日日夜夜開放

自己個節目新開張，我竟然一幅相都唔記得影....坦白講，我緊張到胃痛.....今晚個節奏快左d，急左d，要努力調較。

感謝千嬅，是環節時間出錯，並非存心陷你於不義，再一次致歉！



迪偉，今晚有點大材小用，下次請你食飯！


感謝有收聽的老友，我會二十四小時日夜開放接受大家正面意見~`~`

史拉騷....沉龜底

再次多謝 Angela，希望妳不是犧牲溫習或睡覺的時間來替我搞的！Bravo~~`



向下往~``

這個周日下午我在半島...

久不久就會過這樣的日子，飲到訓仲滿口係酒，然後訓醒一張開眼又飲過；通常呢種情況會係出埠渡假時發生，今日是周日，也是長周末的第二日，昨夜，嚴格是今朝早上，我努力回憶飲了幾多，不過未想到已經又要出門.....


今日是商台高層Rita chan結婚之喜，安排在九龍半島中午設宴，下午去「撼」我都是第一次，於是十點起身，十二點到，十五分鐘後，眼前出現第一杯 Moet Chandon Rose，一點半開席，新鮮熱辣的乳豬放在我面前，等到凍晒我都未食，因為我無法有信心準確夾起乳豬，為免穿崩，我帶笑好淡定對同桌的人說「咁早我食唔落野？」 此時不知從那來傳來一把聲音「哦！飲就得？！」 我唔知係邊個，但好自然答左句「係呀！再丫！」 粉紅色的香檳又再倒進口裡去！
炒飯之後，我要走了...「走先！好wing！」 呢句說話真係第一次係中午講，回到來就攤在梳化長斷了片！醒番時不知何時何日，只覺得好開心，好舒服....










我沒有長假期，但我懂得尋找偷閒的途徑，雖然玩得好疲，但快樂令我充滿力量，叉足電迎接 新開始！

給單拖的人

我喜歡單拖去參與群體的活動，最好全班人都係一雙一對，冷眼旁觀，從兩個人相處的痛苦提煉單拖的好處，但當証實單拖是好的同時，亦發現九十九巴仙推崇單拖的人，都是口不對心。喂！都已經單拖一兜友，搵個好聽d理由提下神都得掛，就好似你失業時，梗係同人講「我未接到合適JOB！做model係咁架啦！」咁都踢爆，你唔係叻，係無品！

『點解無拖拍？』

如果人家問你呢個問題，標準答案係「我唔係無得拍，係唔岩我心水唔拍！」，但當撫心自問時，你可找到答案給自己嗎？其實又係主動問題，如果你無拖拍會即刻溶解成灰，你一定會主動出擊，錯一萬次，都唔會錯過一次！如果你是過時過節，無人無物先問自己點解無拖拍，你平時點會主動出擊？ 又或者你是那種想很多的人，拍拖跟住就要結婚，找結婚對象乃一生一世事情，寧願無都好過揀錯，你看現在離婚率如此高，就証明很多人揀錯終身伴侶。

你是那一種單拖人？不要告訴我你是有心無力，無計可施的那一種，你不是無辦法，只是懶才不肯主動，但條件有限，被動等如不動，不動就無行動，單拖都要定時出動，就等如做人都要定時運動，否則不太健康~~~

單拖最應該經常出席的活動，當然是「約會」，通常約會分為三大形式，「看」、「溝」、「飲 」
「看」即一齊「看書」、「看海」、「看電影」、「看著對方」.....
「溝」即互相溝通，有人以對話，有人以眼神，有人以所見所聞，所學所識，有人以身體.....
「飲」即飲酒食飯跳舞到旦達，狂歡後送回家goodbye kiss.....

由於你是單拖，你可以一晚有齊呢幾個約會，試想想，先跟一個斯文單純的看海，含情互望，跟住約會另一個可以傾得埋的神交，然後再約火辣竦的飲酒跳舞，在家外熱吻片刻；然後到第二日才慢慢考慮那一個可以繼續date，或者全部被擯出局，再揀果另外的再date！如此循環不息，單拖點會唔快樂！

You may say that I'm a dreamer But I'm not the only one....

