5.27.2007

我的法蘭茜式崇拜




成長的年代,身邊人崇拜的,皆是日本偶像,中森明菜、近籐真彥、虎柿隊....唔想咁跟風,可以選擇順便學埋英文的英倫偶像,如DM、Duran Duran、Madoona、bananarama.....

年青人分三種,潮流興乜,我就跟乜,他們是「盲流」,盲目死跟潮流,另一種是「潮流由我創,創之不盡」,他們是「下流」,下意識製造出新潮流,等盲流去跟,跟到佢喘晒氣,而第三種是「風流」,我當然話我是屬於這一流啦,哈!但我的而且確曾是,經常留意其他主流以外的風,希望早人一步,你興緊日本、英國風、我已經留意緊法國,到你興法國風,我已經去左拉丁果邊....

從前我曾經我是法蘭茜式崇拜者,就大約在八十年代初至中期....

年輕時為了告訴別人,我是法國迷,會迷戀法國電影,高達、杜魯福、依力盧馬拍的電影,我全部睇晒,雖然有九成以上係完全唔明佢講乜,但總會覺得「唔明咪型」羅!就等如你對Matrix又有幾明,總之型就得啦!然後其他時間梗係渣住樽PIRRIER,你咪理我裡面係屋企暖水壺隔夜水,個樽緊要丫麻,如果有BUDGET,就梗係買多條法蘭茜長麵包,夾係腋下,「C est la vie~~」

當時真係「迷」得好緊要,係好迷,連去茶餐廳都淨係叫「西多士」食,屋企把牛角扇都叫做「croissant fan」;講到天花龍鳳,高達的斷了氣,其實就是春光乍洩的前身,leo carax的 the night is young不是墜落天使的法國版嗎?拉埋王大導落水,無非都係想拉高d自己level,其實又有幾型丫,到而家最記得咪又係得幾個性感女星~~

不過呢幾位,絕對見得人




敢問我輩男孩,有邊個未為蘇菲馬素付出過?! 但自從雲上的天空正面全裸後,我的夢完了,近幾年更加慘不忍睹,還是回到記憶中最美麗的畫面好!




我無辦法推荐一部近年juliette binoche好看的電影給大家,行霸的推介當然是「藍」,其實她最好是初出道,跟男友導演leo carax的幾部電影,The Night is young(中譯虎父無犬子),還有我認為是近代靡爛愛情經典的Les Amants de Pont-Neuf(新橋之戀),都已經是八三年作品,但最近重看,依然重人...
好友也是她迷哥,看罷侯孝賢的新作《紅氣球》(Le voyage du ballon rouge),發了一個短訊給我,「無論導與演,都是從前的好」

我的回覆是 「我們不是懷舊,只是想東西停留在最好的時光裡」







近年最迷的法蘭茜女星就只有Audrey Tautou,她絕對是我杯迷茶,眼大大,一臉茫然,美麗又性感,高貴但又親切,Far away so close....唔明我講乜?!迷左梗係咩都靚,我把呎點會同你果把,除非你都係迷左~`





但以上講的感覺,其實全是來自一部戲,咪就係呢部羅!



其實部戲勁係導演Jean-Pierre Jeunet到,通常奇幻片的世界,總會披露人性黑暗面,好小有一部咁好心腸,幫人幫到人靚d,世界靚d,咩人做咩野,無呢種情操,導演又點拍到出黎!

極力推荐93年舊作 「Delicatessen 」(港譯妙不可言)

能夠遇到個可以將自己最好一面情呈現的伯樂,是AUDREY福氣,也是我們影迷的福氣,但我好清楚幸福不是必然,愛美麗的好,可能是不可再,因為太好了,所以我其實一直就只看過Audrey Tautou這一部戲,經驗告訴,花無百日好,無謂到好像其他女星一樣,某年某月某日看到的,仍然是懷念從前的好!



咁點解又會再去睇呢部戲,因為我窮途末路,需要一部愛情片沖擊!睇頭十分鐘,見到Audrey Tautou又乾又瘦又殘,我真係好後悔入左場,諗住睇多陣就走,但後來俾我搵到個位續繼睇落去,佢咁乾咁瘦咁殘,係為左配合個角色,通常d風塵女子,又煙又酒又夜生活,皮膚梗係差d,但為左搵食,又要繼續行性感,無錯!audrey 真係PRO,為左演出,不惜一齊,細看佢依然美麗、明艷、性感、好戲~``

終於我睇晒部戲,仲覺得幾好睇,王晶橋法國人拍,感覺似曾相識,但又截然不同,仲幾幫到手添,如果你睇左唔認同唔緊要,一切都是供與求,我需要愛情片,它滿足到我果一刻需求,我決定未清醒要續繼迷,所以我看到的,都是 Audrey Tautou的好處...

