召集

首先要好多謝PETER WONG，佢唔係黃興桂，係NOKIA的一個PR，佢送左一部6280俾我，雖然呢個並唔係我最想換的電話，但而家睇落又OK喎...再謝！



六月尾世界杯期間，我想搞『睇波派對』，詳情遲一些會公報，有興趣者請留下EMAIL，我會有人尃人聯略你

派對要多人先好玩，如果人唔夠多就唔搞LU..

Drinking Horse

哈！原來尋日馬生上左東方C1，個樣死到呢？！直情寫住，「林嘉綺係度又點丫，隔離有個TAKUYA，我都係陪坐架姐....」哈哈哈~~~~
很久沒有跟這隻drinking horse飲酒了....
本來想講下我同馬偉豪的故事，不過抬頭看....


下次先....

暴風雨奇蹟夜

好大風、好大雨，真係好大風，好大雨


英國北部，河畔球場，米杜仕堡再創「奇蹟」，當然有幸有不幸，有人快樂有人愁

為誰風露立中宵

黃仲則，清乾嘉年間名滿京華的詩人，命途坎坷，晚景淒慘





幾回花下坐吹簫，銀漢紅牆入望遙，
似此星辰非昨夜，為誰風露立中宵。
纏綿思盡抽殘茧，宛轉傷心剝後蕉，
三五年時三五月，可憐杯酒不曾消。
　　　－－《綺懷》

呼吸

我都有去上樓cafe，不過多數都係去銅鑼灣區，「after school」、「阿貓地灘」，仲有超儀果間（sorry，無辦法記得咩名），我鐘意呢個地區d客路，但成日聽見馬糞話去旺角d上樓cafe，旺角上樓通常都是黃色架部，唔係好想像到一個sell純情陀地的地方變成賣MOCHA，又好驚會有好多馬伕係度等call，簡單黎講都係怕「雜」，不過今日突然早收工，成個team話去睇「冰河世紀2」，九點到「朗豪坊」，部戲九點八先開，咪跟馬糞上去睇下。
間鋪位於砵蘭街口，呢個位曾經係不小黃色架部入口，架部自置的閉路電視，見有人經過會叫咪「哥仔，新到xxxx，留左俾你，快D上黎..... 」，現在由於整個紅燈區向油麻地方向遷移，變成了上樓cafe區，街上面無數後生仔女派傳單拉客，而大部份上樓cafe都係橫街後巷，整個感覺好像跟從前差不多，哈！
鋪頭同我想像中差不多殘，露天位置又焗又塵，呢d天氣跟本無可能坐，但客路方面比我想像中DECENT，我最鐘意係佢個名「呼吸」，英文名則是「FULL CUP」
食字得食得有意思！食物以咖哩為主打，有風味但未算好好食，整體上，我覺得比我想像中好，但終於有份MK味，我自己就麻麻，不過我淨係同銅鑼灣區比較，可能其實旺角區仲有其他比這間好的cafe？大家有無推介？
但係睇收費，我覺得坐茶餐廳抵好多，係旺角，我都係覺得見到龍哥虎哥會岩數D！

Work Hard Play Hard

玩時唔好想工作，工作時就淨係掛住玩，係大部份地球人的工作態度，要做到Work Hard，Play hard真係好難，博命做工，就無精力去玩，博命去玩完，就心散無精神工作！
我以為過泰國攤兩日，番黎會精神爽利，百無禁忌，工作極其順利；點知尋晚番到黎，做節目時已經疲到癲，番到屋企，唔夠四點就「死左」（通常我無六點都入唔到睡），今日十二點幾醒，仲係雲遊太虛，好不容易才完成手頭上工作！番到屋企，死左係地....不過我唔會就咁放棄，我點都要睇埋阿仙奴對維拉利爾，因為我係十一倍時入左阿仙奴贏冠軍，我一定要身體力行去撐之....
就當train自己係極多野做時，仲有精神睇波，因為世界杯期間會更金，你問我想唔夠時間用，定太多時間唔知做乜，咁梗係前者啦！
係咪『Work Hard Play Hard』有咩所謂
『我寧願工作艱難，仲好過游手好閒』

