12.30.2007

驗眼




做創作,天馬行空,年輕時,總覺得自己的慨念超脫,只可惜有能力去把慨念成真的人有限,才令我大部份心血付諸東流,連變成「豬紅」都無機會;但當有機會到自己去把慨念實現時,我才發現所有慨念絕對是「想就易,做就難!」,還是去找有能力的人相助比較實際,而我是相信所有隱世高手,都會喬裝成其貌不揚小市民,過著平淡無味的生活,直至真正需要出手時,我們才驚覺「嘩!原來佢咁堅!高手黎架!」

我用了二十年時間才碰到一個~`

首先由我個慨念講起,我一直有一個我認為好浪漫o既示愛場面好想拍成畫面,係講一對中學男女生,男的樣子俊朗,但沉默寡言,因為他說話時有點漏口,女的樣子娟好,眼矇矇好可愛,漏口仔一直有留意矇豬眼,最近仲發現佢迷痴痴的看著自己,但漏口仔同時發現佢根本望邊個都係咁眼神,正當佢想放棄之際,佢從矇豬眼同班最口口聲聲話自己唔八,但然後就八單野你聽果個八婆gina個大口中得知,濛豬眼原來上星期路經足球場,被八十年代最多發生的場面,足球射中面膽拖眼鏡爛左然後唔敢同阿媽講因為眼鏡新配無耐,所以其實佢並唔係矇豬眼,佢只不過係反緊眼,而漏口仔對眼,已經看到向她示愛成功的那一幕!

漏口仔約反緊眼去街 順勢帶她到表舅父經營的眼鏡店,當她戴上那個古怪得像JPG出品,又厚又重check近視度數的眼鏡,表舅父把一塊又一塊的鏡片放到眼鏡上,反緊眼慢慢變成明亮的眼眸,而她看到的,並不是一般驗眼的英文字,數目字,而是漏口仔一早準備好,以透明file自製的幻燈片,是一個八格漫畫,當她從幻燈片中得知漏口仔原來叫做莫國強,一直有留意自己,但不敢開口,而自己又看不見,終於現在看到了,最後一張幻燈片是二人手拖手遠去,然後漏口仔股起最大勇氣開口問她「可以嗎?」

她最後有冇接受,要到有機會拍出來至會知,但這一幕我已經來來回回向圈中外人講過無數次,有一些仲聽過三次甚至以上,有人認為太流於設計,欠缺真摯,有人又好理智分折,以果個年紀的男孩子,應該沒有可能咁有創意,而現在已經大部份是用電腦驗眼,根本不會再戴那幅眼鏡,也有位男士說「做男仔開口示愛都唔敢膽?!駛乜搞咁多花臣丫,一句到尾,妳肯唔肯跟我,係就係,唔係就唔好浪費時間!」更有一位從前情人苦口婆心勸我 「唔好再浪費時間想這些不設實際的東西,去學投資吧!」

無論圈內外,都無一個人有能力把我的夢成真,又或者無人覺得這個夢值得成真!直至前幾日,我終於遇到隱世高人~``


朋友David與Bowie是恩愛一對,男的美資大公司Financial Controller,女的是空中小姐,拍拖多年,生活談不上多姿多彩,但總算有質素,多多小小同David搵到又肯駛錢有關,並不是每個人也可以在百忙中星期五晚上機去日本陪女友過周末,其實係過星期六一日,因為星期日又要趕回來準備星期一,肯駛錢,都未必個個有咁o既精力同仲有咁o既心!

David知道自己揀定了,準備向她求婚,但又怕她無準備下拒絕,於是打算在她臨飛英國簿五日trip之前,送上戒子,然後給她五日時間考慮,其實我覺得呢個方法都幾實不錯,似足賣買,先送上草擬合約及介子作訂金,待五日後回覆,如果問題不大,就簽約生效,清清楚,我聽到後笑住話「好!好好!」,同時強行按捺著內心想說的話「果幾日你等回覆就知咩叫忐忑,俾蟻咬咁呀慘!」,點知David唔知係咪鬼上身,突然問我「點樣求婚可以浪漫d?」,方法我當然有,還有好多,但要想出一個適合他們的絕對不易,就在我思量當中,David 收到Bowie的電話,原來她眼睛有點發炎,不想戴隱形眼鏡,但又對現有的眼鏡不滿,叫David有時間陪她去配眼鏡,我得知後不其然就想起「驗眼」那個故事,又即本講出黎給David知,點知佢好大反應,二話不說就四圍call朋友有冇「眼鏡鋪」肯配合,幾多錢租唔係問題,跟住繼續四圍打探那裡可以用最短時間製作到「幻燈片」,係講緊要快到幾個小時後就有,我亦作狀替他搵人,但其實我覺得根本無可能在短時間內實行到,點知原來要實現夢想,首先要有的能力「錢」,可以在五六個鐘內將整件事辦妥,要有咁o既人力,一定背後要好大o既財力!不得不服氣!

於是六個鐘頭後,David 帶Bowie去預先安排好的眼鏡店,口口聲聲話間鋪是朋友開,但又講唔出朋友個名,然後Bowie揀岩眼鏡框,David就提出叫她入去驗眼,點知Bowie話自己度數多年沒變,不需要驗眼,就算要驗,都不用入房,櫃檯上明明有部電腦驗眼機,點解要入房,用最舊式的方法驗?!又要被那又厚又重又扮JPG出品的古怪鐵眼鏡壓走她的精心化妝,David張口結舌,幸好眼鏡鋪內的員工醒目,即說「有時人手會可以比電腦更準確,更微細,偏差減至最低低....」 嘩!今時今日服務態度原來咁先係 夠....勁!

