後全靠我以「溜廢表演」,令外婆破涕為笑
一家人溫溫馨馨,開開心心食左餐安樂茶飯
金雕玉砌,又點及溜溜廢廢
離開時,舅父約我去德國睇世界杯,好想去!

3 comments:

Serina said...

金雕玉砌,又點及溜溜廢廢 <--- I like this sentense, so sensational, thank you

你的聽眾 said...

祝你外婆日日開心快樂~~

Redcherry said...

海灘,
我相信你外婆時常對你講「溜溜廢廢」係因為佢對你的愛由關心到...對你欣賞...到為你自豪。