趕

話行就行，非坐 法拉利不可，紅色底上面有隻馬就是法拉利，高高高~`

SEE YOU SOON~~

My dead-Notes 《2005》

『死』=【盡】

其實「死」字形容得最多並唔係死亡，「死」字大部份時，都係「形容詞」，有時又係「名詞」，「動詞」

死是「這麼近、那麼遠」的感覺

人生由一開始就係會步向死亡,意義在...中間既過程,
連接生與死之間的就是「學習」

死唔死，都唔爭幾

xx好死，欲仙欲死

死力、死頂、死撐、死xx

《恨毒的形容》
死唔斷氣，死不悔改、死剩把口《致命行為》
玩死、激死、鬧死、睇死

《表示賴野》
死喇！死梗！死得！死火！死得！死直！

《稱呼》
死野、死佬、死婆、死人頭、死八公、死仔、死鏟、死黨、老死
大多是親暱的表示

《攻擊用》
都係七武器MEMBER
「你幾時死？！」、「你話死唔死？！」、「作死」、「替死」、「睇你點死！」、「死去邊呀？！」「死埋一堆」、「咁多人死，唔見你死！」、「咁就安樂死喇！」、「佢要死你唔俾佢死呀！」

《死CROSS-OVER動物》
死貓、死魚、死蟹、死雞、死狗、死豬、死馬（鬼馬）tag to『死GAG』

疲周

剛過去這個星期，兩個字形容 「疲累」

星期日（17/2）一日都係親友聚頭，倦得令人十點就熟睡在梳化上，然後到十一點半，竟然收到吳君如電話，
她竟然替陳可辛約我星期一開會時間，說罷便匆匆收線，收線後，我竟然無法訓番！就是這樣，惡夢開始...

星期一（18/2）滿以為節目後，可以先回家急叉三個鐘，然後再出去開會，但由於要替另一位老人家整電視，於是我由星期日晚十二點，一直踩到晚上十點，回家後，第一時間衫都唔換就去訓，點知十二點半收到美國朋友電話，告之後Edison應該星期四開記召，一個我知完但對我完全無關的消息（我可以在節目內說嗎？），再一次打亂我，有質素的睡眠，不是長短，而是能一覺熟睡到醒...若果不能夠， 還連續兩日的話，後果會是.....

星期二（19/2） 由節目完到之後開的兩個會，我的腦和口完全無法協調，說每一句話要先行寫低，還試過寫低，看著讀，卻無法recall到其實想說什麼，到六點幾，我像小孩一樣「扭眼訓」，回到家中，把所有電話關掉，倒頭就睡，可惜三點又驚醒，茫然四顧，不安進襲，再睡我怕返唔到工，於是我開始看電影，到三點九開始睇歐冠，但腦海裡還是一遍空白，似在等什麼進駐

星期三（20/2）節目如常進行，知道新聞人物下一個應該由陳冠希轉為郭炳湘不愛江山愛美人，一方面替edison暗喜，另一方面卻對未來要抖纏的話題，感到極之沮喪，我明白這是我工作，但的而且確我生理上是感到沮喪，即是說我狀態不佳；我走進廁所，洗了個面，跟自己說「今天你不能跌watt，今天很漫長！」 然後我自答多一句「漫長得過人生！」
節目完了之後，我想申請唔開早餐例會，我想去按摩，但未及時開口，已經收到肥肥離世消息，大家又要開會，研究一二台晴朗有什麼搞作，但當時大家的心情都很震撼，根本個個呆住，沒有人可以說話，個會就在死氣沉沉下完結，根住繼續去開會，做做做，想想想，晚上突然收到 來電「你還有多久才到！」
一言驚醒，今天是妹妹生日，我們約好了去吃飯，第一時間撲去，到定神開始享受一家人吃飯的溫馨感覺（那晚也是媽媽的舊曆生日）時，突然又收到馬偉豪女友的sms，說晚上會為馬生搞一個「驚喜生日」派對，我才醒起「係喎！馬生的生日是我妹妹生日後的一天」，但當時我已身心俱疲，口說盡量會來，但其實已有心無力，那派對在十點開始，我九時左右吃完飯，還有近一個鐘，我可以往那裡去，終於我還是回家去，又第一時上床，可惜仍然是三點幾就醒，繼續睇歐冠

