12.04.2007

All About Weddings....




十年前,我去過一個朋友「婚宴」,通常一般在席上會放了一個當晚「菜式」,但那個婚宴的每張檯上,還放了另一個Rundown(節目流程),上面十幾頁紙,密麻麻佈滿文字,細心看竟發現所有文字是同一句句子

『今晚我兩公婆做show,係full show,你走開每一秒,都絕對會是你損失!』

我記得當時半信半疑,還取笑一對新人,如果個show咁勁,應該為客人準備「尿袋」,咁客人就可以唔駛行開!

然後八點三個show就開始,早過紅館d大歌手演出,果兩公婆,又唱又跳左三首歌,換左八套衫,分別solo表演左兩大part,有變魔術,又即場煮野食,有男主角苦練了個幾月鋼琴,自彈自唱「moon river」,有女主角苦練九國語言(中、英、國語、西班牙、意大利、法文、德文、潮洲及越南話),向現場賓客宣讀對丈夫忠貞宣言;之後還有現金及禮物大抽獎,兩公婆與賓客大對答,未來兒子姓別,名字大競猜等,當中常然停不了跟賓客「隊酒」.....

那次婚宴之後,我對「結婚擺酒」的態度改觀了,從前是「憎」,那次之後是「怕」,因為我深深明白,的而且確要婚宴當晚開心,一對新人唔「喪做show」,晚宴就變成一個賓客唔黎唔好意思,黎到食完快快手腳「閃」的「昂貴雞肋晚飯局」,但要搞到咁,我自問無心亦無力,可能我工作關係麻,大半生都是在搞show,其他時間,讓我簡簡單單就可以,但相反一般人大半生都悶悶旦旦,婚宴是他們唯一做show的機會....
「都係做俾d老人家睇...」

我好理解,但始終無法接受,都係果句,做果行,厭過行...講到這裡,我突然想起圈中一個文化型女子結婚的故事,她結婚但絕對是不會做一般世俗「擺酒」的行為,奈何母親聲淚俱下,認為得一個女,嫁女無擺過酒,其他親戚會閒言閒語,型女子雖然思想前衛,但也是一個孝順女,最終她還是應承母親肯「擺酒」,但宴會當晚,她是不會出席! 有人聽見大罵「有無搞錯!?」,我卻心裡熱烈拍掌,你可以說她「不孝」,但「孝順」跟「愛」是兩件事,你可以好「孝順」,但其實只是為了「責任」,「咪話我唔孝順喇!」,其實又有幾『愛』父母們!

當然這都是小數人的想法與行為,一般人搞婚禮,都是為了對父母有個交待....




我這個朋友相識了近三十年,說很好感情又談不上,他慢條斯理,凡事一定要從根部想起,例如年輕時星期六納悶打電話給他「喂!好悶!出來玩吧!」,他沉默了六秒後 「去玩....是可以的,但去玩就要駛錢....」我通常都會忍唔住搶白「得啦!我請你!」,然後後果更加嚴重!「我唔駛你請,我講緊唔係邊個出錢問題!我要知道你去玩,是玩那一種級別,我才可以知道要用幾多budget,如果太貴,我當然要考慮,但如果太平,唔好玩,我覺得不如唔好浪費金錢...但我意思並唔係唔去玩....不如你話俾我知你想去邊到玩先?喂喂喂...」 唔駛「喂」喇!訓著左喇!

以我的「急性子」性格,跟本無辦法有興趣同佢溝通,但係做「巴打」就係咁奇怪,「唔駛講野,好小見面,總之有事九秒九到現場,從沒有錢銀、女人軱轕,拍拍膊頭,心照不宣!」





巴打,我其實一直好擔心你個婚宴,因為你實在太「撮」,口口聲聲只會說「是旦得架喇!」 「下?!乜呢d野要做o既咩?!」,我著重是一個「難忘的晚上」,你繼續同我地講你份仲悶過「施政報告」o既Rundown
「八點三至八點半集合,八點四十分出發,我試過車程係十八分鐘,所以到酒店應該係八點....喂喂喂..」
唔駛「喂」喇!訓著左喇!

作為我最後一個會結婚巴打o既婚宴搞手,但發現新郎「撮」,其他d巴打個個掛住「究竟幾時去婚前派對?去邊間場好呀?」,根本無人做野,到約翌日出發時,竟然有半數以上的巴打是「遲d先到..」、「我在上面,趕緊車落黎...」、「尋晚唔玩通宵,我唔知醒喎!」 其實去到果一刻,我是放棄了....

終於翌日,得我同另一個巴打兩個人早到二十分鐘來到你家樓下,你依然是一貫慢版人反應「係呀...你地到左喇,你地上黎定去食早餐先好呢,因為我仲有d野要搞,係呢,其他巴打呢,佢地會幾點到....喂喂喂..」
唔駛「喂」喇!訓著左喇!


