3.22.2007

G & T




你今日MSN的標題是什麼?


《邊個要鄭秀雯演唱會最後一日四張飛》
《能夠講出情人的好處是IQ題,因為你,我的IQ突然飆升了》
《雖然妳在尖嘴的酒吧演出,但我今晚繼續會捧妳場》
《工作停止的那日,就是我死亡那天,也是我享福的時侯》
《要等一星期先可以再睇PRISON BREAK,我忍唔住上左YOUTUBE》
《我不是無野做,只是不想去做》
《lOOKING 4 NOKIA N65,快D快D...》
《如果跟住無左我消息,唔駛驚,我只是死左》
《身處劣勢,如何不攻心計》
《同老細食LUNCH,淨係得雲吞》
《春風無力百花殘》
《地球有病》
《突然迷失》
《我要找個戰狼300咁大隻的男友》
《死亡只是生命,不是關係》
《點解惠氏廣告個BB咁得意》
《幾時我地都會撐妳,XX貓》
《606 & 610~~生活靜靜似是湖水,全因妳泛起生氣》
《睇番碟,我好後悔無去睇MADONNA》
《我唔要做叻人,做好運的人就夠了》
《食得是福,總好過熊貓要食竹》
《咳咳咳》
《有冇人識人請殺手?》
《我俾心機讀書,其實是不想出黎做野》
《何時可以放得低李》
《以後唔做收錢果個》
《低能兒童,快樂無窮~~要怪就怪自己太正常,所以要繼續做》
《唔食多D又無力,食得飽就眼訓》
《明天最後的考試,緊張的情緒很複雜》
《不幸是,過了這麼久,我依然記得你生日的日子~~生日快樂》
《女人要做極品》
《想你》
《以後都不會在MSN上說真話》
《聽日開始著靚D,因為有人放大假》
《我知道佢幾時會鑽了,就是我要訓覺時》

再寫可以有一萬個例,萬變不離其中,簡單可以分為幾類:

A:情情塔塔類~~甜蜜EG:《有人說「講出情人的好處是IQ題」,因為你,我的IQ突然飆升了》
苦澀EG:《不幸是,過了這麼久,我依然記得你生日日子~~生日快樂》
訴苦EG:《何時可以放得低李》
好DRY EG::《我要找個戰狼300咁大隻的男友》

B:壓力類~~ 工作EG:《工作停止的那日,就是我死亡那天,也是我享福的時侯》
求學EG:《明天最後的考試,緊張的情緒很複雜》

C:暗示類~~ 工作EG:《如果跟住無左我消息,唔駛驚,我只是死左》
愛情EG:《今日食唔到熱野... :{ 》 《忘記了收花的感覺》

D:隨想類~~ 無意識EG: 《樹好綠,花好紅,風好涼,人好疲》,《好耐無去旅行》
又或者引詩句或用歌詞,慳水慳力

創意類EG: 《食得是福,總好過熊貓要食竹》


我很小有標題,一來朝朝已經要為節目諗SOUND BITE,唔想再用力,二來可能因為我好小有標題,所以好易引來其他人強烈反應,因此可免則免了,如果不是「血鑽」那麼嚴重!我都唔會出手!

看見友人間的標題,大抵可以知道他們近況,很多人ONLINE,其實不是要人傾談,只是想一大班人陪住自己!

順便我想回應電影「門徒」的講法,大部份人空虛是不會吸毒,只會上MSN!


因此幾時開聲,幾時沉默支持,好多時就要從個「標題」反影,我有時會起個標題回應或支持某人的標題,例如朋友失戀,在標題上寫著《我還是無法接受失去了的時景人,苦!》,我的標題回應是《 人生的快樂,是來自擁有得小》

但此題一出,又個個問我咩事,唉~`~~

在我的LIST上面,有一個人其實我到現在都記唔起,幾時,點解會ADD左佢,怎至我是完全唔知佢是誰,咁點解我仍然一直無BLOCK同DELETE佢呢?就是因為他的標題!

某年某月某個下午,馬偉豪跟我說,下次搬屋時,會把一部份書不要;他是書迷,書應該是他的骨肉,怎可以分離? 「都存放晒係個腦,留多點空間給其他新東西吧」

我回到家,很想找些東西不要,我發現自己最捨得不要的,是電話內,很多很多人與號碼,由於還未夠喉,我開始從MSN上面個LIST著手, CLICK 「BLOCK & DELETE 」,是何等快感!
然後,我望了LIST上面的「佢」一眼,毫無頭緒是誰,欲BLOCK & DELETE之際,我被他的標題吸引,住了手!




《活得不好,都只因時間太多》

當時我對手已不受控打了四個字『發人心醒』,但又不想因此與這個陌生人拉近關係,於是我把這四個字放了在標題上,亦因此沒有BLOCK & DELETE 佢!

從此,他就變成我的精神食糧,他一轉新標題,就如每期揭開MILK最後一版,看阿Y的文章一樣緊張,興奮,如果他良久沒有轉標題,我會由期待變成擔心,更加會在自己的標題上留下 『ARE YOU OK?』,當然又會惹所有人問那個YOU是誰?「唔知呢!」 我真係唔知!