星期四（21/2）我已經感覺到渾身不對勁，但比我更加發現身體不適的，是盧覓雪，節目開始前，他支持永住，兩個人做節目，會比平時用的氣力大倍半，節目完，我有一種魂不附體的感覺，幸好劇本會取消，我第一時回家...「要訓鑊金」
點解一間屋要裝修完又再裝，打電話落管理處問要搞幾耐，佢答一個上畫，終於十二半，一齊完工，我第一時間浸個熱浴，然後就去訓，上到床的時間是下午二時，我已經打算直訓到第朝，點知兩點半收到電台電話，Edison會開記召，其實我好想講「我知道好耐喇！」但卻被對方的另一個消息嚇醒 「返黎電台一齊睇記召，然後開會，明天兩台一齊點做呢單新聞」
終於我又無得好好咁訓，回到家，已經是十點，終於我不再是三點驚醒，因為我搞到三點先訓...看到網上網友對我的批評，我想起林海峰某一個早上的一段閒話「從前軟硬做節目，阿葛請假，就會有人fax來批評林生，你一個人做個節目無咁好聽....林生話 點解唔怪唔返工果個！」
Anyway，我會繼續努力改善！

星期五（22/2）終於來到星期五，沒有想過今晚會去邊度玩，因為我最後一個會安排係晚上十點，我七點完了劇本會，還有幾個鐘，其實我應該去按摩休息一下，但我驚訓一訓，醒番要好耐先run it番，但星期五晚，臨時臨急，可以找誰吃飯，又或者咁講，可以星期五晚臨時被約到的，都不會是值得去的約會，於是我出陰招，約迪偉出來「傾工事」，其實當然是搵人飲酒鬆一鬆，終於我同迪偉飲左一支白酒後，我本應跟佢同佢兩個朋友吃日本菜，但途中竟然被我碰見一班很久很久沒見的朋友，說在附近吃飯，我決定留肚，終是我只喝SAKE沒有吃東西，又飲了一支330ml的太白，八點鐘我離開迪偉往舊朋友那處，他們原來在打邊爐，好友拿了一支Macallan 10，嘩！利害，我飲了兩杯已經想即刻買一支返屋企嘆，然後還有無數不知名，但好飲到癲o既 Vodka、Brandy.... 九點三十分，我決定打電話取消下一個會.... 但十一時四十五分，亦即是拍攝完以上照片的時間，我離開廁所，發覺已經身處朋友的「私竇」內，也是原先要開會的地方，我打話給朋友說「對不起，太疲無狀態開會！」朋友不停在大笑，我收線望望四周，我幾時返左屋企！
原來我有去朋友到開會，仲sell左條好橋俾朋友，朋友開心到開左支紅酒飲，我飲完一杯，佢就車我返屋企.....

你係咪覺得好好笑，真正好笑仲未開始，如果你有心機睇到黎呢度，千祈唔好行開，睇埋先....

星期五晚零晨，我收線後突然醒起我未吃過東西，一直只在飲飲飲，於是我在「小食籃」內發現這一排「朱古力餅」


第一時間就放了一塊入口，趙呀趙，發現極鬆化，還有就是Sugar Free，朱古力餅無糖，竟然有咁健康的東西..... 當我正想吞下之際，隨手拿起招紙看看... 之前飲幾多都即刻無晒酒意，成個醒晒

我已經再無去想，點解小食籃會有炭係度，係咪我想過燒炭，更加無深究，點解炭o既包裝要同朱古力餅一樣，我希望我呢個歡樂滿東華食炭o既表演，可以得到善心人仕大力捐輸，幫助有需要的貧苦大眾，咁我就算再辛苦d，都在所不辭~~

情話

「想吃什麼？」
『無所謂』
「中餐定西餐？」
『是旦啦』
「咁即是中定西？」
『你話事啦』
「我想吃日本菜」
『太貴了，吃其他吧』
「那妳想吃什麼？」
『我不知道，你話事吧』
「我就是想吃日本菜」
『是旦啦』
「去那裡吃？」
『我不知道，你話事吧』
「不如去吃意大利菜？」
『無所謂』
「去那裡吃？」
『我不知道，你話事吧』
「香港定九龍？」
『無所謂』
「即是香港定九龍？」
『是旦啦』
「不如去看電影」
『無所謂』
「中文片定西片？」
『是旦啦』
「咁即是中定西？」
『你話事啦』
「我想看鬼片」
『太驚了，看其他吧』
「那妳想看什麼？」
『我不知道，你話事吧』
「我就是想看鬼片」
『是旦啦』
「去那裡看？」
『我不知道，你話事吧』
「不如去腳底按摩？」
『無所謂』
「去那一間按？」
『我不知道，你話事吧』
「按一個鐘定兩個鐘？」
『是旦啦』
「不如......... 」

To be continued.....



