遺忘了的周末狂熱

從前我的周末，都是在失憶中渡過，但現在已經很久很久沒有這種場面了！




話說好朋友生日，係上環包了一間小型日本串燒店搞派對，幾十人困在一間幾百呎兼烏煙瘴氣的日式小屋裡，如果外面天氣像早排般寒凍，感覺會像置身於北海道小樽，但昨晚我覺得似身處於泰國巴堤雅，唯一分別是在巴堤雅是飲啤酒，在這裡是飲燒酒，爭幾遠我唔知，我淨係知我食完幾粒燒白果之後，就乜都唔記得晒！如果唔關d酒事，咁應該係d白果落左野！




我張開眼就已經係卡拉ok，然後就見到呢幅相，好貼題的兩個字「會受」，影相的人是Ann choi，佢幾時到？我估應該係果時

我又醒番，佢又係度，梗係搵佢幫我影相啦！




搵Ann choi平時影相要有方法，就係千祈唔好叫佢影相，佢見你影得唔好，就會忍唔住「唔係咁呀！」，然後羅妳部相機幫你影，百試百靈！不過呢個秘密唔好四圍同人講呀！




下面呢一幅係我影o既！你知唔知Ann睇完評語係乜丫？




















Model夠好就可以補救到攝影技術惡劣的問題！

然後我又繼續飲，所以之後係點？我只係記得一樣野，就係好「快樂」，如果記憶可以選擇只記快樂事，你一定會拍掌贊成，但沒有不快樂，就好難比較出什麼才是快樂！

We'll take the good times and the bad times ~`

麵包高高高~

收到麵包天使最新消息，今日下午往紅十字會第二次驗血，進行第二次測試






她說捐血好抵，事後有餅乾食，慳番一餐仲可以減肥，而d餅仲好好食。甚麼東西都可以好吃，只要食之前你做了件有意義的事！



麵包天使有個要求，因為有關方面無法肯定最後成功機會有幾多，她希望各位為她祝福，加強她的能量，好！我帶頭「支持！支持！」

我想做天使

今日我在〈圓方〉飲咖啡，等夠鐘睇戲，突然有位妙齡少女走到我面前，抬頭一看，未見到少女面貌，先見到一個拳頭咁大o既毛公仔，在我面前搖來搖去，然後一把溫婉的聲音飄入我耳朵

「灘叔！呢個係麵包超人，佢見到邊個肚餓無野食，會搣甩個頭俾人充飢架！」

我一時間唔識反應，又俾隻超人搖到開始頭暈，要幾秒後先識捉實個超人回應

「妳早d過黎，我咪唔駛叫個意粉食羅！」

麵包超人隨著她的可愛笑聲慢慢飛走，終於看到少女的面容，皮膚白晢，眼睛又圓又大，有點像未收baby fat的Audrey Tautou

「灘叔！我想做天使！」

「多謝妳加入及支持，我努力搵人搞緊個新網頁，不過其實妳唔駛等我，天使無時無刻都可以做」

「我知...所以我咪話我想做天使羅！」

「點先？！我唔明妳想講咩喎，係咪要IQ題，估乜？俾d貼士」

「我好開心呀！今朝紅十字會打電話俾我，話我d血初步吻合某人，有機會捐到骨髓俾某人！」

我呆住左五秒，然後突然深深抽到一口氣，想不到我眼前這位廿來歲的小妹妹，比任何一位天使更天使，然後我終於明白佢話「我想做天使」的意思！

我再問她「有心理準備會好痛喎！」

「我知...但救番一條命喎！」

「好啦！到時我最多學麵包超人咁，搣甩個頭俾妳咬住啦！」

「多謝你灘叔！」

「我多謝妳就真！麵包天使」

之後麵包天使話佢應該係奧運站落車，但掛住睇書過左站，順勢到圓方逛逛，竟然神奇地撞到我！其實一點也不神奇，個劇本上面一早寫好晒！臨走前她一再強調，每年只有三十幾人可以成功捐增骨髓俾有需要的人，她好希望成為其中一份子！其實做天使係一個態度，結果是成功與否根本毋須擔心，只要能夠令到更多人可以做天使，就一定會成功幫到有需要的人。


