型

幫我執相果個人問，有幾多人話『型』，記住講番佢知，我..希望有得講番妳知啦~`

海灘椅

其實我鍾意『有野link』個意念，一個平台，無數問題，無數答案，一直想把它帶到這裡，但形式應該係點呢？是否多開一個chatboard，讓大家放下問題，然後互相幫大家解答呢？但我又怕會出現無數感情及無聊疑難，大家又可以俾下意見，研究出一個方案，等Angela去搞！

救左近火先，想買一張沙灘椅好耐，但一直苦無方向尋找，膠的、木的、鐵的也不是問題，只要有得俾我捕就得，你知的話，留低條link等我去搵下，謝`~~

千斤重

是壓力、感冒，還是被樓上的血鑽（今日又鑽番）影響呢？我頭頂有千斤重壓下，心情無法向上。這個季節，這種天氣，大家都應打醒十二個精神，因為你需要有多餘的精神，去關汪其他唔夠精神的人，又或者，如果你唔夠精神，千萬不要找情況相同的朋友，免得「攬炒」收場！

放鬆點，望向上，壓力可能是你引路的「明燈」，共勉之~~`

人云亦云娛樂人

每年從有這些乍暖還寒的日子，如果你跟到一日急跌十多度，其實這種偶意的「倫敦天氣」，是很適合我的，可惜今朝睇歐聯，更難得是今日樓上無「血鑽」了，所以放工後，我只是在樓下行徘徊了半個鐘，醒來時已經在床上。





差點忘記了曾經替某學院做個一個訪問，今日才有時間打開信封觀看，乜我有講我係『娛樂人』咩？！





想了很久，通常如果你問我是咩人，我會答「GAG佬！同做Gap一樣，不過人地賣Gap，我賣GAG；我比Gap的貨小，因為我無佢咁濫~~`」，大抵我同一班二十未夠的學生說這些，點會明？！然而在這個圈，我涉獵的範圍咁多，咁多個身份要搵一個統稱，似乎我當時答佢「我是一個娛樂人」 是理所當然的。

而實際上 「娛樂別人」的首要是「自己快樂」，「我快樂，所以你快樂，因為你快樂，所以我也快樂」，我不是曾生，我深明掌聲，笑聲，歡呼聲是何等重要，就算是搞亂的拍掌聲，恥笑的聲音，甚至是喝倒彩聲音，只要不是靜晒，我這個娛樂人就安樂了~`

GAG佬自嘆

鑽鑽鑽未完那會厭倦~`~``~`

我回來時問他們 『還會鑽多久呢？』 『應該不會鑽了！』 天真的我，信以為真，想小睡片刻然後工作，終於個綺夢都未開始前奏，佢又鑽，我醒左佢就停，我唔介意無得發綺夢，我只係想你坦白話我知，如果要鑽，我咪出街羅！我坐係梳化半個鐘無鑽，一訓又鑽！

我再走到樓上，正常發脾氣向他們洩憤之際，我的良心天使及時趕到，「人地打份工，關佢咩事呢？」，本想轉身走，點知這時門打開，裝修師傅甫見我便大聲喝過來「喂！做野無辦法！唔駛交貨咩！」，既然來到，總要回應一下，一貫我的性格，搞隻GAG打圓場 「師傅，你唔好停丫，你係咁鑽我就唔覺嘈架喇！」
「我點係咁鑽呀？！係鑽咁多就咁多，不過有時呢度要補下，果度要整下，做野無辦法！唔駛交貨咩！」

其實我無留心聽佢講咩，心裡只是不停責怪自己，「鬼叫自己隻gag唔中咩，人地都唔係拆我gag，根本就唔知我講緊乜，淨係覺得我串佢！」

GAG佬講GAG無人有反應，同舞男發現陽萎一樣咁傍惶~`

接受事實，跟朋友MSN，知她辭了工，正想安慰佢隨便抒懷一下，佢竟然話「真係好！可以做自己想做的東西！」 然後我這樣回覆 「太妳想了」 「這不是我想，是大氣侯，我只是隨遇而安.....」 下刪五十字。

