1.24.2010

披星戴月



最忙的人,是扮忙的人,其次就是無事忙!我很忙,卻不是上面兩種,有聽過一小滴墨汁,就可以把一杯清水弄污的道理嗎?我的忙就是常常為了這一滴。

這個星期的168小時,本來隨著上星期日的「開心行山」之後開始,除了十七小時電台做節目,四十二小時睡覺,其他的一百零九小時,理應有一半用來度劇本,而另一半就用來吸收(睇書睇戲睇人睇事睇物),但星期一收到妹妹來電,求救要我幫佢為某明星寫篇二千字article作工作之用,家人就有這個好處,我根本無需要考慮就去做,因為家人有事,無得唔幫手!

作為寫作人,寫二千字其實是好個好濕碎的任務,但作為一個寫作人,寫二千字其實是個好Q艱難的任務,仲要大品牌大明星,再加上妹妹從來禍不及家人,拉到我落水,形勢一定好險峻,我一寫衰,就兄妹一齊衰,影響家聲,因此呢個星期,除了電台的十七小時,及三十小時睡覺時間外,其他的一百二十小時,我都全奉獻給這二千字

或者你上星期會係街上面見到我,然後懷疑我都唔係秒秒鐘坐係度寫,我當然沒有秒秒鐘都坐定定寫,如果可以坐定定,即是諗到點寫,咁我仲點會出街,但出到街無論食什麼,見什麼人,腦裡面仍諗著點寫,但越諗就越諗唔到,諗唔到就越要諗,二十四小時不停站纏擾著你,最忙就是這樣,明明是一件小事,但偏偏無法盡快完成,但時時分分秒秒都想著,然後心理生理錯晒,情緒差,出暗瘡,period亂晒,古靈鬼怪,無晒交帶...I hate it!

這不是藉口,但咁多年都未有新劇本,都是每次好怕面對果種心事有誰知的文字獄生活,古語有云「有仔襯嫩生,有字襯嫩寫!」,生仔同寫仔用的氣力其實係差不多,現在有開刀生仔,所以寫字應該係辛苦好多!

經過幾過百小時的折磨,終於交貨出獄,別以為回到現實世界就可以得重生,那一刻才是最痛苦難過的時侯,等待人家看過之後的回應,是比等死更難受,這個時侯多希望電話快響,又多怕電話響,如果呢個時侯收到cold call,就真係及時雨,可以俾我發洩一下內心的不安感!可惜cold call同情人一樣,你需要時是絕對不會出現!於是辛苦了幾隻龜仔,煩到佢地縮晒入殼都仲未停嘴,而這個時侯終於收到電話.....

「Thx~` They all like it!」

每次聽到對方收貨,我都會勁鬆一口氣,然後講句粗口「舒x服晒!」,但今次感覺好唔同,我講完粗口,然後釋懷地說了聲「好彩無辱到家聲!」

然後當任務真係完成,就會好想同愛的人食餐好,以前我梗係會約女,但現在我除了約女外,仲會約多條仔一齊食







什麼創作人,寫作人的生活就係咁痛苦,如果你都仲想做,首先唔係要問問自己有冇創作力同忍耐力,首先問問自己有冇愛的人,可以在最痛苦之後同你食餐好!

13 comments:

bone said...

"自己有冇愛的人,可以在最痛苦之後同你食餐好!" ←同意 ! 恭喜你!

身邊也有天使,會同我食呢餐飯! ^-^

Fion Mui said...

我都有試過呢種感覺....
做份proposal諗爆頭, 度左成個星期, 放工上網係咁搵料, 食飯諗, 搭車又諗, 連沖涼個時都諗(試過諗到唔記得自己落左shampoo未..XPP)...到交功課後就等老細既一句"無問題"...即時透個大氣 再同自己講句"辛苦晒".....跟住我會搵班老死或FD爆既同事去狂食一餐....呢種鬆一口氣既感覺係勁開心!!!

騷緋 said...

愛有好多種,梗一種在附近! 只耍用心看便找到!

Brian Hui said...

有創作力、又有忍耐力,但無執行力,咁點算?

Alexandra Ho said...

You are a good brother.



創作人,寫作人的生活 + 讀書人都是痛苦, 我發現心要靜, 才可以寫到好東西.

我喜歡, 因為痛苦後, 滿足感很大 , 用盡所有力量去完成 , 結果已經不重要, 因為當時的智慧已用盡... 明白明天可能還有進度空間已不重要, 當時已 The best.

結他手WL said...

灘叔, You really are a good man! You're definitely someone I can look up to ^^

龍兒 said...

我唔敢,因為我系個朝三暮四的人。

audreybrenda said...

你妹妹多麼的幸福,有你這樣好的哥哥,見你有這樣好的一家, 是令人多麼羨慕, 就算再辛苦對你而言都是直得!

perztc said...

Good to know you Love your parents and your sister so much. That is why I love you so much, Matt. Work hard... but rest too.

olgagagagaaaa said...

情緒差,出暗瘡,period亂晒,古靈鬼怪,無晒交帶... yesyesyesyesyesyes is me!!!!!!!!!! 醫生.. 點算呀 我有愛的人們, 但我要等到星期六日先可以同佢地聚埋食餐便飯炸 ;_;

wangelau said...

灘叔,精神上支持您呀!!!! ^w^

Anonymous said...

period 亂晒,手腳冰冷!

period 到的人 said...

超同感!超同感!超同感!超同感!超同感!