我想一個人

在某人的MSN標題見到這一句，簡單而有趣！我想著一個人，還是我想一個人生活，究竟係咩出發，可能當事人都唔知，又或者仲有其他意思，但無論什麼意思，呢句說話好有想像力，啖火係來自己夏日燃燒著的青春！
SO SEXY！
大家一齊玩個遊戲，仲有冇呢D一句兩意的句子，舉多個例
林憶蓮的 沒結果
想你是我 想你是我麼...

「是我在想你嗎？」、「想你是屬於我！」 還是有其他意思......

B I G

ANGELA給我的，唔知點解連續兩日下午都突然提起「大」，長大係大，變大都係大！THINK BIG係我成日掛住係口邊的兩個字！當日馬偉豪創立「天下電影公司」。B I G~~Billiant Idea Groupe，理念就係「think big」！d老人家成日話「佢都未大定，仲有得變....」 到咁上下就會講「佢大定架喇，無得變！」係咪每個人都會大到咁個位就停止發育，定怕貪心變唔到大，發現自己好茫小！
「think big」係需要知識、見識、視野、精力、恆心，你想變大，你就唔會甘心縮係一個細小空間做山寨皇
電影BIG FISH裡巨人問男主角「我咁巨型，係呢條村係咪好怪？」 「其實唔係你太巨大，只不過係呢度太細，容納唔到你！」

「海納百川，有容乃大！」

15/16

15 狗咬狗APM首影禮


15 首影口碑不俗，恭喜阿瑞！


15 阿田新髮型，則面係好睇，至於正面.....見我相都無幅就知咩料啦！



16 節目後同阿立飲野，傾偈，因為今晚節目講唔夠，我覺得今晚後半PART可以用悶得死人做帛金來形容！我真係要潛 苦練，再遇上同樣情況應該如何處理，令個節目KEEP番住！
我會努力！

拒絕成長

「成長」像坐過山車，過程好似好漫長，但轉眼間發現自己已長大，驚魂甫定，回望去，卻無法憶述過程！營營役役的日子裡，跟本無時間研究自己的成己狀態，但每當有問題要面對，如果你唔夠冷靜，亂發脾氣，問題沒有解決，更會換來一句「你仲係好細路！」 近年我已經鮮有俾人這樣說，別以為是自己長大了，只是人家連講呢句都慳番！
但當另一種情況發生，我就會坐埋一邊check下自己個成長狀態！呢種情況就係身邊一d比我年輕的人結婚，轉頭話埋我知個仔下個月出世！
人生係咪一定要結婚生仔先代表「成長」？從前我常常抱怨「點解我唔可以成世都係小朋友？！」，但現在我常常撫心自問「點解我做小朋友的時間咁長？！」我認同結婚生仔係人生其中一個成長的表現，因為婚姻與養育是一個大難題，肯去面對問題，絕對係成長及成熟的表現！但我現階段認為成長是，當你懂面對每一個問題的同時，心境仍然可以保持年輕！
保持年輕但慈想成熟是另一個好好玩的題目，我而家要得到的是「佢平時係成個大細路咁架！不過一做野就兩個人！」 呢d野講好易，但可以令人講，需要的時間，心機，勞力付出，比後生時去玩更要氣力！但都係果句，唔係難就唔做！
「怔服一個自己恐懼的環境，比轉路離開為之漂亮」 李碧華小姐名言

很多人拒絕成長，如果你一生志願只希望係小朋友階段，你跟本不會意識要面對成長的問題，但大份拒絕成長的人面對的最大問題是，其實係當發現自己無法面對成長而面對的問題，而悲天憫人，仰天長嘆「點解我要做大人，點解我唔可以永遠係小朋友！」
老友，你除左思想外，其他所有都係大人行為啦！拒絕成長其實係大人扮細路，一d都唔cute！仲幾嘔心！試想想唔係小bb ALLS 睇報紙，而係大人拿著支奶飲！如果你咁都覺得cute，你應該好接受到以前d港產片，黃百鳴扮嬰兒係架BB車飲奶的片段！ 真係恭喜晒，咁都頂得住，你仲唔係一個大人，我當時睇完驚左成個星期，驚過睇「閃靈」

別來無恙

見到工作人員貼上這個牌，心裡面不禁叫左出黎「返黎喇！」 兩個月前匆匆一別！沒特別說過什麼
今晚離開時我說 「別來無恙！Good show！」

Matt List

我出海！唔游水，唔wakeboard，唔jetski，唔香蕉船，唔食野，唔飲酒，唔講野，淨係聽音樂同曬太陽！不過每次上到船，D ipod五六部咁飛出黎，十足警匪片，d賊行動前交晒d電話出黎一樣！有i-pod唔代表 d歌好聽，但係d歌唔好聽又唔代表你可以即刻戴起head-phone聽自己部-IPOD，因為咁樣除左唔俾面人，仲會影響我跟住想做o既野！

