孤獨精的快樂周末

我問她「妳快樂嗎？」，她微笑回覆我，她的facebook title是「XXX Is Happy！」，已經日個多星期！然後她跟我說「你也應該去尋找快樂吧！不要那麼孤獨！」我只笑而沒有回覆，真相是我不想讓她知道我其實比她更快樂！因為我有一班一定令我快樂的專家！










跟她們出動是快樂的，但只可以久不久，否則對我這種儲半年先夠能量玩一次的中佬，跟他們出動，會變成要落場踢波一樣辛苦！但想不到有人比我年輕，比我健壯，但竟然比我更早收工



呢張相你未必察覺


但呢一張， 請留意最右手邊那一位哥仔，就是傳說中比我年輕，比我健壯的大好青年，你睇佢似乜？！


點解會搞成咁？！咪只不過係一杯香檳羅！飲完就開始暈，然後想乘機「逃」，可惜俾我〈夜店巡警〉機靈發現！一手拉住佢.....

點知一拉佢落梳化，佢就無起過身









無論最後你有醒過來，我都感謝你及一眾令我周末過得如此快樂的人！我會永遠懷念大家！




這個周末，你們讓我太快樂了！謝爆~`

我愛你不變

有一個晚上，我在MSN上送了黃耀明的新歌「同一個世界」給好朋友，還大力推介這是明哥回勇之作，但朋友竟然冷淡回應「哦！」，我深深不忿追問朋友「點解哦？！」 得到一個更冷酷的答案，「我不愛他已經有近十年，事實他現在仍停留在十年前！」我默言無語了一會，還是理直氣壯地向好友聲明「我！仍！然！愛！他！」，輪到好友窮不捨「你愛他什麼？」我毫不猶豫回覆他「我愛他到現在還是不啋我！」，好友回覆十個「哈！」然後說「我輸！」

有一個八十年代我愛到死的浪子填詞家，從前恃才傲物，待人極其無禮貌，但人當紅這些不敬會改稱為「有性格」，後來他由於太有性格，開始無詞填，但由於外表有型！於是他開始客串電影演出，有一次我做導演找他來客串，佢竟然晨早流流見到我，九十度鞠躬，聲調比酒店大堂門僮更誠懇地跟我說「早晨！」，抬頭仲送多個烚熟狗頭笑容，個一刻我想過換人，因為我無辦法見到從前所愛變到咁，比看到初戀情人變成C9更難過！

黃毓民仍然是電台主持的時侯，我原則上是不認識他，但或許他對我會有一點印象，在一個首影禮中，他從遠處「喂」我到來跟前，遞了一張二十圓紙幣給我「同我買兩樽水！」，「你當我乜x野，助手，工人，阿四？！」，我心裡不停重覆問他，同步就走去買兩樽水！我還記得他拿了水，「唔該」都無聲，眼都無望一眼，我差點想把手中的散銀掟爆他，但回心一想「黃毓民係咁x樣架啦！」
「麻不甩」在書展的第二日簽名會，黃毓民在我旁邊攤位嗌得聲嘶力竭，大力推銷他的新書「無所不容而有所不為」，他竟然拿著他的新書走到我面前，「賢弟！多多指教！」，然後把書珍而重之地送給我，還令工作人員為我們拍照，我裝出笑容的那一刻，比他叫我去買兩樽水時更難受！直到最近他的「掟蕉事件」，我才釋懷！「黃毓民梗係咁x樣至岩啦！」

我由「達明一派」就愛明哥，由小fans同同行，到有耳菲文介紹過，一直明哥見到我，都係唔啋我！二十年不變，坦白講，我好驚有日佢會突然同我打招呼或者點頭微笑！所以有時我遇到他，我會轉身運路走！防止結局發生！
我認識對公公婆婆，一起近六十年，公公對婆婆的「口頭禪」永遠都是「唔駛對佢咁好，佢都係鍾意我對佢差！」，每次婆婆都係垂低頭，但提高聲線說「係呀！千祈唔好變，突然對我好，我受唔起折福呀！」