其實對方可能一早DELTE左我,只不過唔記得左BLOCK,但所謂,我依然是佢Hardcore Fans, 最近他終於有新標題了


《我們都被寵壞了》


又一句「bingo」,中得入心入肺的說話;自從番了晨早後,朋友,家人不時慰問,擔心我適應唔到,壓力太大,又開始精神錯亂,擔心我無晒夜生活,創作會dry,又繼續精神錯亂~`~`
多謝關心,我是有精神錯亂,但不是因為調到早上,其實做人最辛苦係無工番,日日要諗做乜,肯定痛苦過任何創作!快樂是來自不快樂,享受是來自痛苦,我有壓力,是因為我有減壓方法,我快樂地享受,因為當中的苦與不快,有得就有失,有因就有果..

寵壞你的人,是因為想給予你比其他人更多的愛,你越橫蠻無理,對方就會給你更多,對方付出愛,你接收後,代價是變成了沒頭腦的刁蠻廢人!付出,接受,一切都是供與求

於是我在標題上留了「G & T」,幾日之後,他的標題竟然是「GIVE & TAKE or Girls Talk?」

突然間,我有一絲興奮,原來這個人亦一直同我有link up,但半秒過後,我有點不安!原來你以為同某人是保持距離,當發現大家原來這麼近,不感到浪漫,反而有點心寒~~

猶如無人敢碰秘密現在被揭曉~~

幾日後,他見我的標題不見了,他在標題上留了《.........》,然後我依然無回應,他的標題最後空白一片,我也在那個晚上把他「BLOCK & DELETE」


他付出了主動,希望同我拉近距離,我卻沒回應,是不是代表,付出不一定有收成?「GIVE & TAKE」是經典一對,永不分離,他付出了就會有收成,只可惜這一回得到的是「失望」,但總不會空手而回,但下次可能得到的是「喜出望外」

你永遠唔付出,就永遠無野得到!

我今天的標題是 《付出G & T,得到B & D ?》

15 comments:

Anonymous said...

看完之後好開心唷!

Anonymous said...

你好奇怪, 每次有人想同你拉近距離, 你就自動退後500m,甚至離場, 你真係變態偷窺狂or係嚴重自閉?

Anonymous said...

你真的被寵壞了.!
你的標題是..《又期待又怕受傷害》

Anonymous said...

又近又遠, 又ling又放,唔明 .\/.
吸引既標題無罪, 捉動左你個心靈有罪.

Anonymous said...

你永遠唔付出,就唔會有期望,冇期望,就唔會有失望!

Anonymous said...

越想同你拉近距離,你就反選擇逃‧‧‧
咁係咪代表越同你保持距離,你就會越好奇,然而主動接近?!






開頭感覺好似好有挑戰性,但最終得到你所想,所有野就會自然地消逝~ 係唔係咁?!

Anonymous said...

海灘﹐你係咪一個好無安全感嘅人?
或者你曾有不愉快經歷?
雖然我唔係成日MSN﹐但我覺得你的個案好有趣、特別。
我諗我都會留意朋友的MSN標題﹐只想從那裡知道他們的近況﹐又不主動聯絡。
但未至於那個人在MSN標題回你時﹐你驚到咁!
佢又唔係企喺你門口﹐佢ed你時﹐你可以唔睬佢o架?

Anonymous said...

保持距離......多一點空間......多好 !

Anonymous said...

灘叔..
其實msn係可以知道你仲o係唔o係對方個list度...唔使估估下人地有無delete你...

Anonymous said...

哈哈哈,我個佬聽到我勁笑問我做咩,我翻譯佢知我睇緊你個卜同埋話佢知你玩B&D,佢話你所做o既係"block stalker"唔係完全錯,因為就算add左人都唔係一定要永遠keep架喎..哈哈,真攪野!

有時我d朋友個標題都幾無聊,咁我都係..不過,個d日日轉標題o既人都可能係要get attention,同埋有時係比自己睇多過比人架 :p

Anonymous said...

唔知點解... 灘叔原諒我咁講 ...
我覺得o個個人有點兒可憐同無辜 ...
佢行出1步 ...
你向後走番10幾步 ...
仲要立即建起bom牆 ,, 驚佢再行近你 ...

Anonymous said...

oh ... um ... it is unfair wor ~ You can give respond to his/her title, but why he/she can't give u any reply or respond ? maybe the distance that you wanna keep is hard to measure ....

teresa said...

我唸你係享受在暗处旁观人的乐趣,
anyway,保持距离很多时候与安全感
无关,可能只是习惯.也未必不是好事~

Anonymous said...

我就是不小心走前一步, 結果, 失落幾個月...

Anonymous said...

《付出G & T,得到B & D ?》
他得到的...應該不只是B&D吧~﹗至少..你用了多少時間來寫底了對他的感覺..若果那個“他”或“她”看到了這篇POST..必定會比標題對話更開心了吧...~!