I hope someday when someone ask you 「點解無拖拍？」 你答察應該是
「我一日有三四個約會，邊有時間拍拖呀！」

給有拖的人

無拖拍，悶！有拖拍，煩！不過大多人都寧願好煩咁有拖拍，始終點煩，只要一百個巴仙裡面有一個巴仙是甜蜜，可以甜蜜半分鐘，就夠捱餘下果二十三小時五十九分半痛苦！
拍拖中最煩當然是想節目，但你有時間，有錢，節目是可以買回來的，總算可以解決！最煩又最難是拍拖一段時間，對方係你想唔到的情況下問你 『其實你鍾意我d咩？』





『頂！問d咁野？！』 、『我想同你上床左喎！』 、『鍾意你有d錢羅，唔通貪你樣醜地中海咩？！』 、『其實我都無鍾意過你，空虛搵個人hae住先之麻！』 、『死喇！無瑞瑞問d咁樣，我梗係之前做錯左野！』

或許當情人問你這一句時，你心裡面還有更加多其他沒有說出口的答案，但你選擇唔作答，因為點答都死！有些人會覺得自己好聰明，會反客為主『不如你講左你鍾意我d咩先啦？』，然後對方又會話『你講左先！ 、『我唔講住，妳講先！』 問來問去，問多兩句大家d火就會上腦，呢個話題好快就會完，但對方問得你，而你未答，轉頭咪又再問過你！ 所以有人會選擇答『點知喎！鍾意一個人點知鍾意佢乜喎，總之鍾意咪得羅！』

當你講呢一句時，心裡想著的全是上面的答案，其實對方都質疑你個答案背面的真相！

我都俾人問唔小，由諗爆腦到口不對心，由保持緘默到胡亂回答，現在如果仲有人問我，我會有果句答果句

『我想同你上床左喎！』 、『鍾意你有d錢羅，出街我唔駛俾錢！』 、『其實我都無鍾意過你，空虛搵個人hae住先之麻！』 、『無瑞瑞問d咁樣，我梗係之前做錯左野！』

咁樣答好處是及早話俾對方知，問我呢d問題，難受果個會係你，但偏偏事以願違，我咁講完，對方會當作是笑話聽，放聲大笑；平生我用盡幾多功力去講一個笑話，都唔會及呢個咁引到人笑，所以一個笑話好笑唔好笑，都係睇對方想唔想笑，笑話當認真咪唔好笑，但認真當笑話，除左好笑，仲可以避開好多尷尬場面！

久而久之，無人再問我，係時侯到我問番對方，竟然每一次問，唔同人但答案都係相同 『無野鍾意你，係因為你直接過其他人！』

各位！重大發現定係其實一直忽略呢？個個都等人錫，等人愛，等人約，等人攬，等人開聲表示.....等呀等，等到忘記左可以自己主動去爭取！「點爭取喎？！唔通話我鍾意你，好想佔有你，你跟我啦！」

中學時代喜歡了一個隔離班校花，所謂校花，即係好多人媾，幾時輪到我，高年班的幾個師兄，教我買定一張星期六七點半戲票，然後走到個女仔面前俾張飛佢「我想約妳，聽晚七點三係海運戲院門口等！」講完唔好等佢反應，轉身就走！

我真係有咁做，翌日仲真係係戲院門口等佢，但等到七點九都唔見人，我無入到場睇「刀馬旦」，心裡面自責蠢過隻豬，浪廢金錢，信錯師兄！果年我十五歲，之後我再唔主動！

十二年後一個寒冷晚上，我在朋友屋企BQQ重遇這個女子，當然事隔十二年後，佢美其名就叫有左女人味，實際上都人老珠黃了，大家閒談飲酒，想不到幾杯過後，佢竟然話我「無風度，無耐性，梗係無女仔鍾意啦！」
「咁耐無見，講d咁野？！」

原來十二年前對方是有出現，但遲了二十分鐘，仲自己入左場，可惜不見我在，好不氣結！所以從此無再啋我。我問佢「妳....當年點解會應約？」 「？！果時邊有人會咁樣直接約人架，仲懶型咁....咪出去睇下羅...點知....」 跟住佢一五一十說我不是，當中當然拉埋其他男人落水鬧啦！」 望住佢，我明白原來主動的重要，但好彩我無入場，大家無開始過，呢個故事先會更加入心！

「主動」確實會易於令事情加快進展，但主動只是一個行為，只構成事情開始，咁「其實你鍾意我d乜呢？」

『頂！問d咁野？！』 、『我想同你上床左喎！』 、『鍾意你有d錢羅，唔通貪你樣醜地中海咩？！』 、『其實我都無鍾意過你，空虛搵個人hae住先之麻！』 、『死喇！無瑞瑞問d咁樣，我梗係之前做錯左野！』