所以好多謝妳！麵包天使！

各位毋須等Angelbeach成立，只要你想去做，你立刻就是「天使」！

失戀怎會未經過

可能是大氣場影響，今日連續收到七封email，都是有人失戀要求救，但其實每日每分每秒都有人失戀，七封又算得是什麼？失戀又算得是什麼，但晚上做節目聽到一位因失戀而自殺，最後搞到仰鬱症的A-level女生電話後，我認為「失戀」是要正視的！就讓我簡單地告之天下，「失戀」究竟是什麼一回事

「失戀」就等如跌銀包，唔想發生，但人生裡總會試過...

跌第一次，你會損失好嚴重，因為你所有都放晒入銀包
跌第二次，如果你損失更嚴重，証明你仲有大把本錢
跌第三次，如果你損仲嚴重過上兩次，恭喜你，你仲有大把本錢，否則你會開始放少好多入銀包
跌第四次，你會考慮再放少d入銀包，又或者已經開始唔介意，仲有dd享受呢種「失去」
跌第五次，你開始明白自己可能唔適合用銀包，將財物四圍存放，反而無損失
跌第六次：如果你仲用銀包，你根本就係一個鍾意不停換銀包的人
跌第七至N次，你都應該無咩感覺啦！同埋都好慶幸自己可以有咁多次戀愛，賺晒啦！

不滿回暖

「凍得一個星期又暖番」

「暖番咪好羅！咁凍你呢d老人家好易病」

「點會病？！著多d衫咪得羅，夠凍至著得多幾件，著得有款d」

「你咁款，著幾多都咁款架啦，體恤下其他無乜衫著d老人家，回暖係好事！」

「係好事！不過春天回南天濕濕邋邋仲易病.....不過未食五月粽，仲會有日子凍...」

原則上這番閒話家常已經講完，但三秒後我聽到強哥喃喃自語

「我今年都仲有兩件褸未著過....」

強哥貪靚到咁，由咁鍾意迪偉，其實你係咪來到呢個年紀先搵番自己真正個取向，而做仔o既只可以講最行果句「你開心咪得羅！」 唉~`

Angel is all around

已經收到很多天使EMAIL，但抱歉我對這些東西一竅不通，所以要看懂亦須時，不過大家放心，這是一個永恆的計劃，所以就算ANGELBEACH未建成，大家亦已經可以做天使！
各位可以繼續提供意見，但其實最緊要是解決方法，希望下星期可以有成個灘的雛形，信我！呢次一定會做，唔會講完就算！

We re all ANGELS

我在屋村長大，我喜歡「小社區」情懷，一個「街市」，一個「lift口位」，一個「涼亭」，一個「士多外的空地」，一個「籃球場」...任何一個地方，都是社區的平台，你有什麼問題，只要在「平台」上發表，就算現場找不到天使相助，都總有傳聲大使，把你的問題轉到其他地方，讓有能力的天使知道，空降到你面前相助，今次天使幫你，下次你化身天使幫人，別以為要有強大能力，才可化身「天使」，其實別小覷你的一點點幫忙，對需要援手的人來講，那是極大的能量！
雖然現在我已經離開了那個小社區，但依然相信那裡的力量，我有什麼問題，都會講俾阿媽知，等佢有機會到平台時，傳遞給會來拯救我的天使知道，我的脊椎痛一直無法根治，就是靠她在平台發表，傳播給現在幫我醫番好晒o既天使推拿師知道

我深信在我這裡出入的天使也有不少，只不過沒有人提出要幫忙，他們都日日無工開，所以我決定一使當先，希望製造一個「平台」，來讓有問題的人可以發表，讓天使出手相助，而這個收容天使的平台要比平台大，要海灘咁大，所以命名為「天使海灘」~`《AngelBeach》