「我愛你，是因為你不變！」

愛我的人放心，我是不會改變，我仍然是我！仍然是繼續會好咸濕的我！多謝各位！

豁達潮童

佢只係羅「花旗參」俾人，都D-square 格仔恤衫，A&F Vintage cargo cap，Wrangle 90'Stone Wash Jean，戴Bell & Ross vintage123全黑皮帶版，LamTwo 環保袋，著diadora d.lux Poule Cavallino，仲有幅Ray-Ban包皮九三年限量版..袋住係袋，落街至戴，佢由十八歲已經開始扮靚，宗旨係「做一日人，扮一日人靚！」，做人點可以無「造型」，錯都係一個造型！ 呢d咪叫態度羅！



送完貨佢就會閱讀，Paul Smith 眼鏡下，看到都是關於英倫的事情

「你球來球往講加拿斯單野啦！用國之將亡，必有妖孽做切入啦！」

問佢今次海嘯，我會唔會有事！佢肯定咁搖頭「一定無事！」 「點解咁肯定呢？」

佢話好簡單「你呢d人餓又餓唔死，彈又彈唔起，你怕乜？！」

你咁講，我什麼都怕啦！多謝晒！


祝有型與你常在，健康自在！

裁財才材

收到朋友W的短訊，「幾時約埋其他朋友出來「猜枚」？」，我看罷沒有立刻回覆他，反而第一時間打電話給其他朋友匯報，讓大家有時間想想對策！
我好怕「猜枚」，首先怕用腦，二來怕嘈又粗魯，而最主要我係怕輸，輸完仲要俾人串「唔夠班！」，我覺得除非我掘過對方祖墳，否則我點都唔應該受呢種「點錯相」o既侮辱！但你唔猜唔代表人唔逼你猜，為了逃避猜枚，我唯有四圍去識妹妹！「妹妹！係猜枚逼我！」但最近有種枚，你點避都避唔開，咪就係你猜開果種「財拳」海嘯版「裁員」囉！
「裁員呀！一定中，你定我... 又黎.. 裁！裁！一team人，四！四！四！六！六！六！炒晒去！又黎....三個月，七份糧，唔出住，四圍追，易走數！又黎.... 陸續會...執晒去！執晒去！ 飲！」

W四十歲未夠，已被人裁過兩次，正所謂二不離三，基本上在市道最好的時侯，佢都擔心會被炒，更何況現在的環境.....

「我呢d 無功又無過，裁就第一個！ 」

呢個時侯，與其去搵假說話安慰對方，倒不如實際地想辦法拯救朋友，一個人的力量有限，所以要朋友們總動員！我們集結了一筆錢，同W對賭，如果W被裁，W獨得全筆錢，如果W無事，筆錢我們可以收回！咁我們贏什麼？！現在環境唔駛蝕，已經有賺！
終於W不負所托，大熱無敵姿勢勝出，派彩那個晚上，W收到彩金後，第一時間請我們去飲酒，還計劃要去一個離開亞洲的旅程，更約好我們去血拼！
「ITS not the END of the WORLD！」

當然我們是知道那筆派金是W的救命錢，但至小他還會想過請我們飲酒，上網尋找過去歐洲的板圖，憧憬過一晚身處克羅地亞的橙色世界中，但由於當地現在的天氣很差，才打算了念頭；而我們也知道他一定會以今年的衫不靚作借口，因而一滴血都無拼出，但至少他有出現過，而不是每天躲在黑暗中，令恐懼無限放大！

「工可以暫時無，做人態度不可以無！」

活著生存只是做人頭盤，主菜是我們要真正享受人生，當中包括悲喜苦樂，但無論快樂或痛苦，我們的態度都不能變，不可以做「財叔」，被裁就縮，一退縮就更難翻身！

「裁員！久不久，四圍有，漆黑裡，唔駛驚，一齊捱... 又黎... 捱多次... 捱多次....三叉仔，七旋斬，開晒去，死唔去！陸續好... 發發發！一定掂！飲！

娜！妳好野！

我一直以為，親眼看過她之後，這個由十六歲就開始欣賞的人，應該再難給予我驚喜！佢同GuY RICHIE分開，我一點也不驚訝！佢要俾贍養費阿GuY，我更不驚訝！但睇到呢篇佢列俾阿GuY，佢個仔到倫敦探望阿GuY時的「規條」，我驚訝她今時今日仍然有這樣的創意，呢篇「規條」根本就是想出來玩阿GuY，你玩得起就可以見個仔！絕！
如果劉生可以駕馭到娜姐呢種女人，我就真心佩服你！