『我講先？！』 、『點知喎！鍾意一個人點知鍾意佢乜喎，總之鍾意咪得羅！』

其實唔知道鍾意你d乜，而繼續鍾意緊你，咁咪幾好羅！係要情人好辛苦講左你一樣微不足道行為「我鍾意你肯幫人！」，然後連你自己都所都質疑 「我又真係無咩值得人鍾意喎！」 咁又何苦呢~~~

Kowloon boy

小時侯去九龍仔，為左睇球員練波，青少年時侯去九龍仔，為左去踢波，少年時侯去九龍仔，為左去拍拖，人到中年，上次去九龍仔係拍戲睇景，終於懷緬一番之後，場景其實不適合，今次去九龍仔，係為左食飯！


朋友介紹去呢度食飯好耐，其實以前老闆娘係坑口開鋪時，我已經不時特登駕車去食，食完就落西貢食滿記，呢d編排，除要有車外，仲要有閒情，同埋真係好食！
無論在坑口還是現在九龍仔，好味的水準是可以保持的！「豉油雞」、「魷魚膠餅」、「浸蜆」等等等等...（對不起，我是不會叫鋪頭的拿手菜，所以無特別介紹）你自己去試啦！

我得一個意見，你地去開幫我講，就係d送大碟d，十個人叫十二碟送都唔夠食，終於食左兩隻雞，幾碟菜都好似未夠喉！
有時兩個人食飯同，就希望有d細細碟，一人幾啖就食完菜式，今晚我今覺呢度可能好岩兩個人食飯，包可以叫得多，樣樣試小小！

















有車去當然比較妤適，泊車四蚊一個鐘，但就算無車，始終位置不算偏僻，去九龍塘、旺角撘的士去都是幾十圓，當然你去九龍城或樂富行去都可以，天氣開始轉涼，感覺也不錯！

至於價錢方面，如果你食過好味，你會覺得合理！

我在聽你說

終於面世了，早前在這裡及電台介紹過的一本書，我看初稿的時侯暫名「我在聽你說」，我覺得老土，但簡單直接，「無料呻吟」東洋味重，切合本書背景，但班客未必一睇書名就知本書講乜！不過Don't judge a book by its cover！否則你會錯過一本好有趣的漫壓秘笈！

有個橙色頭的中年日本人，三年來在涉谷、原宿、新橋、橫濱....多個地方，每天聽不同的人說話，不收費（無料），無特別意圖，就只想提供一個渠道，一支咪給其也人說話，說那想說的，開心、痛心、喜事、白事、心底不敢說的，不能夠說的.....只要你肯說，他就肯聽，無特別分析，亦沒有提供解決方法，總之俗語有云「講左出黎就會舒服好多~~~」

書內記載的真人故事，儘管我覺得可能有一些經過人手強化，但打個七折好未，內裡人物的遭遇，相對我們面對的所謂壓力，真係小巫見大巫，雖然人比人比死人，但生在福中不知福，無病呻吟的朋友們，看罷這本書，可能會改變自己的做人態度！

世上亦需要這樣的一支咪，像從前商台的「無人駕駛」，但對著有血有肉的真人說，總比對著冷冰冰的機器留意來得真實！

「你有無留給空氣的說話.....」

ps：Angela，沒有無人駕駛，但我在聽妳說......