「噢......」又一次失手？ 我坦白跟朋友說「最近GAG成日都唔中」 朋友沉默了片刻，傳來這一句

『你其實有冇開心過？』

一時間，我不懂回應，她卻傳來另一句

『不過GAG佬通常都係悲觀怪』

究竟我是悲觀，所以變成GAG佬，定因為要做GAG佬，所以強說愁？

我只知道，這一刻我是不快樂的~``

人生得一知己

小時侯，家境並不算富裕，父親是斯文（seaman），一年先會回家一兩個星期，妹妹未出世時，媽媽除了照顧我之外，可以同我玩的，就只有自己。
媽媽有見及此，怕我孤單（當時未有自閉概念），但又未有時間，對手，能力生多個陪我，於是媽媽選擇放我周山走，而我同樓下五金鋪老板個仔，同我年紀相若，好自然我就同佢玩得好埋，俗稱「Friend左」，一玩就五六年，到我十歲時，我要搬走了，好友要分開，大家都難捨難離，承諾以後要保持聯略，一星期至小要見一次面，終於我們再次見面已是我中三的時侯，大家長大了，相對無言，對方不停向我重述昔日開心片段，但我一點感覺也沒有，對方心痛得要死 「你唔當我friend喇？！」

道行未夠的我，竟第一時間說了個大話 「梗係當啦！聽日再約出黎玩丫！」，在逃躲他的那一天，我心情好亂，其實我真係同唔到佢再做friend，當時我唔知點解，只係覺得自己對唔住人~``

我跟一個男同學， 由中一至中五都是同班，抄工課、走堂、出貓、識女仔、睇咸戲、賭馬、踢波、去P，做每一件事都是一黨，理所當然地得到「死黨」的稱號。畢業後他到了台灣讀書，起初還有聯略，但發覺大家有了距離，我已經在社會打拼，凡事以實際為本，他仍然虛蕪飄渺，我發現根本大家是不同世界的人，我開始疏遠佢，無聯略，收到信都唔回，怎至唔睇！

多年後在一個朋友婚宴上再遇到他，我只是跟他打招呼，沒有刻意走近，後來大家喝多了，我跟他喝光一杯酒之後，佢鍊住我膊頭同我講 「你唔當我friend喇？！」

「friend乜X呀？咁岩安排同一班，同學黎咋！」

酒精讓我坦白，也令我傷了一個人的心~`

我近十年沒有見過他了，直至....

今朝做完節目，我在荃灣銀龍食早餐，突然有人親切地拍拍我手臂，然後坐到我對面，我同他微笑，以為我的FANS，心裡想這個麻甩佬駛唔駛咁熱情呀？

「我呀？！阿mil呀？阿狗呀？」

「係咩？！嘩！我真係唔認得！」 然後呢個近十年無見的人，就滔滔不絕把佢近十年的景況講我知，我凝神聽著，但一點也聽不入耳，只感覺到有個似曾相識的人，在我面前show off，又當是我唔夠訓心情燥而過敏，佢跟住問番我
「你掂啦，做有線」 「我做完羅喎」 「係咩？！同阿毛毛打牌果個喎，咩四方城喎！做完喇咩？」
「係呀！岩岩上星期last集」 「係呀，我無裝有線.....我成日出埠，一年都無兩個月係香港，無謂裝啦」

如果是真話，咁都俾我撞到你，都算係我倒霉~`

呢個世界，救你果個永遠是你最憎果個，我的電話響起，我從未覺得cool call是這麼可愛，這麼溫暖，這麼知情識趣，我是多麼有興趣聽你推廣你們公司的會藉，「唔明喎！妳再講清楚d....慢慢講，唔好心急...」
「喂！唔阻你......」 理應完結，怪就怪自己口快，慣性同人講再見，仲會加多句「再聯」，「我個我個電話你」 我示意電話正在使用，無法入電話號碼 「你講俾我聽幾多號」 我又即本講，反正我知你入完就算，一定唔會SAVE，「打俾你」 佢講完就走，「唔該！我唔join喇~`」 「先生，其實...」我收線之後，電話又再響起，我以為cool call覆桌，正準備收佢線，發現是有一個有顯示的電話號碼，響了一聲便收線，是剛才的人打給我，我驀然有點內疚，我把他的電話save了，反覆問自己「他其實也算是我朋友？」問到自己肯承應為止。

不是每一個人也可以成為朋友，成為知己，上天安排他們出現於你身邊，就是希望你們成為朋友...反覆自我催眠，讓自己相信這一套想法，正當我迷惑得頭昏腦漲，我在傍晚收到他的來電，深呼吸後，我決定接聽，「喂~``」 對方呆了一呆 「喂~`你係~``係咪張生呀？」 我還以為對方給我開玩笑 「唔係呀，我姓歐陽架」
「歐陽生？！你邊間公司？唔好意思，我唔知幾時打過呢個電話黎~~`」 「咁我估我打錯！」 對方靜了三秒後，再見也沒說便收線~`