有殺有賠

俾你可以殺死一個人，你會殺死邊個？但條件是要同步救一個人，你會點選擇？

我會揀殺死鄒凱光，同步救番鄒凱灘!

美好假日

秋風、陽光、球賽、餐旦麵、焦急球迷、Miss Football、拍檔、球迷、Rocky、海南雞眅、有耳非文、假日司機......感謝令我可以快樂迎接新一個星期，新的挑戰！

又三年....

據說現在三年就是一個 Generation，但我這輩老餅，三年時間可能大部份都是過了之後才察覺！時間過得很快，有時回看才知道自己及身邊的人已有不小改變，又或者，幾年過後，我們驀然發現，我們還是我們，已經不會有大變！


前輩常說「人大定了，就不會有太大變化，三五年也是同一個模樣！」

大時代口號是「改變」，但我們卻絲毫沒變，是諷刺，還是我們太落伍？

其實如果一切安好，又有誰想來過重大「改變」？願大家都可以千載不變，就算容貌變，心態變，身份變，位置變，角色變...只要你跟某些人依然不變，那就已經心滿意足！

外面的世界很精彩

外面好好天氣，食晏就算帶左飯，快d食完落街兜過圈，我包你叫「醒神」！
高高高~`

我就先飲為敬，keep住個Mood等你地來！


諗咁多做咩丫，陽光，秋風，食物，酒精會話你知個答案架喇！記住唔好困住自己，走出去睇睇，四圍滿佈希望！

血拼前夕

好想「血拼」這句話其實係家下時勢唔應該講，但我認為做人更加唔應該講是「假話」，我係想「血拼」！怕咩認~`但到現在仍然未行動，原因當然係等SALE！我知已經有店鋪開始有private sale，不過只要你聽過佢講解一次之後，你會無晒心機去拼...

「買一件七折，兩件六折，五件以上半價，如果總數超過一萬，就可以四折，買夠二萬有三千圓現金禮卷，用現金禮卷買滿七千，可以獲得七折，買滿五件再半價，總數後過一萬再八折，買滿八千又送一千現金禮卷.....」

你聽完覺得去「血拼」比看赤川次郎的推理小說更費精力，所以我終於都未出動！但相信不出十日內，再覆雜的遊戲規則都難不到我，因為再唔去拼，我驚會爆血管！今日我就忍住你先！係網上搵住d野買頂住先！

上面把遮唔算靚，但唔知點解覺得有一日要送禮物俾DR.HO，我覺得送呢四把遮俾佢，簡直絕！





Martyr 是一個功能很簡單的即插型小壁燈





我會把佢個頭轉做第個顏色，不過一定唔會係紅色，太似「地主牌」



可以有地擺放呢個鐘，証明擁有到好大個空間，無論是自己屋企，公司都好，有日可以把它放出來，証明你已經「大左！」不過最有可能唔係地方「大左」，而係「飲大左」！否則買咁大個鐘來做乜！

泠靜，血拼前夕，最易出錯，忍手！ 共勉之呀！各位~`

Seen

SEE~ SAW ~SEEN.`



陳健鋒好靚仔 鄭融好鬼矮
阿Ann讚我呢張相影得好呀！好明顯係玩我啦！DEE佢丫！無聊與有意義只是一線之差！而大部份有意義的事，都是無聊人去做，Ann Choi就是其中一個！ DeeU~`

