怪

中學時期，曾經被一個女同學幫我改左個花名叫「阿怪」，因而耿耿於懷！「我係唔靚仔！但係都唔算怪麻？！」 「你又唔算好醜樣，但你思想，打扮，行為真係好怪！」 「？！我呢d叫思想、打扮前衛，係型唔係怪呀！」 「咁樣叫做型？！我只係覺得怪！我真係接受唔到！」 佢講到咁，我就明白晒！
當我身邊的同學仲迷戀緊ALAN TAM或張國榮，我只愛達明一派，其實咁樣又幾前衛，達明概念咪又係來自英倫組合，只不過當時你地接受唔到長頭髮男子做主音，鬥雞眼結他手！我認為結婚係人類最蠢的發明，死左之後應該唔好再浪費金錢係喪禮同壽衣身上，你覺得我不孝，花弗，只是你們比我傳統！接受新鮮的事作能力低！如果這樣就導至你認為我「怪」，只係你太正常，唔抵得我D有別於你，所以就用一個可以打擊我地的TERM「怪」來穩守突擊！由果日開始，被人話怪我當作是一種讚美！
後來入到ESPRIT工作，我好介意自己唔夠怪，原來會有人剪河童頭（早過朗拿道十幾年），男人會著TIGHT PANT同化裝，女人會鏟光個頭，有人可以同你做左半年同事，但未同你講過一句說話！有人要求加班因為媽媽就快過身，唔想面對！喜歡睇極都唔的「進念」、聽SPK，基本上係挑戰人類聽覺極限的嘈音，一齊睇戲，有人因為隔離位不停傾偈，屢勸無效，那人毅然離開，不久又回來，手持一把軍刀，隔離位看見即刻收聲！
我無辦法入到佢地世界，我想怪但怪唔起，我開始質疑佢地係「扮怪」，為怪而怪！呢D係嘩眾取寵唔係怪！
有日那個從不對我說話的同事突然開腔「你做PUMA岩D！你太正常！呢度只會容納到我呢D怪人！」 「咁我唔夠怪點解佢地又請我呢？」 「請錯！」 當時我啞口無言，暗暗覺得佢講得有道理！我打算唔做了，不過最後呢位同事比我早離開，因為佢偷衫！似乎請錯果個係佢！我開始唔信D人係真怪，
「扮出黎搵食！」
近年扮怪真係可以搵到食，不過時代唔同，稱呼亦都改變，家下所謂「怪」，其實應該叫做「騎呢」，但細想其實「騎呢」同「怪」仍然係兩個不同類別！睇到「騎呢」的人，做騎呢的事，正常反應係放聲嘲笑！呢個係對佢地讚美的方法！真正「怪」係好有感染力，你今日唔鐘意，係因為你未識欣賞！終有一日，「怪」 字是你對我美麗的形容！
「若你喜歡怪人，其實我很美」
每個人都是出身自一張白紙，「怪」又好，「騎呢」又好，扮又好，真係咁都好，一個稱呼而已，不過做人最唔怕生壞命，最怕改壞名，被人叫「怪傑」定「騎呢怪」，就要睇你有冇揀錯！
揀岩一個適合你的角色，演好人生這場戲！

見証

養七仔第一日我已經講過，要向佢學習，學佢不停要超越前面阻礙，勇往直前！終於佢就係因為咁，爬過露台，飛左落街，其實我到而家都想唔通佢係點樣爬得過，佢伸直晒手腳都唔到！家下要學習做龜的頑強生命力，四五十呎飛落街，家下竟然已經有五六成復原，開始郁動，不過係未有胃口食野！真係堅！

