4.08.2008

甲由窩



舊朋友約食飯,說介紹一個風味地方我去.....土瓜環落山道一條昏暗,濕漉漉,臭氣薰天的殘舊後巷內,可以有什麼吸引人的食肆?





甫步入後巷,就覺得似曾相識,當然每條後巷其實都差不多,但呢條我一定見過!終於想起是「無間道2」,黑幫頭目被活生生燒死的那間「火窩海鮮店」






呢度不但可以邊爐,亦同時可以燒烤,食物質素不錯,我好快就係咁食,係咁食,正想大讚「得喎!」之際,我看見我其中一個朋友好隨意地掃掃大脾,我看到一些東西飛到一旁,細看下,是一隻很大的甲由(正寫我識寫),朋友繼續進食,然後我一直覺得「長江七號」最正果場戲,兩父子像打遊戲機般,拍打牆上不知從那裡跑出來的甲由,這場戲,就在我面前一張檯的距離外的牆上重演,朋友們繼續視而不見,繼續食得津津有味!但我已經有點反胃,正考慮應否坦白向朋友相告 「我頂唔住,走先!」之際,天花上有些牆灰跌落我膊頭上,我順手把灰掃走,突然感到頭上有東西跌下,來不及想像是什麼,但見朋友輕輕的望著我頭頂,我即時彈起,手頭並用,終於把「東西」fing走,就這樣地,一窩「甲由窩」製成!

老闆娘好禮貌同淡然地問「同你換過個窩去」,而朋友就轉移去燒烤,一會後,新的窩底重來,朋友們又繼續開懷進食,而我眼睛看到那裡,都只看到「甲由」

『唔好意思,聽朝要開咪,走先!』






離開時,我才發現原來我們是可以走進鋪內他食,打電話問朋友,他的回覆是「以為你鍾意外面有風味D!」,我份人係「溜廢」,但都怕污漕同甲由!不過我重申,呢度D野係好食的!

13 comments:

Anonymous said...

beach :

點解朋友咁失策比你坐响條走廊道ga...下次試下坐响室內,又有電視睇, 又有邊爐打.. 啲嘢仲好新鮮好好咪....感覺即刻好好多....

強烈推介: (燒)牛柳粒,帶子,魚標,牛舌,豆卜, (煮)油鹽水煮蜆, (烚)一碟手切肥牛..

諗起都想食啦~~~

Anonymous said...

灘叔你真係勁大膽,仲可以坐多陣
換轉係我即刻走,真係好恐怖!!!

Melody said...

我依家既心情好矛盾..睇你同小紅咁講又覺得好似真係幾得咁..但係..又怕到時甲由湯底會出現O係自己個右腦度...

唉...

Anonymous said...

嘩!好堅喎!

Anonymous said...

幾好食都頂唔順......可能我唔係太為食既人啦.......

sugar19sugar

Anonymous said...

我都去過鴻福
燒蜆同燒鱔,好好味!

雖然坐室內係安全好多,但就好焗
打一次邊爐,我飲左五六支可樂,支駁支

講開小強,前兩日係地鐵車箱竟然有飛小強
好彩佢低飛,好快就有名男子踩死左佢
但我已經嚇到成個人都彊硬左
好驚呀!

櫻記士多*Ada* said...

有小強咁地度嘅昆蟲陪你吃dinner執到啦!真係夠哂風味啊!

Anonymous said...

甲由係我第一大敵, 咁嘅地方, 就算有金城武陪食同埋免費任食龍肉都唔洗旨意我會去呀!!!!! (汗)

Anonymous said...

should have just barbecued the roaches...lol!

-jaymee

lampuiling said...

恭喜你成為朕連續三日寵幸過既blog主!

亦恭喜朕以後放工後有個地方發洩下!

Anonymous said...

既然啲嘢食得咁你個BBQ gathering係咪應該去嗰度呢!? :p

RubiyaCat said...

我想同你講...........
坐響入邊都有甲由咖..........
仲要響部電視機從天而降....
好得人驚~~~
但係佢d野食好正~~
真係驚都要黎食呀~~

Anonymous said...

我都成日去鴻福,佢d野真係好食,不過就真係要好大既勇氣至可以行晒個條走廊囉,灘叔,你見唔見到有好多隻貓咪係度同你一齊食呀?