挽叻大中著名魚翅

值得一去，簡單黎講平靚正，個地址係「12.soi charoenkrung 46 Banrak Bankok 10500」
係空鐵總站SAPHAN TAKSIN四號出口右轉，行到見到ROBINSON百貨公司，就係隔離街，（面向ROBINSON右邊），照計我咁低都搵到，大家要搵無理由搵唔到，俾埋個電話，有事可打去問，個老闆都係華橋，識講廣東話 0-22373197 0-16443079，記住食埋隔離檔「燕窩」呀

買BRA

去泰國除左飲飲食食，DUP骨，好多女子過去最主要係買BRA，我知wacoal賣得好平，我無買，但睇都好好睇


最後，我都忍唔住買左對

Millennium Hilton

間酒店如何？其實都OK！

Designer Chair

真係唔知個設計師睇見會咩感覺...





相比起，上面兩位都唔算過分 〉攝於泰國PARAGON內

人言可畏

某日開會，瑪莉叫我寫blog，佢話以我而家知名度，應該有人想睇，我話係因為d人鐘意聽君如，帶挈埋我，我邊有咁多fans，何況要我日日好似專欄咁寫，但無錢，我邊有咁好恆心同耐力，瑪莉話呢個咪訓練耐力同恆心的好機會！
就因為呢句話，我開始寫blog，都算人言可畏！
瑪莉本身亦有blog，但只供圍內朋友使用，從未公開，而我亦無打算公開個blog，你搵到係你同我有緣，直至某日，瑪莉問准我把我的blog公開給她的朋友，但作為一個編劇，我個徒弟，瑪莉用左一個既有創意又好賤的方法去介紹我個blog，佢用我講過的話，扮係我講來反串反串我，我睇見即扮反面reply佢，但當佢還未想到點回，繼續玩我地呢個「私人遊戲」，佢呢段blog被發現仲公開理，瑪莉為怕夜長夢多，立刻把那段blog delete，但竟然有人已經save左，仲掟左上咁個討論區，以「有邊個唔鐘意鄒海灘」為題的回覆中，內容是我乘君如不在博上位，但被自己人踢爆，百密一疏；瑪莉此時才醒起在網上是「無秘密」、「私人活動」也隨時有人會硬要加入，瑪莉內疚非常，佢今晚shut down埋個blog
一個私底下玩笑，被拿來作公開攻擊工具，瑪莉深深感到什麼人言可畏。
阮玲玉自殺，留下「人言可畏」四個字；軟硬當年戲言九鐵廣告有鬼，被人無限炒作，軟硬在電台上沒解釋，只說「人言可畏」，家下網上討論文化比傳媒胡亂炒作更放肆，傳媒還顧慮會被告，你可曾聽過有人上網胡亂批評或對某人某事出言不遜會收到律師信，怕咩講，講完就走，無需負責，一百個人同時鬧緊你，可以係同一個人，無限變身，變成無限人言，如果你信團結就是力量，咁人言就真係好可畏！無打算再研究網上批評討論文化，這些水過鴨背的BS，一覺醒來就另有新天地.，就當是訓練EQ的好方法！
瑪莉！如果咁樣唔開心，不是証明了人言可畏，是妳太削了！

CHECKERS（2）

首先開估，由左至右「海灘、導演鄭保瑞、編劇馬糞」
我好鐘意格仔，衣櫃三份一位置都係格仔衫，大部份老底都係格仔，平日好鐘意食格仔餅，做編劇又係爬格仔工作，年輕時曾經好迷CHECKERS



