3.04.2007

扭蛋





小時侯,士多外總會放滿無數的咭紙,紙上有一百個有號碼的的紙窗,先付款,然後揀一個號碼撕開,,底下便看到你理應得到的獎品,這個過程,我們稱之為「潛野」

當時的獎品,通常都是雪條一支~~~,汽水一鑵,糖一包,咭紙上的五百圓大獎,有人認為跟本未存在過,這是一個錯誤的睇法,我人生有一次「潛野」,就係潛到五百圓,當時我只得七歲,滿心歡喜地拿著那紙仔,走到士多老板跟前,他拿了我的紙仔,轉身走入後鋪,雖然七歲的我,但已好有計劃,準備如何運用這五面圓,首先我會告訴媽媽我中了二百圓,然後將全數獎金獻給她,媽媽一定會覺得我唔貪心,分番一百俾我,即係我實際袋起四百,又心安理得,想到這裡,年紀輕輕的我不禁自詡有腦、有謀、有肯氣,將來一定係社會可以闖出一番天下!

大約五分鐘之後,老板拿著一盒封滿塵的金鷹朱古力出來給我。

「!禮物!」 「咩呀!我中左五百蚊喎!」 「呢盒糖咪五百蚊羅!」

當時我已知道對方決定懶皮,我雙亂泛紅,牙關緊咬、雙拳合緊,我氣憤得身體在打震,既想衝過去打去,但又驚,好不容易才能夠開腔。

「我係中左五百蚊,唔係發霉金鷹!」 「盒糖五百蚊羅!你唔信呀!我無話過賠現錢喎!」

我終於按捺不了,淚水如噴泉溢出

「你呃人!我中左五百蚊,賠番俾我!」

由於我的嚎哭驚動了路過的街坊,那個老板以一貫大人蝦細路的方法,大聲夾惡,歪理當真理來恐嚇我

「你咁細個,要五百蚊黎做咩?!咁細個就咁貪錢,大個好易學壞,到時你爸爸媽媽就心痛死,走啦!」

老板開始郁手郁腳推我走,我知我鬥不過,但總不能就咁算,七歲的我,已心明「尾彩」的重要,我走都唔會俾你好過,一定要回番一句俾佢我先甘心,好不容易下,我終於想到呢句

「你唔俾五百蚊我,你以後賭馬日日都輸五百,五千,五萬!」

我好記得那個老板當時眉頭一皺,然後大力推我走 「咁易俾你咒到咩?!」

跟住的十年,我每日就像祈禱一樣,一定咒佢一次,星期三同星期六的賽馬日,就會加倍,有時三倍!不知道究竟這老板有否被我改運,但自此我就不再信這些,欺騙你運氣的「潛野遊戲」

多年後,我明白到這些「潛野遊戲」,又或者其他「攤位贏獎品遊戲」、「夾公仔遊戲」等,都是一個原理,首先博你貪小便宜、碰運氣,希望以小可以博到大,然後每次總給你爭小小就成功的感覺,令你繼續玩落去,然後要你覺得玩左咁耐,唔甘心贏唔到份禮物,最後終於贏到時,就會話「真係貴過買!」

所以每次在玩之前,我總會問員工最大那份禮物,如果要買需要多小錢,當然我不是想買,但知道幾錢,就會識幾時收手。

在Juliet in love 內,葛民輝這個教車師傅,用錢買了吳君如很想夾到的那個公仔,但最終還是沒有送給她....

錢是可以買到很多東西,但不代表可以達到你最想的目的。

自摑一巴掌之後,及後在下一站天后裡,余文樂誓要扭到周麗淇喜歡的那個公仔,連老板提議「不如賣俾你啦」 余文樂仍然是低頭繼續扭 「自己扭先有意思!」 最終余文樂把整個扭蛋機搬到周麗淇面前,贏得美人歸。

很多人很喜歡這段戲,而我只認為,這只是電影世界虛構美化出來的一幕,能夠感動到你,就是因為現實生活不會發生....











直至數年後的今晚,我竟然駐足在這兩個扭蛋機前





最後我竟然用了四十圓,扭了八個,為的竟然是那個無謂的「壽包電話繩」




最後一如過往打開這些東西,失望落空後的必然說話,「咁易俾你潛到咩?」,通常這時,總會有人說,「唔得!再去潛過!」 然後我就會阻止 「夠喇!仲俾人呃唔夠呀?!潛到貴過買呀!」
今晚亦唔例外,不過身份角色卻調轉,說要再潛的是我,阻止的竟是我媽媽。


「揀燒賣咪一樣!」 「唔想請妳食壽包咁行麻,我唔信潛佢唔到!」 由於阿媽力阻,我俾面佢今日生日,所以就佢,但我終於都無叫「壽包」呀,我係要潛到為止? 係大家都食到好飽,無謂浪費食物,但生日點可以無壽包架!唔得咁樣,我點都會潛到果個「壽包電話繩」俾妳做生日禮物,放心!


