10.14.2007

花紙



收到兩張英國「老友」ellen傳給我的『環保花紙』,她是一位L6的學生,跟同學們set up了一個名為「underwraps」的『組識』(我覺得咁形容會勁d!),組織目的不用多提,就是為聖旦禮物效勞

我對『花紙』毫無感情,自小見女同學們以「名貴」、「可愛」、「鮮艷」、「自製」等各式花紙悉心地包裝聖旦禮物,送給心儀的學長,我總會酸溜溜地說,『人家收禮物時,只會竭力把花紙撕爛,妳的心機根本是多餘!』,而對方的回應通常離不開『你妒忌呀?!』又或『再多餘的心機也不關你事,有人送給你嗎?!」甚至 『我就是要看他撕開時的模樣,好MAN呵!』

人總是喜歡被『外面』蒙蔽,你揀情人首要,都一定是從外表開始,所謂『內在美』,只不過是你張『花紙』不美,但又別無選擇下,大家好落台的一種說法,君不見每次被讚有「內在美」的人,都是因為 你得到『外表就認真麻麻,但有內在美嘛』,跟香港小姐的友誼小姐一樣,是最無人恨拿的獎項!

所以我從不可憐在感情上被『花紙』所騙的人,因為這些所謂「受害者」,打從心底裡,是多麼渴望有張吳彥祖咁靚的花紙來欺騙她,最好還是環保再用,呃完然後不停再呃,騙財不緊要,最緊要肯騙埋色,相反地,如我這般情深款款的男孩子,因為「花紙」不夠靚,就算山盟海誓,也只覺得我是想騙她們上床!

我無怨恨父母生得我不像吳彥祖,亦從不刻意為自己加上「花紙」,從前工作,上司常暗示我打扮可以「莊重」一點,闊衫爛闊褲,老闆們都是上一代的人,對新事物接受能力低,我的打扮絕對會影響他們對我的「睇法」

「我有內在美麻,我的劇本好才是最重要!」

「好的東西還要加上其他因素促成下,才會成功!賣相就是其中一項!」

我不肯去相信,人家寫劇本,封面可以弄得比外國雜誌還要出色,但我從來沒有封面,因為我認為浪費紙章,就算後來妥協了,加上封面也只得在左下角,細細個字寫著「編劇~`鄒凱光」

我從不知道因此而走多幾多怨枉路,直至2005年,我走訪國內尋找機遇,人到窮途沒路時,就會肯放下,對自己背道而馳,我把家中最DECENT的「花紙」都放上身,每天出門去開會時,都把鬚刮清,頭髮弄得整整齊齊,對住鏡,看著從不束進褲內的恤衫,對自己說,這是我最後的底線,如果要我把衫束進才可以得到工作機會.....我是無可能接受,但到頭來亦會照做,可能還會比其他人束得更入,更緊,這樣我才夠「絕望」,就讓一張庸俗如超級市場的花紙,遮掩我高貴的靈魂,你永遠再看不到我「真人」,是你的損失.....然後我就想起工作上很多不滿的人,其實不滿的,都不是他們真人,為口奔馳,面容扭曲,在所難免

終於我像極不情願但又無計可計施下被人強逼進行缸交,讓衫腳鑽進一個從來未接觸過的黑暗國度,當時是仲夏,我相信「它」有如被困就男廁格一樣,又臭又焗,又焗又臭,我實在對不起它,應承過給予它的「自由」盪然無存,下班之後,我第一時間釋放它,但它已生氣得皺作一團,像那些面容扭曲的工作敵人

「為口奔馳,在所難免」

欠它的,我即晚就還!來到夜店,它心情轉晴,樣子亦神奇地變得畢挺順滑,還引領我遇到工作上的一位女編劇,一位才女,酒過三巡,她跟我說 「你很懂得包裝自己,日間是一個模樣,晚上又是另一個模樣,但穿的都是一樣!」 「是嗎?你喜歡日間的我,還是晚上的我?」 她沒有回答,直到離開送了她上的士後,我收到她的短訊 「日間的你還是比較好一點,至小我不會心存僥倖,以為你會送我回家!」

有時,一張「花紙」,是可以製造很多驚喜,也阻止很多「慘劇」發生!



我相信「工作」只是為了糊口,為了可以過自己喜歡的生活,工作上的苦痛,是要令你去爭取,去珍惜生活上的每一刻快樂,為了可以繼續過現在的「生活」,我願意被花紙包著,但我會繼續學習,去找一張最適合自己的「花紙」

23 comments:

Anonymous said...

“花紙”亦可以算係一種適應能力,對住唔同0既人就要有唔同0既花紙包裝。不過,禮物就係被等人包;人就係自己搵嘢包住自己。真係好得意,我成日都話要以真心待人,但係又會唔知唔覺咁搵張自己睇唔到0既紙包住自己,覺得有d不知所謂添!