崇拜也是一種需要,你夠崇拜自己,駛乜駛祟拜其他人~`

21 comments:

清清河邊草 said...

兩部戲既ending都係一樣 - 塔圖與愛人騎著電單車, 幸福的遊車河去

阿朗利密斯 said...

audrey tautou一點都唔靚,只是天使愛美麗劇本令佢很討好,之後的什麼神婆愛美麗...悶到嘔. 逹文西又好花瓶。 真是各花入各眼。

Anonymous said...

i love the movie amelie from monmarte! i think i have re-watched it for like 50 times! whenever i feel down i would put the DVD on again to remind myself that the world is still beautiful, there are still good people around and we can still help to make a difference to the fxxked up world :)

amelicious

samsam said...

灘叔
祟拜你係因為我睇到你肉慾咸濕的外表下的一顆善良大愛之心‧‧‧

Edmond said...

法國版既嫁個有錢人
Audrey Tautou真係靚

p.s. 我第一次出post的

Anonymous said...

Have you seen "Chocolat" with juliette binoche? It's good too.

pvc said...

我家姐以前都好鍾意蘇菲馬素,尤其係佢超迷Le Boum(個名好似係咁樣串),我都叫做迷過吓,不過只係套戲首歌"reality"...嗰陣覺得係超浪漫囉 :D

白雪山 said...

在驚世未了緣第一眼見到蘇菲瑪素已經覺得佢似天仙下凡,柯德莉荅圖由可愛到現在的美麗,依然令我愛戴...keep住呀, 各位脫俗仙子...灘叔,你都系呀 !!

RyanFour said...

Audrey的獨特氣質令佢雖然唔係好靚,但你都會比佢吸引~

unkle beach said...

pvc:
我以為妳家姐以前好似蘇小姐,haha

ptony said...

個新mini game 好正 -_-

pirate uncle beach

scarred v said...

只可話外國女星的青春消逝得太快了...
最美那刻是第一套爆出來的電影﹐驚為天人!
Juliette Binoche這幾年啲電影只看到她的美人遲暮﹐Sigh...
Audrey Tautou身段好纖瘦﹐着啲名牌衫好靚﹐但總覺得佢個頭大到唔係幾啱比例。
反而hors de prix其貌不揚的男主角越睇越charm﹐只看到他散發的光芒。

小朱飛刀 said...

其他Audrey Tautou 的片我也一套也看過, 但Amelie,是繼GONE WITH THE WIND, 是另一部我常翻看的戲,家人常問為何一看再看。

最近也留意到此片, 感覺像天使要變回凡人,亦由以前的甜到漏的甜姐兒變為成熟嬌媚的女老千..不敢恭維.

始終仍喜愛 Amelie 中的簡單純真,即影即有相房中的勇敢的小天使.

Anonymous said...

-helenato-

對法蘭西無乜情意結.
係仲未有潛水艇,飛機,雷達...年代,
善於打仗行軍排陣napoleon(拿破崙)黎講,
就有另類魅力,
我用左佢長眠地st.helena island紀念佢.

慧美 said...

海灘哥,
我之前響度留過言,點解會無左既?
唔制呀!

pvc said...

unkle beach:
嘩,唔好玩喇! LOL :D 雖則佢當年可能都幾恨似蘇小姐咁樣喎..哈哈 :D

Anonymous said...

I have been living in Montreal for 12 years, speak french for almost 10 years, such shame that i have never watched a french movie. :(

-AK

jl said...

to samsam,

同意呀~
如果灘叔唔係咁狼樣,
我諗都係個好浪漫嘅理想情人嘅~~

belle said...

我都好喜歡Audrey Tautou!
我覺得佢真係好有 柯德莉夏萍

qt芝士 said...

我也很迷他, 單是那雙眼, 已夠煞食~

S said...

睇埋 Jeux d'enfants (love me if you dare)仲正呀~~~ + 男女主角都十分迷人!