「藍藥水」真係百試百靈，又一次發揮佢功效！

七仔！等妳好番晒，再帶妳去曬太陽！幾時都好，最緊要記得約好左！

there is something about GOD

世界杯完了，拉闊完了，生日完了，軟硬完了....似乎是新開始的來臨！


其實.....我唔算係軟硬hardcore fans，咁點解再去睇，睇兩次我其實都係黎支持阿葛！

同阿葛認識其實都有十七八年，但交往極小，稱不上朋友，但阿葛對我做過幾件事，比一般所謂稱兄道弟的行為，簡單直接同窩心！
其實八七年做espirt已「認識」阿葛，當時佢好型，住砰洲，著好多comme sa du mode的衫（呢牌子而家已經變成大眾普及抵著牌子）手裡面永遠夾住幾隻黑膠唱片，kraftwerk、YMO、Dream academy....仲有好多好另類的樂隊！果時佢好cool，並唔係咁鬼馬咁神經！好難接觸上！
九十六年因為百份百感覺認識阿葛，當時電影市道好好，d戲開完一部又一部，邊個得就不停拍，百份百之後有百份百岩feel、愛情ameoba...當時阿葛算係最紅的一個電影人，再加上軟硬岩岩搞完「天空小說」，王家衛又搵佢地拍戲，阿葛當時就係忙緊「初前戀后...」佢當時講野已經成個大師咁！但老實講，阿葛係電影大師，不過係「電影雲遊大師」，初時成日唔知俾佢帶你去左邊，後來識野多左，就知道佢同好多謂識電影的人一樣，虛蕪飄渺，不切實際，呢樣野，你睇佢之後搞果部「龍火」就知，但自己羅錢出黎拍，無野好講啦！
九十七年我第一次做導演，王晶要我拍喜戲，仲要係佢果種喜戲，當時有得上車做導演，唔係拍三級，乜都做啦！部戲叫「超級無敵追女仔」，當時阿葛係你俾得起錢，佢就肯拍！雖然之前有三部戲合作過，但唔覺得同阿葛friend左，亦都唔覺得佢會幫我，只要唔好帶我遊花園已經係好大幫忙！拍攝過程，我開始覺得阿葛其實好會幫人，但當然幫緊你同時，亦都係俾佢玩緊，小則meet下你奶茲，大則你發現佢原來可以用五分鐘解決問題，佢會搞左你一日！戲裡面有場歌舞，拍完之後，阿葛捉住我，話場戲應該參考日本一隊當時好hit，好搞鬼的樂隊的演出，叫我剪片之前睇睇佢地d VIDEO！我照單全收，問佢係邊度可以搵到隻碟，佢話四圍都有，終於我係各大唱片公司搵左一日一夜，答案都係無，然後再開工問番佢，「係四圍都有喎.......係日本！」
佢就係度大笑，我就轉身走左去！過左好多日，有日阿葛無戲份，我拍拍下戲，副導演羅住一隻CD SINGLE俾我， 就係阿葛介紹俾我果隻，我問佢係邊度搵，佢話阿葛頭先親自渣車送來，但唔想阻你拍戲，所以俾左佢，等我得閒D先交俾我！呢個工作上的小幫忙，我到而家都記得！但係未算最深刻....
我成日問佢借YMO聽，但佢要我答到三個成員係邊個，我只係記得板本龍一......然後兩個就唔得，但佢次次都問，又唔肯俾個答案我，一唔識答就MEET你奶茲！我為左自己乳頭著想，一見到佢就問佢其他野，其中一條係「你有冇LAID BACK的WHITE HORSE」首歌係咁「IF YOU WANNA RIDE，DON'T RIDE A WHITE HORSE！IF YOU WANNA RICH ，YOU HAVE TO BE BITCH.....」佢話佢知日本可能有，跟住我已經好醒目話我自己去日本搵，佢奸笑「你咪試下搵羅！」 搵唔搵到唔緊要，最緊要係乳頭可以唔好再受創，我經好多次女友問我個乳頭俾邊個搞過黎？「阿葛！」 「你當我傻架！我點會信你！」 其實係真，不過你唔係傻，係阿葛傻！
好多年之後一個星期六晚上，我奇怪地留左係屋企，通常呢D應該出去但唔出的日子，總會有怪異事情發生！十一點幾我收到一個怪聲人電話，係呀！就係阿JAN扮阿葛果把「我係萬佛朝宗，想搵阿鄒乃光？」 雖然我知道又有排俾佢玩，但係我真係好開心佢會打俾我，我顧作鎮定「阿葛！咩事？」 「你搵到隻WHITE HORSE未！？」我繼續扮冷靜「搵緊....」「我有一隻喎！」 我開始D戲散左「阿葛！你想點先？唔好玩我啦！」
「你係邊？點俾隻碟你呀？」 「？！你幫我買左仲送埋俾我，咁又要付出咩代價？」 「我有支疊球棍，粗過手臂，你拮起俾我插人下就得...係一下，你鐘意都係一下！」呢D情況，我只可以笑來把事淡化，因為我真係驚佢會咁做，而自己又鐘意左！「我係屋企，係新界！」 二十分鐘後，佢渣住架招牌啞黑色旅行車係我樓下出現，俾完隻碟我就走左！
第一場我去睇軟硬，入到DRESSING ROOM見到佢，佢第一句就問「點呀？有冇聽WHITE HORSE呀？」「久唔久啦！」 「我一見到你就諗起WHITE HORSE！」，尋晚我係後台，佢地臨出場，我豎起姆指向住佢，我其實唔知佢睇唔到睇到，但佢豎番起兩隻姆指！係台上，佢竟然望到我，仲開左我名！果一剎那，我感覺到唔係虛榮，而係「上心」！
近年阿葛表現大不如前，有時見佢接D戲，又走去同查小欣做881，真係心裡面問「阿葛！你係咪真係咁等錢駛！」不過個仔都十幾歲，點會唔等錢駛！可以理解！ 呢次演出，你總有六七成番左黎！我已經好滿足！
雖然你唱「妳的生活」感動唔到我！但係你就係咁，正正常常做D野，一見到你個樣就想笑，感乜春丫！但實際上，俾你無情情感動過的人，又點止我一個丫！
THX GOD！