收線後，我把他的電話delete~`

我不介意沒朋友，卻很討厭你同我扮朋友，人與人有無數的相處方法，形式及關係，同學並不一定要成為朋友，同事、合作伙伴可以有合作上的感情，但不代表可以轉化成朋友。

在某個階段交匯過，然後各自到自己要去的方向，我們不是朋友，只是萍水相逢的一場相識，勉強只會破壞最好的關係。

人生得一知己，就是自己~``

扭蛋

小時侯，士多外總會放滿無數的咭紙，紙上有一百個有號碼的的紙窗，先付款，然後揀一個號碼撕開，，底下便看到你理應得到的獎品，這個過程，我們稱之為「潛野」

當時的獎品，通常都是雪條一支~~~,汽水一鑵，糖一包，咭紙上的五百圓大獎，有人認為跟本未存在過，這是一個錯誤的睇法，我人生有一次「潛野」，就係潛到五百圓，當時我只得七歲，滿心歡喜地拿著那紙仔，走到士多老板跟前，他拿了我的紙仔，轉身走入後鋪，雖然七歲的我，但已好有計劃，準備如何運用這五面圓，首先我會告訴媽媽我中了二百圓，然後將全數獎金獻給她，媽媽一定會覺得我唔貪心，分番一百俾我，即係我實際袋起四百，又心安理得，想到這裡，年紀輕輕的我不禁自詡有腦、有謀、有肯氣，將來一定係社會可以闖出一番天下！

大約五分鐘之後，老板拿著一盒封滿塵的金鷹朱古力出來給我。

「！禮物！」 「咩呀！我中左五百蚊喎！」 「呢盒糖咪五百蚊羅！」

當時我已知道對方決定懶皮，我雙亂泛紅，牙關緊咬、雙拳合緊，我氣憤得身體在打震，既想衝過去打去，但又驚，好不容易才能夠開腔。

「我係中左五百蚊，唔係發霉金鷹！」 「盒糖五百蚊羅！你唔信呀！我無話過賠現錢喎！」

我終於按捺不了，淚水如噴泉溢出

「你呃人！我中左五百蚊，賠番俾我！」

由於我的嚎哭驚動了路過的街坊，那個老板以一貫大人蝦細路的方法，大聲夾惡，歪理當真理來恐嚇我

「你咁細個，要五百蚊黎做咩？！咁細個就咁貪錢，大個好易學壞，到時你爸爸媽媽就心痛死，走啦！」

老板開始郁手郁腳推我走，我知我鬥不過，但總不能就咁算，七歲的我，已心明「尾彩」的重要，我走都唔會俾你好過，一定要回番一句俾佢我先甘心，好不容易下，我終於想到呢句

「你唔俾五百蚊我，你以後賭馬日日都輸五百，五千，五萬！」

我好記得那個老板當時眉頭一皺，然後大力推我走 「咁易俾你咒到咩？！」

跟住的十年，我每日就像祈禱一樣，一定咒佢一次，星期三同星期六的賽馬日，就會加倍，有時三倍！不知道究竟這老板有否被我改運，但自此我就不再信這些，欺騙你運氣的「潛野遊戲」

多年後，我明白到這些「潛野遊戲」，又或者其他「攤位贏獎品遊戲」、「夾公仔遊戲」等，都是一個原理，首先博你貪小便宜、碰運氣，希望以小可以博到大，然後每次總給你爭小小就成功的感覺，令你繼續玩落去，然後要你覺得玩左咁耐，唔甘心贏唔到份禮物，最後終於贏到時，就會話「真係貴過買！」

所以每次在玩之前，我總會問員工最大那份禮物，如果要買需要多小錢，當然我不是想買，但知道幾錢，就會識幾時收手。

在Juliet in love 內，葛民輝這個教車師傅，用錢買了吳君如很想夾到的那個公仔，但最終還是沒有送給她....

錢是可以買到很多東西，但不代表可以達到你最想的目的。

自摑一巴掌之後，及後在下一站天后裡，余文樂誓要扭到周麗淇喜歡的那個公仔，連老板提議「不如賣俾你啦」 余文樂仍然是低頭繼續扭 「自己扭先有意思！」 最終余文樂把整個扭蛋機搬到周麗淇面前，贏得美人歸。

很多人很喜歡這段戲，而我只認為，這只是電影世界虛構美化出來的一幕，能夠感動到你，就是因為現實生活不會發生....