在那間又殘又舊,原全唔襯我一身英國紳仕(咪就係傳說中o既鄒紳仕羅!)打扮o既茶餐廳內,終於一個又一個巴打到場,果一刻,我想起「少林足球」內,那場天台上,各師兄弟終於一一現身的劇份,我要把紳仕外褸除下,因為我覺得很暖....





上午一切總算順利,對面姊妹水準一般,我意思係「接新娘」難度真係太低,開門利事個價平到有d我地覺得去錯左地方接錯新娘,但anyway..就如其中一位巴打所言「都係咁架啦...」

然後......然後咪因為要就時辰回男家,一眾要遊大運兩個幾鐘羅....但其中一位巴打提議去海旁影相,雖然係好老土,但果兩個鐘是快樂的,至小我一定係,因為第二日,我又要去海旁同一個地方拍野,我爭d同「自由行」大打出手,地方不重要,人與事才是快樂的沿頭!



到晚上,經過在我家的「放縱」,大多巴打到現場都得番半條人命,但好肯定都交晒俾果晚,我作為當晚主持人,其實好定,不停口口聲聲說「細show黎o既...」,但直到遇到果個酒店經理,那一種我一生最憎的人,好有禮貌,表面完全讚同你所有做法,但就口口聲聲講你知咁做酒店是不大歡迎,你要做當然可以,但遇到什麼意外,酒店是不會願意負起任何負任,但一切也是為你好!我頂佢!

「新人入場時會有花炮嗎?」

「有!由門口到台前,兩旁會企滿人,大約有一打左右!」

「其實呢,花炮只係門口位同台前可以發射....但今日咁開心,我試下幫你地安排到中間都可以射啦...但係
d紙屑會跌落檯,係拍攝上個畫面就會麻麻,同埋亦都會令到d賓客d杯入晒紙...」

我不語怒視著他..

「一陣我問問攝影師,咁做拍出黎如果啦....」

然後我繼續講我會點做,佢繼續要我check清楚所有東西,總之就係保障酒店可以唔駛「咩鑊」,同埋做小d野!我已經無訓,d火直標上腦,幸好有其他巴打知我性格,立刻拉開我,還要我顧存大局,要發圍等埋單時,飲大兩杯先做佢野!「巴打!好!就咁決定!」

我以為只係有一個人阻頭阻勢,我在盡量配合下,更改我的Rundown,呢個時侯,阻頭人二號出現,那個黎負責註冊的律師,一輪嘴以專業口吻通知我佢會點做,當然佢要做的程序,又跟我安排的原全相反,果一刻,我真係有D緊張,會唔會係我搞之下的晚會,比一般婚宴更悶,「呢次PK啦!」

PK 就是我巴打,亦都是這次主角的名字,為左呢個名,我企埋左一邊爆背「有請相方主婚人XXX XXX上台...」、「註冊儀式係莊嚴同隆重,請各位來賓把手提電話關掉,係關掉,不是較至靜音....」、「根住係簡單而隆重O既切餅儀式....請一對新人向大家祝酒....」


終於,我只係叫左兩位世伯名字,無叫大家閂電話,未切餅就祝酒,切番餅後祝酒又叫早左,個攝影師拍唔切,要再祝多一次,但總算世伯簽得開心,無電話響,好事成雙飲多杯....

然後到我安排給新郎送給新娘子的「賀禮」,簡簡單單,買了一百九十九枝花,襯新娘換完衫後,在新娘房外邀請她上台,坐在台中央,讓所有賓客逐一把花及祝願送上,由於我好擔心賓容唔肯下台,於是我地打感情章,叫其中一個巴打的女兒帶頭上台,點知臨上台之前,小女兒唔肯上台,我係台上,面都清埋,見巴打同佢老婆竭力把女兒押上台,心裡面有半秒擔心小女孩會有「童年陰影」,但要成功,就要犧牲,對唔住呀!

小女孩搞掂,但現場SPOT-LIGHT竟然係呢個時侯壞左!?,女主角無SPOT-LIGHT,你唔係咁爆呀!?但雖然無燈,我仍然看到拿著花等上台的人龍,終於鬆一口氣....

說時遲,那時快,我回身見新娘子個妝化開晒,眼淚源源不絕地灌溉著跟前不停增加的鮮花,雖然只是重覆說「多謝...」,但一聲比一聲難模糊,我在旁聽到的只有「因快樂而失禁的哭聲」

新娘抱著一百九十九枝花,哭著向所有來賓說「多謝晒大家....多謝MATT,我同PK咁耐,從未收過佢送一枝花!」我聽見新娘子如此這樣說,心裡面大叫「BINGO!」

「阿嫂,妳有冇試過一晚裡面有兩次高潮,未試過,你老公可以俾到妳!」

呢個時侯,當然是新郎羅住最後一束花送上台,深吻影相位,不過我估呢幅相未必會俾我地睇,因為一個正常女人,係最快樂時,可以忘記個妝化晒,但到睇番D相時,一定唔會肯再俾人睇,我能夠近距離見証到呢一幕,都算我福氣了! 感``

到他們上台感謝家人,我第一次見到巴打講野可以咁簡潔!