你解決不了的問題，都可以留言，待有能力天使出手相助，但聲明這個並不是「討論區」，也不能有賣買出現，例如：你不能留言話我好想睇陳奕迅演唱會，邊個有飛？亦唔希望是少男少女的感情信箱或結識地台（這些問題email去er.beach@hotmail.com或打上1872都可以解決），但如果你覺得老父孤獨，想為他找個老伴，就可以留言，簡單來講，就是比情情塔塔有意義的問題，你未明唔緊要，形式仍然在思考中，相信開始時是來者不拒，我會先censor過才放出海灘



這是一個集大家力量的事情，所以靠我一人之力，是無法實行的，單是搞這兩個logo，已經化了我很多氣力，時間，幸好有20及oel、samantha ting這幾位天使123號幫手，但希望更多天使出手相助，我現在需要的是「設計網頁」的天使，話我知應該點建立呢個「AngelBeach」，究竟是一個網頁，還是一個forum形式的東西，我願意付出酬勞，因為其實我亦想四四正正地開闢自己的網頁，一個連國內都可以看到的網頁，內裡有不同的地方，有「Angelbeach」、「答書」、「文字」、「相片」等等等
等待天使們的出現！

認同我這個海灘的天使們，請留言給予我一點力量，可以幫我製造這海灘的天使，留言後email去er.beach@hotmail.com，方便我聯絡及約你傾談

另一葉

與葉問導演葉偉信談論「葉問2」的上畫檔期，阿信擔心檔期撞正世界杯，會影響票房，說罷三秒後，我們都異口同聲地說「我們第一次合作的電影，又是遇上世界杯」，那部電影是「生化壽司」，上個世紀1998年，當年法國爭議性地奪得世界杯，令無數外圍莊家輸爆廠著草走數，啟發了我們之後「茱麗葉與梁山伯」男主角吳鎮宇的角色；我其實好怕講呢d陳年舊事，人都是貪新忘舊，你懷舊即是無新野，但不經不覺認識了葉偉信原來已經有十二年，看到他現在的成就，又難免會想從前，他還是瘋狂爆裂，一起合作的年代！



從前葉偉信是「神經魔術師」，不停地變，+很多時我們都猜不到他會變什麼，但更多時侯是他自己亦不知會變什麼，他通常最後會變走自己，但我們依然期待看他的魔術表演，因為確實是難以想像的精彩，但他為了越變越大，中間是有失手過，還不只一次，我雖然知箇中失手的原因，但亦不得不承認，「導火線」、「龍虎門」是難睇的，但無上一葉，又點會有現在這一葉！

現在的葉偉信，再沒有那份年少氣盛，沒了崚角，像一個隨時可以起動的車輪，少了點憤怒，但依然幽默黑色，還多了點沙糖，好有層次感，這可能就是世人稱之為的「成熟了~`」







我看了「葉問2」的rough cut，第一個感覺就是回想起「龍虎門」甄生果個假髮，膽拖二十四小時不停站的「chop樣」，到「導火線」果份超乎「自戀」的狀態，當時確實覺得「好難頂」，但到「葉問」，由甄生肯剪戲中的「髮型」，再加上終於肯放鬆自己去演，終於覺得他「其實都幾好睇」，到今次「葉問2」，有笑、有淚、有情、有打，我個人覺得甄生今次演「文戲」比「打戲」還要好睇，果種感覺可能是世人稱之為「成熟了~`」

「成熟」是要等待，但不知不覺就會來臨！一位很久不見的幕後工作人員謂「忍唔住」要問我「你變左咁多o既？！開始有男人味羅喎！」我本來想舉高隻手嗅嗅腋下然後說「無味呀！」但終於我選擇把聲壓低「真係？咁我真係請飲下午茶！」，我覺得咁做比較Man！問你怕未


