11.02.2006

仲有邊度痕




搵個情人難,搵個「祖利亞」仲難,搵個好員工好難,搵個會做得己「祖利亞」更難!以前大家都會叫saloon內的junior做「洗頭仔」、「dog仔」,我一直叫佢地做「祖利亞」
呢個譯音係來自好多年前有套電視劇叫做「飛越十八層」,裡面主角鬧人就會話「祖祖你呀?!」簡直係樂而不淫,簡單又有力,用幾重語氣講,都唔傷身,但入肉!

對住junior,有時真係唔講句「祖你呀!」唔得!

基本上祖利亞最主要的工作得一項,就係「洗頭」,我認為一次愉快而享受的洗頭過程應該是,我躺在洗頭椅上,閉眼養神,適當的水溫及按摩技術,讓我獲得十五分鐘的安逸!可惜大部份的祖利亞,總會在你想休息時問「D水溫岩唔岩呀?」,你答與不答,佢都會過多一陣又講「我而家幫你洗一次頭先.....」 我曾經唔好老脾反問「你不如唔係幫我洗一次先講我知啦!」 但咁做仲蝕,佢會不辭勞苦追問「先生,你想洗多次....?」
我仲邊敢再答嘴丫!跟住就係主菜對白「你有邊度痕?」 就算我答「無!」,過一陣佢又會問「仲有邊度痕?」 電影「同君蜜友」內,梁朝偉被個祖利亞不停問「仲有邊度痕?」 偉仔忍唔住答「仲有屎忽痕!」我每次睇都覺得大化人心,我亦都試過咁答d祖利亞,點知佢竟然仲笑,我感覺到佢張開口,口水花如甘露般墮到我面上,我想過即刻彈起身,但咁做會成身濕晒,於是我唯有選擇d水花是來自水喉....

仲未完....跟住「我幫你落d護髮素」,祖利亞其實係問緊我d頭髮,所以我可以唔回答,但跟住佢會再問「同你按摩你介唔介意?」 佢問我條頸,咁我條頸咪郁下當答左佢,「按摩額頭同頸你介唔介意」
我唔想 去剪頭髮會惹上仰鬱燥狂,所以仍然講笑「最好踩埋背丫!」,跟住水花在降落面上,好正!

唔好以為我淨係識投訴,我其實每一次洗頭前,都會講得好清楚「個頭岩岩洗完,唔痕,有問題我會出聲,我想訓!」 但講完仍然會被「d水溫岩唔岩.....」同埋仲會加影「噢...sorry,整醒左你....」
成日同自己講,如果佢地夠醒,就唔係「祖利亞」,係「仕歹辣匙」啦!所以係應該忍?其實遇到水準低的祖利亞是應該的,能夠遇到個超水準的,不說話,洗頭、按摩技術一流,細心,冷氣不能閂細,就多加一條毛巾在你身上,洗完頭會把瓷盆內的番泡沖走,免得安發出刺耳的仆仆聲,我可盡情享受,只擔心訓著發出鼻鼾聲擾騷到其他人,起身時,發現她是位青春性感,樣子甜味,打扮入時的祖利亞,遇到這種世界級的祖利亞,比中三TT更難,好彩我都中過,平時一個月剪一次碼髮,我為左呢個祖利亞,九日就去剪一次,因為我唔多d去享受,好快就會無,祖利亞係世界上,除左賣淫外,員工流失得最快地方,捱三四年祖利亞先可以做仕歹辣匙,到時隻手都洗到爛,三四年時對年青人黎講,係終身監禁,黎賺左個Drag Lock頭就走架喇!有d就俾artist睇中,轉去做佢地助手。

聽過這樣的一個笑話,某藝人的助手從前是祖利亞,助手經常犯上大意的錯失,藝人每次都問佢「你有邊度痕呀?等我「?」下你丫!」

做咩助手丫,如果仲係做祖利亞,已經昇左做仕歹辣匙啦!

12 comments:

呀一 said...

哈~ 最唔中意過d係咁同你講野過d..
好似係度查家世咁... = =""

scarred v said...