祝願世上所有情侶們，情話綿綿，講一生一世都不會嫌悶~`
「飲杯~`」
『飲咩酒？』
「無所謂...... 」

當陽光仍是燦爛時.....

已經很久沒有見過陽光，已經很久不能走出露台伸懶腰，已經寒冷了半個月，已經証明全世界的天氣在改變，距離香港落雪的日子不遠矣！ 等到死之前我都會等~`



無錯！我肯等，你咪即本四月先開晒羅！不過在心理上，我已經嚴重沾染了「桃花」咒，兩個時辰內，一定會慘遭妙齡火竦型妹 謀財騙色，仲可能唔止一個....

等待受害的感覺很差，所以我決定主動出擊，見人就撩，見人就媾....



回到電台「團拜」，人多勢眾，好快我就成功拖住一件，佢仲死都唔放手，係咪好似我？佢原本戴鴨嘴帽，無戴眼鏡，根本就係少年谷德昭，加下都同我有兩分似，所以幅眼鏡好重要架！你最記得，最認得，還是我的「眼鏡」 ....

之後我請佢飲汽水，仲錫左佢一啖，咁應該應左「謀財騙色」咒喇掛！，但細心想仍然有點心虛，還是四出再找找受害的機遇....

我已經有十年沒有走進SOGO去，十多年前，我力追一個在那裡的女SALES，一個星期，至小有八次，每次十二個鐘，徘徊SOGO上下，左右，明暗，濕乾的每一處，等她收工，那時我曾經想過改名成為 『鄒崇光』，她叫April，「所以你入唔到「三越」做！？」我估到今日佢都未明我呢個笑話，但我仍然 蘇拋惡芙 呢個笑話，我認為是A GaG！她不懂笑，是因為她不是A Grade的人....

So.....Go~`

只此我就無再入崇光


今日再去到，行左一層就即刻想走，無謂破壞從前美好印象，但我被這個機械人吸引住！，究竟如果按佢身上的掣，佢會有咩反應，行為，我見佢下身向正我，仲係黑人，真係無勇氣試，大家有時間又夠膽上去試試，試完話我知係點，謝~`


.So.....Go...
在時代廣場外，我的頭突然撞到硬物，好痛！係會痛到講粗口果種，我雖然唔矮，但搞乜要吊d野離地六呎咁近，「吊乜Q野呀？！」 咪就係呢個燈迷羅，我就無估過，不過大家一齊玩玩丫，但係答案要去番 現場先有，不過我估大家實估到啦，高高高`~ 唔好浪費我個頭的犧牲，「真係好Q痛，啄得好應！」

之後...之後陽光全失去，後來還下起雨來，心情一百八十度轉變....




當陽光仍是燦爛時，盡情去享受，但陰天暴雨來臨，耐心去等侯下一個陽光爛燦的日子再臨~`

真功夫

罐頭撈飯，只不過係為左掩飾我煮野食好叻o既身份，今晚我終於忍唔住，出手喇！

好好食呀`~`

彥實Q牙 ~`

面對不安，首先要拆解到，不安感是否來自「無中生有」，例如 因多疑而小事化大，未開始就諗最壞結局，只承認有問題，但沒有去尋找解決方法，又或者明知前面是錯，卻不肯改道，強詞自己無路可揀...簡單黎講，「不安感」是來自一個字 「懶」

你多疑，因為你有太多空餘時間，所以只要你勤力找事幹，就不會不安
你肯勤加思考，你的結局就算不成功，也不會是最壞
承認自己的問題，就會有動力去找尋解決方法
人生小不免會走冤枉路，最重要是及早回頭，努力去尋找另一方向，但不代表另一方向就是對，講到尾，
還是要十倍勤力，不停試，不停學....如此忙碌過活，何來有時間不安！