聽見.......便

跑手聽見起步鎗聲便會起跑

泳手聽見horn聲便會跳落水

演員聽見action便開始演出

球員聽見雞聲便知道犯了規

學生聽見老師話見家長便知道出左事

員工聽見上司問「仲有幾耐先俾到我」便會開始騰雞

上司聽見員工話「就黎搞掂」便知道一定有排先搞掂

匪徒聽見警察見「咪走」便會加速

孩子聽見母親說「飲湯啦」便會覺得好煩

母親聽見孩子話「你好煩」便會好心痛

女士聽見sales話「有新貨到！」便會準備奉獻

男士聽見朋友話「好多女，快d黎！」便會早d換衫上床訓

情侶聽見對方說「不如分開下」便會死纏不放

女朋友聽見男朋友話「我地都係埋一齊咁耐....」便知道對方想分手

男朋友聽見女朋友話「我地都係埋一齊咁耐....」便知道對方想結婚

太太聽見丈夫說「夜d番，約左舊同學聚會」便會覺得丈夫有古惑

丈夫聽見太太說「夜d番，約左舊同學聚會」便會覺得應該要爭取時間去古惑

你聽見朋友訴心事便知道今晚有排都無得走

我聽見有人叫老豆便第一時間拔足而逃

你聽見人講事非便會覺得對方親切

我聽見你叫「住口」便繼續講唔肯收手，但我聽見我良心不停責備，便知道我應該Back to work！

SAL ut E

難得早起，心情又ok，開下倉，簡單任務你地實鍾意！

我其實由細到大都唔係阿姐迷，就同其他年少時沒有迷過的大明星一樣，而家我會欣賞，因為可以尊重欣賞的專業明星，已經小之又小！
一個第一次做呢個節目，黎之前已經做晒資料搜集，開咪第二句就串到華倩飛起，然後等我地笑完，輕輕帶句「我知呢個節目個風格！」，第一part完，佢就話「講多d男人野啦，佢（我）唔可以無野講！」
咪後還讓後看到她嬌俏害羞的一面！
salute to 阿姐！
可以同阿姐同場已經難得，更難能可貴是，竟然可以同國際巨星合照，呢個spider girl cute到爆！其實其老父安排佢做d咁野，真係令佢好難堪，但佢好專業咁做完晒！

salute to Spider girl！





同阿JAN唔算相熟，亦都唔知點樣可以同佢熟，其實無諗過要同佢熟，不過每次見到，閒話幾句好舒服， 再講佢亦都唔會出聲，正！
呢排日日番商台都見到佢匿埋係房度野，尋日係cable撞到佢傾開幾句，知道佢因為「低噴飯」好頭痛，有壓力....當然我是理解，第二次搞，今年仲搞左個「軟硬show」，吃力是可以理解的，但當現場看他做節目嘉賓，阿Jan放心啦！你只要輕輕鬆鬆，係咁易都笑到我地標眼淚啦！我知講就易，到自己做就個個都放鬆唔到，你緊張都係因為你專業！

Salute to 阿Jan！





秋天真的來到，但空氣的差，真係令人沮喪

Salute to HK Government！

蘇波榮

我並不是要特別多姿多采的生活，我並不要特別多朋友、情人，我並不要太多工作，搵到錢而工作小，又邊個唔想？！ 小時侯看新紮師兄，劉青雲走佬後，劉嘉玲自己去打壁球，佢話「打壁球唔駛約人，打成點都係自己知....」，一場簡單但會令人看得落淚的場口，一場我記住到而家場口！
我們做野都需要人俾反應，表演完希望得到觀眾拍掌，煮完野食出黎希望有人讚，扮完靚希望你話我靚，做完一作品希望會有人欣賞，dum完你開心希望會見到你笑......dum人開心的人，未必一定是快樂人
『明明是個可憐人 竟 可憐人....』 阿Y「水枰座」
自己拉得太緊，借幫助人時暗中抒懷，你沒有察覺，只是你從來沒有細心留意可憐你的可憐人，又讖者這就是你的感謝方法；如果沉默是一種鼓勵，那請不要在有事發生後開腔，繼續沉默，讓有需要的可以振作起來！
無人想要波榮，係人都想要阿婷，但係又有幾多人個到呢個西婷，仲要係上手（EX）

Tribes

我覺得子華「兒童不宜」最精彩的，是講辦公室那一part，好笑之餘，亦奇怪子華沒有在辦公室工作已那麼久，竟然可以玩得咁刁鑽到肉！當然亦有人認為子華只不過是講了辦公室內的皮毛事，還有更多難以想像的情況沒有披露；無辦法啦，辦公室的人與事，比Twilight Zone內出現的，發生的更加迷離，要全部涉獵到，可能要講十一二年先夠講，事關這些事與人，還會日日更新，加強，快過新款日本時裝，點跟得切！？
我好好彩，可以做一份唔駛點番office工作，不過因工作關係，亦遇過不小辦工室內的奇人，或者咁講，我遇過唔同種族辦公室人！

首先從面色分類，最常見當然是「黑面人」，呢種人通常係你上司，你好似變左部太陽燈機，你老細一見到你，佢塊面就自然變黑，慢慢變黑又得，即刻變黑又得，得左！無論你做得岩定錯，佢塊面都係同古天樂咁黑，但樣衰五十倍！鬼叫佢係你上司咩！咪忍囉！但最唔明係果個明明係你下屬，你叫親佢做野，佢望住你，接觸到紫外光，塊面何止黑過古仔，直頭同摩根費曼兩兄弟一樣，如果唔係懾於荷里活明星艷光之下，你一定會開口問「我係你老細，叫你做野係咪我唔岩？！」其實就算佢唔似費曼你都唔會問，因為佢唔會識答，但塊面就會再黑D，公司d燈暗d就搵佢唔到！

有黑就更係有白，「白面人」通常白中帶青，佢地長期時間都表現到自己好大壓力，做到面青唇白，隨時'砰'一聲就一倒不起，犯錯時加強版的青色會滲透整塊面，「責怪我都無用....一陣我暈埋俾你睇添呀！」
呢個種族好小做到老細級，通常都係跟你但一個月病番左四五日果個手下！