我聽日就會去問買要幾錢~`~`

16 comments:

lulu said...

hoho....they look so cute.
in San francisco. all those 扭蛋are cartoon. like hello kitty, winnie the pooh....shrek, stitch, etc. -_-"
要起碼一元美金一個。 大約7-8HKD...many girls like to 扭 winnie the pooh, and force their bf to use it as the 電話繩。 D男仔好可憐。 好彩我唔會咁做。
不過其實呢﹐ 呢D扭蛋的外殼可以點處理﹐ 好似好唔環保咁。

fa chai said...

潛到確實係開心d架ma!
潛唔到梗係覺得爭d野!
堅持!!

Anonymous said...

條電話繩10蚊都唔洗XD
不過自己抽出黎好似有意義D

Cathy said...

D 電話繩 very cute ar.
I think your mum doesn't mind whether you give her b'day present or not.
I think all she wants is you spending more quality time with her la.

bo said...

So sweet!

holycow said...

如果現實中有個女仔為一個好中意電玩噶男生買一部他很喜歡的卡通噶扭蛋機,你估會不會有同樣的效果?

灘叔,你對你媽咪好好~~嗯,記得要講價....

chinKerbella said...

多左0個d送俾我地~yeah~

Anonymous said...

-唔係導彈女-
亞灘你大可放心,就算你欠我1個獎,
我都唔會選擇去咒人,點解唔去好好待自己,
自己都唔善待自己,點出黎交際呀?
細個時,我唔鐘意"潛野"鐘意買出奇蛋,
出奇蛋實有野送.

**記著你馬仔唔聽話咪賴我!**

pvc said...

我細個嗰陣都好鍾意潛嘢架,哈哈,都係去士多玩囉..最叻咪潛到汽水或嘢食架渣,冇你咁勁抽到五佰蚊,雖然最後比個士多老細呃埋添... :p

我哋呢啲屋村大o既唔係去士多潛嘢扭蛋之外,就係玩"猜(包前揼)"樓梯又或者就係玩"二龍爭珠令"架喇,哈哈,你有冇玩過!?

pvc said...

噢,click得太快添..我都未講完 :p

你好孝順呀,竟然咁sh-weet去扭蛋比你阿媽,咁仲特別過食真正o既壽包呢 :)

賀少 said...

係呀
細個果陣,書報攤 文具鋪 士多
都有果d雙面硬卡紙抽獎
多數都係糖呀 雪條
我記得有個係大叮噹
唔係卡通片果個叮噹
而係真係噹噹聲果舊野
500蚊,但最後係朱古力?
個老版真係攪卓頭,昆人!!!
咒佢輸錢就岩架啦!!ha ha
你去扭蛋呀
其實真係有市價架
以家市道上,有扭蛋set
一係一套買[最慳錢]
一係散買[買心頭好]
一係去扭[最蠢,但又最刺激]
以家d靚蛋蛋大約10-15蚊1次
但係最難抽中果d,市價可能值20 30 40或者更多.
所以玩具鋪先有生意!!
朋友話我中6合彩,好手氣,叫我去抽蛋
(其實張飛中返20蚊之嘛~.~)
點知佢一見個玩具,就大叫一聲
話隻野係入面最貴 最難抽 最值錢
抽就10蚊,市價就值50蚊 [死未?]
海灘,你去睇下部機
機身有無寫特別版或者什麼版
如果無,就姐係一視同仁,隻隻數量一樣
無話特別難抽中.
伯友生日呀?祝身體健康 萬事如意

Anonymous said...

海灘住荃灣呵, 去荃豐, 任何潛得o既o野都有現貨賣.

Anonymous said...

我都好鍾意扭蛋,有一刻係想令自己開心,有一刻係唸得到後可以送比邊個,其實我好支持你,或者大家係同一個姓(鄒),同埋一樣住係荃灣,你繼續努力!!

高玉 said...

灘叔~我扭到壽包呀!!
不過都係扭到8個之後先扭到呀> <
重有好多重複既蛋tat 同春卷,我覺得叉燒包都幾q~
我個壽包係諗住送比婆婆呀~
不過重未送~
我驚佢唔要啦,話晒$啦,話送埋d垃圾比佢~><

高玉 said...

回上題呀~灘叔~
我拜山個日走去送左個壽包比婆婆lu~
佢好開心woo,真係好,佢話好"贊鬼"
重要囉黎影相tim 呀^^

qt芝士 said...

小時候我經常扭, 長大了, 已忘記多久沒有投幣潛過....

看著身邊的小妹妹每次滿懷興奮地扭, 感到自己老了....