捱左兩個鐘頭「喜喜」同「voler」d音樂，我終於頂唔住！我.......訓左！
醒番時侯，見半數人都訓左，其他d落左水！咁靚音響，咁好天氣，無理由唔聽「MATT LIST」啦！ 一駁我部i-pod落去，d人坐晒起身，不停話好「舒服」呀！好「relax」！
當時係下午五點左右，陽光開始收火，我果set 歌係咁樣
Pablo's Cruise by The Avalanches
Perfidia by Xavier Cugat
2046 Main Theme（rumba version） by Shigeru Umebayashi
下世紀再嬉戲 黃耀明
Cucurruccu Paloma by Caetano Veloso
Jazz Suit NO2-iv Waltz by Mariss Jansons
Love Letters by KETTY Lester
The Blower's Daughter by Damien Rice
A Love That Will Nerver Grow Old by Emmylou Harris

大家終於由睡眼惺忪變成陶醉，開始望住個海思潮起伏，唔明或者唔信，自己搵d歌黎聽下就知我講乜！叫得Matt List，又點會得一種選擇丫！日落西山，係時侯起圍！

aletheuo（truthspeaking）featuring angelina esparza by DJ krush
I Love New York by Madonna
Voodoo Voyage by buscemi
Starry Eyed Surprise by Paul Oakenfold
Boby Movin' by Beastie Boys
Sunset Beach by Dragon Ash （賣飛佛）
Zagadka by bukowski
Til Death Comes by Cypress Hill
sunset（bird of prey） Fat boys SLIM
都扮到兩成IBIZA，七成蘇梅架！我中學時期開始，就鐘意製造自己的song list，果時一盒九十分鐘「錄音帶」，要錄滿歌除時要兩三個月，又要租，又要借 ，有時要帶過帶，仲要班多部機！其實三個月錄得滿都算我有運同勤力！不過毅力好多時來自其他動力！當我只靠呢種方法追女同學，我就自然會好勤力咁錄呀錄！仲會加埋封信，內容仲要配合d歌，例如錄了達明一派的「半生緣」給女同學，信上面就寫著「張愛玲的半生緣是苦的，達明的也是，希望我跟妳最後是甜的！」 我而家諗番，如果我係女仔睇到呢封信，只會得一個反應「X家富貴......」都未講完就掩嘴都掩唔切，嘔到一圍都係！如果你覺得肉麻，因為你唔信我係真心！的而且確我係太假，咁樣會傷害到人，但我無悔用呢個方法追過女同學，因為從來都未成功過！
早排撞番個以前追過的中學同學，家下變左C9了，閒聊一會，佢以為我做電台係做唱片騎師（sorry！佢真係用呢個term！）「岩晒你做啦，你以前咁鐘意排晒位錄歌，又講埋d....」跟住佢流露出一個少女含羞笑容，好惡頂！但多謝妳令我肯定我個「Matt List」係由始至終都咁有水準，咁touch到人！不過下次真係唔好咁樣笑！
對住日落起圍，係人生一大樂事！但越快樂，就會越容易唔快樂！套幾皮野的音響over heat！全架船靜晒，之前借d意駛近的其他船起坨走人！咁點呀？！人生就係咁，發現果樣野係「寶」，通常果樣野都已經到「末期」，想珍惜佢已經同你講拜拜，好多野真係要先知先覺，唔覺唔覺，要果時就好難撲！
個日落靚到咁，無音樂真係好慘，既然我明箇中痛苦，我唔想其他朋友受呢d苦，我犧牲自己唔聽之餘，仲因應朋友需要，即場為佢地製造song list！聽到訓著，就到下一個！