「惶種人」算是咁多種族之中有智慧的一族，口口聲聲「死喇！死喇！點做得切呀！」，面對所有事情，都先扮死狗，驚左先，自然就會有其他「有種人」自告奮勇或者叻唔切話「唔係嘛？！咁都要死？！好易之嘛，等我搞！」，以退為進，集天下兵器於一身，但這種人會唸精學懶，越做越無heart！最多呢種人產區是政府機構、歷史悠久的大公司....至於年份，最前是60至65，但最近發現竟然有83、84出廠亦不相伯仲！SIGH~~

「有種人」上面已提及過，如果不懂及時頓悟，轉到另一個族類，壽命極短！

「借種人」，由於借人種類扮做自己種類的科研仲處於發展階段，好多借種人只借左個殼，裡面乜都無，你點可以怪一個無腦人，佢唔明你講乜係好應該，佢唔記得你講過乜亦都好正常，至於上司講完唔數算，做左又唔認，扮唔知，扮唔見，佢根本無錯，只係科技發展緩慢所至！因為有很多人為左可以同借種人溝通到，自願轉族，裝傻扮黐，加入借種一族，你唔做我就唔做，你做我唔駛做，要我做就扮唔記得，你提我就扮唔識向你請教，兼博你無耐性教，自己羅做埋，如果學識點做就點下個去做！
真借種人你無佢乎，扮果d你無佢偈！

「播種人」，簡單直接，係辦公室就係負責散播各種是是非非，有組織無目的，搞到公司分晒黨派，鬥得你死我活，好睇過金枝欲孽，有些老細鍾意公司分黨派，因為可以借力打力，要改頓時只要發動一場內戰，勝出就証明有能力留低，因此播種人絕對係有價值員工，更何況，唔知咁岩定咁穚，好多時D播種人同老細總係有傳撘上，有時仲真係播左種，咁你話佢對老細幾重要！
切記「得罪播種人，惡果自尋！」

「果精種人」，越來越小這種人了，可以決定果斷，頭腦精明，運籌帷握的員工，大多已到他鄉掘金，還留在這福地的，是「紅種人」，一些未夠班但在無人可用之下，佢好運過你小小，所以做左你上司，實際就你做得多過佢幾倍，但人工小佢幾倍！
「你上司係紅種人，你都幾難唔頭痕！」


「紅種人」，靠運，靠果排鴻福齊天，時來風送騰皇閣，運完就玩完，照計壽命好短，應該影響唔到好耐，但族人人數多呢，真係死左一個紅種人，仲有千千萬萬紅種人，望死晒不如望自己有日變種又為紅種人好過啦！

「賤種人」，一班俗世人無法接受戰士，以身作則，提醒大家不要得意忘形，世途本應如此險惡，弱肉強食，忘了這是生存的必需的話，你被吞噬人理所當然的！


「變種人」亦都是另一種為求生存的轉變，無可厚非，比起「雜種人」，算是易對付，而不可怕了！


「雜種人」，對付騎牆派，無招勝有招，無論自己是那種人，只要你處於優勢，佢就會出現於你身旁，你一唔見佢，就代表你跌，又或者做另一種人更有利益；如果你認同，咁雜種人多D出現絕對係好事丫！反而好耐無見過佢，就要好好撿討下自己！「
見到雜種人，果期就精神！」


「絕種人」，真真正正廢人，無腦，蠢，唔靚，懶...除非佢係敵方公司派來做臥底，否則佢存在是無意義的，但佢廢到咁，可以係公司臥到咩呢？！唔係臥底，唔係皇親國戚，同老細又無撘上....咁點解唔炒左佢呢？！一定係呢種人已經列入瀕臨絕種受保護的名單上，所以一定要養活佢地，炒一個就小一個，香港已經無晒特色建築，如果唔救救呢種特種人，真係天理不容！

唔知仲有漏左邊種，或者又有新變種出現左，辦工室個戰場其實好細，空間細但人種多，註定無得諧和，但如果係汰弱淘強，把最好的給客人，我當然支持辦公空係應該開戰一樣，但現在是廢鬥廢，仲要連累到其他人，包括客人喎。Tell me why？！點解一間公司越大，就越多各種廢人？！

