10.08.2007

三千年後



我很小會post『歌詞』上來,而事實上這一段也不是歌詞,是陳輝陽「十二金釵眾生花內」,第十三cut『三千年後』 內李香琴的獨白,是陳慧小姐的手筆,只要集中去聽,眼淚就自然會流出,利害~`


〈三千年後〉


再見

唔好怪我第一句就同你講再見
因為我真係專程黎同你道別

我知道我係邊個嫁
不過你唔記得左之?

我記得你 你總係笑瞇瞇甘望住我
你唔講嘢 淨係聽我講嘢
嗰陣時個世界好安靜 無而家咁嘈
襯得我特別吱喳 特別開心

我記得你隻手掃過我背脊既感覺
我記得同你去睇影畫戲
你會係響我耳仔邊講嘢
你講得好細聲
其實我一啲都聽唔清楚
不過 我好鍾意聽你甘樣同我講嘢

以後再無人甘樣同過我講嘢

我記得你好鐘意睇日落
睇完日落 就去聽音樂會
我地又成日散步去食宵夜
個陣唔知點解
周不時分唔清究竟係星期幾
日子好似唔會過去
時間都好似係停左落黎
然後 忽然間
就發覺原來已經過左好多年

我記得 好痛
因為你話俾我知你要走

我無再睇過日落
亦都無再同人食宵夜

原來 難過既日子
一樣係好似唔會過去
然後 又係一眨眼
至發覺已經過左好多年

我記得 你同我去過嘅每一個地方
我唔會再去
個啲茶座 舞廳同花園
而家係點 我唔知
個啲地方通通留喺我心裡面

不過 我知道 你唔記得左嘞
唔緊要 我一個人記住就得啦

我點解要走? 怪我自己啦
我先兩日 唔知諗緊乜嘢
無端端走咗去睇日落
個日落就同我記得陪住你睇既嗰個一樣
不過 就算我點樣裝出若無其事
我都無辦法唔承認
我失去嘅嘢實在太多

我太傷心 唔走唔得

我要走喇 如果你記得返我係邊個
我知道 你一定會好唔捨得我
仲會好掛住我

再見


我聽到一個臨死的女子,對舊愛的心聲,既然不知你人在何方,就當你已經忘記了自己,但她離開前,最掛念的仍然是你~~`

你聽到的故事又是怎麼樣呢~`?

17 comments:

Panda said...

灘叔, 係陳輝陽, 唔係陳輝楊...

Panda said...

仲有呀, 灘叔, 多謝你post呢段詞出黎, 唔係我都唔知呢隻碟入面有呢隻歌, 想知好耐了...
我都覺得好正, 好好feel!!

Bo said...

相思相見知何日 此時此地難為情

kat said...

睇過你寫嘅blog同書, 一個咁麻甩嘅麻甩lu入面可以咁豐富, 寫出好多咁touching ge說話, 但係d靚仔得外面塊皮, 好膚淺, 有知識都好, 都要冇常識, 呢個世界真係令人矛盾~
不過我個人o黎講都係appreciate d有裏面嘅人 XD

櫻記士多*Ada* said...

我第一次聽琴姐lee段獨白時已眼濕濕!灘叔點解每次你都有能力觸動人深處的痛嗚...嗚!

che. goo. said...

我聽到0既係一位女子同佢老人痴呆的老伴講的一番說話, 而呢位女子同時亦患上老人痴呆, 開始忘記丈夫...

其實我想話你好out 囉, 隻歌plug左咁耐先推介~~~~hehe

esc said...

我聽到一個靈魂的說話,在她必須永永遠遠消失前對舊愛和自己的過去道別. 還有,灘叔多謝你的介紹,好聽!

20 said...

原裝係琴姐講o既,聽首歌時,我都覺得係鬼魂同佢在生時一個好鍾意但係冇係埋一齊o既男人講,感覺有d胭脂扣。

但求先就咁睇歌詞,幻想係個女仔講的話,我又覺得係一個女仔心裡面同分左手o既男朋友講,雖然知道佢已經唔再鍾意自己,但自己一直唔捨得段感情,今日終於發現唔可以再繼續沉溺落去,決定要離開。不過係離開前,仍然希望個男仔有一刻會想起自己,希望佢仲會掛住自己。

DAY仔 said...

唔知點解,我聽緊呢段野既時侯。就諗起以前係網絡上既一個「風與樹葉」既故仔
一陣微風吹來,可能已然穿越了萬水千山,可能,已橫越了半個地球,甚至,已見證了世間一切人情冷暖。你又如何能寄望它會把你牢記於心......

Candy said...

我覺得係個女人同佢老人痴呆兼臨死的舊愛講的一番說話..佢地相愛但最終無係埋一齊..

Yuki~☆ said...

三千年前...
兩個相愛的靈魂,因為種種原因同波折,一個永墮輪回,另一個卻被留下來長生不死,永世相隔。

三千年來...
被留下來的一個,一直孤獨地守護著屬于他們的那份刻骨的回憶和感情,并只能在遠處默默地守望著不再記得自己的愛人。

三千年後...
她再一次亦是最後一次出向愛人傾吐愛意,代價是“永遠的存在”的相反——“永遠的消散”。

Anonymous said...

-helenato-

個心有d寒,
睇完自知,自己唔嚇得.

"妳安心d上路啦!無野要寄掛架!"

Anonymous said...

朋友,,呢期咁感性呀~~
are u ok???

不中留 said...

閣下 麻甩星球的 球友網
http://charcoal4.blogspot.com/2006/12/blog-post_25.html-- 生力啤妹

pvc said...

幾個月前朋友點咗呢首三千後我聽,嗰次我第一次聽亦竟然一聽就令我喊~我愛李香琴!

Q子 said...

我都會忍唔住想喊...次次聽都要攞定紙巾先得.....
仲有二汶的星星月亮太陽都好好聽....

snowfalling said...

我个电脑只有简体输入,希望你睇得明。

05年旅居香港开始听商台,第一次听呢段三千年后,第一句就认出是李香琴把声,实在讲得太好,我在忙碌之际却完全地停了下来,静静地听。歌曲同这段独白配合得十分完美,带点淡淡哀伤的甜美回忆,美丽但已远去的青春岁月,怀念但无悔的从容。

我听到的,是“从前的香港”同“旧香港人”的对话。

我觉得,从前那个香港正在消失。这段三千年后像她与旧香港人之间的一段对话。有点伤感,但大势所趋,旧的香港,有人情味,有特色,有自信,有坚持,串得起那个香港,逐渐消失。旧香港人,年岁也大,经过风浪,亦熬过变迁,明白变幻才是永恒,不舍但亦没有歇斯底里,大家以多年来“修”来的风度,默默地送别香港。