都唔駛半個鐘，全部訓晒，一定唔關我個song list事，係佢地玩得太疲！過多十幾二十年之後，佢地就會講番今日全靠我個list！

咬

對我黎講，今日係寫意的周末！由第一餐開始講起......
我開始懷疑，如果我有一日唔食過「薯仔」，係咪會變左做「薯仔」，香港的jacket potato無英國果d咁heavy！原因來自己其size、餡料全比英倫的細及小！但係我雖然係一個薯仔狂，但都無理由次次要食就撘飛機過倫敦食架，加上家下倫敦又咁亂，真係有錢都唔好過去住！
我鐘意食「蛋沙律焗薯」，其實我鐘意乜都加落個薯仔到，不過呢d只限係屋企自己整時做，但我諗我十年都唔會有一次係屋企整，所以每當出面有新選擇，我就一定會第一時間試下！
呢個餐其實就係多碗「栗米」，但加埋落d蛋沙律到，多左個唔同「咬口」感覺，個味道又甜左，好好食！
好羅！以後可以多個選擇！
我鐘意係呢類型的咖啡店到hae，呢類型包括「pacific coffe」、「starbucks」、「Delifrance」，因為夠平民，你坐半個鐘意，已經可以見到不同故事！「一家大細買一杯野飲嘆冷氣樂也融融」、「少情侶經濟式約會地方」、「相戀多年戀人hae時間各有各睇書總之唔會傾偈」、「自閉青年聽IPOD傻笑」、「失戀售貨員飲黑啡紅唇煲煙唏噓到熱淚盈眶」「成班ABC熱褲小背心wake完係度等去睇戲」
仲有好多好多，一個人一個故事，兩個人至小三個故事，等何咁上！去得多，就可以見得多，見黎為乜？！當然幫助到創作，但當你見多d，知多d故事，明白得d其他人，就會明白多d自己，明白多d人生！
如果你未夠十八歲，你無得睇「狗咬狗」，因為佢係三級，如果你而家有得睇，即係睇翻版！恭喜你！你成為另一位快速消減港產片的幸運兒！
鄭導演好尊重我，不但叫埋我上去個觀後研討會，仲一次又一次多謝我！其實應該我多謝你，你令我個劇本昇華左好多！同理做左咁多年編劇同電影，真係有d乏味！但今日播影後，八成觀眾留低，係為左睇edison，阿sam又好，為左睇我同導演都好內 感謝大家令我有番從前做電影的感覺！每次有戲上畫，前前後後都欲有很多談論、觀後交流，還有觀眾的反應，你地係屋企睇戲，我又點知你地睇時咩反應呢！我其實唔係覺得做電影乏味，只不過之前兩年做過d野對得佢地唔好！而家愧再面對，最佳修補方法就只有以後對佢要好過以前，用行動去感動佢，佢感動，其他人亦都會感動！
狗咬狗係一部好heavy的電影，佢其實唔係商業動作警匪片，如果你係電影迷，你會知道有d戲「一係好鐘意，一係好憎！」 呢部戲就係呢種類！ 今日係討論會上，我講左原本要拍，但因時間問題而取消的「結局」出黎，希望成年的老友，有時間去捧下場，之後我可以講番個原本ending俾大家比較一下，多人睇就係呢度寫出黎！
離開後等朋友食飯，係海？四圍行，俾我係一個互動電子遊戲示範單位碰到佢地！
一對好可愛的twins，睇住佢地姊妹情深，合力過版，好認真但好純真，我企係度左十幾分鐘，寧願犧牲佢探相熟女sales的時間，因為佢地真係好鬼吸引，一個人有一個故事，一對孖女可能係同一個故事分裂出黎！「爆裂孖妹」 正！
食埋我心愛的「樓上樓」，返到屋企都係十點幾，回程時收到好多電話叫我出去玩，「NO喇！今日好開心，唔出黎玩喇！」 唔明都唔解釋喇，有d野你係明就明，唔明就點解釋都唔明！

Do Ya think i SEXY

什麼是「性感」？有人認為大胸就是「性感」，有人認為暴露就是「性感」，有人認為一臉茫然就是「性感」.... 唔同人有唔同答案。我曾經認為擁有「長腿」就是性感，不過好快就否定左自己，就等如擁有大胸最多只是身材性感，暴露最多只是打扮性感，其實只不過係「肉感」！一臉茫然只是你覺得佢易呃，自製的「性幻想」而已！咁可以令你有無限瑕想的東西，絕對可以受得起性感呢個稱號！但對長腿的幻想，都是長長軌道後的神秘關口，但在我而言，其實那個關口仲有幾神秘？而我認同「性感」同「神秘」係掛勾，所以長腿已不性感，因為毫不神秘！

神秘的東西會引發人的想像力，性感的東西會製造出激素，激素會刺激大腦，令想像力更豐富，咁你話「神秘」+「性感」，係咪不得了！

我認為工作狂的女性最性感，因為我會幻想在這個遇神殺神的兇惡外表內，每天當她卸下戰鬥裝甲，再不用力敵八方，佢會抱住隻cute到爆的熊bearbear（呢個形容真係令人打尿震）含笑而睡！呢個可能唔係真相，但亦都可能有過之而無不及！係呢個反反覆覆想像的過程，已可以令我熱血沸騰！唔好話我咸濕，因為我係！但妳地望住個男人好專心工作時，個樣咪一樣咁咸濕！不過妳地會形容專心工作的男人係「CHARM」，而我就用「SEXY」，形容詞的分別而已，意思咪一樣！當然「夠專業」係好CHARM，係好SEXY，所以球員、運動員、空姐、售貨員、警察、消防員等等專業人仕可以迷到萬千眾生！仲要加埋件制服！係咪諗起都呼吸加速！咁點解制服咁性感，都係因為制服內裡的神秘真身！