好朋友Cindy話「大公司做得野人唔多，所以先要請咁多人做野！」，這番話不無道理，你睇d大公司可以次次裁員二三百人，裁極都仲可以再裁，你話之前請左幾多廢人丫！

如果你係做得野果種，你一定係做到死，如果你係廢下廢果種，你一定嘆到死！

有能者居之，無能者自知

飲飲食食...好到極

喜歡多工作的日子，因為工作多，就會出去玩更多！「做得金！玩得更金！」








所謂「玩」只不過是一個代號，一個可以促進人生理、心理新陳代謝的行為，一個可以令我們終於無覺得時光虛渡的過程，這過程稱之為「好玩」；打牌、飲酒、唱K、行山、游水、睇書、聽歌、煲劇、潛水、性愛、購物、肆食、釣魚、工作、清潔，維修、旅行、按摩、吸毒、橋牌、過招、下棋、飛車、上網、做gym、訓教........總之你覺得幾悶，只要做某個行為，是會覺得好好玩，這行為就叫做「 玩 」 ，但可惜城市人個個忙到得閒只有一樣東西做，就是「死」，個個都做到得閒死唔得閒病，仲邊有時間做其他野！無可能淨係玩同淨係做（淨係讀），人是由多面體組成，人生不應只得一面，有時真係要「死就死！我要去鬆鬆！」，鬆完返黎，往往有意想不到收獲！
這個星期去了多個生日會，飲左好多，食左好多，回家的時侯，突然有兩秒問自己「passport放左係邊？！」，無辦法，呢個周末真係好似去旅行，「飲飲食食.....好到極、甲乙丙丁.....都岩傾」，有很多啟發，也有不小新構思浮現.....太寫意，我想做「思想家」，齋想唔行動！起碼偷埋今日懶先！
「前路漫漫....有排燦爛！」



「無黎禮貌......亂認母校」
從某相識的blog中發現他將會回到母校舉行婚姻註冊儀式，文中提到重遇一些十多年的舊同學，很有情懷！可能我不是這種人，如果我當你是朋友，我定時定刻一定會找你見面相聚一下，如果過了一段時間沒聯略，就以後都不會再聯略，見到面也很不自然，昔日的感覺已褪色，仍然歷歷在目的，定必是不堪回首的往事，但偏偏見到面要打開溝通之門，就要從往事開始，所以不如不要開始！
但成件事令我思潮起伏是，邊間係我母校？中一至中四，我是在葵盛的 樂善樂顧超文中學就讀，但由於無心向學，中二果年班主任為左力保我唔俾人趕出校，自己辭職，我一直覺得有個人可以自己唔做，就保到另一個人留低，只會發生係差館，但既然發生左係我身上，我昇到上中三係發奮左好多，跟住原校昇上中四，但果年我又故態復萌，終於無人再保我，我終於相信當年老師係真係要唔做，先可以保到我留低！
成績差，操行劣，只可以去讀私校，我係官塘地利亞重讀中四，然後中五！咁前面未完成，唔算母校，後面完成左下半場，即係全場過喎，咁算唔算係我母校？
邊間都好，其實我突然想起某幾位老師，想知他們近況，但我只是想知，不想見，如果你地係呢兩間學校學生，email俾我~~
「現在要找一個人.....是沒有找不到的可能....找不到只是你跟本不想找那人.....」

燙

基本上，所有家務我都認為是厭惡性工作，我係怕到就算有其他人幫我執屋，我都要出街，我聽見吸塵機聲會煩燥不安，我會恐慌書房俾人執到整整齊齊，我會搵唔到野，所以我好怕執屋！不會我一直努力克服，因為間屋唔執，係可以好似「狗咬狗」內，那個垃圾山咁...有人問我，我就會講，但是無人來！我係因為間屋亂，而觸發我上網，才發現世上原來有一個地方同我間屋差唔多恐佈，就是在柬埔寨的垃圾山！嚴重到咁就真係要改變自己去遷就！所以我會身體力行，多D自己執屋，至小執自己間書房丫！但有一樣更厭惡的家務，我真係面對唔到，提起都驚~~~

試想想，世界上有邊個好人好者會定時羅D衫出黎燙，都係諗起要著先會去燙，咁有兩個可能性，A係之前果晚臨訓醒起未燙衫，沖晒涼仲要燙到成身汗，已經好眼訓，又熱又燥，然後諗 著上身轉頭就皺晒啦！燙乜X丫！