終於Bowie被帶到驗眼室去,驗眼師把JPG眼鏡戴上,正欲把一塊又一塊有度數的鏡片放進眼鏡去,而David亦正準備要合時間,放出他準備好的「幻燈片」,我以為電影橋段先會「好事多磨」,原來在現實生活中,情況一樣,可能因為現在已經無乜人用這款驗眼方法,眼鏡被荒廢一段時間,出現了問題,鏡片被卡在眼鏡中,舊的拿不出,新的又放不進,驗眼師竭力搶救中,David見狀急如鑊上蟻,Bowie亦不悅說著不驗了,David不知所措,只懂得逼Bowie一定要繼續等待,那邊廂驗眼師仍然無法把鏡片弄好,Bowie決定唔等,起身欲走之際,David情急之下,突然跪下,把整個求婚計劃對Bowie和盤托出.....

Bowie聽罷既sweet,但又啼笑皆非,個未來老公咁「低能仔」,都唔知有無幸福,但那份坦白的傻氣已常給她無限的安全感,通常呢種情況,女方都唔會開口答應,只會伸出手指,讓對方替自己戴上「訂金」,戒子戴上後,全場拍掌,David竟然說「橫掂都整好左,不如開出黎俾妳睇睇我做左d咩幻燈片丫!」.....

其實David講到呢度,我已經無興趣再聽落去,因為我的「設計」,始終無法發揚光大,但原來好戲在後頭!當David正欲開幻燈片出來看時,Bowie阻止了,她作出了一個決定,也令到我這條橋昇華十倍,更Touching,更Powerful!

「留到我們婚禮當晚,跟賓客親友一起看!」

我一直相信愛可以帶出女性體內難以估計的能量,就等如母親為救兒子,可以把火車托起一樣,我認識的Bowie是從沒有這種創意,她就是那種機械人空姐 『coffee or tea ,fish or beef,see you next time bye bye....」講多半個音,想多半種變化都唔會,而「愛」卻把她「高手」的一面揭露...服!

陳細潔小姐說,飲到一枝靚酒,會感激流淚,我覺得被揀中的也相當感動,終於有人懂得幫我提昇,所以我不怕被人抄橋,只怕自己的橋唔夠水準俾人抄,期待當晚看片時的感動!更希望David唔好低能仔send俾我睇睇先!Please~`

11 comments:

pvc said...

好浪漫!!!真係替David Bowie高興(假名係咪!?個組合又會咁啱o既).雖然話有財咩都幾乎可以實現到,但係冇心的話,點做都冇用..真係覺得你個空姐朋友佢好幸福呢!

拜杜喴,開始睇嗰陣,有啲覺得新紮師兄裡面傑佬同穎芝去配眼鏡嗰幕咁,不過都希望有一日你呢個意念真係可以响大銀幕到出現呵~ 仲有你點都要留番個更浪漫的意念比你自己他日用,唔好隨便公開喎(我知你會喇)!

加油呀,等你嗰日出現 :)

bone said...

一路覺得嘅好橋,有人用得着,重要喺自己嘅朋友,完全感覺到你的喜悅!

恭喜海灘 + David + Bowie!!!!

Anonymous said...

-helenato-

咁嘅鋪排,
建議d姊妹們努力配合演出,
可遇不可求,
條件,當然係自己杯茶啦.

Joyce said...

一切都是互動的…他以(or 採納)如此充滿心思的浪漫手法去表達,自然激發她以更加多的愛去回應。我希望他沒有如實地向她鳴謝你獻計,總覺得這樣做會有點反高潮…雖然要你委屈一下當個無名英雄。:P

mia said...

嘩!真係好SWEET~
希望婚禮當晚灘叔你見到自己條橋被發揚光大,唔好感動到喊啦~
P.S.都不得不讚下個服務員咁醒~

Melody said...

好掂!!! 從文字中已經感到果種現實中的dramatic!

能夠將自己諗出來的橋段拍出來當然開心...但可以將佢運用在現實中更加有意思呢!!

Congratulations to their wedding,
but most important,
congratulations to your idea can turn to real!

sugar19sugar said...

吾......

唔好話睇到自己條橋發揚光大啦,有人去用已經好高興 !!!!!

嘻嘻~.....SWEET SWEET......

sugar19sugar

Anonymous said...

能幹又有財力,肯花心思攪浪漫的男士,真係買少見少,希望灘叔呢兩位朋友可以白頭到老!(珍惜眼前人)

祝 灘叔 新年快樂!

Alex said...

不得不服~
世事真係咁啱得咁橋

20 said...

好sweet呀~

呢個"配眼鏡事件"有d新紮師兄feel

我覺得條橋用黎求婚o既效果會勁過用黎追女仔,如果故事發展順利,我諗bowie都會感動到暈。

雖然原來個劇本最後冇法達成,不過一個少少意外,又引黎另一個驚喜,都幾好呀~

qt芝士 said...

四字作總結:
塞翁失馬, 焉知非福。

灘叔叔, 你條橋勁正正正正~

我們等待你寫的大團圓結局。