希望我張花紙有少少透明啦,咁有可以俾人睇到真0既一面,又有少少神祕感,效果應該唔錯。

perztc said...

I am totally agreed what you said.

The most important thing, what kind of 花紙 you use, and how you wrap it.

Matt, please give yourself some credits. Remember you are very good, just being so picky in choosing what you believe for LONG TERM.

Good luck.

Anonymous said...

花紙...花紙...有時候會因為身邊既'花紙'而點都要有張花紙旁身呢?

櫻記士多*Ada* said...

我覺得花紙一向只是給人剎那美麗,無論你花幾多心思在張花紙度,到最後睇完就掉無得留低!海灘你有內涵又何需重視花紙呢!那怕前路難斗量,衹管活得更舒暢!

Anonymous said...

你個Package冇問題呀
人又越黎越靚仔
寫野又越黎越好睇
做電視又甘生鬼
星期一同星期五記住睇

嗱 做到甘
唔好話我地上黎齋睇

Anonymous said...

鄒凱光我好中意你:]

Anonymous said...

請不要灰心, 你也有人妒嫉...

Anonymous said...

"如我這般情深款款的男孩子"俾呢句笑XD

Anonymous said...

我來+卜你的灘叔~~~~

永遠支持午夜閒談~~~~

Anonymous said...

海灘﹐唔係唔想篇篇都回應。
只係有時你寫得太中﹐寫得太滿﹐不知可再寫甚麼去表達所想的。 如這篇...
有時的題目是自己未曾接觸過﹐如紋身﹐如CU﹐不知可寫甚麼﹐又不想寫些無謂嘢而已。

但我可是每天都等着你的新篇。 努力啊!

Anonymous said...

-helenato-

為左要keep住,
有個好嘅生活質素而去工作,
總好過唔肯去變,唔肯去改,
"妥協"比講句sorry更難.

你post出黎呢2張"花紙",
個pattern....麻麻啫.

Anonymous said...

支持靚非, 支持海灘, 支持滴奶, 支持午夜閒談, 十扑十扑!!!

Anonymous said...

亞海灘,咪鬼咁stubbon啦!点解叻就唔洗靚喎!又叻又靚有乜問題呢?

Anonymous said...

有時候唔一定要用有「花」o既花紙嚟包裝,簡單及單色的都可以包裝得好睇,有時就算我哋揾咗高級品牌花紙去包裝都未必會得到人垂青,因為可能運氣未能搭夠又或者人哋根本都睇唔起眼呢..

不過我好認同你嗰句「為口奔馳,在所難免」~共勉之

Anonymous said...

拜杜喴,我啱啱响柏林返來,除咗我有帶咗你本書去睇之外,有一晚我响柏林突然諗起你,係因為有晚行一間精品店時見到你之前post其中一張相內嗰對鹽胡椒攬人 :)

Anonymous said...

雖然有不少女性喜歡靚仔,
但有更多女性根本對齋靚仔冇興趣,
尤其那些太姿整的男人,簡直令我反感。
別再說吳彥祖係女都得佢,
我唔得囉!!!!
有得揀,我真的希望我的男人不太靚仔,
這樣省卻很多麻煩!

Anonymous said...

睇完後,我不得不吐苦水。我身邊就有一份用花紙包得美輪美奐既禮物,佢每日既工作就就好似係睇報紙同傳遞我交比佢既野‧人人都唔係太想叫佢做野。唉,有時做吓花瓶都幾好啊,你就咁放佢係度就有水你飲,有花你扮’青見’。

Anonymous said...

人大了,經歴過現實的洗禮,自我漸漸變得模糊不清。戲劇世界裡的超現實,正好給予一個釋放空間,從中找尋遺失/迷失了的情懷。謝謝你!
編劇先生。

cc

Anonymous said...

灘叔..我支持你...加油....!!!!

Anonymous said...

有時候或者我們轉過來想想,我們可以將“花紙是用來掩飾真人”轉換成“花紙是對人的一種尊重”
我們未必會覺得“唔用花紙就唔尊重”,但是一定覺得“用花紙就一定尊重”。可能是人類的錯覺,但是已經成為社會的潛規則。
有時我更加尊重“有隱衷而包花紙噶人”,因為他們可能為了一些很偉大的原因(例如要養家,或者只不過系想買一件名牌,買名牌我當系好偉大噶啦)。
若隱若現,點都比赤裸裸吸引。

Anonymous said...

Pessimist said...

一張花紙還好,有時遇到包上幾廿層花紙的東西,都唔知應該繼續拆還是冇癮地將它棄掉...

Anonymous said...

海灘...當我對住那份令我透唔到氣既工作,那個令我討厭既老闆,我總會上離呢到睇下減下壓,多謝您.