如果你夠老餅，唔駛我介紹由主音藤井郁彌帶領七人樂隊，如果你太後生，我點介紹都唔知同無性趣．
我由佢地第一隻ＳＩＮＧＬＥ「淚之點唱」捧到藤井郁彌出 ＳＯＬＯ ＡＬＢＵＭ，我咁都未算HARDCORE FANS，我而家仲識唱「淚之點唱」，當年通頂拼音翻譯，仍曆曆在目，如果你話你都識唱，咁你都算勁，不過都未係最勁，如果你識唱當年CR2黃綠歌唱大賽，王鐵雄翻唱果隻，你就真係同我一樣咁勁！
為你點唱，陪你分享，不分早晚，仍是這樣....和唱....
`接到你來信，你說你與我共勉，共分享好感想
.....
跟住係點？我真係好想有人仲記得，填埋落去，如果真有此人，唔即刻同佢結拜，都即刻要同佢結婚
！等緊你呀

CHECKERS（1）

三個格仔仔，竟然在同一日同一個會出現
三仔是誰？

溜溜廢廢

溜溜廢廢點解？
我細個住荔景村，外婆住美孚，我成話去探佢，陪佢住佢屋企，其實係為左方便去荔園同保齡球場玩，我同外婆好鐘意互窒，我唔夠窒就傻笑，亂講野，碌地，外婆就會話「阿光！你溜溜廢廢咁，大個點算呀？！」
呢個例子，溜溜廢廢解「胡鬧、輕挑、唔成熟」
大個左，我成日漏帶鎖匙，要去美孚取後備匙，外婆就會話「阿光！你咁溜溜廢廢，出黎做野好蝕底架！」
呢個例子溜溜廢廢解「操心大意，難成大器」
到我開始做演員，扮鬼扮馬搞笑，外婆就會話「阿光！你成世都溜溜廢廢，岩晒做呢d野！」
呢個例子溜溜廢廢解「有喜劇感，夠騎呢，錯有錯著」
鐘意點解，鐘意點用，適隨尊便，真正解釋只有外婆知道，但一直無問，相信以後佢都答唔到我！
外婆舊年中風後，活躍老人急轉直下，其實佢都算勁，生左七個，我阿媽係大女，亦都係傳說中的大姨媽，外婆幾年前患癌可以捱過無事，呢一次終於要抖抖了！
今晚佢八十三歲生日，總動員為佢賀壽
「外婆，阿光呀！溜溜廢廢果個呀！」
外婆捉住我隻手「唔溜廢，阿光唔溜廢..」
我想......呢個溜廢應該解「溫暖」
外婆感觸落淚，然後全靠我以「溜廢表演」，令外婆破涕為笑
一家人溫溫馨馨，開開心心食左餐安樂茶飯
金雕玉砌，又點及溜溜廢廢
離開時，舅父約我去德國睇世界杯，好想去！

Almost Perfect

我唔係講笑，我真係鐘意三姑，唔係因為佢靚，唔係因為佢好笑，唔係因為佢叫我做電台，唔係因為佢介紹我俾陳可辛寫劇本，係因為佢「串」，唔係串人果種串，係行為串！
雖然佢口口聲聲話自己係普通人，好可惜，全香港都識妳，想好似普通人咁生仔，要用比普通人多幾倍錢之外，仲要用多普通人幾倍腦汗，度條絕橋避開晒所有狗，佢已經做到九成九！佢爭小小就可以十分滿足咁講
「我度呢條橋真係天衣無縫！」
而家就言若有憾「我呢條橋爭D就天衣無縫！」
無所謂啦~~~~妳真係已經度得好好，好串，好串！ BRAVO！
知道呢段時間妳會好辛苦，我好諒解，咁大個胸，未慣係好辛苦~~
好好休息~~~
今晚好warm，好touching

生命真係一樣好奇妙的東西
咁講好老土呵？不過生命真係一樣好奇妙的東西

我燈定你燈

家下開始有人post上黎問我d歐冠買邊隊，我以為大家咁捧我場，原來當我係「燈」
今晚我大力撐巴塞，幾多人話買AC米蘭，而家知道邊個 「燈」啦！
今晚同幾個老友（3P，peter pan patrick）傾波經之餘，大家商討「世界杯」期間點安排睇波，
我一直好想搞個大party，好多人一齊睇波，3P叫我搞，仲可以約埋 D聽眾一齊睇，我聽落覺得好正，於是係節目咪隨口講下如果我搞睇波PARTY，有冇人會參與，有回應播！
好！等我繼續放風，如果到時真係有好多人想參與，我一定搞！