直至數年後的今晚，我竟然駐足在這兩個扭蛋機前





最後我竟然用了四十圓，扭了八個，為的竟然是那個無謂的「壽包電話繩」




最後一如過往打開這些東西，失望落空後的必然說話，「咁易俾你潛到咩？」，通常這時，總會有人說，「唔得！再去潛過！」 然後我就會阻止 「夠喇！仲俾人呃唔夠呀？！潛到貴過買呀！」
今晚亦唔例外，不過身份角色卻調轉，說要再潛的是我，阻止的竟是我媽媽。


「揀燒賣咪一樣！」 「唔想請妳食壽包咁行麻，我唔信潛佢唔到！」 由於阿媽力阻，我俾面佢今日生日，所以就佢，但我終於都無叫「壽包」呀，我係要潛到為止？ 係大家都食到好飽，無謂浪費食物，但生日點可以無壽包架！唔得咁樣，我點都會潛到果個「壽包電話繩」俾妳做生日禮物，放心！


我聽日就會去問買要幾錢~`~`

等開Show

最怕就係等開show，要準備的已經準備好，再諗只會越諗越錯，所以個人就係一片空白，齋等！本來都仲有d興趣睇下波黎消磨時間，點知曼聯咁樣都贏到波，作為車仔fans我，正所謂咩mood都無晒啦！

於是整理近排影過的相，其中就是這幾張，就是到人山人海的梁基爵studio錄「午夜閒談」主題曲時所拍



我鍾意呢度地方細細，舒服但又不會給人「扮晒野」的感覺，的而且確有好多所謂band 房、studio，雖然裝修好靚，入到去會周身唔自然，咪因為佢「扮x晒野」囉！
呢度簡約、好raw，但又有華麗水晶燈，唔會黑沉沉，窗紗以粉紅、粉綠為主，色調令人好放鬆，你會好夠膽去表現自己，唔信大家睇下呢位女仕，佢都係等錄音，無無聊聊可以做出難度咁高表演，服！

更加服呢個女人的是，這個studio的所有裝修，都是出自她手筆，都係果句，你話佢唔好，係你唔識貨！

In~Out~In~Out~In.~「 」.~「 」.~「 」

春、夏、秋、冬，日出日落，時間每分每秒過去，卻又重覆地走到起點，好像一個賽車手，在沒有完結的比賽上，不停地走著同一個圈，既是起點，又是終點；我有一個未發表的鬼片劇本，某人不停重覆自己死亡前的一切，完了又是另一次開始，跟本永遠無終結的一刻，在結尾的一段是這樣
『HERE is the beginnig！ Wherever you go！wherever you ' ve been！at the end，you 'll come back here，this is the End & also the Beginning .......』

小時侯不肯把舊衫棄掉，我跟媽媽說，這些東西在二十年後會興番，會好值錢！
可惜一個幾百呎的公屋單位，差點連人也無地方容納，何況這些「期貨」，可憐的我失去大好發達機會，仲要駛錢幫襯d貴到癲Vintage鋪頭，買番以前俾阿媽掟左果d衫，仲要俾阿媽見到我著呢d衫時話
「你著呢d舊衫，`總之以前d衫唔好掉啦！」

『追潮流』咪就係當你日跟夜跟，跟都有日氣咳，不情願地停下來時，發現自己一直想走在潮流最尖端，其實只是在沿地踏步，浪費青春。

現在的數碼相機出新款比手提電話更快，我質疑點解相機唔可以像手提電話，舊機可以trade in換新機，
令我們這些走在潮流側邊的人，可以大條道理換機，卻又不會負上浪費的罪名，又可以促進經濟，總好過而家新機唔想換，因為一跟落去就係萬丈深淵，但舊機又唔敢羅出黎用，雖然口說「沒所謂」，但始終會為「你部機好out」呢句而尷尬難堪。

而事實上，我的而且確是「OUT」，潮流已經番到起點，現在大家又興番用單鏡反光懷舊用菲林手動相機。






「唔知晒出黎張相會點呢？」 「遲d約出黎睇相丫」 「最後一張菲林喇」

我知道這些話終會有日回歸，但想不到是這樣快，從前二十年的一個循環，現在變成三五年，如果你仲研究邊邊數碼相機像數高，到你發現興影番菲林舊相機時，你正想接觸，其實已經又興第樣東西，可能是傻瓜機，可能是你現在那部out了被放棄的Digital Cam

知回頭，會是岸，昂然投入去這巨浪~~`

寫就易，要寫得出做得到，除非你是黃偉文~``