2.13.2010

珍惜相聚時



我有一個外婆,佢好溜廢,成日話我「溜溜廢廢」,話左我三十年,但近年已經少話左我了,唔係我不再溜廢,是因為她現居療養院,見的機會越來越少,仲邊有機會話我,以往每逢同佢拜年,就係俾佢話我「溜廢」o既好日子,但今年.....

「阿媽!今年初幾去探外婆?」

「你鍾意幾時去就幾時去啦,唔一定要初一二三,果幾日好多人,你得閒等少d人至去啦.......反正外婆已經認唔到我地!」

一個月前聽到外婆因為長期坐輪椅,背部皮膚潰爛,聽聞傷口有手掌咁大,但一直無法埋口,醫生亦說「唔好再惡化,已經是萬幸!」
媽媽說自己亦不想看到她,每次探望完,都幾天無法入睡,有時真係想外婆快d走,唔好再受苦!好心痛!

「媽!有時未受夠,未還晒債,咪無得走羅!」

「我當然知佢未受夠!但看到真的好心痛!」

「今世受晒,下世就享福架喇!其實佢都唔多覺,無乜痛苦,妳唔開心就太笨....強哥!點解你老婆咁Q蠢」

你可以話我不孝,但係公共場所,我寧願咁總好過同阿媽一齊喊!

「人終須要一別,但可唔可以走得舒服d?!」

「咁同其他d阿姨、舅父聚會呀?」

我以為自己好聰明,刻意轉話題去避開d唏噓話題,點知.....

「22號!」

我繼續扮醒目,扮孝順

「22號咪妳生日,咁可以搞大去喎!」

我個去「喎」字都未講完,阿媽已經喝止我

「唔搞!幾十歲生日已經無咩好慶祝,更何況生日其實是阿媽的受苦日,我阿媽而家咁,你要我大魚大肉,我食唔落!」

「deeeeee~`」

係要搞到大家都喊先安樂!

何為一個有型男人,就係少說話,而係最適當時侯講一句就搞掂晒!強哥就係呢種男人!

「做人係咁架啦!最緊有得食就食,有得見就見,咁就死得眼閉架喇!」


《珍惜相聚時》 共勉之~`

12 comments:

Fion Mui said...

見到灘媽媽既答話,佢當時講出個句說話心一定係非常非常之痛...

一定張好好珍惜仍相處之時光~~

小泉 said...

一個孝順仔
一個孝順女
一個型老公
相信婆婆肉體受苦但心靈非常安慰個女有兩個好男人睇住

janjan said...

Wish your mum will feel better becos of the chinese new year atmosphere.

秀秀 said...

"有得食就食,有得見就見" <--係囉, 我地做人真係咁架乍. 內心有平安就係福. 有時想想自己有既福, 動個心念, 希望福氣同親人朋友分享, 幫到自己又幫到親人, 其實我地咁做都會好有力量, 可以做到比自己想像的多.

theresa said...

前年我爸爸亦病得認不出人來
在他身上亦有不少大大小小手術留下的刀傷
每次醫生說他身上又有問題
必需再做多次手術
但要我們簽紙
在此時刻我們都會爭扎一番
不想他再受苦
但想他再生存
(爸爸自己有放棄的諗法)

由於宗教理由
最後都是做手術

今天我爸爸清醒了
雖然沒病前那般壯健

由於爸爸是在台灣
所以我每個假期都會到台灣
給他有個期盼我的到來
有個生存的理由

記憶.蘇生 said...

珍惜眼淺人。

騷緋 said...

你又令我落淚..... 講得好 - "有得食就食,有得見就見,咁就死得眼閉架喇" 珍惜珍惜!!!

梁渺黑 said...

*大家都經歷相近的事,
得見時多見很重要。

*冇誰啱冇誰錯,
不過我會寫「漏漏肺肺」。

bone said...

很多時候,大家會覺得老咗有病會好可憐。我並不覺得如此!公公婆婆也有可愛的時候!

婆婆唔認得並不等如她對你們设有感覺!你們對她好,婆婆一定知道,同埋會好開心!

(足夠營養對皮膚傷口很重要!可以的話多活動或坐坐不讓皮膚長期受壓,不至有更多傷口。)

加油 !

Alexandra Ho said...

可以的話, 請再為她多做一點點事:
有沒有院牧 , 叫院牧多探佢....
多些講愛佢....

p.s. 我不是社工.... 但是會記念她.......

candykit said...

婆婆未受夠嘅唔係苦,而係愛。即使佢唔再認得靚仔光你,佢依然會感受到你對佢嘅愛。
珍惜眼前人。

龍兒 said...

開開心心就一年,快快樂樂就一世啦,唔開心的話就度日如年啊。