相對起，B比A大鑊十倍！臨出門口先諗到著邊件衫，唔著無安全感，但件衫皺過老婆婆塊面，一邊除埋晒D衫褲，一邊身水身汗燙，希望遲十五分到，快手沖多個涼，但越急越慢，然後就責怪自己麻鬼煩，咪又係普通一件恤衫，搞到遲到又辛苦，有好睇左幾多呢？！但係我試過中途放棄，無著想著果件衫出街，成日無晒自信，唔敢望女仔，男仔就更加要垂頭行過，做什麼唔順利，都會歸疚因為無著想著果件衫！所以邊鬧邊都係繼續燙！

A/B情況我都試過，我憎燙衫，但我鍾意著恤衫，我一見到D洗完唔駛燙恤衫，我就開心到見一件買一件，但係有好多靚恤衫，係真係要燙先係件靚恤衫！擁有佢就要供養佢！
但我份人真係好麻煩！自己唔想做，有人肯幫，仲要揀呢個，指定果個，我唔可以俾D恤衫工人燙，唔係怕佢燙爛件衫，係我唔想佢俾第個摸，除左我，仲有一個人可以摸佢！


就是圖片中這個狀似女人黑影人！有人認為咁做好不孝，當黑影人是工人；老人家你唔「駛」下佢，佢覺得你唔緊佢架！你俾小小野佢幫手做，佢一方面可以消磨時間，另一方法身體力行証明自己仲做到！緊要架！只要唔係駛死人果種，D輕可野俾佢地幫下手，係一個好好同老人家親子活動！



佢好似跳舞一樣，手腳靈活快速，要捕觸佢一舉一動，要好集中，當妳集中看著她表演，視線會不其然從個SCREEN移到前面的真人身上，這就是呢個親子活動最動人一刻，同時亦都是不禁神傷的時侯，看著她的汗濕透衣衫，一袋性感油物咁款，呢D SHOW就係睇得一場就小一場！再望過去負責陪呢性感油物黎男保鏢，神態自若，一眼並沒有關七，雙眼都是看著電視，廣告時間就會去撩下七哥傾幾句，永遠唔會干擾她表演，型到爆！


晚上係節目曾小姐講果十樣「珍惜」，其實好老土，不過呢一刻，我一百個巴仙認同！ 在需要珍惜之前就開始珍惜，早一點發掘他們的好處去欣賞！「最心痛是，愛得太遲，有些心意，不可等某個日子」

我服左妳黑影人，件恤衫值幾千銀，都係因為佢個設計係成件衫都係皺！妳可以幫我燙到咁直！呢D表演唔係睇一場小一場！ 跟本無下一場啦！我下次仲俾佢燙？！「最心痛是，說得太遲，有些恤衫，不可亂燙架媽子」

底線

底線要黎做咩？分別場內場外，底線前未必一定得分，底線外卻一定失分;足球有底線、網球有底線、藍球有底線、羽毛球有底線、排球有底線、做人有底線。
現實生活中，我們聽見的底線通常跟女星性感演出有關，「xxx突破性感底線，大膽演出」、「只要劇本有需要，我的性感演出是無底線的」，有底線就即是在框框內，無突破，但過了底線就犯規，點精彩入球都是作廢！所以最精彩演出係「踩界」，過左個框框DD，爭小小就犯規，以為出界又無事，觀眾看得血脈沸騰，這才是精彩難忘的演出！不過我想問，現在大膽演出的底線是什麼？蔡依林在演唱低胸倒掛出場，皮球隨時飛出底線外？還是網上自拍，赤裸真人show，多種花式真人發聲即時旁白，再加賽後簡評呢？定還未過底線，要加埋貓貓狗狗，老鼠蟑螂外星人，先叫做過左底線？性感與色情這條底線已模糊得把兩者二合為一了！

「底線」是每日最多人挑戰的東西，除了以上例子外，感情上，情人總愛測試對方的忍耐底線，你越忍讓後退，佢越踩上黎，係要過界犯規反面先收手，但下次又再出手，永遠希望將你底線推後，永無止境享受這種病態式行為的快感，有些人是因為其佔有慾，一定要馴服對方，所以這種挑戰底線的行為，也會發生在家人與你的身上！

退一步，海闊天空未必可以放諸四海，情人可以忍，忍唔到最多唔要！但工作唔同，可以唔鍾意就劈炮唔撈轉身而離的人，同愛斯基摩族的人數差不多小！偏偏個個上司無理取鬧，每日挑戰你發圍條底線，鬼叫自己無用做你下屬，我忍！將底線再押後！最難忍是大家咁高咁大，但佢係客，無理要求，無理亂吠，你未退得切，佢已經踩到上心口，但大局為重，咬住牙關將條底線拉後，越後情況越嚴峻，更加唔可以發圍反面走！慘羅！從此慘過落水狗，俾人追住打，到時想反抗都已經太遲！