Transfer

我只係去飲杯茶，妳一向都無能力同本事爬得過露台.....再見番佢已經係平台！
唔好同我講生日快樂，將所以祝福送俾七仔，不過如果妳太辛苦就唔好頂，今世受晒，下世好好做人！

心事有誰知

我係呢度做左一個實驗，我証明到一d野，但呢d野令我有點迷失！angela忙於做paper，佢搞掂之後，會出一個調查，我希望各位老友真心參與！ 咁我就安樂晒！

妳快樂.....

給三姑的禮物






我諗係電台史上第一次，有主持可以dead air咁耐去許生日願望！三姑，好野！

......所以我們快樂

祝

冬叔、冬嬸，祝妳個女生日快樂！

cheers~~~

你們近況

首先分成兩派人先，第一派，會常常問人「阿A同B最近點？聽講佢地成日嘈喎」或者「阿A同B係咪拍番拖？」呢個叫「人派」;第二派係「灘派」，永遠唔問人家感情事，如果太唔熟，你講我會行開！
其實人家的感情近況關你咩事呢？「我想關心下之麻！」係關心定八呀？「又關心又八羅！」
你係關心就應該好細心留意到啦，開心的情侶，你見唔到個人，佢地都有陣甜味會飄到你面前；到人家有事，唔代表想講你知，唔代想你關心！「點解個個都知我唔知喎！」咪就係因為你八！所以唔講你知羅！
有好多人會鐘意講感情近況俾「人派」成員知，當然係一些希望借你把嘴會四圍唱的說話，又或者將所有講晒你聽，你就成為要幫佢承擔的一份子，跟住「人派」的人就覺得對方煩，對方又覺得「人派」的人唔夠FRIEND，最後反面可能都係因為一個「八」字！知小D，就煩小D！

「人派」會員最多當然係C9同OLD嬋，佢地生活簡單，「八」係唯一運用到腦袋的創意部份，是關每一單八掛新聞，都會留好多談論空間俾佢地作簡單創作遊戲，「A都係同B有路架喇，唔係點會咁寫丫，我話一定係A襯C唔係度，B又知D同E有路，所以B咪同A發姣，諗住激下阿D，點知假戲真做.......」呢D創作，係佢地先諗到！
有供就有求，有人做馬騮戲，係因為有鐘意睇馬騮戲的客！但係唔係隻隻馬騮都識做戲，識做戲，趷起個紅仆仆屁股，懶CUTE咁搖下搖下，都仲還可以，但係唔識做戲果D，趷起個屁股，表演瀨到一地都係，之後仲要同場加演互相餵對方食屎，然後再瀨過出黎，再食、再瀨、再瀨、再食......我頂得住，你兩隻野都顧下自己丫！食得屎多講句野，流滴汗，噴啖氣都臭過人，D本來會餵香蕉俾你地食的客人就會走，你地就會餓死！不過係你地未餓死之前，我已經嘔到缺水而死！我已經好努力咁避，但係你地真係太臭！
Give Me A Break！