咁有興趣者，請報上名來，等我好好安排！

生存

如果你問我做人為了什麼，我會答你是為了生存，或者你會覺得我灰，但生存的而且確是繼續做人的基本需要，娛樂圈要生存，聲色藝最好有齊，但有齊要識點sell出來，sell錯可以黑足半世，識sell就事半功倍，ALIVE部四大天皇咪識 SELL例子
ALIVE四個男人，加三個經理人，兩個攝影師，一個發行商，再加理我同阿田，光仔，阿ming，直播室好耐無試過咁多人，好彩三姑放假，否則再多兩個。「四大天皇」作為一部小博大的商品，件貨絕對對版，中段真係好好笑，部戲仲有樣野要講，就是在娛樂圈如何生存，早排幫鄭保瑞導演寫左部電影叫「狗咬狗」原先個戲名就是叫「生存」，我地用大量慘絕人寰素材，千計萬苦去講生存的困難，其實駛乜丫，幾個靚仔嘻嘻哈哈，講乜我都聽啦;借傳媒力，網上引起罵戰，靚仔講埋粗口，到上畫時侯粗口卻咇了，如此精心簡潔的計劃，吳彥祖又可止一個導演咁簡單，未來商業奇才是也！
ALIVE NOT DEAD又幾難？！

無變

以前月尾先會去茶餐廳食飯，因為貪平，家下佢翠華食個飯，飲杯凍奶茶，落樓過五十，一d都唔平
佐郭牛奶公司仲係二十四蚊一個茶餐，你睇下豐富到，加埋凍飲先係二十六銀，去邊到搵！
價錢無變，地方無變，d伙記都無乜變！
『知否世事常變，變幻原是永恆.....』
「皇后」變左，「山頂餐廳」變左，「雍雅山房」收埋檔，香港仲有幾多remarkable地方係「無變」
油麻地「美都」由好食焗豬扒飯到地方都無變
沙田「龍華」由好味乳鴿到地方都無變
美乎「牛車水」由好味咖哩到地方都無變
上環「九記」地方無變，但唔知點解，牛腩無以前咁好食
波鞋街隔離間「美而廉」名無變，但食物同地方都變晒
相信還有很多很多....
每人心裡面除了有座不變的斷背山外，還有很多東西，地方，人物，我們都希望無變，或者一廂情願佢永遠無變...
時代進化，舊事物消失是必然定律，投訴事物改變，其實是自己適應能力有問題

『迎接那變幻，今生與你，擁抱永恆...」

傾城之戀

『一個炸彈跌落唻，炸死左你，我個故個故事就完；炸死我，你o既故仲有好多！』

軍車的斗上，萬天戰火下，流蘇倚范柳原，淡淡的說出了這番話
死對流蘇唻講未必係最慘，只要死o既時侯仲係范身邊就夠了，終於一場戰事，造就二人平淡的走在一起

這就是 『傾城之戀』

其實張愛玲o既書，我只看過「傾城之戀」、「金鎖記」（係傾書內另一故事）、「半生綠」
但對我影響最大的，只有傾城之戀
「我唔明白自己，但你要明白我！」
「你今日著得好似一個藥樽，妳就係醫我o既藥！」
當年我見到呢d對白，四圍拎去媾女 啦
「小姐！我唔知點解咁想攬妳，錫妳，但妳要知點解，唔好抗拒俾我攬下，錫下...」
「如果今晚妳唔同我同我去街，妳o既愛情故事就小一個，我就繼續仲好多...」
佢地唔似得流蘇咁垂住頭，等我可以好似范生咁同佢講「你o既特色就係鐘意垂頭！」佢地通常只會大大聲『死 x開啦！講乜春呀』
無人識得欣 賞我，無人覺得我係范生，講花心，我有絕對去到佢o既級數， 係佢地唔識貨
直到邵氏終於搵許鞍華拍傾城之戀，當見到周潤發演范生，繆騫人演流蘇，我心裡面再無出現過另一位柳生同流蘇，世上仲有人可以嗎？
（ 講開流蘇，我真係唔多頂得順發家下「留鬚」，簡直偶像幻滅）
最近上演的舞台劇，梁家輝演范柳原，蘇玉華演流蘇，朋友說，現時的家輝演，真的老了點，但佢話蘇小姐ok喎
sorry！點ok，點好，都唔會好過繆騫人，呢個係人氣質問題
至於柳生，除了當年的發哥外，家下有邊個可以演！？
（佢連花柳原都演埋《精裝追女仔》
我 發過一個惡夢，周杰倫同張柏芝做傾城之戀，我訓醒抹走d冷汗，
想起N年前 CR２搞過廣播劇叫0作
「傾唔成之戀」
岩晒！