為免太遲，底線同髮線一樣，係未太向後退時，及早將自己條底線拉前，小小事要令對方知過左你底線會發佢圍，並非善男信女，等對方知驚，佢一定暫時收手，但遲d又會伺機再出手，佢再進，你仲有空間退，都咁上下提示對方知道，再唔收手今次發圍會比上次來得更恐佈！咁樣做都仲有機會保住條底線係最佳位置！如果一開始對方已經接受唔到你條底線的位置，及早反面，長痛不如短痛，恭喜你及早脫苦海！


及早知道自己底線的最後位置，不要等有事發生，無得思索時，求其「是但啦！」，將自己條底線無端set後，到你發現時，已經萬劫不復！

廢

春麗是什麼？是街霸中那個既可愛又性感的Fighter.......


還是嘩眾取寵，將騎呢肉酸推至頂峰的潮流COSPLAY打扮中，不可缺小的一個人物造型...



我所講的春麗是一匹日本馬女，1996年於北海道出生，1998年十一月在高知賽馬場首次出場比賽，到2004年8月為止，出賽113次，每次都拚命跑的牠﹐但從來沒有跑第一。

這匹連戰連敗的雌馬「春麗」﹐日文原名是春urara﹐日本人通常覺得是「春爛漫」﹐不同於「快打旋風」電玩裡的春麗（syunrei）或是「聖鬥士星矢」裡的春麗﹐這隻已經八歲的春麗名駒﹐去年為該賽馬場賺進了五億多日圓﹐讓這個原本虧損累累的日本最小賽馬場免於關閉的命運，而且成為日本首次轉虧為盈的地方賽馬場。

春麗屢戰屢敗、屢敗屢戰，依然努力不懈﹐於是，全日本的人都幫牠加油；牠開創了地方賽馬馬票在全國發售的紀錄；排隊等買春麗的彩券要兩個小時；春麗每次出賽，都是馬迷的一個希望，希望見証到牠終有天勝出！今次失望變成下一次的希望！其實明眼人一早已經知道春麗是庸才，但日本人就是有這種奇怪的堅毅精神，你肯繼續努力，就會繼續支持！相反香港人，你睇下今時今日邊個仲支持精英大師，百勝雄師都落得如斯下場，何況是一隻永無機會勝出的馬匹，我支持你條毛咩！

日本人給任何東西也有個定位，只要你夠「盡」，『廢』都可以係一個定位，如果唔係邊有「廢柴同盟」、「稻中兵團」，我認為「軍曹」都係寫班無用傻人！照我咁講係咪只要廢到盡就有轉機？「無錯！」，但你究竟有幾廢？鬥好難，門廢仲難，呢個世界，低處未算低，要做到最廢同做到最好是一樣難！

細個有次失戀，覺得世界末日，我要遭遢自己，令自己沉淪到底，終於五日唔沖涼，日日飲酒，醉得不分天昏地暗，人唔似人，鬼唔似鬼.....我過左半個月呢種日子，終於頂唔順醒覺，唔可以再咁廢人；近十年來我看見友人失戀，沉淪的程度及時間跟我相比，我簡直覺得自己當時無沉淪過，乜原來可以半個月唔出房，三年來未醒過，點睇呢班人都唔似人，又唔似鬼，總之係一堆『廢物』！我估當佢地有日醒覺，是因為遇到一班比他們更廢的人，更廢的又會再遇更廢，點鬥呢？

我總覺得每個人都可以好叻，亦都可以好廢！視乎你有否去岩地方，如果碧咸是在你公司當會計，佢一定係廢中之廢、梁朝偉去做bill gates，微軟廢左九年、相反bill gates去演戲，一定係最廢演員（不過可能佢用電腦執好自己d戲，咁即係電腦特技勁，d戲仲係廢）

周星馳最鍾意寫廢人，但佢所謂的廢人，其實只不過是「英雄無用武之地」 「凌凌漆」的唏噓豬肉佬特務、「凌凌發」的神經發明家、「食神」淪落廟街變嘍囉、「喜戲之王」懷才不遇匿係石澳的演戲天才尹天仇、「少林足球」內各師兄弟虎落平洋、「功夫」內豬籠城寨的臥虎藏龍！每個人總有自己出色的一套武功，只要你肯去苦練，時機未到，找不到可以演出的舞台，唯有繼續苦練，「機會只會給有準備的人」，又或者咁講，你跟本無準備過，個機會黎左你都唔知！
既然做至廢同至叻都咁難，清楚自己定位，莫再不倫不類，做番個平凡普通人算罷啦！