11.22.2008

裁財才材



收到朋友W的短訊,「幾時約埋其他朋友出來「猜枚」?」,我看罷沒有立刻回覆他,反而第一時間打電話給其他朋友匯報,讓大家有時間想想對策!
我好怕「猜枚」,首先怕用腦,二來怕嘈又粗魯,而最主要我係怕輸,輸完仲要俾人串「唔夠班!」,我覺得除非我掘過對方祖墳,否則我點都唔應該受呢種「點錯相」o既侮辱!但你唔猜唔代表人唔逼你猜,為了逃避猜枚,我唯有四圍去識妹妹!「妹妹!係猜枚逼我!」但最近有種枚,你點避都避唔開,咪就係你猜開果種「財拳」海嘯版「裁員」囉!
「裁員呀!一定中,你定我... 又黎.. 裁!裁!一team人,四!四!四!六!六!六!炒晒去!又黎....三個月,七份糧,唔出住,四圍追,易走數!又黎.... 陸續會...執晒去!執晒去! 飲!」

W四十歲未夠,已被人裁過兩次,正所謂二不離三,基本上在市道最好的時侯,佢都擔心會被炒,更何況現在的環境.....

「我呢d 無功又無過,裁就第一個! 」

呢個時侯,與其去搵假說話安慰對方,倒不如實際地想辦法拯救朋友,一個人的力量有限,所以要朋友們總動員!我們集結了一筆錢,同W對賭,如果W被裁,W獨得全筆錢,如果W無事,筆錢我們可以收回!咁我們贏什麼?!現在環境唔駛蝕,已經有賺!
終於W不負所托,大熱無敵姿勢勝出,派彩那個晚上,W收到彩金後,第一時間請我們去飲酒,還計劃要去一個離開亞洲的旅程,更約好我們去血拼!
「ITS not the END of the WORLD!」

當然我們是知道那筆派金是W的救命錢,但至小他還會想過請我們飲酒,上網尋找過去歐洲的板圖,憧憬過一晚身處克羅地亞的橙色世界中,但由於當地現在的天氣很差,才打算了念頭;而我們也知道他一定會以今年的衫不靚作借口,因而一滴血都無拼出,但至少他有出現過,而不是每天躲在黑暗中,令恐懼無限放大!

「工可以暫時無,做人態度不可以無!」

活著生存只是做人頭盤,主菜是我們要真正享受人生,當中包括悲喜苦樂,但無論快樂或痛苦,我們的態度都不能變,不可以做「財叔」,被裁就縮,一退縮就更難翻身!

「裁員!久不久,四圍有,漆黑裡,唔駛驚,一齊捱... 又黎... 捱多次... 捱多次....三叉仔,七旋斬,開晒去,死唔去!陸續好... 發發發!一定掂!飲!

7 comments:

櫻記士多*Ada* said...

哈...本來心情down down地,睇見你段野又好似安慰左啲!
ps:拱我係咪都有獎金先....

Anonymous said...

W有你呢o的朋友真係好

kahsandra said...

多謝你呢篇話.. 我會記住!!.
.

工可以暫時無,做人態度不可以無!~!!

小朱飛刀 said...

直到這刻暫時未有 fd 被郁,但下一刻未知..
留與不留, 有幸有不幸.
大家繼續頂硬上~~

p.s.我唔識枚, 只玩猜情尋..^0^!
不過會將你這個海嘯版宣揚開去

sc said...

係呢個時候, 老板叫你做咩就做咩, 無得say no, 但諗番, 無人叫你做野, 你仲驚, 這又不是做人的態度嗎? 其實都係搵餐飯食, 無得計!

YOYOs said...

Uncle Beach, you 're 100% right-->做人態度不可以無!
[我們要真正享受人生,當中包括悲喜苦樂,但無論快樂或痛苦,我們的態度都不能變]
Love u so much !!

Enjoy out life!!

Chi-Wai said...

All the best to all the unfortunate people! Good Luck