11.25.2008

我愛你不變



有一個晚上,我在MSN上送了黃耀明的新歌「同一個世界」給好朋友,還大力推介這是明哥回勇之作,但朋友竟然冷淡回應「哦!」,我深深不忿追問朋友「點解哦?!」 得到一個更冷酷的答案,「我不愛他已經有近十年,事實他現在仍停留在十年前!」我默言無語了一會,還是理直氣壯地向好友聲明「我!仍!然!愛!他!」,輪到好友窮不捨「你愛他什麼?」我毫不猶豫回覆他「我愛他到現在還是不啋我!」,好友回覆十個「哈!」然後說「我輸!」

有一個八十年代我愛到死的浪子填詞家,從前恃才傲物,待人極其無禮貌,但人當紅這些不敬會改稱為「有性格」,後來他由於太有性格,開始無詞填,但由於外表有型!於是他開始客串電影演出,有一次我做導演找他來客串,佢竟然晨早流流見到我,九十度鞠躬,聲調比酒店大堂門僮更誠懇地跟我說「早晨!」,抬頭仲送多個烚熟狗頭笑容,個一刻我想過換人,因為我無辦法見到從前所愛變到咁,比看到初戀情人變成C9更難過!

黃毓民仍然是電台主持的時侯,我原則上是不認識他,但或許他對我會有一點印象,在一個首影禮中,他從遠處「喂」我到來跟前,遞了一張二十圓紙幣給我「同我買兩樽水!」,「你當我乜x野,助手,工人,阿四?!」,我心裡不停重覆問他,同步就走去買兩樽水!我還記得他拿了水,「唔該」都無聲,眼都無望一眼,我差點想把手中的散銀掟爆他,但回心一想「黃毓民係咁x樣架啦!」
「麻不甩」在書展的第二日簽名會,黃毓民在我旁邊攤位嗌得聲嘶力竭,大力推銷他的新書「無所不容而有所不為」,他竟然拿著他的新書走到我面前,「賢弟!多多指教!」,然後把書珍而重之地送給我,還令工作人員為我們拍照,我裝出笑容的那一刻,比他叫我去買兩樽水時更難受!直到最近他的「掟蕉事件」,我才釋懷!「黃毓民梗係咁x樣至岩啦!」

我由「達明一派」就愛明哥,由小fans同同行,到有耳菲文介紹過,一直明哥見到我,都係唔啋我!二十年不變,坦白講,我好驚有日佢會突然同我打招呼或者點頭微笑!所以有時我遇到他,我會轉身運路走!防止結局發生!
我認識對公公婆婆,一起近六十年,公公對婆婆的「口頭禪」永遠都是「唔駛對佢咁好,佢都係鍾意我對佢差!」,每次婆婆都係垂低頭,但提高聲線說「係呀!千祈唔好變,突然對我好,我受唔起折福呀!」

「我愛你,是因為你不變!」

愛我的人放心,我是不會改變,我仍然是我!仍然是繼續會好咸濕的我!多謝各位!

15 comments:

Anonymous said...

多謝你

這些日子下來你都做極正面的鄒凱光

請你要繼續咸濕

我們會繼續支持你

cheers.

Anonymous said...

好認同, 每一個人都應該有自己的性格特點, 而呢d特點亦可能係叫人欣賞之處.

所以灘叔,唔好比我係荃灣街頭見到你因為溝女而攪爛gag呀, 唔係我驚我會睇唔起你呀!!!
Just kidding :)

Anonymous said...

祝繼續咸濕!

粉絲繼續支持咸濕的你!

Anonymous said...

咁如果下次我再在街上遇見海灘你,我唔會叫你啦,因為我唔想見到你係咁意的擺出一副為了招呼粉絲的表情。 我要和你保持距離,為了keep住一份心情繼續欣賞你的文章。

BTW,旅行回程的機上,終於有時間一口氣睇完你本書,之後諗咗好多嘢。 多謝!

Anonymous said...

唔好玩喇,邊個會覺得你呢個咸濕人會變呢!?就算變都係變得更加爆咸濕喇!

浪子填詞人~潘源良!?哈哈~

櫻記士多*Ada* said...

pvc : 我愛死你啊!
衰佬:要變都係鄒凱光變好喇,海灘唔好變啊!

Anonymous said...

我都係由始至終愛明哥. 因為佢好吸引!! 真係好吸引!!!!! 就正如brett anderson, 雖然佢而家既歌無suede年代咁好. 但佢依然吸引!!!!!

Anonymous said...

灘叔!! gogogo~
支持~支持~支持到底!!!

Anonymous said...

所以 你都唔好变 ar 香港人,如果有日俾我梯见你因为迎合内地市场而做出不伦不类的作品,我会鄙视你

Teresa

jpky2727 said...

We all love you, don't worry~

Anonymous said...

放心啦灘叔!你係唔會等到明哥對你改態度的一日~~~~~

Anonymous said...

如果今年聖誕有免費PARTY ,我一樣是愛你不變!

Chi said...

Haha, i like this article!

Love for purely what it is and not for anything in return... Nice!

The word Change has been in my head a lot lately, is it good or bad, i don't know. Just hope I'm still ME.

祝繼續咸濕!!

Anonymous said...

I like the way you are; pls don't make any change:}}

Anonymous said...

就係鍾意你咁,你變我就走~