關於關於海灘的二三事

關於海灘的二三事是出自我其中一個助手瑪莉的手筆；我有兩個助手，一個是「瑪莉」，另一個是「馬糞」
瑪莉是我五年前帶入行，當年請佢係因為佢同我性格好似，大家都係「獅子座」，熱情，敏銳，搞笑，創作力強 （ hee hee ）
但五年了，遺憾合作機會不多，偏偏在這過電影市道不景氣時，我們先re-union
真係C組難度加冒險分
另一個更加高難度選手係 馬糞，佢係一個從Birmingham番黎的英國仔，聽落係咪有D吳彥祖、尹子維feel
如果真係就好，佢個樣傻下傻下，好多鬚根，好適合做變態殺手；但其實條友識好多野，不過為人感情用事，所以係岩做創作，但現時距離成為一個編劇，仲要下好多功夫，但呢d純書生仔，係我呢d咁地，咁爛組合裡面，係會製造出好多好多「化學作用」
試想想，當我同導演講日本AV巨鉅「人間廢業」，佢會用佛諾依德理論分析雜交！
勁D！
電影圈可用的人已經無幾，汰弱淘強，未來繼續做電影的都是「精英」
努力就搵到食！ 共勉之！

肩周炎

去「HEALING HANDS」做SPA最主要唔係為左周身骨痛，咁為乜？

個鋪 係都會海逸九樓，係我一個認識十多年現身處英國的朋友家姐開o既，老實講，我覺得我朋友好醜樣，但係佢家姐點解似到佢一模一樣，但我完全唔覺得佢醜，仲覺得佢正！
呢位家姐 以前參加過新秀選拔賽，入左圍， 因有事無去參賽，但之後華星竟然再搵佢「出碟」，係「出碟」！你話佢唱歌 幾好聽， 佢唱林憶蓮同 巴巴拉史翠珊o既歌，我咁心散都會坐定定聽晒！
但佢無去做歌手，走左去做MARKETING，但有本事係酒店開間SPA，好！
好耐無見，佢仲 係咁有CHARM，言談 間先知佢岩岩去完工幹落機，即刻番鋪頭，仲可以有時間練跑，佢跑過兩屆「渣打馬拉松」跑得晒，仲破自己紀錄，仲可以第日繼續番工
我灘叔真係叔肅然起敬！勁
間場乜都 好，係李家誠較細左個水溫，搞到d熱水好耐先熱，我咪就係咁病囉
按摩真係一件好奢移o既事情，我唔係講錢，係時間，大拿拿兩個幾三個鐘喎！

八九年夏天，我同呢位姐姐送佢細佬，我朋友去英國，走o既時侯佢問我「家下做緊咩呀？」
「無野做，不過ATV請左我做「見習編劇」
「 嘩~~~~你走娛樂圈喎，我會睇！」
佢不但『睇住』我入娛樂圈，仲見証住我由結束的少年時代走向另一個新世代！
家佢仲見証住我由後生進入中年，唔該快幫我醫好個『肩周炎』！
好痛呀！

相認

偷賴左一晚，今日繼續同導演鄭保瑞度「見鬼」，今晚節目有人POST上唻問鄭保瑞同鄭丹瑞有咩關係
阿旦話「 以前見鬼係彭氏兄弟搞，而家係鄭氏兄弟搞」
佢搞GAG咋，佢地並唔係兩兄弟，係兩父子至真！