除咗祖利亞,仲有油站、7仔、OK、屈臣氏、萬寧等等嗰啲所謂服務性行業嘅阿姐,全部都係公司唔知邊派training program倒模的訓練出來。
唔理顧客買與否,都要講晒啲指定對白。
擺明要測試顧客啲EQ。

candy said...

hahaha睇完笑死左~~~~

qt芝士 said...

曾經遇到一個好細心的祖利亞, 每個洗頭步驟都好有心機。

後來, 髮型師跳糟, 我也跟著髮型師走。
兩年了, 每次理髮, 都會想起那個祖利亞。

sugar19sugar said...

剛見證左位祖利亞昇左做仕歹辣匙.....好戥佢開心~~~~

粉絲 said...

好發人心省的一篇.....

賀少 said...

祖利亞....一句祖利亞
可以發洩情緒之餘,又唔會太失大體
而且仲係人地英名拼音黎...絕!!
講起洗頭,成日都問我邊到痕
大佬呀,訓係到,個頭又微微向下跌
你要我開口講野,就好似比人拉緊塊面
把口仲要格硬郁一樣!!!
有d人好受得太陽穴按摩,我就次次都唔要
因為我覺得好頭暈!!
有時個場爆人,髮型師又未得閒
成日叫個祖利亞洗多幾次水
雖然我聽唔到呢個order
但佢番洗1-2次,已經知咩事!!
洗到我興興地,我就一句頂落去"洗夠未呀,我有少少頭痛呀"
佢先好心抹乾頭比我坐,我完全唔介意要等囉,但你係咁洗,洗到個頭都暈埋!
妹妹仔祖利亞?我成日都見到d女仔個頭爆哂 金哂 飛起哂 成個TB咁,次次都係咁
完全無d溫柔少少既女仔幫我洗!
或者可能溫柔既女仔,都唔做洗頭妹!
我成日都希望.有個女仔長長頭髮
而且又紮條小馬尾,跟住穿著圍裙
輕拍床位叫我洗頭....全是幻想
講起行去床位洗頭,我好討厭佢地手指指.成日指住個盤,好似叫狗仔去小便咁...
有時又卒下隻眼.心諗有眼屎點算...
喂喂喂,我唔明咩叫做仕歹辣匙???
style??

Christie said...

有次去剪頭髮﹐ 位祖利亞係男仔。
我第一次俾男仔洗。
洗洗下﹐ 佢用手由下到上“劣”我條頸背。
其實平時D女仔祖利亞都會咁做﹐
好“行”咁幫你按摩下條頸﹐
但係果下都係忍唔住打左個突﹐
心諗﹐ 你做咩摸我條頸啊﹖
係唔係我個人特別老土呢﹖
定還是大家都會覺得﹐
始終男女都係授受不親﹖

belle said...

而家仲慘,掂一掂你個頭,驚死整髒自己隻手

栗子 said...

我通常都係點下頭~ 唔 咁~~
之後個祖利亞 多數都唔會理我 ~~
由我閉眼養神 ~~

Anonymous said...

小子"
我仲慘 " 因為身型矮小 "
洗頭果時成日叫我訓高d"
真係好無奈囉"點高d呀"
我係咁高就係咁嫁na ~
你睇唔到嫁咩!我以經訓到最高嫁na ~

kay said...

你寫得好好笑呀...
最憎d祖利亞問三問四...洗緊頭d水係咁沖緊耳朵..好難聽得清楚佢問咩講咩...
有次洗洗下頭個祖利亞問我:你係邊間剪?
(心諗係你度洗埋頭唔係你度剪去邊度剪?)
我就話:咪呢間lor~
祖利亞:下?即係邊間呀?
我就興興地話:你呢間呀!xx salon呀!
之後佢就冇再出聲,直至洗完頭佢再問多次:唔好玩啦啦!你即係讀邊間學校je?

我個刻先知原來佢係問我係邊間"讀"唔係問我係邊間"剪"...真係吹脹....=="