易叻唇

LADY first
女人聽見必跳制的說話
「妳好煩！」

無論對方真係有幾煩，都唔可以話佢煩，一講你有排煩！

「妳肥左呀？」

不要以為用其他說法如 「妳好似渾圓左喎... 」、「呢排心情好飽滿左... 」、「妳件衫縮水呀？」、「不如一齊去做運動羅？」... 就可以無事，點講對方都會癲左咁反問你「我肥左呀？！」，到時仲難答！女人點會唔知自己肥左丫，基本上女人一生都覺得自己處於肥的態度。

「妳病呀？」
問中無獎，但隨時對方只不過是無化妝，咁你就神槍手射魚絲，斷到正一正！如果真係覺得佢病，買藥買粥買問侯咭去照料佢，唔行動齋問，咪俾對方鬧死「你隻死人眼見唔到我病到面青口唇白咩？！仲要問！？」

「阿xx點會好似妳咁！」

無論xx是EX，是人家女友，朋友... 總之一比較，而對方是差的那方，你講之前就要CALL定黑箱車，因為你講完就會即死！

「妳仲蠢過XX！」
同好的比較而變差已經難受，同差的比而變成差上差，簡直是頂級侮辱，講之前唔駛CALL定黑箱車，因為一定死無全屍

仲有冇，放上來研究投下票

到男人，什麼說話一聽見就癲

「你好冇用呀？！咁都唔識！」
單對單講，還可以頂得住，如果在大庭廣眾下，或當住親朋友戚友面前咁講，同大聲話佢「佢陽具好細架！」的傷害性差不多！


「你會同我結婚嗎？」
會就一早同妳講左啦，但又唔可以直接答「梗係唔會！」又要諗點答，又怕承諾，亂講又驚妳變雷曼苦主，「煩！煩！煩！」

「你有野可唔可以講出黎！」
講到就講左啦！已經唔開心，仲要重覆講多次唔開心d野，就係為左俾妳知，但妳又多解決唔到！不如妳靜靜地陪係身邊支持我好過啦！

「人地xx就會好似你咁！」
呢句說話是男女平等的，總之一比較而輸，就涉及尊嚴受損，人就一定會失措！

「我同xx跌落水，你救邊個先？」

無論xx是親人，朋友，球隊，寵物，遊戲槭..... 心裡面都一定係唔會救妳先，因為妳問呢條咁煩問題，已經撻著對方，仲點會講大話（tum）妳開心！

仲有冇，放上來研究投下票

沒什麼

一條諗爆腦的IQ題，大家幫幫手

「你當我是什麼？」

不是關楚耀首歌，係一條問題，男男女女，老老幼幼，久不久就會有人問，問最多可能係情人，仲通常係反問

「拿我的袋過來」
「你當我是什麼？！工人呀！」

當你興之所致，要求對方配合你比較大膽的嘗試！
「你當我是什麼？！妓女呀！？」

又或者你發現，某人每次找你都只為性，有天你總會問
「你當我是什麼？！妓女呀！？妓女都有錢收！！我是白做的！」

有天你發現對方見你的原因，是為佢買衫，去玩，睇戲等等消費時結賬，你總會問
「你當我是什麼？！提款咭定信用咭？！」

當你心情不好，向情人，親人，朋友發脾氣，對方忍無可忍下就會說
「你當我是什麼？！出氣袋！」

朋友叫八歲個女去睡，但女兒毫不理會
「妳立刻上床去睡！」
「你當我是什麼，你公司的手下...」
女兒經常聽見父親講電話，命令手下工作 「你立刻同我做好去！」「你立刻張個FILE給我！」

但我認為以上都不是最難，最難的是你一直以為佢唔介意是什麼，但竟然有天無緣無故問起你
「其實你當我是什麼？！」

為什麼我們要被「關係」、「位置」、「角色」控制，相處開心之道，就是我們什麼也不是，我沒當你是什麼，我也不是你什麼，不要問為什麼，無求什麼，無愁什麼，我們有沒失去什麼，就是擁有什麼！

至少還有我....

我們手牽手，緊握不放，一定可以攜手渡過難關！頂住呀！打令們``

頂到請講頂到，頂唔到請留言抒發一下，有需要就email給我，幫到我實幫！高``

新的開始

新的開始，新的希望！一定撐得住~` ！



祝福你快樂，再不知可多講些什麼 `~