我睇這幅相，就依然覺得自己好「o靚仔」，不過都係果句「成熟不知不覺就會來臨！」，正如我臨走時，葉偉信問我「你準備好未呀？」 「駛乜準備架！話黎就黎架啦！」

至強

我曾經年少無知地認為，自己可以成為你的接班人，但其實我根本連完成九十分鐘比賽的能力也沒有，而你不但有能力，還有接近固執的鬥志，由從前至今，由球場到病床上，你力戰到最後一秒，得到萬人景仰，但卻辛苦了自己，或許這就叫做「真漢子」，這就叫做「真英雄」，人生都只不過是一場會完場的賽事，你不是提早離場，只是功成身退，綠茵上只留下白雪，從此再沒有人說她是「對人歡笑背人愁」，白雪其實一早已解脫，所以她永遠美麗，因為她的心很美，放心吧！掛念你的不只白雪，還有跟你一起成長的他他他他他他他......你在另一個球場上拼博吧！我們會繼續為你彩歡呼喝彩，「香港第一中鋒」至強 ！

真相是難以令人接受的

以下內容全是真人真事，但內容可能引起閣下不安，看之前要有心理準備。

當所有親戚圍住阿婆時，個個都問佢「認唔認得我呀？」，我心想如果我係阿婆，認得都扮唔認得啦，個個都要話認得咪辛苦過平時，但過時過節有d野唔可以唔做，就係「交戲」，見阿婆個個都點頭點腦就知佢交緊戲，雖然無個親戚佢認得，但我都照樣走埋佢面前「交戲」 「阿婆！認唔認得我呀！」，以為阿婆點完頭就算，點知佢竟然講得出我係邊個「....大佬光...」，從來都唔想做大佬，但呢次就做得好開心！跟住d親戚梗係起哄，「搞錯呀！點解妳淨係認得阿光....」幾秒後，阿婆講出左一個可能令到大家不安的答案，各位如果未成年，最好有家長陪同下至睇落去...阿婆話






「佢..靚仔！」

老人家講o既說話，大家一定要尊重，所以就算妳無法接受呢個事實，你都最好唔好反對！而我本人對呢件事係無回應，我只可以話「阿婆係識貨之人！！！」

AngelBeach

Stay tuned!The AngelBeach is coming to town soon!!


Project AB 201O~`

天天向上

同我一樣！

珍惜相聚時

我有一個外婆，佢好溜廢，成日話我「溜溜廢廢」，話左我三十年，但近年已經少話左我了，唔係我不再溜廢，是因為她現居療養院，見的機會越來越少，仲邊有機會話我，以往每逢同佢拜年，就係俾佢話我「溜廢」o既好日子，但今年.....

「阿媽！今年初幾去探外婆？」

「你鍾意幾時去就幾時去啦，唔一定要初一二三，果幾日好多人，你得閒等少d人至去啦.......反正外婆已經認唔到我地！」

一個月前聽到外婆因為長期坐輪椅，背部皮膚潰爛，聽聞傷口有手掌咁大，但一直無法埋口，醫生亦說「唔好再惡化，已經是萬幸！」
媽媽說自己亦不想看到她，每次探望完，都幾天無法入睡，有時真係想外婆快d走，唔好再受苦！好心痛！

「媽！有時未受夠，未還晒債，咪無得走羅！」

「我當然知佢未受夠！但看到真的好心痛！」

「今世受晒，下世就享福架喇！其實佢都唔多覺，無乜痛苦，妳唔開心就太笨....強哥！點解你老婆咁Q蠢」

你可以話我不孝，但係公共場所，我寧願咁總好過同阿媽一齊喊！

「人終須要一別，但可唔可以走得舒服d？！」

「咁同其他d阿姨、舅父聚會呀？」

我以為自己好聰明，刻意轉話題去避開d唏噓話題，點知.....