「我想多謝外父肯送個女俾一個兩袖清風O既人,我多謝我父母.....」

然後...然後巴打就沒有說下去,雖然不是嚎啕痛哭,但巴打那種「不知從何說起,淚水已經奪眶而出」的表現,是我近三十年來從未見過的「真」,大家給你的掌聲及歡呼聲,雖然並不是全場,但有拍過,有叫過的,都被你感動了!

然後...我突然覺得...我的負任完成了,可以下台,問問同檯巴打,有否為我拍照,他們紛紛拿出相機,問我是否要現在拍,之前原來一張也沒有拍到!所以我無法放相上來給大家看!老實講,如此感動的一刻,還記得拿出相機來拍照的,我反而覺得你無投入過,一切都已經在腦海裡,永遠都會記得!

然後....我咪開始飲羅,下面張相係最後在場証據....




跟住咪差不多兩點聽到電話響,發現自己已身處床上,接過電話,是巴打打來感謝我
「今晚好開心,我老婆都好開心,唔知講乜,長話短說,真係好開心.....多謝你!巴打!喂喂喂....」

唔駛「喂」!訓左喇!

21 comments:

Unknown said...

哈哈!講起Wedding,我身邊有好多朋友都結婚,有D生埋仔添!
我同我男友都行左7年,成日間我地幾時結婚,在於一個唔想面對奶奶,三姑六婆的我,結婚的後果都幾麻煩。

Anonymous said...

好感動呀..由其係送花個part...
同時我諗起我既好朋友係o黎緊一月頭要結婚啦...我要擔當2個重要既角色..伴娘+MC...
唔知自己可唔可以勝任...但希望一切都可以SMOOTH D 啦...
而家講起都開始好緊張啦~~

CellCell said...

嘩~ 真係...
前段登你緊張~ 後段好鬼感動~

櫻記士多*Ada* said...

So sweet 排隊送花.....係新娘都感動啦!

Anonymous said...

在我的婚禮上
我老公
响台上

「本人就冇乜才藝 亦冇乜表演慾
就不如甘......」

之後佢响件禮服入面攞左本馬簿出黎

「今日大家做左甘多禮 就四場七同八場...」

我差點暈在當場........

Anonymous said...

You're such a great friend - even though u don't like the concept of wedding receiption, you still put in your best effort in organizing such a successful wedding!! THAT'S WHAT FRIENDS FOR:}}}
p.s. I'd really like the part of sending roses & wishes.

Melody said...

如果打牌睇女婿既話..咁婚宴一定係睇巴打...

好巴打呀你...XDDD

講起婚宴..我個friend 岩岩做完佢ex 同事既伴娘..佢話男家既兄弟基本上都係一個字.."劣"....質數既問題..都算...佢地係完全唔幫手..好似路過咁...夜晚要敬酒時先話 "我地唔飲得架"咁...

搞到新郎個親細佬一個人頂...最後咪頂到訓低反白眼call 白車....=.=

所以睇到你呢篇..我都覺得好warm 呢

Anonymous said...

唔講嗰句都講埋...........
佢現職馬會.........
受薪董事

問你死未

Anonymous said...

That's Great
and Mission Accomplished

Anonymous said...

melody:
九成巴打都係廢男
得一成做到野,但又唔願做巴打

sigh``

Anonymous said...

係呀, 勁セ鬼吖! 人地放假佢就死去返工, 又要倒塔甘早去睇晨操, 場場馬要行上個三層樓既塔.....不過我呢個「倒屎」夫人睇馬就屎到爆, 大賽就 of course 睇啦!

Anonymous said...

-helenato-

知你唔多鍾意聽,
但相信,
好多人都好期待
下次post出黎
係你d結婚照.

又留唔到言,第二次留言啦,好煩!

Anonymous said...

好多巴打都係齋睇唔做,由得啲姐姐著住對高跟鞋跑嚟跑去

另外一啲就乜都要攬住嚟做,但係做啲嘢出嚟唔得呢,又响度咆哮..

其實幫下手或者比人幫吓都唔係好難啫~

Anonymous said...

感動 !

(我都係第二次留言,其實我有咩做錯之前留唔到 ?)

日日一返到公司.....msn未開就睇左灘blog先啦....無出聲係我唔岩....以後會出多d聲!!!!哈 !

Anonymous said...

好感動ar...
我都已經好耐無參加個婚禮喇..

Melody said...

to: beach

無錯..佢地簡直係廢男!!但係如果廢男係自己既巴打...咁自己係....@.@

題外話:你會唔會去睇子華既棟篤笑呀? 唔知會唔會撞到你呢..:p

Anonymous said...

你呢個搞手真係掂~

Anonymous said...

hahaha...
與巴打對話最多係: 喂喂喂喂...
hahahahaa

勁正

Anonymous said...

扮型,已經係件好老土嘅事,
孝順,至係型。

Anonymous said...

婚禮真的令人(所有人)疲憊不堪!

Anonymous said...

人生得一好巴打, 死而....