12.09.2007

闊太唔易做




從前有位電影大亨,喜歡招呼導演、編劇到他的家中,傾劇本,談末來電影方向,我有幸曾經亦多次成為座上客,每次皆在他偌大的客廳中,那張彈力適中,質地柔軟的大梳化上開會,但由於客廳實在太大,我每次為了說話時,可以令對方容易聽到及多一點親切感,我總會坐到地上,那張雪白無塵的長毛地毯上,每次總有衝動,打橫成個人訓落張地毯到,每次都覺得咁做其實無問題,唔會失禮,但每次依然是唔敢咁做!

有一晚,大享的太太打完牌,從地下的麻雀房喜孜孜走到大廳,贏錢是小,食出鋪破紀錄番數的奇牌,絕對值得飲杯慶祝,然後太太興之所致,講左一句法文,應該係一個牌子名,跟住大亨有小許錯愕,然後展示他一貫的大方笑容 『開心咪開黎飲羅,大家一齊飲丫!』,跟住太太就叫傭人去取酒,半分鐘後,傭人空手回來,跟太太耳語了片刻,太太一臉質疑,然後急步跟傭人離去,又過了十多分鐘後,太太獨個兒回來,仍然是兩手空空,「今晚唔飲住,聽晚...」太太重覆,以肯定語氣再說一次「聽晚上黎飲!」

我們不以為然,一笑置之,繼續開會,點知第二晚,我們都收到電話,問點解到時侯仍未見我們現身大亨家中,是否忘記了約會,坦白講,我們當時全部不是忘記,根本沒有當太太之前的話是真,於是我們立刻飛車到大亨家中,太太把一枝又一枝,應該是她說的那個法國牌子的紅酒送上....

終於我躺在那張雪白無塵的長毛地毯上,橋如泉湧,意識上我是把最好的橋都賣出,真實是我根本不知在說什麼,但仍然引得全場大笑,那一晚很快樂,我看著檯上四個的「酒塞」,隨手拿了一個作紀念

後來我將「酒塞」給一個好識酒的朋友看,他第一時間問我當晚飲了多小枝,我說應該是四枝,朋友呆了半響「嘩,四枝咪成十萬銀!」,當時現場總共有四個人,咁差不多一人飲了一枝,即是說我飲了兩萬幾銀酒,嘩!花酒飲咁貴都未試過啦,何況一枝紅酒,果刻我不禁說了聲「有錢人真係唔易做!」,但原來故事未完,多年後有一次遇到大亨的司機,現在已轉職到別處,正所謂講開又講,佢記番起果晚,太太發現酒窖內,想飲的那隻法國紅酒只得四枝,太太擔心飲得興起,但無以為繼,所以寧願第一時間落order訂貨,明天晚上再飲,雖然到頭來我們都是飲了四枝,但「預鬆d好!」果刻我不禁說了聲「闊太唔易做!」

請妳飲酒未算「闊」,預多到你飲極都仲有先真正係「闊」

但近年我已經好小識到闊太,直至最近,從某老友blog上看到她介紹一枝紅酒,我隨手留言說留起一枝給我試試,翌日我在電台收到一箱對方介紹的紅酒,我立刻上去check清楚自己點留言,無錯是「一枝」,不是我寫錯呢!

托住果箱紅酒回家時,我又不禁說了句「闊太唔易做」,因為我肯定呢箱咁重o既紅酒,佢由落單俾咭到叫送貨。整個過程中,佢雙手都唔駛粗勞,而我呢邊托到唔生唔死,佢果邊已經兩雙手拿住八個唔同名店。既shopping bag,花枝招展地去緊cova hi-tea

然後今日是國際賽事,當中有一隻馬叫「狄倫」,是我愛驅,我好想親眼睇佢跑,然後我四圍問朋友羅「牌」,搞左成個星期,都係話「真係好爆!有d難度!」,我其實已經準備放棄,撞到闊太,又即本開口問問,佢淨係問左個一句「幾多個人?」,然後大約十五分鐘後,就已經話我知「聽日送上電台」

有錢未必一定真正「闊」,還要有人力,時間,同預到你飲極都仲有一樣,有會員馬牌,仲要專人送到上門,咁先為之「闊太一條龍」!


認真感激,沒有妳,也沒有機會親眼看到狄倫,但看牠的代價其實幾大,都可以飲多好多紅酒....


所以我開始懷疑,闊太其實係馬會臥底,俾d甜頭我,等我大舊大舊俾番馬會!


闊太唔易做,唔會留生路!

12 comments:

Alfie said...

我今季既花紅就靠哂你喇!
繼續, 唔好比佢停!

bo said...

唔好意思
身為員工家屬不能睹馬
但下次有d甘既K屎我會私底下同你通個電話
隻馬甘肥..........

還要從申
我係一個靚師奶
唔係闊太

Thank you.

bbci said...

講開紅酒..記得應該係年幾兩年前係荃灣某間紅酒舖見到你...其實係我咁岩行過個度...你又咁岩係紅酒舖行出黎...迎面見到你個隻呢...心諗你一定係熟客仔啦...hehe~~

Melody said...

致:受害人-灘叔

唔通闊太界都有三姑最喜愛既保藥黨??? @!@

XDDDDDDDDDDDDDD

Benny said...

朋友只需一句
你估有錢唔洗落心機咩

櫻記士多*Ada* said...

出席任何場合不能重複衣著(怕記者寫佢cheap);社交舞要跳得好(唔係點帶第一支舞);面對記者對答又要德體...種種跡象都是說著靚太/闊太lee份工唔易做!!

Alex said...

灘叔:嘩!你一講我已知個位闊太係邊個~

在我眼中佢其實真係一個闊太黎架!!!:)

eunice said...

我好想知係邊個喎,可唔可以講呀?

unkle beach said...

eunice:
大亨闊太就唔講喇
另果位,妳咁唔留心,當然唔知係邊個啦

Anonymous said...

-helenato-

賽馬嘅野,
我一d都唔曉,
細個個陣,
亞爸最迷騎師告東尼,
佢唔理邊隻馬出賽,
但凡係告東尼策騎,
佢就話一定win,
真定假?
我就無去理啦.

Jenna Michelle said...

unkle,
你0個日好忙喎! 去完馬場去撐場. 定係你兩日都著住同一件衫呢?

qt芝士 said...

這位阿太, 有情有義, 難得~