4.23.2007

Pro



再重提一次,我最怕撘的士,個司機問我「應該點行?」,俾錢撘的士並不是大晒,但一個職業司機連行邊條路都唔識,咁唔尃業,仲要煩到個客,作為消費者,我絕對有權不滿,尤其是當我表示不滿時「?!你問我呀?!」 對方的回覆九成是「唔好意思,我替工黎!」 你都知你係替工,你要真係替到人工作先得架,唔識路仲黎做替工?!又或者「唔好意思,我對面海過黎,唔熟路」,咁點解你仲要接我生意,咩道理呀?! 唔好同我講「搵食~~」,搵食咪應該裝置好自己,毫無準備出黎搵食,就即係「呃食!」,奈何世上充斥著太多呃食扮搵食的人!

雖然講得好似好火,但每次對方問我「應該點行?」,最後我仍是死死氣回答,跟著又心心不忿,自責又一次姑息了他們,「下次我一定唔會咁答佢地」,但應該點對付,一直唔諗到,直至早幾日.....

我和一個男子乘撘的士,上車後,告之要往目的地,的士司機開始自言自語,「左轉出?...直去轉右出?」,見我們沒反應,對方索性停低架車,重覆再問「左轉出定應該直去轉右出呢?」,我當時已無名火起「又遇到呢d司機!」 此時司機竟然再重覆問題,我身旁的男子好淡然咁回答「你慢慢諗下先!」

嘩!我簡直覺得呢句係「絕」,就算下次個司機問我「應該點行?」,我都可以答「你慢慢諗下先」,諗唔到我咪落車羅!然後個司機終於有所決定 「轉左出啦....轉左出岩..」半答自己半問我們,我和男子再沒回答,過了一會,司機又開腔「係咪一直去.....唔好意思,我對面海車」,我們沒有回應,十秒後,司機又再問「直去岩呀呵?!我對面海車,唔多熟!」,我在旁的男子再開腔 「你打上台問下岩唔岩?」

嘩!出到呢句都好串了,司機沒有問上台,不語憑信念繼續駛向前,之後亦沒有再問路,我與男子對望,他向司機身後做了一個鬼臉,好不威風,一幅「唔俾d顏色你都唔知味」的神情,就再此時,司機再開腔

「林生,你個show真係好好笑,最衰隻碟唔係度,唔係俾你簽名」,我即時擰開面笑,只聽到有人輕輕的回應
「係呀!多謝~~」,到落車先敢再望番佢,佢當然不苟言笑啦,呢方面佢都好Pro,會番到屋企講俾老婆聽先 會笑。

不過雖然係咁好笑,我是百份百認同你個做方的!

18 comments:

櫻記士多*Ada* said...

灘灘:我能想像得到當時阿林生個樣同個司機個樣,真係名副其實(超低能勁搞笑)!

Anonymous said...

咁萬一你好趕時間,而個司機又真係玩野特登兜你路又行錯晒咁點呀? 我唔係林生又唔係彭小姐, 佢可能會同我鬧玩大佢架播~

Anonymous said...

一直有睇開你個blog,成日睇到大笑!!!
估唔到你今次篇野個主角係林公子!!!




照咁睇黎,佢真係幾寸下:)

3 (avis) said...

所以點解咁多年佢都仲係有咁多男男女女fans對佢不離不棄風雨不改日日聽佢做節目逢碟必買逢show必到(仲要四周撲飛)~ 佢響我既生活圈子入面, 係一個women's man, 又型又cool又好笑, 最緊要係, 對個老婆鬼死咁好, 我真係好愛林jan......

Anonymous said...

你哋有錢啫,出入搭的士。
咁多公共交通工具揀,全部都係指定路線嘅,司機實識路。
或者你哋唔好彩,成日遇到替工。
對人要求咁高,咪盞自己激心。

Anonymous said...

beach,

我又返黎la!
初初我估同車個位係滴奶, 點知係阿Jan,
我好覺得個語氣係滴奶個種。

Anyway, 香港仲有好多好gei的士司機~

仲有, 幾時俾我返黎做節目, 幫我問下Winnie.

Anonymous said...

超正的林生!!!

Anonymous said...

I LOVE JAN!

Unknown said...

Beach, 你好寸!
Jan, 你好很寸!

Anonymous said...

WAHHHH~~~ 吳君如 ar!!!! 好掛住你同 unkle beach 一齊做節目呀~~~~~ 真係掛死人啦!Beach, 快啲問Winnie啦!!

Anonymous said...

除左唔識路既的士司機,仲有好多識路架.
姑果果個地係方係你去開既,話比人知點去唔係咁難.如果佢知,佢都唔會問個客,佢都係想盡快帶你去你想去既地方先問你,行錯怕你話佢兜路,唔識路又比你話,我係佢我都揀問一問先.其實佢都要冒比人鬧既可能黎問,人地幾有勇氣呀^^我有理由相信係坐果個人既心情煩躁同要求高 ;p

unkle beach said...

to wendyh
就係因為有妳呢種諗法,呢個世界d人咪唔進取羅,我亦坐過不小專業司機,識路,細心,知客人要乜,咁唔通我要讚他嗎?呢個係必需架,況且,我係的士消費,絕對有資格有高要求!

unkle beach said...

to scarred v


對人要求咁高,咪盞自己激心。

講緊係基本要求都未達到,還要再降低來遷就嗎?!

Pessimist said...

與林公子嘅簡短相比,
以上詳盡回應亦不錯~
"to wendyh"
"to scarred v"

=)

Unknown said...

問你應該點行,都好過o係英國,我有一次搭的士,要去一個幾難搵o既地方。我問個司機識唔識點行 + 3次"are you sure?" 答番我3次Yes. 點知原來佢唔識行,死都答我識行。去到大概o係o個個area, 佢就求其話呢個地方就係我要去o既地方,just across the road from here, 叫我落車....... 我緊係唔落啦,我即刻叫佢去睇地圖,睇極都搵唔到,叫佢去call台,又問唔到.... 唯有落車啦?點之佢話要車返我去番我上車o既地方。o甘點呀?唯有落車.... 你o個個司機真係算係o甘啦。唔好o甘多要求喇。

Anonymous said...

oh,起初估會唔會係迪偉呢..當知係林九嗰陣我都忍唔住大笑..哈哈哈~

不過林九講法又真係啱架喎...如果係過海車就應該唔好再亂接客喇,我都明揾食難,不過宜家啲人要求高咗,的士司機都應該要識執生o既...

Anonymous said...

to beach
我好同意wendy既講法
好多野人生都有第一次 我認為唔識可以慢慢學 大家係咪可以多d包容 比個機會大家進步呢 講一講點行 絕對唔難 照上述的回應方法去回應個司機我認為是過份 站係消費者立場係大晒 旦係站係待人接物的立場 是大牌..
高要求係可以令社會進步 旦係若能夠住係一個包容,認讓的和諧社會 比起一個只有高質數服務而冷漠無情的社會, 前者令我感到更舒服。
peter

Anonymous said...

我又學到野~
不過唔係度度都啱駛~