「22號！」

我繼續扮醒目，扮孝順

「22號咪妳生日，咁可以搞大去喎！」

我個去「喎」字都未講完，阿媽已經喝止我

「唔搞！幾十歲生日已經無咩好慶祝，更何況生日其實是阿媽的受苦日，我阿媽而家咁，你要我大魚大肉，我食唔落！」

「deeeeee~`」

係要搞到大家都喊先安樂！

何為一個有型男人，就係少說話，而係最適當時侯講一句就搞掂晒！強哥就係呢種男人！

「做人係咁架啦！最緊有得食就食，有得見就見，咁就死得眼閉架喇！」


《珍惜相聚時》 共勉之~`

Star~

香港從前好多Star，香港現在得好少Star，香港已經再沒有新Star，幸好還有她他照亮著！

什麼是Star，自己睇！




我真心替你不值，就算「意外」沒有，「竊聽風雲」的角色，我們編劇認為的羅獎角色，而你的演出沒有提名是令人錯愕的，但正如你所講「話算啦，其實即係好介意！」，咁不如就「算啦！」，至少做番自己！一切都係時間問題，你要提名羅獎，都是指日可待的事！

關於黎明的二三事

有關黎明，我比廣大觀眾們認識多一點，多幾多？多了三次。第一次跟黎生接觸，是2001年的冬天，我為電影「情迷大話王」客串，與張達明一同飾演他的好友，鏡頭前我們是好友，但鏡頭後我們其實甚少交談，因為完成每個鏡頭後，黎生就會返回他的保姆車休息，直至後來在一個氣溫只有七度的寒冷晚上，我們困在清水灣一座向海的別墅拍攝，凍得牙關打震。晚飯前，製片走過來問我們「黎生萬歲，要加什麼菜？」明星萬歲，在片場是平常的事，而我總愛胡亂回答，例如「盆菜... 」、「蒸條魚吧.... 」，工作人員對我的亂答已習以為常，所以通常聽罷都不會理會，而那個晚上實在太凍，我隨心而說「不如打邊爐吧！」，工作人員沒好氣地回敬了我一句「我都想... 不如你去買...」，此時我才發現原來黎生一直站在不遠處，他向我們抿嘴一笑，然後轉身而去，不出一小時後，一輛七人車駛至，幾名大漢托著大箱細箱東西下車，手切、本地、美國雪花、日本和牛、沙嗲、麻辣、海底椰、豬骨湯底，各式肉丸，新鮮蔬菜，清熱涼茶，各式其式，應有盡有，到「火窩店」打一世邊爐，亦未必得到這樣的排場，這樣的體驗；那個寒冷的通宵拍攝夜，所有工作人員都很溫暖；收工時我多謝黎生「感謝你這個窩心的火窩！」黎生帶笑地回應「有些人有能力想出一些主意，有些人有能力把一些主意實現，我們都是做好自己本份，去令其他人快樂！」晨光初現，我看著黎明時份的黎明，腦裡面驀然響起了音樂彩繪家甘道夫的「黎明天使的花園」，那刻我很奇怪的覺得，眼前的人就是傳說中「可以付託終生的男人」，就算在現實世界不是，至少在電影世界內，要演活情深義重的角色，一定非他莫屬！終於在一年後，我的想法被証證了

2002年初，我跟黎明再次合作，這一回我的身份不再是演員，我是電影「三更之回家」的編劇。導演陳可辛告知「回家」是關於一個情深丈夫堅信死去太太會復活的故事，起初我是有所質疑，但並非質疑故事的可信性，是誰可以演譯出這份接近瘋子的堅持，而令觀眾信服及至同情他而感動，可是選角並不是編劇可以控制的事，我只可以在編寫時幻想由誰去演譯，而這個故事的結局一開始時已鎖定為悲劇收場，男女主角雙雙死去，但在殮房內，卻發現二人竟然十指緊扣，畫面回憶到男主角第一次拖著女主角的手，以手指在她手背上寫了「至死不渝」，編寫時我代入了女主角當中，眼看到的他就是黎明，而我跟女主角，都澘然淚下.......