但如果突然感到生理上不安，即是老人家常說 「心緒不靈」又應該如何面對，其實我認為最好方法就是「have sex」，咁我當然知並不是話要就有，咁咪改為去做運動，跑步又好，游水又好啦；咁如果係公司，一
般黎講，都好小有公司可以立刻得到「性」，如果有..記住介紹我入去做~`

係公司最佳對付不安感方法是
撘電梯到二樓， 然後行兩層樓梯落地下，走出室外，深呼吸，然後拿出手提電話，打給你最愛的人，至小一個，至多無限，廢吹幾句，講下死gag，知道對方安好，然後望錶，發現已經偷雞左好耐，立刻轉身撲番去座位繼續工作，如果仍然感到不安，過一會再試，應該還有一些你愛的人，你未打電話俾佢！ 高高高~`

切記在不安時飲酒、吸毒，它們只會把你的問題無限放大，建議閱讀 星雲大師 的 『迷悟之間』




『 應無所住 而生其心 』

符雨函牛慾犯

我深信呢種最簡單直接傳統o既整法，一定好食，上次失敗，是罐頭的問題，最佳選擇，都係「咸牛肉」








再加蛋，真係好彩，全間屋得番一隻蛋... yeah`





最好玩仲係 「搞」 ！



個賣相都無上次咁可怕啦！




其實都已經可以，但總係再加多「磚」野上去會更PERFECT！






結果如何？ 睇睇下面咪知羅`~







好好味哦~`

醒目地....溜廢

『妳記唔記得我係邊個？』

『大佬光丫麻~~我點會唔記得！』

『點解妳咁老都咁好記性架？！』

『唔老，我不知幾後生 ~`』

『妳老到自己幾多歲都唔記得喇！』

『我記得！八十六歲丫麻~~』

由於電視直播果場「賀歲杯」，港聯入波，我一時分神，沒有繼續接婆婆的話題下去，兩秒後，佢突然唏噓起來~`

『八十幾歲人，無用架喇，我仲識咩丫~`？』

嘩！我一聽見即時入後波，掟彎要度句說話出黎dum番佢，好可惜，我點快都只不過一架日本跑車，始終都係古董Ben跑利害！

『我無野識，淨係個人夠 醒目！』

『妳醒目？！妳溜廢到爆啦！』

『醒目去溜廢，溜溜廢廢咁醒目~~』

然後......

『喂！妳笑乜呀！？有冇咁開心呀？！妳食左咩呀？！有好野預d黎喎！』

等妳成年，就係等妳呢封利是，呢兩句，真係居家出外旁身必備`~

市花行..完

好凍！做完要做o既事，買完要買o既野，第一時間離開~` 不過咁樣托『桃花』走，其實都幾型！

竹你好運

看圖識字，再加最緊要的「身體健康」 高高高！




要留祝賀說話，俾d心思呀`~高高高！






打緊d打一場小一場o既麻雀，仲要輸緊，唔講住，唔係高高高，係追追追~~

一面唔夠用

我從來麻麻台灣女仔，可能在我成長當中，聽過看過大多人被台灣女仔弄得頭昏腦脹，家財盡去，到頭來都是兩手空空，換來一句「台灣妹真係功利！」o既人；八九十年代電影市道大熱，你面對台灣妹，只要說「我是香港電影人！」 對方就自然投懷送抱，我不是好人，但我對燈發誓，從來無羅過呢D著數，因為我尊重我O既工作，咁當然有時都會後悔自己咁正直啦，哈！

自此，所有台灣妹，我都只會遠觀而不會....當今世上，就只有舒淇，小S同范曉萱，令到我對台灣女子仲有興趣，但可幸地，我到現在同佢地都唔熟，否則可能我連呢三位都會怕埋....

唔怪得人，台前同台後如果同一個樣，點夠搵食！

S H E 由出道到現在，我都麻麻，因為我覺得佢地好「娘」，我覺得裡面果個ELLA好煩，好粗魯，到上次WILD DAY OUT，係後台見到佢地，又嘈又叫，毫無巨星風範，但跟住佢地出場，係台上面，原全係兩班人，回到後台，佢地又變番自己！

已經唔想再講藝人千祈唔好見到佢真身呢個題目，我只想講，係呢個世界搵食，無論你有幾自我，如果想搵到大眾O既錢，你總要有另一面親到民....放諸四海，做自己，真係好難搵到食！