我買左對波鞋，搵到個細佬 定係父子重聚了

半年來第一次

如果我無想過半年未請過假，我個病唔會發出黎！

今天應 該很高興

14th APRIL06
A SPECIAL DAY

A ray of hope, flickers in the sky
A tiny star lights up way up high
All across the land dawns a brand new morn
This comes to pass when a child is born

希望之光，在空中閃耀
一顆小星，照亮天上路
跨越整個大地，開拓新的黎明
這全是因，一個小孩旦生

正牌灘叔

師妹3在海灘拍攝，當演員的好處是不用理位時好得閒（當然尃業演員會繼續培養感情）我得閒到可以坐近海邊，上演一幕「老人與海」
其實看海除了浪漫外，仲好悶，同一個畫面不停重覆，再靚都會悶；我見到其他人做生做死，我就吹海風，嘆世界，心裡面覺得自己好賤格，但越覺得自己賤格，我心情就越來越好，咁心情好演出就自然會出色好多，我咁賤格都是為了部戲，我真係用心良苦！
果朝氣溫得十四五度，海灘應該再低二三度，我見到不遠處，四五個六七十歲阿伯正在熱身準備落水，前面條欄杆變成一班變態裸泳阿伯的「Banned Bar」
同一般阿伯一樣，咪睇佢地超瘦削，聲如洪鐘，說話鏗鏘有聲，無所不談
「鬧政府、談政治、哭馬喪、論盡西甲、英超、意甲、中超、日職黑削假波、中外女星真假波分析....... 」
還有笑談泳友離逝.....
「一早都知大炮根會死先，條友行先死先，朝朝最早到，最快游完最快走.... ... 我知佢一定死先過我架！」
阿伯未說完，另一個阿伯已答嘴
「第時死最緊要學佢，無累到街坊，唔係游游下去，仲識按「救命鐘」
「佢一直唔肯用平安鐘架，一用半個月唔夠就死！」
「多Q餘啦！我地幾十歲！死唔死，都唔爭幾... 」
其他阿伯以笑和應....
「落水啦..... 有得游好游多D喇. ！ 」
睇住班阿伯，我想起阿麻，小時侯有次我好心叫醒佢去飲茶
「阿麻！起身喇！起身去飲茶.. 」
阿麻一張開眼，就大巴摑我，原來我地客家人「起身」即「執骨」，我仲講兩次，真係打得小！
「死」是中國人的禁忌，老人家大都怕死，關於死的東西要「免提」裝置
我阿麻九十八歲至死，怕死係咪可以長命D？
班阿伯咁輕鬆面對死亡，係咪會短命過阿麻？
無門禪師講過「春有百花秋有月，夏有涼風冬有雪；若無閒事掛心頭，便是人間好時節」
不管春去秋來，不管生老病死，過客的一生，來也匆，去也匆，生命在乎的不是長短，而是質素
像野花一次開過　便算一生燦爛過 只要我活過哭過

關於海灘二三事

1. 真實姓名：洲海灘
---藝名：鄒凱光
2. 性別：鹹濕哺乳類動物
3. 身高：高過矮人，矮過高人！
4. 星座：超級獅子座，皇者、豪情、衝勁、熱情，一句講晒，吸引死人！
5. 優點：好膚淺，靚仔咁簡單！
6. 缺點：太多，謙虛，得饒人處且饒人，善良，有愛心，有才華，數之不盡...
7. 職業：任何出賣左腦活動機能的工作！（即係咩呀？用下你個腦啦！)
8. 運動：因為左腦過度發達，所以右腦就...踢波都入到籠o既！
9. 驚世駭作：
《初戀無限tounch》-- 喇沙仔
《爆烈型警》-- 投訴王
《洪興十三妹》 -- 史sir
《百份百感覺》 -- 華dee
10. 至理名言s：
『@#$&#@#$ 』
『你死了，我的故事就完了；我死了，你的故事還長著呢...』