後來黎生決定出演這個角色，卻換來一些人的質疑，要這位萬人迷，大情聖，飾演情深義重，此至不渝，一生只愛一個的角色，會否欠缺了一點說服力，而當時我的心態是跟劇中的男主角一樣，「我做的一切，並不是要其他人相信，這一切都是為愛而做」，經得起越大考驗，証明愛得越深！於是我把角色的難度加大，把原先戲中丈夫幻想妻子仍然活著的「對手戲」全改掉，變成了丈夫只有對著妻子屍體的「獨腳戲」，單憑他獨個兒對著妻子談情，跳舞，梳洗，扮靚... 去表達對妻子的情深，這不但是對劇中人的考驗，同時也是我對自己信念的一個大考驗，但終於我在拍攝現場，看著黎明在床上抱著妻子的屍體，求她要振作，不要捨他而去，他的表情木納，卻充滿感染力，現場的工作人員都說「從未看過這樣的一個黎明！」，但其實這個情深的黎明，一直都存在於我心內；拍攝完畢後我跟黎生說「感謝你再一次把我的想法實現！」黎生跟我擁抱，然後對我說了簡單的一番話，內容大慨是「每個人都需要愛，能愛人或被愛都要靠一點緣份，有緣就要好好珍惜，無緣別強求！」
當普羅大眾發現黎明可以如此情深時，原來黎生已經超越了這個層次，「隨緣不攀緣，豁達洒脫」

緣份讓我跟黎明要到八年後，才再有機再合作，這一次我又回到演員的身份，客串他有份演出的電影「Frozen」（暫名），依然是飾演他的朋友！我們在舊機場的一塊空地撘建的一個舞台上拍攝，那一個星期六晚上，適逢是東亞運動會開幕，在場景背後的維港，上演了一幕煙花匯演，製作組其實就是捕捉這一幕，當煙花發放得最美麗時，黎生與我們幾位好友就站在台上打band，璀燦花火成為舞台後的大佈景，因此這樣美麗的一刻，台上的我們只是聽到，但無法看見，我們就像聽電台直播煙花，只聽到轟轟巨響及人聲叫囂，畫面就要靠自己想像，是比完全看不見為痛苦；十多分鐘的煙花放了一大半，剛完成了一個鏡頭的黎生走到台前面，向導演及工作人員嚷著「給我們看一分鐘吧！」，導演最後都批准我們下台，一眾走到台後的荒野上，全天侯眼耳鼻同步感受花火帶給我們難忘的一刻，然後我聽到黎生跟工作人員說 「耳聽為虛，眼見為實，快樂美麗的一刻，應該親身去感受，否則過後就會好後悔！」

有關黎明，我比廣大觀眾們認識多一點，多幾多？多了一點智慧，多了一點歡樂，多了一點美好回憶！

DIk on the BEACH

《DIk on the BEACH》 is an award winning character-based comedy sketch show first appearing on 903 radio. It was written by stars Matt Chow and Alton Yue.

The show comprises sketches involving exaggerated parodies of HK people from all walks of life in various situations familiar to the Hong Kong. These sketches are presented to the viewer together with narration in a manner which suggests that the programme is a guide — aimed at non-HK people — to the ways of life of various classes of HK society. Despite the narrator's description of HK institutions, the comedy is derived from the HK audience's self-deprecating understanding of either themselves or people known to them.