既然神秘咁重要！點解舒琪仲可以咁性感，由出道第一日，佢身體已經完全無神秘感，但到現在我每一次見到佢，都仲會目定口呆，心跳加速！其實舒小姐都可算係醜樣，但越覺佢醜樣就越覺佢性感！究竟佢D性感係來自什麼呢？有人話舒小姐的性感來自其「嘴唇」，我覺得係來自佢的經歷，一個台南鄉下妹，以身體作為娛樂圈入場卷，係八九十年代，這類台灣肉彈，一日黎八個都唔止，但可以變成而家國際巨星，呢個進階已經夠性感，到現在我都未覺得佢D演技開竅，仲係打緊天才波，感情何其豐富，同佢經歷多當然有關，再加上佢果份打不死的博鬥精神，看似垂手可得的，原來與我距離頗遠，製造出一種奇怪的慾望，被佢神秘的魔力吸引住！

好多人話黎明兜兜轉轉，都係搵番一個似舒淇的人樂基兒，但我認為樂基兒是溫室名種玫瑰，而舒淇則是不怕風吹雨打的牽牛花，我比較市井，我仍然係鐘意舒淇多好D！

最近我覺得有線主播史澤雅好性感，又係鼻大口大，講真都幾醜樣，但呢個樣+其聲線+佢個名，我又對佢唔係咁認識，+神秘感，佢就變得好性感！

不過俾你揀，妳寧願得到「妳好靚呀！」定是「妳係唔靚，不過妳性感喎！」定還是「妳好醜樣，但係妳真係好性感！」

至於我，我梗係想你話我「你一D都唔性感，但好感性！」哈哈！「係呀！我真係覺得自己好神秘！」

都不見了

無意中找到這條片http://www.youtube.com/watch?v=OOmwDkTl0wI，大家睇完先睇落去！

九七年元旦的下午，沒特別節目，電視將會直播大球場舉行的「叱吒領獎禮」，在等侯的過程中，我收到一個電話 「happy new year matt！」 「happy new year.....妳係？」 「你唔認得我把聲呀？！Sammi呀！」 我當然認得，不過我唔係好相信鄭秀文會打俾一個小編劇講「新年快樂」，或者因為當時佢都未算紅，一切剛起步，但係我依然唔係好信！我記得當時我有十七秒諗過係咪「整古電話」，發現唔係之後，大家寒喧左幾句，「叱吒見！」 「你黎睇叱吒咩？」 「我係電視睇...睇妳羅獎..」
終於鄭秀文第一次羅「叱吒我最喜歡女歌手」，我係電視機旁邊，振臂低聲「Yeah！」了一聲，我知果年佢一定羅，天時地利人和！唔係妳仲會係邊個！
十年後睇番呢條片，Sammi繃緊的面容，既緊張又充滿未能接受的喜悅，簡單傳統的致謝詞中，Sammi笑容慢慢滲透出來了，「係妳呀！」 之後輝虹問到論嫁談婚問題，Sammi面上流露出少女的可愛與靦腆，這一切....
都不見了
當你走到另一個階段，舊的就會變成歷史，歷史會重演，但發生在另一個人身上；楊千嬅羅「叱吒我最喜歡女歌手」果年，我又係好有信心，因為情況同鄭秀文一樣，又係電影、CD同時大賣，唔係妳仲會係邊個！所以個人歷史只可以重溫！可能而家已無法接受，又或者依然回味，就算你決心忘記，發生過就係發生過，歷史無得改寫！過去就是過去，你無珍惜過，過左就追唔番！
我一直懷念呢個時間的鄭秀文，因為我以為現在的她不快樂！但舊年電台做「長恨歌」訪問，我發現Sammi本質上一點也沒有改變，只是成熟了，謹慎了，從前要出黎打生打死爭野，現在無論是磨劍多時，準備再戰江湖，還是已經與世無爭，姿態、地位都比從前超然出眾，再無需要凡事必答，你覺得佢串，我覺得慶幸，香港有藝芝同霆鋒已經夠晒娛樂新聞！
我希望sammi繼續串，繼續黑面，繼續遠離群眾！一顆「星」應該係同我地咁有距離！現在的藝人，太近但更鼽你們「無性格」！