2.01.2010

別興奮得太早



有朋友話睇完我的「波可以咁睇」,覺得我唔多enjoy伯明翰睇波之旅」,其實真相是「因為想快d俾到相大家睇,所以無原文把故事奉上」,成件事其實係咁

的而且確呢次咁特別難得o既睇波經驗,我並唔係特別興奮,個原因係我之前太興奮,用晒d力!

距離開波前七個小時,亦都即是英國時間早上八點鐘,亦等如香港時下午三點,就算平時疲,下午三點都一定起床啦,所以我係英國七點唔夠就醒左,係可以理解的,而難得咁早醒,不如落酒店餐廳食個英式自助早餐更加是理所當然,這一切的必然,就開始左我《過早興奮之旅》






大家想知我當時有幾興奮嗎?係興奮到底褲都飛理出黎,肥腰都要撲埋出黎睇,仲興奮到唔記得叫高治企起身同我影,睇下佢高我幾多,但係晨早可以咁興奮,我都好多年無試過,但原來呢個世界就係咁,凡事一不離二.....




由於要尊重下午個場合,我需要係咁易都打番條呔,但小弟其實from 5果年之後,都無再打過呔,平時打呔通常都係演出上,都總會有專人幫我打好,但今次要自己打,十二點半要出發,我十點三已經開始打,打左兩個幾鐘都覺得似條「吊頸繩」,最後自己呃自己話有條頸巾遮住唔多覺就出發,但入到lift照鏡覺得如果我望見鏡中人果條呔,唔講出口但心裡面都會好自然講句「你不如打個死結好過啦!」,就係因為呢句說話,我又走返上房,上埋網打埋電話問我個妹「如何打好一條呔」,經過十五分鐘搏鬥,我知道我再離唔出發,我不但是一個「唔識打呔的死蠢」,更加是一個「遲大到唔尊重場合仲要唔識打呔o既死蠢」,通常為聲譽而戰,都會得到意想不到的回報

我趕入LIFT見到個西人,我心裡不其然說了一聲,「呢個西人咁似細一個版o既羅比堅尼... 」已經開口問「Robin?ARE U Robin Keane?」然後雞仔聲+愛爾蘭口聲「YES!「Can I have A PICTURE with U?」「Sure!HERE?!」雖然我知佢唔係搞GAG,不過我都係咁笑,試想想如果我答「yes!」,然後下一個畫面就係LIFT門打開,見到我同羅比堅尼自拍,呢個畫面唔笑死!


同羅比堅尼影相都未係至興奮,可以發現原來我係高過佢,先係最興奮!不過可能當時我太興奮,先會變高大左!哈哈!

興奮事一不離二,二不離三

我其實之後仲見到迪科爾,贊拿斯,領隊列納,但對我黎講,點都唔夠見到佢咁興奮




「HI NIKO!」
我一直覺得卡蘭積卡好有型!雖然果日無剃鬚,仲戴帽,又後備無得出場,但你係我心裡面,係永遠不變架!

一早就三次興奮,到下午見到KATE MOSS都無反應啦,所以咪會俾朋友睇得出伯翰睇波事件,我唔多興奮羅,都怪自己興奮得太早,不過這個錯,我不但在伯明翰發生,去到倫敦我依然是死性不改



不顧一切,在最後一秒終於班到波飛入場,果種興奮,是來自己只會在旅行才有的任性,一生可以有幾多次,所以竟然興奮到學人帶住阿仙奴球迷心情入場去睇波









開賽不久仲以為有機會可以隊lum曼聯,但其實一切都係因為自己興奮得太早

我反曼,但不得不承認,曼聯強起上黎,真係無堅不催,但要我用咁大代價去見証對方如對把手蹂躝,實在太殘忍了!所以《曼聯》,我好Q憎你!!

15 comments:

Sang said...

灘叔!
我係史高b,都估到你點都撲落倫敦睇埋呢場。話時話,繼上次睇侯城之後,你兩次入酋長球場阿仙奴都主場輸波。

Alexandra Ho said...

嘩嘩 ! 超正 !

你帶我們好像去了現場一樣, 真正 !
照片影得很好, 特別是第一張, 及尾 2 哪張,
p.s. 好到以為你正職是寫 Blog....

fionne said...

真係好羨慕你呀灘叔~ 呢種現場睇波嘅feel好正!!

Anonymous said...

對 !!!!
"《曼聯》,我好Q憎你!!"

sugar19sugar

Tony Boy said...

所以《曼聯》,我好Q憎你!!

Totally agree...XD

Anonymous said...

-helenato-

尋晚以為大猩猩會落場,佢連後備格都無,
睇左半場,工廠輸埋2粒,...

羨慕死人啦,見到高治,羅比咁多球星,
有得揀,好似美斯舊年羸歐聯,比亨利佢攬攬,
我就真係開心死.

Fion Mui said...

灘叔, 咁你應該努力D搵一個專幫你打呔既女人啦~~

janjan said...

I am very happy for you - having an exciting trip:}} Enjoy the rest of your vacation!!

Laa said...

OMG u watched the gunner vs red devil match!! im soooo jealous!!

Brian Hui said...

快d 回來!晚上節目冇0左你,現在變了知性及感性節目,不感言是好事定壞事,但氣氛確是嚴肅了好多!

龍兒 said...

點解你可以見到0甘多球星?

20 said...

我都反曼家!

Anonymous said...

《曼聯》,我又好Q lum 你:-P

Leo said...

灘叔,話時話我係BBC的Match of the Day好像見到你!

Anonymous said...

Robbie Keane not Robin Keane~