《DIk on the BEACH》 NEW SERIES COMING THIS SUMMER~`

表妹 妳好野！

其實我今次本來計劃落幾日Prague，但臨上機都係決定唔去，而之後我知道我呢個決定係絕對無錯，各位請忘記傳說中浪漫到飛起，唔去過枉過此生的捷克首都布拉格，我已經不下一次聽到每個去完之後，都係媽聲四起，收得貴又無服侍，仲好歧視最大消費者 華人，又要搵人錢，又要討厭人，除非你唔睇「木偶戲」會死，又或者前世欠左呢個地方，否則千祈唔好去！

咁本來計劃取消，我無端端多留倫敦幾日，完全無晒計劃！正正正！「無計劃就是最好計劃！」於是相約第一次在倫敦見面的朋友，一見到面佢就話帶我去見「表妹」，我雖然唔多知呢位朋友幾多歲，但係除非佢日日浸protox，否則點睇都唔過二十七歲，佢表妹就算同年，咁都衰極有限啦！正所謂衰到極都仲有青春，所以其實佢都未講完話搵表妹做乜，我已經答「我行得架喇！」



你睇我當時幾開心！咁先係去Trip架麻！估唔到D行程先秒秒有期待丫麻！去到撘TUBE，係PADDINGTON落車轉火車？仲要來回飛成廿五英磅，「嘩！妳表妹係OXFORD！」「你去過未？」「都十幾二十年前！」




上次來個景像係點都已經好模糊，今次仲唔清楚，因為一到步就被拉左佢HIGH個正宗 ENGLISH TEA







都未有時間同表妹正式溝通溝通，張單已經送到，佢地話要行人，仲有地方去！





埋單無所謂，不過我真係要問問「妳地去果個地方，帶唔帶得我去架？」「去得！橫掂你咁鍾意埋單！」然後兩表姐妹互望陰笑！我成日講出去點玩都得，最緊要保護到自己，所以我臨走前已經入廁所，將銀包大部份英磅及信用咭收起，留番最細額果張係銀包，將有可能的損失減到最低後，我怕咩跟妳地走！

表妹手車都幾辣，十五分鐘就到達目的地 「哦！Bicester Village」，呢個係英國東南部的出名Outlet Market，幾多人特登係倫敦撘車過來掃貨，但現場所見，這個Market已經變成中華民族街市，但由於佢地全部都係鋪頭裡面，所以只要留係鋪外，這裡還是一個不錯的地方！












































當每個人都瘋狂掃那些off season的加威貨，由天光買到天黑亦樂此不疲，我就係室外由天光hae到天黑，呢種眾人皆醒我獨醉的態度是我最鍾意的！
「你唔係麻？個個係度買衫買袋買鞋，你買左兩杯咖啡！」表妹簡直覺得我是暴殄天物，而我當然借勢保護自己，順水推舟「呢幾日駛大左，爆左咭無得再買野！」 「真係架？你想買咩呀！我幫妳轆住咭先啦！」果一刻我真係有d內疚，原來表妹咁有義氣，我睇錯左妳！「今晚我請食飯！」 「你又話爆左咭？！」「...請...食.飯..應該...仲轆到....」「一陣唔得咪尷尬，等我黎啦！」，既然係咁我都好難say no啦！果一刻我先知，其實老千同被千者，原來係一線之差，以為被千果位，變左做老千啦！







呢間舊式英倫餐廳，吃的東西一如一般英式餐廳，大件夠熱肉質烹調一般，但最吸引我的，還是下面最低果個甜品，我問住左多年的表妹，呢個是什麼甜品，佢都無法答到我！


各位高手「Spotted dick，homemade custard」，究竟係陽具軟質奶油冰淇淋，還是整果位叫做阿dick呢？由於現場果位待應太風趣，叫我地order一件就知係咩，大拿拿六十幾銀港紙，而真係唔知「係乜X？」，再加上埋單的表妹亦無興趣去知，所以到現在我都未知，各位高手出出手話我知，呢味究竟係乜x甜品


以英國的消費，這一日我係駛得最少，而得到最多，有飲有食仲收到表妹左對Paul Smith靚襪俾我做禮物，可惜表姐妹聲明唔可以將合照放上網，所以我只可以話俾大家知，佢兩表姐妹都好正！至少心地好好好好！呃飲呃食左成日，點都要講番句幾好說話啦！不過真心感激表妹同表姐，妳再次給我肯定「越無計劃就越精彩刺激！」 些些