唔好意思，唔知點解要講英文，「俾我抖抖氣丫！真係好臭呀！」

哇wow ~~

就咁睇呢幅相，你會覺得好紅，所有襯晒色！第一時間要你答幅相係邊到影，你個答案係咪「去飲果時影羅！」














幅相其實係九展影！睇見係咪為之「哇wow」呢？
什麼是「哇wow」？每當我們遇到一些事情，不懂反應，啼笑皆非，用「吹漲」又好似嚴重左，就會用「真係為之哇wow！」 呢個配樂係卡通片常有！都唔明就上「都唔知好嬲定好笑」架車啦！
我喜歡遇到令人為之哇wow的人與事，有咩奇妙得過你明明嬲但竟然笑左出黎丫！真係為之哇wow架！
早排去書展，有個肥仔問我「你係咪做她他她果個鄒海灘？」 「我係！」 「我無聽她他她好耐lu！」 「嘩！你叫我就係要話我知你無聽？」 「我坦白丫麻，我好鐘意聽你做節目架！不過而家真係無聽！」 「咁你鐘意聽但係又唔聽，你其實想點先？」「鐘意聽但唔一定要聽o既，總之你比心機d啦！我真係好鐘意聽你做節目！」 肥仔講完就走左去，我企係度，心裡已替自己配樂 「哇 wow~~~」

我係台灣拍「一個字頭的旦生」，有個樣子娟好的少女，手持紙筆，一臉靦腆，儲左好耐勇氣，然後走到我跟前，遞起紙筆給我，我雖然受寵若驚，但仍保持冷靜接過少女紙筆，正想簽名的時侯，「你可以幫我找劉青雲簽名嗎？」 起配樂「 哇 wow~~」

劉青雲係日本同我拍「七年很癢」時，曾經有兩個日本女仔問佢「可唔可以幫我地影幅相？」 青雲好有禮貌答好，然後走到兩個女仔身旁，點知個日本女仔俾部相機青雲「哦~~幫妳地影幅相！」 青雲忍住笑拿起相機同佢地影！ 配樂又起「哇 wow~~」

我試過開工住酒店，第二朝七點要開工，一早訓，點知兩點幾俾隔離房開party嘈醒，我打電話落大堂求助，無耐之後，隔離就靜左，我心想，呢間酒店做事效率真快，所以我好快又訓得番，點知個幾鐘頭後個電話再響起！「先生！頭先你打電話俾我地，話隔離房好嘈，我地已經去同佢地反影左，唔知佢地而家仲有冇嘈呢？」
起配樂「哇 wow~~~」 「無嘈~~點夠你嘈丫！」

係澳門食飯，我叫身後的待應「唔該！請問有冇茄汁？」 「有！」個待應答完我繼續企係度！十秒後「我要呀！」 「好！我羅俾你！」 配樂又起「 哇 wow~~~」

同個女仔係寒冬行街，個女仔有點冷，我拉拉外套，個女仔見狀「喂！我唔凍.....」，未講完先發現我原來只是拉起拉鍊，並非除外套給佢！配樂起，兩個都為之「哇wow~~」

其實爆裂刑警內，羅蘭姐羅碗麵出來，然後好似俾古仔「要唔要呀？」古仔點頭 「自己煮丫」，呢場咁「哇wow」的戲，前身來自當時喜歡去飲野，問女仔「要唔要野飲？ 自己買丫」我一見到佢地黑面，我就會「哇 wow！」 好開心！
面對難題時，橫豎發脾氣都解決唔到，倒不如說聲「咁大鑊！呢次真係為之哇wow喇！」
俾老細鬧，下屬害你咩鑊，情人對你無理取鬧，遇到任何唔開心東西，試下講句「真係為之哇wow！」，然後傻笑一陣，我肯定心情即刻會好番！我想起各位老友傻笑個樣，已經忍唔住笑左出黎，多d人做，多d笑容！ 哇 wow~~